حطة الصينية

[زرقاء اليم]

مساء الخير ،أردت أن أطرح هذا الموضوع للنقاش،و قد سبق و أن أشارت الأخت أم دودة اليه في موضوعها حول الضيوف،لكن لم يتم النقاش حول ما يقدم للضيف
من عادتنا عند تقديم شئ للضيف، أن نحضر ما سيتم صبه من مشروب و معه الكؤوس في صينية،او القهوة و الحليب أو الشاي في ترامس و يتم صب المطلوب أمام الضيف,لكن لاحظت مِؤخرا ان العديد من النساء يحضرن العصير مصبوب واجد في الصينية وحتى مؤخرا القهوة بالحليب مصبوبة واجدة،اصدقكم القول هذا لم يرقني،وليست مسألة اني أعاف لكن رأيت ذلك غير مقبول،فما رأيكن؟ و كيف تقدمن أنتن المشروبات؟

[it's me]

عندك الحق حبيبتي انا ثاني مانحبش كي نشوف هاذ اللقطة ههه
كيما انا نحب نكبر بضيافي و نستقبلهم مليح انا ثاني نحي نلقل نفس الشي نظاف و و كلش

[samira 1993]

لالا حببتي حنايا نجيبو كلش في الصينية وقدامهم نفرغولهم سوا قهوة و لاعصير ..
جديدة هادي تاع جيبولي القهوة مفرغة في الفجان شكون لي يضمنلهم بلي نشرب قهوة بالحليب هههههههههههههههه

[زرقاء اليم]

والله هذا ما جعلني افتح الموضوع
علما انني لا أريد أن ندخل في متاهات الجهوية،لكن هذه اللقطة رأٍيتها مرارا حيث أعيش،على عكس عادات مسقط رأسي (الشرق)، طبعا دون تحديد المدن تفاديا للحساسيات
وما جعلني أتكلم هو أنها تكررت معي مرارا حتى ظننت أنها عادة جديدة،مرة في قهوة ختان،ومرة في قهوة نجاح ،و مرة اخرى في زيارة نافس ومؤخرا في زيارة مريض

[حياة نور الدين]

السلام عليكن والله العادات الجديدة هبلتنا احنا احطوا كلشي قدام الضيف ونشاوروه باش نفرغوا قهوة او عصير لكن في المناسبات الكبيرة وكي تكون في الدار نسربوا صينية فيها قهوة كحلة واخرى بالحليب و في الصالات كل واحد يفرغ روحوا هههههههههه

[malak achark]

والله عندك حق تجيبلك كلش مصبوب ماتدري واش مخلط معاه ههههههههههههههههههههه

[*أمنيآت لآمتنآهية*]

أم،في الحق كاين لي شفتهم يدييرو هاك صح،بالصح احنا لالا،نحطو السنيوة وكل واحدة نسقسوها واش تشرب ونسربولها،أنا مانبغيش ذيك العادة لخاطر نموت على القهوة سخونة امالي مانظمنش تلحق لفمي سخونة كي يكونوا حاطينها في الفناجين
بالصح في المناسبات الكبيرة وكي يكونو النسا كامل مجتمعات نجيبو الصينية مسربيين فيها خاطر مانقدوش نسربو بلي تارمو وكل وحدة وتخير واش تشرب
موضوع شباب صح،وخلينا في العادات لي يخرجو علينا انا هذي كي يديروها كامل الناس مانعاندهمش خاطر مانبغيهاش
صحيتي أختي بارك الله فيك

[chahrazedberrichi]

شكرا اختى على الطرح بالنسبة لي هده للنساء الخايبات انا نشرب قهوة وحدها وكي يحطولي لي فيها الحليب نهرب من الطابلة وزيد ما عنديش كونفينس ههههههههههههههههههه رانى نضحك كي يكبوها من التارموس بسم الله ونشرب

[زرقاء اليم]

شكرا أخواتي على التفاعل مع الموضوع
و الله أنا تاني حيرتني هذه العادات الدخيلة علينا
وكما قالت الأخت يمكن ان نرى هذه العادة و تكون مقبولة في اعراس لبيت
و ما اثار استغرابي ان المكلفة بالتسربية كانت تحسب من تشرب قهوة كحلة و من تشرب قهوة حليب ومن تشرب شاي برفع الأصابع،وكأنها نادل في مقهى ثم أخذت الطلبية و ذهبت لتجهيزها في المطبخ ،و عند احضار المشاريب لم تضع السكر لأنه برأيها عادة اذا أكل البعض الحلوى لا يرغبون في تسكير القهوة،ثم مرت علينا بالسكرية و كل واحد يأحذ القطع و يضعها في فنجانه، والله شربت حشمة برك ترهجت فيها
قد يظن البعض أنني أتمشرك لكن و الله والو،هناك عادات جميلة ترفع من قدر صاحب البيت و الضيف ،نتمنى ألا تزول،و أرجو أن يفيد الموضوع المقبلات على الزواج

[حلم جميل]

مليحة هاذي تاع يرفعو صبعهم هههه
كون انا منشربش خلاص
حنا القهوة تجي مصبوبة غير فالوفاة
عادة مش مليحة
تبانلي تحطي من قدر الضيف كي تجيبي الحاجة مصبوبة

[ميرة34]

عندك الحق حبيبتي انا ثاني مانحبش كي نشوف هاذ اللقطة ههه
كيما انا نحب نكبر بضيافي و نستقبلهم مليح انا ثاني نحي نلقل نفس الشي نظاف و و كلش

عندك الحق اختي بصح في منطقتنا كاين لي يديرها سورتو في لعراس تحياتي

[oum adam]

السلام عليكم احنا مازالنا نجيبو صينية تاع لاتاي و الاخرى تاع الاقامة و تجي امرءة كبيرة تاع لوقر تعمر لاتاي قدامنا يعني طيبه وحنى نشوفو والاقامة تاع لاتاي توصل حتى 6ملاين لازم هاد الشي و كل واحد على حساب طاقتو بصح لازم لاتاي يتعمر قدامنا

[نيفرتيتي.]

ياخواتي واش راح نقلكم كاين ناس عرفهم على قدهم مايروحو مايشوفو على هاذيك يسربو بالطريقة هادي وكاين اللي ماعندوش شكون يوقفلو في عرسو مثلا عرس طفلة واحدة عند والداها شكون راح يوقفلها بالبرستيج
وبالنسبة للسكر احنا عندنا يتحط في بابي قلاصي ويتسربى وحده وكاين اللي تسكر اللي تسربي وتاع انه الانسان يروح مايعجبوش الحظ ياكل ولا مايكلش وكاين اللي ينقص الباروك هادي ترجع للناس اللي راكي رايحة ليهم اذا كانو زواولة ويتامى حتى اذا جابولي القهوة مسكرة وحطو طعام برك نزهى ونشطح ونمد الباروك المخير ونروح
اما حبيت نصقصي على العفسة تاع انك تحطي الباطا تاع الجي الطاس تاع الجي والكيسان في الصينية وقدام الضيف تصبي الباطا تاع الجي في الطاس وبعد تزيدي تصبي في الكيسان واش رايكم
انا نحب نصقصي باه ماتضحكش عليا الناس

[Lili Rose]

مساء الخير ،أردت أن أطرح هذا الموضوع للنقاش،و قد سبق و أن أشارت الأخت أم دودة اليه في موضوعها حول الضيوف،لكن لم يتم النقاش حول ما يقدم للضيف
من عادتنا عند تقديم شئ للضيف، أن نحضر ما سيتم صبه من مشروب و معه الكؤوس في صينية،او القهوة و الحليب أو الشاي في ترامس و يتم صب المطلوب أمام الضيف,لكن لاحظت مِؤخرا ان العديد من النساء يحضرن العصير مصبوب واجد في الصينية وحتى مؤخرا القهوة بالحليب مصبوبة واجدة،اصدقكم القول هذا لم يرقني،وليست مسألة اني أعاف لكن رأيت ذلك غير مقبول،فما رأيكن؟ و كيف تقدمن أنتن المشروبات؟

موضوع رائع يعطيك الصحة وعندك ألحق حتى أنا لا أحب وضع القهوة والعصير ونديلهم, هنا عندنا حتى فالأعراس كل طاولة عندها ترموس تعها
والأواني تع ضياف دائماً أحب غسلهم مرة أخرى قبل ما نحطلهم مع أنهم مغسولين ونضاف مي نقول On sait jamais
كلش يعدي غير تبهديلة لا :sdf:

[Lili Rose]

بصح يا أختي الناس عقليات مختلفة و كما قالت الاخت أم دودة كاين الناس زواولة بزاف ولا ميخالطوش ميعرفوش

[زرقاء اليم]

و الله لو كانوا زواولة ما تكلمت و زيد تلقايهم على قدهم لكن كلش يديروه بالساس
لكن هؤلاء من طبقة راقية جدا و من عائلة عريقة(يعني ناس بلاد)
أم دودة لم يكن عرسا لو كان كذلك نورمال تعدي لكن هذي عشوية و كاين اللي واقف

[نيفرتيتي.]

و الله لو كانوا زواولة ما تكلمت و زيد تلقايهم على قدهم لكن كلش يديروه بالساس
لكن هؤلاء من طبقة راقية جدا و من عائلة عريقة(يعني ناس بلاد)
أم دودة لم يكن عرسا لو كان كذلك نورمال تعدي لكن هذي عشوية و كاين اللي واقف
والله واش راح نقلك كاين ناس زواولة ويديرو الشان خير من اللي بخير عليهم
كاين اللي يحوسو يلمو الباروك برك وماهمهمش الناس كلت ولالا
ساعات واحد يقلك انا رحت لفلانة مديتلها 100 الف باروك وهي رجعتلي 50الف بصح شوفي هي واش حطتلك وانت واش حطيتيلي
كيما حكيت للاخوات مرة رحت نبارك لوحدة اديتلها 100 الف باروك نفاس وبلاد بعيدة على بلادي العشية كان حاكم في راسي حليب واش خسرت عليا جي بالقاطو تاع بيمو في ديسمبر والباقي ماكان لاه نحكو
وكاين اللي في عرس تحطلك عشا قارس والله حطت طعام قارس مايتكلش ومشو هامها المهم الباروك يقلك العار اطول من العمار

[فـرح]

يا اختي انا لازم ندي كلش في ابريق
باه اولا يبقى المشروب سخون سواء حليب و قهوة وزيد باه واحد ما يشك فيا كاش ما حطيتلو في المشروب ههههههه
وهذا من الاداب
في سوريا سمعت يقولو كي يجبو القهورة للضيوف يحط صاحب البيت ليه هو الاول القهوة ويشرب منها هو الاول ومن بعد يحط للضيوف باش الضيف يشرب وبالو مرتاح
يا اختي انا باه يجيبلولي السينية وكلش مصبوب ما نشربش نقوللهم شبعانة والا صايمة

[زرقاء اليم]

يا اختي انا لازم ندي كلش في ابريق
باه اولا يبقى المشروب سخون سواء حليب و قهوة وزيد باه واحد ما يشك فيا كاش ما حطيتلو في المشروب ههههههه
وهذا من الاداب
في سوريا سمعت يقولو كي يجبو القهورة للضيوف يحط صاحب البيت ليه هو الاول القهوة ويشرب منها هو الاول ومن بعد يحط للضيوف باش الضيف يشرب وبالو مرتاح
يا اختي انا باه يجيبلولي السينية وكلش مصبوب ما نشربش نقوللهم شبعانة والا صايمة




كلام صواب و أهل قسنطينة معروفون بالحطة و الساس

[chahrazedberrichi]

احنا تانى ناس الغرب ما نبغوش التبهديلة كل حاجة نديرولها القيمة

[سوسو الطموحة]

انا اختي برايجية من الشرق.....هذه العفسة ما صراتش مازال ما شفتهاش صح شفتها في لعراس نسربيو لحليب وبلاطونسربيو فيه القهوة ونحطو مايدة وسني في الوسط اللي حبت تزيد السكر اوالقهوة ...هذا في عرس اما قهو عادية وين يكون عبادها مايفوتوش 40هكذاك ندير كل سارفيس وحدو في مايدة ونخلو كل مرا تقوم بمايدة تضيف لعباد اللي دايرين بيها من كلش وقاطو الاولاد وحدو ونشريو لهم لاكريم وحدهم باه الضيفة تكون متهنية على ولدها ماكل شارب وضحكة نضحكوها واخرى نوجدو فيها حتى لو واعرين .....لانه جاونا لدارنا نقومو بواجبهم باكمل ومثل ما تقول حمتي اللي يجيني ماخافش مني بل احترمني ودارلي ....واللي كانت صايمة تدي حقها معاها.....الواجب واجب....

[ام سارة 285]

قال رسول الله صلى الله عليه وسلم " من كان يؤمن بالله و اليوم الاخر فليكرم ضيفه "
واش نقولك اختي
كرم الضيافة من الاصول و تربينا عليه من الصغر و في الجزائر كل واحد كيفاه ماشي اللي في الشرق كرماء و اللي في الغرب بخلاء او العكس انا نقول كل واحد علاش تربى ... نلقاوهم جيران وواحد و اخر بخيل و راني نلاحظ ضرك هذي القيم بدات تروح ,,,, ممكن في المناطق الريفية مازالو محافضين عليها
ربي يهدينا و يهدي الجميع

[zomord]

والله موضوع في الصميم...ومليح كي نتبادلو الاراء....انا عني في منطقتي...نجيبو السنيوة تاع القهوة ونسربو قدام الناس...حتى في عرس تاع 150مرة نحطو مايدة كبيرة في الوسط ونحطو فوقها السني تاع القهوة و نسربو قدام الناس و نعطولهم....بصح اخواتي حابة نسقسيكم...انا سمعت بلي كي ايكونو عندك الضياف....عيب نحطلهم القهوة في تارموس...لازم طقم كامل تاع قهوة( service à café
كاين منها هاد الحكاية ولا والو...و سؤال واحداخر و كي نحط السنيوة تاع القهوة ونسربي....انا تجيني ثقيلة كي نمد بالفنجان...نسربي كامل و نفوت عليهم بالسنيوة...بصح تجيني ثاني ثقيلة باش نعاود نخرج تارموس تاع القهوة وتاع الحليب والسكرية ونخلي غير الفناجين باش نسربيهم...امالا اخواتي واش ندير...بالاحرى واش ديرو انتم....امليح كثير باش الواحدة تتعلم اتيكيت الضيافة خاطر كين حوايج صغار بصح والله غير الضحك الكبير عليهم...صح صيامكم اخواتي و ماتنساوش تردو عليا.

[بسمةbb]

يا مولات الموضوع راهو كاين فرق مابين يجيوك زوز ولا تلاتة من الناس للدار مش كيما في طهور ولا حفلة لي فيها ناس بزاف
ماعليهش اسيديجات عالقهوة ????????? القهوة هام يحطولك في termosse و يصبو قدامك و jus يجيبولك cartoné يا سيدي و درك دالت الرفيسس كيفماه يديرولك باه يرضيوك يجيبوا الدلوة ولا الشكوة باه يسربيولك اللبن ,,,,,,,,,,,,,,,,ربي يهدينااااااااااااااااااااااااا