غسالة ملابس

[صاحبة السمو الفكري]

السلام عليكم ورحمة الله وبركاته
حياكم الله اخواتي
اريد شراء غسالة ملابس فأشيروا علي بماركة جيدة وفي رايكم شحال نشريها من كيلو؟
مع العلم ملابسي وملابس زوجي وابنتي فقط

[ايمان2009]

Lg مليحة بزاااااف و اشريها اكثر من 7 كلغ تلقايها حتى لغسيل الافرشة والزور تغسل كلش و ماتقولش وجعني راسي

[RISA]

انا ننصح ب سامسونغ جديدة تع 8 كيلو كيما تيعنا تتباع ب 5 ملايين وحاجة تغسل روعة وتشلل وتحدد الاقمشة حتى الافرشة تغسلهوم مليح

[kheira07]

Lg 610 عندي 5 سنين ونا نخدم بيها ومزال كما راهي وما اديتهاش حتى مره للخدام

[بنت الطيب]

غسالتي arthur martin كانت عندها أمي وما زالت للىن وتاعي تاني عمرها 10 سنوات ومازالت والحمد لله فقط لو لقيتي اللي تهز اكثر من 5 كيلو حتى تساعدك في غسيل الأفرشة الكبيرة يكون أحسن

[أم ياسين الزهراء]

سامسونغ تاع 7 كيلو شريتها مليحة بزاف وزيد حنونة عيلتك راح تكبر وتصلح لغسيل الفراش ومليحة بزاف

[صاحبة السمو الفكري]

باااااااااااااارك الله فيكم جميييعا

[dahby83]

لو تحطو لنا الصورة يكون احسن لتكتمل المعلومة وشكرا

[ميرثا]

نصحك بالاتوماتيكية
arthure martin
الاحسن على الاطلاق لانو جربنا من قبل ومش ملاح هدي بصراحة روعة
واذا تحبي نصورلك نتعنا مكانش مشكل
:)
وهدي البضبط كاين انواع

[صاحبة السمو الفكري]

بارك الله فيك ميرثا
كي تفرغي حطيلي صورتها لاني شفت واحدة في النت وماعلاباليش الا نفس للي عندكم

[فـــرح]

انا ننصح ب سامسونغ جديدة تع 8 كيلو كيما تيعنا تتباع ب 5 ملايين وحاجة تغسل روعة وتشلل وتحدد الاقمشة حتى الافرشة تغسلهوم مليح


انا أملك واحدة حقاا رائعة وسعرها في حدود 5ملايين
انا شريتها ب 5 ملايين ونصف

[مزاجها من تسنيم]

شكىرا لكم جميعا

[بسمـة أمل]

ننصحك ب lg مليحة
خصوصا تع 7 كغ باش اديري فيها الفراش

[ninaricci]

انا راني نخمم نشري براند شكروها بزاف و سعرها مليح 6 كغ ب 3 ملاين ومئتين مع العلم عندي كوندور 12 كغ منذ 5 سنوات بلاستيك هايلة لحد الان لكن تعبتني من حيث الخدمة اما هذو كوندور نتاع الحديد ما شكروهمش ما فهمتش علاه:dj_17:

[ninaricci]

انا اغلب الاتي كوندور والحمد لله هايلين لافسال و فريجيدار و اسبيراتور و ماشين الافي بلاستيك راني ندوخ كيما مايشكروش في كوندور ممكن يحبو يبقالهم طول العمر مع العلم ان العمر الافتراضي للالة هو 5 سنوات مهما كانت نوعيتها

[بناتي نور العين]

افضل بدن منازع lg

اخطيك من كوندور و ايريس ( عندي ايريس )

موفق

[لجين وفاء]

اختي نيناريسي واش رايك في لاففيسال تاع كوندور راهي تغسلك الماعن مليح؟ وواش هوما عيوبها تعيشي

[ninaricci]

مرحبا اختي لجين وفاء للامانة لافيسال كوندور هايلة قليلة عليها ياختى انا كيما شريتها زهر كنت شايطة بين الخدمة والدار و مع زوج بنات ربي يحفظهم قررت نشري لافيسال لقيت كل النوعيات غالية ارخص وحدو تبدا 4800000 دج الا كوندور لقيتها 3900000 دج يعني مليون ناقص اضحكي عليا شوىة في هذي عجبني المبلغ نتاعها قررت نشريها و قلت اذا ماصلحتش نحسب روحي شريت كبش وكليتو ههه وكي شريتها صاحب المحل قالي راهم ملاح ولكن ماعليهمش اقبال من الناس يحوسو غير علي الغالي قالي راني جبت غير 2 وحدة ديتها لداري و وحدة اذا تديها نخليهالك ب3600000 دج تخيلي فرحت مت و جبتها وراهي عندي عندها مدة تغسل هايلة تنحي الهم ياختي اذا بغيتي تشريها على ضمانتي

[لجين وفاء]

اه ياختي لعزيزة الله ينورك رديتي عليا تاني هنا ؟ربي يسترك انشاء الله انا لقاها راجلي في لاميزون كوندور 43000 الرمادي راهم زادو والبيضة ب40000 والكحلة 42000 .بروند ماهيش بعيدة عليها بزاف راهي ب50000 يعني لو تخيري بيناتهم وايناها الي نشريها مدام راهم صحاباتك عندهم اكيد عندك خبرة.ربي يخليك اختي

[ninaricci]

حبيبتي لجين وفاء صرالك كيفي مع اللول كي حبيت نشري احترت في كوندور ولا براند كيما راني ضرك محتارة في ماشين الافي براند ولا كوندور حبيبتي كيما قتلك كوندور راني مجربتها مليحة و ليمارك الاخرين تاني ملاح براند راهي عند صحبتي شكرتها هايلة وديري في بالك بلي حتي براند راهي صناعة جزايرية حكمها ربراب رييس مجمع سفيتال في 2014 ما بقاتش براند فرنسية

[ninaricci]

اختي لجين وفاء اذا راكي مرتاحة ماديا الله يباركلك وعندك لاديفيرونس نتاع مليون ماهيش حاجة اشري براند راهي في النت مشكورة بزاف وزيد عن تجربة نتاع صحبتي عندها عامين منين شراتها عجبتها ماصرالها والوا وانا تاني كوندور مريحتني و ما صرالها والوا ربي يباركلي فيها فحلوتة تناعي

[ninaricci]

اختي كيما رانا في زوز محتارين بين براند و كوندور انا في لاف لانج وانتي في لافيسال انا نقولك قوليلي واش قررتي لامارك انا تاني نروح نشريها

[لجين وفاء]

انشاء الله اختي نهار نقرر نقلك.ههههه راني سامطة مانجي نشري حاجة بالسيف.وقوليلي على العجان بومان يعجنلك الكسرة تاع السميد ولا غير الفرينة تعيشي قليلي

[ninaricci]

اختي لجين وفاء عجانة بومان 1200 واط الكبيرة تهز 3كغ سميد انا نعجن فيها كلش هايلة نعجن كسرة خميرة و شخشوخة و كلش طبعا نتاع السميد انا ما نفوتش فيها 2 كغ سميد مع زيد يتبل راه يزيد الثقل نتاعو :19:

[ninaricci]

لجين وفاء كوني سامطة في كلش غير هاذ الالات اللي يسهلولك حياتك وينحيو عليك الهم خاصة اذا كنتي خدامة ما تستخسريش في روحك خلاص هذه الامور وزيد ضرك كلش راهو متوفر ولله تجربيهم تقولي واش بيا كنت نقتل في روحي من قبل

[لجين وفاء]

اه يا اختي واش نقلك راني رحت نشري لقيتهم طالعين في السما سامسونغ الطايحة ب8ملاين بروند الطايحة 7 لقيت اريستون 12كوفار ب6.5ملاين وطومسون
15كوفار ب5.5 ملاين كنت رايخة نشريها وخفت.كوندور ب5ملايين 12كوفار .حبست قلت نخمم مليح ونقرر.

[ninaricci]

لجين وفاء اشري كوندور البيضاء 12 كوفار كيما نتاعي راهي مليحة وسعرها معقول راني قتلك بلي ماكانش فرق صدقيني صحاباتي كل عندهم و كامل دي مارك مختلفين لكن كامل عندهم نفس الكفاءة من الجي الى كوندور و ستار لايت شوفي اللي تساعدك ماديا و اشريها راهم كامل ملاح الحاجة اي كانت تحب الاستحفاظ برك

[ninaricci]

لجين وفاء ما تشريش من لاميزون راهم غاليين على المحلات حوسي في عقلك في المحلات حتي تلقاي السعر الي يناسبك حنا عندنا كوندور في لاميزون 4900000دج و في المحلات ب4300000 حتي 4500000دج ولا استناي في نوفمبر راهم يديرو تخفيضات في براند راني شفتهم العام اللي فات و هذا العام

[ninaricci]

انا مافهمتش اصلا اريستون اغلي من براند كيفاه لقيتيها رخيسة صحبتي عندها اريستون شراتها 6.5 مليون اما تومسون ما نعرفهاش حبيبتي ما تستعجليش شوفي في عقلك اصلا لاففيسال راهي من الكماليات كملي شمخي لماعن وغسليهم وبشوية حتي ديريها ما تقلقيش روحك بيها بزاف

[لجين وفاء]

وقوليلي اريستون تاع صاحبتك قداه نكوفار ومليحة؟وزيد هيه اختي لقيتها ب6.5 ملايين اما بروند والله النار شاعلة قلتلك الطايحة 7.6ملاين ماشي 7برك حرت تعرفي كنت معولة عليهم بصح كيما قلتي رحت ليميزون كانو كاملين قدام بعضاهم بروند وكوندور وسامسونغ واريستون لقيتها عند حانوت نورمال هي وطومسون.ربي يجيب الخير خلي لعطلة تاع لولاد ونروح للعلمة ونشوف عندك الحق لميزون راهم يشويو

[ninaricci]

اختي لجين وفاء اريستون نتاع صحبتي والله ما نعرف قداه نكوفار بصح تبانلي الكبيرة يعني 14 كوفار انا شفتها لونها رمادي رائعة جدا عندها عام منين شراتها تغسل روعة و تعرفي راهم مايكتبوش في لاففيسال عدد لي كوفار من غير اذا شفتي في الكتيب نتاعها تصدقي راني كلمتها وسقسيتها قداه نكوفار والله ضحكت و قاتلي والله ما علابالي كي شريتها قطعولي ولاتي كامل اوراقها وانا ما هتميتش بيهم كي ركبتها و مشات خلاص ما خميت حتى في حاجة ومن ناحية مليحة راهي تشكر فيها و تعاود و راني قتلك كامل راهم كيفكيف كي الطونوبيلات كل يوصلوا غير كاين نوعيات مختلفة على حسب درجة الرفاهية نتاع الشخص

[ninaricci]

وزىدي شوفي في العلمة راهم يقولوا الحالة رخيسة عندهم اي وحدة ساعداتك اشريها راهم كامل كيفكيف ولكن انا من وجهة نضري نفضل نشري من المكان اللى راني عايشة فيه هكذا اذا صرا مشكل لا قدر الله تقدري ترجعي للحانوت فاسيلمو وزيد انا رحت للعلمة نذكر مرتين و لقيت الاسعار كيفكيف تبانلي دات الشيهة هكذاك الحاجة المليحة فيها انو كل شىء متوفر كل النوعيات نتاع كلش تقدري تخيري في كلش برك ماشى كيما عندنا سعات تلقاى النوعية اللى تحبيها وسعات ما تلقايش