شكون فيكم تعرف دير بقلاوة

[sarasrour]

السلام عليكم من فضلكم الي تعرف دير مليح بقلاوة تقولهالي من الالف الى الياء انتظر الرد اريد الي تعرف الي تعرف مليح تكتبلي اني نسنا ربي يفتحها في وجوهكم ويعطيكم ما تتمناو امين

[الواثقة بالله 23]

السلام عليكم اختي

رح نعطيك طريقتي المعتمدة

العجينة : 4 كيلات فرينة "لابال " و كيلة زبدة ذايبة و باردة " انا نستخدم فلوريال"فاني و تلمي بماء زهر مذوبة فيه قرصة ملح صغيرة

بعد ما تتكون عندك عجينة اقسميها الى 4 قرصات و حطيها في كيس بلاستيكي و دخليها الثلاجة ترتاح لساعات " انا نخليها تبات في الثلاجة"

الحشوة : 3 كيلات مكسرات " تحبي تعملي 2 لوز ووحدة جوز او 3 لوز او 3 كاوكاو انت حرة"

معاهم اقل من نص كيلة سكر عادي و هذا مهم جدااااااااااا لانك لو حطيتي كيلة كاملة سكر رح تجيك يابسة و عاقدة و تتعلك و متخافيش على الحلاوة لانها رح تتعسل مليح"

شوية قرفة و اذا استعملت الكاوكاو حطي ملعقة اكل زبدة طرية باه متجيش الحشوة يابسة

و لمي بماء الزهر

و كي تلمي متلبزيش بيدك يعني خلطي الحشوة متل ما نعملو الكسكسي باه متوليش الحشوة عندك مثل العجينة لاسقة في بعضاها

ملاحضة اذا استعملت الجوز انا منرحيهوش بالروبو او الالة تاع رحي الخضار

نقسمو قطع صغيرة باستعمال السكين

ممكن تحطي في الحشوة قليل من عطر الجوز او البندق

طريقة التحضير : رشي طاولة العمل بالنشاء او الفرينة حلي العجينة بالقراص قصي شرائط احكمي كل شريط عقبيه على الة ترقيق العجين " المشينة تاع البقلاوة " على رقم 5 ثم على رقم 7 و هكذا كل حتى تكملي

حلي نص العجينة اولا و النص لاخر احتفظي بيه مخطي " و حتى الشرائط لي حليتيهم حاولي تغطيهم باه مييبسوش المهم

الصينية مدهونة مليييييح بالزبدة و مرشوشة بالفرينة حطي الشرائط واحد ورا واحد هدي الطبقة الاولى الطبقة الثانية تخالفي يعني اذا حطيتي الشرائط بالطول المرة التانية تحطيهم بالعرض

و هكذا حتى تعملي 6 طبقات و بين كل طبقة و طبقة تدهني بالزبدة الذايبة

ثم تحطي الحشو كامل و تزيذي تحلي العجينة المتبقية بنفس الطريقة و تعملي 4 طبقات و كالعادة تخالفي و بين كل طبقة و طبقة تدهني بالزبدة لاكن الطبقة الاخيرة يعني وجه الصينية ادهنيه بالسمن باه تجي تلمع

قصيها معينات اذا تحبي الحبات كل متساوين استعملي المسطرة ارشقي حبة لوز في كل حبة او حبة قرنفل

في الصينية تاع كيلو انا نستخدم تقريبا كيلو فرينة "تقسميه على ربعة كيلات و تعملي كيلة بالزبدة الذايبة

و رطل جوز و كيلو لوز ناقص منو شوية مش كامل ممكن تستخمي 750 غ نفصي منو حفنة ترشقي بيها حبات البقلاوة باه تجي عالية

دخليها فرن مسبق التسخين على نار هادئة رح تاخد شوية وقت

كي تلاحظي انو الجوانب بداو شوية يحمارو طفي من التحت و شعلي علاها شوية من الفوق

كي تخرج من الفرن غرقيها في العسل يعني صبي علاها العسل " مفيه حتى اضافات" يعني غطيها بالعسل و من المستحسن تستعملي نوعية رفيعة لانو مهم جدا في نجاح البقلاوة انصحك باعسل المرجان

خلاها ليلة كاملة تشرب العسل ملييييييح و تحكم روحا باه قصيها و اذا قدرتو تصبرو اكثر خلاها اكثر باه تحكم روحا

نتمنى تنجحلك و بصحتكم

اللهم صل و سلم على سيدنا محمد

[natacabell]

okht sisi26 ana personellement ajbatni ou laki el ikhtiyar hanouna ال سلام عليكم
لمقادير العجينة : كيلو فرينة + 200 غ مارغرين التوريق + قرصة ملح + حبة بيض + الماء الدافئ
مقادير الحشو : كيلو كوكاو مرحي + 300 غ سكر عادي + شوية قرفة + ماء الزهر
التحضير
طري المارغرين بيدك ما تذوبيهاش طريها برك ضفيها للفرينة و بسي بيدك مليح ضيفي قرصة ملح ثم البيضة و خلطي مليح ثم ضيفي الماء الدافئ حتى تولي عجينة شوية طرية
http://nsa22.casimages.com/img/2012/05/06/mini_120506120659964365.jpg (http://www.casimages.com/img.php?i=120506120659964365.jpg)
رشي عليها المايزينة هكذا
http://nsa22.casimages.com/img/2012/05/06/mini_120506120756149222.jpg (http://www.casimages.com/img.php?i=120506120756149222.jpg)
اقسميها إلى 14 كرية و رشي عليها المايزينة
http://nsa22.casimages.com/img/2012/05/06/mini_120506120909987346.jpg (http://www.casimages.com/img.php?i=120506120909987346.jpg)
خليها ترتاح 45 دقيقة
رشي المايزينة و حلي الكرية الأولى
http://nsa22.casimages.com/img/2012/05/06/mini_120506121106106045.jpg (http://www.casimages.com/img.php?i=120506121106106045.jpg)
رشي عليها المايزينة كثري باش متلصقش
http://nsa22.casimages.com/img/2012/05/06/mini_120506121159161458.jpg (http://www.casimages.com/img.php?i=120506121159161458.jpg)
حلي الكرية الثانية و حطيها فوق الأولى و رشي عليها المايزينة وأعيدي الكرة مع خمس كريات المتبقيةأي مجموع الطبقات هو 7 في كل مرة حلي الكرية و ضعي فوق الأخرى مع رش المايزينة
http://nsa21.casimages.com/img/2012/05/06/mini_120506121425919384.jpg (http://www.casimages.com/img.php?i=120506121425919384.jpg)
حليهم و هم فوق بعضهم بالحلال حتى تولي قيسها يفوق قيس صينية الفرن
كرري نفس العملية مع السبع كريات الأخرى أي نحل كل سبعة مع بعض
انزعي الطبقة الأولى و حاولي أنك ترقيها بيدك و ضعيها في صينية الفور المدهونة بمارغرين التوريق الذائبة أو السمن
http://nsa22.casimages.com/img/2012/05/06/mini_120506123155136517.jpg (http://www.casimages.com/img.php?i=120506123155136517.jpg)
ثم ادهني الطبقة ثم ضعي الطبقة الثانية و ادهني ثم انزعي الطبقة الثالثة و ضعيها في الصينية ثم ادهنيها و هكذا حتى تنهي 7 طبقات الطبقة السابعة لا تدهن
حضري الحشو بخلط الكوكاو و السكر جيدا ثم اضافة شوية قرفة ثم اضافة قليل من ماء الزهر حتى يولي كي تدي شوية في يدك و تغلقي عليه يتلمد ثم كي تضربيه بيدك يتفتت ثم ثم أي لا يعجن
ضعي الحشو فوق الطبقات ثم مرري الحلال من فوق الحشو حتى يلتصق بالعجينة جيدا ثم اثقبي بالسكين الحشو ثم ادهني جيدا أي كثري بالمارغرين أوالسمن
خذي طبقة و حطيها فوق الحشو و ادهني و هكذا حتى تكملي 7 طبقات الطبقة ما قبل الأخيرة ترش بمارغرين التوريق لا تدهن و الطبقة الأخيرة لا تدهن حتى تقطع
ننزع الحواشي بالسكين باش ما طيبش خضرة
نتركها ترتاح 10 دقائق ثم نقطعها
http://nsa21.casimages.com/img/2012/05/06/mini_120506124146353845.jpg (http://www.casimages.com/img.php?i=120506124146353845.jpg)
http://nsa22.casimages.com/img/2012/05/06/mini_120506124247438353.jpg (http://www.casimages.com/img.php?i=120506124247438353.jpg)
بعد رشق الكوكاو أو اللوز تدهن و تدخل إلى فرن درجته 320 درجة مسخن مسبقا جيدا
كي نخرجها نسقيها بعسيلة المرجان جيدا
و هذا شكلها
http://nsa21.casimages.com/img/2012/05/06/mini_120506124332650783.jpg (http://www.casimages.com/img.php?i=120506124332650783.jpg)
http://nsa21.casimages.com/img/2012/05/06/mini_120506124620425369.jpg (http://www.casimages.com/img.php?i=120506124620425369.jpg)
إذا أردتم الاحتفاظ بها لمدة شهر لا تسقوها بالعسيلة خزنوها ناشفة و كي تحبو تاكلوها سخنو بالحبات ثم اسقوها بعسيلة سخونة هذه نصيحة الأستاذ
أرجو أن تجربوها لأنها لا تأخذ الوقت مثل الماشينة هي سهلة جدا





l

[لينا11]

هده طريقتي وبالصور طبعا

http://www.djelfa.info/vb/showthread.php?t=938264