كل وحدة تتفضل تكتب نصيحة في الطبخ

[Basketteuse]

السلام عليكم . شفت هذه الفكرة في احد المنتديات حبيت ننقلها لمنتدانا الغالي ونستنفعوا الكل
طبعا الطبخ له مباديء اساسية للمبتدئين هي جبال من الأسرار . لكن في حقيقتها ممكن تكون خطوات بسيطة جداً وبما انوا إحنا هنا باه نتعلموا ونعلموا .. ممكن كل وحدة فينا تكتب نصيحة او خطوة بسيطة لتعلم الطبخ



بما انوا انا من طرح الموضوع راح نبدأ بالنصيحة الاولى

الحب.. الحب .. الحب ..طبعا حب المطبخ هي القاعدة الاولى لتعلم الطبخ واتقانه

[Basketteuse]

ياجماعة وينهم مشاركاااتكم ، اعتقدت ان النصائح ستتهاطل على الصفحة ، لكن!!!!!!!!!!!

[Basketteuse]

معناها انا راح اضيف نصيحة
كمية الملح المضافة تلعب دورا هاما في إظهار ذوق مكونات الاكلة . لذلك انتبهن ايتها الطباخات المبتدئات . يجب تذوق الاكل وتعديله قبل انهاء الطبخة يعني لما نحط الأكلة على الطاولة تكووون مضبوطة 10/10

[أنا أمهم]

أول نصيحة : لا تخافي من الفشل, (حتى أكبر شيف يخطئ هههههه) و تغاضي عن انتقاد الآخرين لك.

2- حضري كل المكونات قدامك قبل بداية الطبخ

3- كل ما كانت المكونات طازجة أكثرو جديدة يكون الأكل أحلى

هذا اللي تفكرته, و لي عودة إن شاء الله.

[هبه خير]

اذا جاك الاكل مالح ضيفي حبة بطاطا فسوف تمتص الملح الزائد

[catia]

انا نصيحتي لكل اخت تريد ان تكون مرقتها بنينة لازم اتقليها امليح يعني قبل ما تلوح الماء اتقلي باكبر وقت ممكن وكي اتلوح الماء ايكون على فترات وليس دفعة واحدة

[أم ياسين الزهراء]

نصيحتي للعندها عجانة لازم كيتكمل العجين خاصة المطلوع ماتقرصهاش ثم ثم لازم تخليها تترتاح على خاطر تكون سخونة

[أم ياسين الزهراء]

وشربة الفريك لازم نمرقوها بالماء السخون

وكينتفكر عفايس راح نقلكم وبارك الله في الاخت اللي دارت الموضوع وشكرا لكل المشاركات راح نستفادو بزاف

[Basketteuse]

شكراااا لكم كامل ، نصائحكم فعلا مفيييدة، لي راح يدخل الصفحة راح يستفاد

[mamatou]

اما انا نقول كي تحطي الطبخة فوق النار اوقفي معاها وخاصة اذا كان عندك ضيوف واخري المسلسل والفيلم حتى تطفي عليها

[Basketteuse]

نزيد نقول: لي دارت صوص توماط وجاءتها حامضة تحط شوي سكر يعدل الحموضة
المقرون نغلبها دائماً في ماء غزير و مملح على حسب كمية الماء ، لكي يكون قوامها وطعمها مضبوطين

[imane khaled]

نصيحة لنجاح الخبز قبل ما تعجنيه إجمعي المكونات بالماء الدافئ و خليها تخمر و ترتاح ثم إعجنيها و شكليها

[sisi 26]

أنا نصيحتي ما تغليش الزيتون انقعيه ليلة كاملة قبل ما طيبيه

[هبه خير]

عند سلق الخضر الجذور مثل البطاطا نستعمل الماء البارد والخضر ثمار مثلاللوبيا يكون الماء سخون

[بنت مسلمة]

نصيحة استاذة في الطبخ لمحطة قسنطينة

المطلوع او خبز الدار او اي عجينة فيها خميرة و تحتاج ان نصيف لها الماء شيئا فشيئا

نضيف الخميرة في الاخير لان الماء كما قالت " يقتل الخميرة " اي يفسد لها الطلوع

[Basketteuse]

أدا ما حبتش الحبوب تطيب ممكن تضيفولها شوي سكر او بيكاربونات

[هبه خير]

في تحضير الحلويات الخميرة الكيميائية هي اخر شئ

[Basketteuse]

تفادي الطحين في تخثير الصوص ، استعملي صفار بيضة مع عصير ليمون في المرق الابيض في الاخير بعد اطفاء النار مباشرة وخلطي بسرعة
نديرها مع مرقة الجلبانة و البروكلوا والبطاطا مع اضافة المعدنوس للخليط ... تعطيها ذوق و قوام رائعين

[Basketteuse]

وييين ركام يا الشاطرااااات أفيدوني بنصائحكم!!

[Basketteuse]

اذا جاك الاكل مالح ضيفي حبة بطاطا فسوف تمتص الملح الزائد

شكرًا اختي على النصيحة ، وممكن أيضاً تضيفوا قطعة خبز لمدة 10 د . انا ديما نستعملها وناجحة معايا
لكن ماااااااااااااتحركوش باه ما يتفتتش ;)

[almoslima]

إذا أردت طبخ الحبوب جيدا ضعيها تغلي في الماء مع ملعقتين من الزيت من غير ملح و عندما تقرب تنضج أضيفي الصلصة التي طبختها سالفا ليكملوا النضج معا

[MERIEM SETIF-2-]

السلام عليكم أخواتي و الله مانيش فور فور لكن نسلك راسي و نصيحتي هي :
*تنظيم الوقت والأشياء ،فالمطبخ يحتوي على الكثير من الأشياء ولازم تكون كل حاجة في مكانها حتى ما نضيعش الوقت في التحواس .
*لما نجي ندير مرقة تحتوي على الخضر ما نكثرش الماء في التمراق لأن الخضر لا تمتص الماء كثيرا.
*قبل ما نغلي الأرز نقليه قبل في شوية زبدة و من بعد نكب الماء "3 كيلات ماء ب 1 كيلة أرز " .
هذا واش تفكرت كاش ما نزيد نتفكر راني نقولكم. و شكرا للأخت الفاضلة علىالموضوع

[Basketteuse]

السلام عليكم أخواتي و الله مانيش فور فور لكن نسلك راسي و نصيحتي هي :
*تنظيم الوقت والأشياء ،فالمطبخ يحتوي على الكثير من الأشياء ولازم تكون كل حاجة في مكانها حتى ما نضيعش الوقت في التحواس .
*لما نجي ندير مرقة تحتوي على الخضر ما نكثرش الماء في التمراق لأن الخضر لا تمتص الماء كثيرا.
*قبل ما نغلي الأرز نقليه قبل في شوية زبدة و من بعد نكب الماء "3 كيلات ماء ب 1 كيلة أرز " .
هذا واش تفكرت كاش ما نزيد نتفكر راني نقولكم. و شكرا للأخت الفاضلة علىالموضوع

شكرًا على نصائحك المفيدة اختي .. في انتظار جدييييدك:mh92:

[hanaa zahra]

من المعروف ان تقطيع البصل يتسبب في حرقان للعينان وهطول للدموع ولتفادي ذلك عليك بوضع البصل في اناء به ماء مضاف اليه كمية من الملح.ثم قطعيه كما شئت.ستلاحظين الفرق.:mh92:

[صريحة]

شربة الفريك باش اجيك عاقدة لازم تنقعي الفريك 15د او اكثر في الماء السخون
والمعجنات باه ما تتعجنش لازم ما تخليهاش تنشف وخصوصا كي تكوني حطفيلها النار لازم تكون فيها الماء

[صريحة]

الي تعرف ادير البغرير تمدلي نصيحة جربت كامل الوصفات مي ايجيني شوية معجن وعلااااااااااااااااااااااه

[ميس منة]

[COLOR="Red"]السلا عليكم انا نصائحي هي
قول باسم الله قبل البدا والله امر مهم
امرقي دوما بماء ساخن احسن من البارد
االبيذنجان باه مايرفدش الزيت عقبيه في بياض البيض واقليه في زيت ساخن على نار قوية قلبيه ثمثم
[/المطلوع قد مايكون جاري يجي خفيف مع اضافة الماء بالشوي برك
COLOاللحم والسمك يفضل تتبيلهم بيوم من قبل لطعم الذ
المسمن او النعمة او لفطير او الشخشوخة او عجينة لمحاجب بليها بليلة قبل مع اضافة كمية فرينة للسميد لنتيجة جيدة زلعجين سهل
اتمنى ان اكون قد افتكم قليلاR]

[ام ايمان1]

شكرا على النصاءح من تعرف ادا نقدر نشوي الطماطم نحطها الكونجلاتو باش نستعملها في الحميص رانى نحب نفهم لكان صحية

[ناصرة]

لي حبة طبخها يجيي بنين تكثر الثوم

[Basketteuse]

شكرا على النصاءح من تعرف ادا نقدر نشوي الطماطم نحطها الكونجلاتو باش نستعملها في الحميص رانى نحب نفهم لكان صحية

والله ما علابالي.. بصح انا نخدم الحميص ومانضيفلوش زيت زيتون ونكونجليه وكي نحب نجبد نحط يسخن ونضيف الزيت

[mamarine]

نصيحتي تتمثل في النظافة.أولا بجب تغطية الثعر عند الدخول للمطبخ و غسل اليدين بالصابون كأننا نتوضأ للصلاة.فالنظافة من الايمان والوسخ من الثيطان.

['' أمة الرحمن '']

عند شواء أو قلي شرائح اللحم لا تقلبيها حتى ينضج الوجه الاخر كي لاتجف و تبقى طرية

[Basketteuse]

شكرًا على النصائح القيمة

[Basketteuse]

عند غسل الخضر خاصة السلطة تفادي وضع الجافيل . بما انه مادة كيميائية فانه يضر الجسم
ضعي قطرات من الخل فانه احسن مطهر للخضر

[taha70]

سلام عليكم الطبخ فن لكن الاجمل لما يكون المطبخ جمييييييييييييييييل ومملوء بلاكسسورات فهذا يجعلنا نتعلم ونبدع اكثر و نتفنن في التقديم العين تاالكل قبل الفم اختكم في الله

[الأمنيات]

حتى يجيك لحم الدجاج بنين ويطيب بسرعة اتركيه لعدة ساعات في الخلطة تاعه حتى يتشربها مليح وضعي عصير الليمون فيه
والله يجي اروع ما يكون عن تجربة

[meryam02]

و انا نقلكوم لحبت تلاع بياض البيض الى ثلج دير شوي ملح وتلعوا
و اشكروكم على كل النصائح

[princesse_kheira]

لا تظني ان كثرة التوابل تزيد من طعم الطبخة كل طبخة ولها احتيا جتها و توابلها الخاصة فلا تفقدي الطبخة طعمها الاصلي و عودي زوجك و الولادك على الطعم المعتدل ولا تكثري من الملح والسكر و الزيوت لانها ضارة بالصحة علمي اولادك مشاركة الاخرين اكلهم لكي يتعلموا مشاركة الحياة عند الكبر

[Basketteuse]

نصيحتي بالنسبة للمواد المخزنة في الثلاجة لازم تكون محفوظة في علب وبالنسبة للفواكه كالبطيخ مثلا بعد فتحها تغلف ب ورق غذائي papier filmً للحد من عملية التأكسد ومنع اختلاط الروائح

[Basketteuse]

لا تظني ان كثرة التوابل تزيد من طعم الطبخة كل طبخة ولها احتيا جتها و توابلها الخاصة فلا تفقدي الطبخة طعمها الاصلي و عودي زوجك و الولادك على الطعم المعتدل ولا تكثري من الملح والسكر و الزيوت لانها ضارة بالصحة علمي اولادك مشاركة الاخرين اكلهم لكي يتعلموا مشاركة الحياة عند الكبر

شكرًا نصائحك عجبتني بزاااف .. :19:

[Basketteuse]

لا تقلي البوراك أبدا على نار هادئة ... لانه يمتص الكثييير من الزيت فتتحصلين على بوراك ثقيل ومترهل!

[❀عنْفُوَاפּ طُمُوحْ❀]

للاسف ليس لي نصائح و لكن اردت تجديد الموضوع للمشاهدة و وضع نصائح جديدة

[Basketteuse]

للاسف ليس لي نصائح و لكن اردت تجديد الموضوع للمشاهدة و وضع نصائح جديدة

بارك الله فيك اختي على المساهمة الفعالة:dj_17:

[زائرة]

كيتلقاي المرقة مدسمة هزي قطعة خبز وفوتيها من لفوق باش متتفرتتش

وتاني مرقة الفريك قبل ما تطيبيها ضيفيلها اعواد من الكسبر اعقديهم ولوحيهم راح يضيفو بنة هايلة

[mamia]

حبيت نشكركم كامل على النصائح تاعكم ................................ كلها في القمة ونحتاجوها يوميا في طيابنا

انا معنديش نصائح راني نتعلم منكم


شكرا مرة اخرى

[Basketteuse]

نصيحتي بالنسبة لغسل الخضر يكون قبل تقشيرها . لمنع تسرب الميكروبات اليها ... وكذلك اضافة قطرات من الخل لتطهيرها احسن واامن من الجافيل

[moslihe29]

انانصيحتى اذا احترقت لك قطع الحلوى مثل الصابلى والكروكى خذى السيار وحكيها على جهة الشباك راح يروح السواد وتحصلى على حلوة كانها لم تحترق

[houaria031]

ادا مطابتلكش البقوليات مثل الفاصولياء اضيفي قليل من البيكاربونات

[Basketteuse]

لا تستعملن ورق الالمنيوم (القصدير) في الطبخ وخاصة لا تجعلنه يلمس الاطعمة لانه خطير جداً على صحتنا .. واكتفي من الشرح لان اسمه دال على ماهيته

[it's me]

اذا حبيتي يجيك القاطو خفيف و هش و الطورطات كذلك ضربي البيض ملييييييح مع قرصة ملح حتى يرجع كي المايوناز..عن تجربة
حطي قطعة فحم في الثلاجة تمنع انتشار الروائح الغير مرغوب فيها و كي نزيد نتفكر نرجعلكم
شكرا لصاحبة الموضوع

[maramelmess]

pour la pate de pizza
matlemihache bezaf w mata3ginihache kheliha molle diriha fi un sachet w khliha
ki tgi ha tefthiha diri la farine


pour dolma ana ki nahfer la pomme de terre et les courgettes
je les fait saute a l huile bech nehchihom w ki tmerki ma tmerkiche bezaf


la sauce rouge diel le couscous bech tgik bnina
erhi une pomme de terre et une carrote avec les oignon
w armi kemcha sgira diel l foule l mdechech

[عطوفة]

الملح يضاف الاخير عند تحضير المخبوزات وخاصة في البغرير . حتى لايقتل مفعول الخميرة ..

[sahlelzhar]

السلام عليكن لدي مجموعة من النصائح أرجو أن تفيدكم :
- بالنسبة للسردين من الأحسن أن يبات ليلة كاملة في الدرسة داخل الثلاجة
- بالنسبة للقرانطيطة يجب أن يكون الفرن ساخن جيدا وعند إفراغ الخليط داخل الصينية ندخله مباشرة في الفرن لكي لا تنزل للأسفل

[Basketteuse]

:19::19:شكرًا على المعلومات المفيدة .أكيد ان كل من ستتطلع على الموضوع ستستفيد فعلا..

[Basketteuse]

من المعلومات المهمة ان الكرنب الاخضر لا يأكل نيئا لان به مادة يعتقد انها مسرطنة .. لذلك يفضل طهوه

[maramelmess]

الي تعرف ادير البغرير تمدلي نصيحة جربت كامل الوصفات مي ايجيني شوية معجن وعلااااااااااااااااااااااه

زيديلو حبة بيض قبل ما تطيبيه و شوية خميرة كيميائية

[وصال7]

سلام نصيحتى قيمة بالنسبة للمطلوع اللتى ينجحلها واللتى لا ينجح كى تكملى الدليك خليها ترتاح 20دقيقة ثم اقرصيها بلا ماتخرجى منها الهواء جربوها وردولى
وبالنسبة للاكل بنين متكثروش الماء

الكرنطيطا انا نضيفلها كاس الحليب فى الاخير

[Basketteuse]

كي لا تحترق الزبدةعند وضعها على النار ضعي قليل من الزيت

[Basketteuse]

ضعي قطعة خبز على الطعام المحترق (اذالحقتي عليه ) لكي تمتص رائحة الاحتراق

[قاتلة الصهاينة]

متطيبيش ديما نفس الحوايج
حاولي كل مرة تجربي حوايج جديدة وخلي اطفالك يساعدوك في الطبخ

[omrahim5]

السلام عليم أخواتي
-- لطولت المرقة نتاعها مخثرتش وهي مزروبة حلي شوية فريينة في شويا ماء وضفيها للمرقة تخثار ليه ليه.
-- ولا قدر الله اذا تحرقتلك الطنجرة ولا لاكوكوت أغسلسها بالسنيال و قطعة صبون حجرة ورايح تشوفي قمة اللمعان. وهذي الطريقة تقدري تغسلي بيها الاواني لقدمتلك وصفارت رايح تولي تلمع . جربي و تشوفي أختاه.

[Basketteuse]

انصحكم باستعمال لوحين تقطيع بدلا من واحد
واحد للخضر والاخر للحم ....بلونين مختلفين
لوح التقطيع الخاص باللحم يستحسن ان يكون بلاستيكي لان البلاستيك ذو مسامات رقيقة يقلل تسرب البكتيريا للوح نفسه .. مع تنضيفه دائماً بالخل

[imenealg]

للاسف ليس لي نصائح و لكن اردت تجديد الموضوع للمشاهدة و وضع نصائح جديدة

[Basketteuse]

عند الطهي بزيت الزيتون، يجب ألا يصل الزيت إلى حد إطلاق الدخان، فذلك يفسد النكهة العطرية لزيت الزيتون.

[nokia111]

اقدم لكن نصيحتي التالية ادا كان عندك وقت فراغ عجني خبز بالفرينة وكي طيب خليه يبرد وديريه في الاكياس دخليه الكونجلاتار نهار لي متلقايش الخبز صبيه ولا نهار لي تبحرلك في العشاو لا تكوني خارجة توجديه على اساس خبيزات معمرين لا بغات ديري فيهم الباتي والبيض والطماطم وجيوك بنان

[حياتي نبع امل]

ادا استعملت الليمون فى اى طبخة تفاداي وضع ورق الالمنيوم لانه راح يتاكسد

[Basketteuse]

لاختبار خميرة الحلويات :يمكن إضافة قليل منه إلى الماء ، فاذا أحدث فوراناً فإنه يكون صالحا اما اذا لم يحدث هذا التفاعل فهذا دليل على انتهاء صلاحيته.

[Basketteuse]

لاختبار خميرة الحلويات :يمكن إضافة قليل منه إلى الماء ، فاذا أحدث فوراناً فإنه يكون صالحا اما اذا لم يحدث هذا التفاعل فهذا دليل على انتهاء صلاحيته.

[yasmine f]

شكرا اختي عن النصاائح و بارك الله فيك و في جميع المشتركين في هذا المنتدى

[Basketteuse]

العفو اختي بارك الله فيك

[jackin]

بارك الله فيك

[Basketteuse]

فيك البركة اختي . نورتي الصفحة بمرورك

[milia87]

زيديلو حبة بيض قبل ما تطيبيه و شوية خميرة كيميائية
عند الحق اختي انا دايمن نديرو هاكا ويجي خفيف
عندي برك نصيحة صغيرة عند عمل الفريك او اي نوع مرق قبل ما تطفي عليه حطيلو قرن فلفل حار بصح تولهي يكون متقوب باش ما يجيكش حار.راح يطلق فالمرقة نسمة هايلة.

[panpouna]

يمكن اضافة ملعقة صغيرة سكر كي تولي رايحة تمرقي لشطيطحة و مثوم و الجلبانة و طاجين الزيتون يعطيهم بنة هايلة و صلصة الطماطم تاني

[Basketteuse]

انا نستعمل دائماً صفار بيضة مخلوط مع عصير ليمون ومعدنوس مقطع في المراقي البيضاء . اضيفها في الاخير باه تخثار وتعطيها ذوق ولون رائعين

[Basketteuse]

اضافة القليل من السكر في الكسرة يخليها تطيب بسرعة وبالتالي تجي اخف
في وصفة التيراميسو استعملي الكريمة الطازجة الحامضة بدل المسكربون تعطيك نتيجة مرضية

[الامل نور]

حقا موضوع مفيد و رايحين نستفادوا كامل منه
نصيحتي هو انك كي طيبي ما دريش النار قاوية خليها طيب على مهلها مام اذا كانت اللحم رايح تجيك بنينة كذلك ما تكتريش الماء وعسيها
بالتوفيق

[هنا محلو]

انا نصيحتي في التحضير للقاطو بعد ماتحطي المقادير وقبل ماتحطي الخميرة حطي شويا فرينة وحطي فوقها الخميرة الي راح ديريها للقاطو خاطش كون تحطي الخميرة ديراكت يتشقق القاطو وشكرا

[Basketteuse]

شكرًا فعلا معلومات مهمة ..!

[ghelem]

السلام عليكم يااخوات انا عندى نصيحة وهي لما تطيبي الشوربة او الحريرة (الفريك) طبيها في القدر احسن من الكوكوط ملاحظة صغيرة اطياب القدر ياخد الوقت اكثر من الكوكوط وجربوها و ردولي الخبر

[Basketteuse]

شكرًا اختي . فعلا تجي ابن انا والفت ماما تطيبهافي قدر الطين ... بقيت بنفس الطريقة وبربي انشالله مانغيرهاش الا لضيف الغفلة!!

[عروبتي]

موضوع رائع والنصائح اروع وجد مفيدة
شكرا لكم جميعا لي عودة ان شاء الله

[oum mehdi]

اخواتي الزيتون الاخضر بيتيه ليله كامله في ماء به فرينه حتي ينتزع الملح الزائد

[meriem06]

لما ديري الحبوب مثل العدس واللوبيا ما دريلهاش الملح حتى طيب لانه ايبسها

[إلهام07]

أنا نصيحتي : إذا حبيتي العجين يطلع بسرعة ( المطلوع أو أي عجينة فيها خميرة الخبز ) ، سخني الفرن نتاعك شوية حتى يصبح دافئ مليح و طفي و لفي لإناء اللي فيه العجين في منديل و حطيه في الفرن رايح يختمر العجين بسرعة.

[Basketteuse]

الا حبيتي الكيك تاعك يجي خفيف نقصي من القليل كمية الفرينة تتحصلي على نتيجة احسن

[maiss toussa]

الثوم اضافته عند نضج شربة الفريك أو الحبوب يعطي مذاق ولا أروع

[أنوثة شرقية]

اذا بغيتي اطباق العجائن مثل السباقيتي و المقرونة تجيك فيها بنة مميزة اضيفي ملعقة او ملعقتين من زيت الزيتون للصلصة

[ام مريم اسراء]

اولا مشكورين على النصائح القيمة بارك الله فيكن و اقدم لكن نصائحي المتواضعة :
- بالنسبة للارز باش يجي مزربع - يعني كل حبة وحدها - لازم اولا تستعملي الارز المفور لانه ميتعجنش و نوعيته جيدة ... اما السر نتاعي : قومي بالتخلص من النشاء الزائد الي يغلف حبة الارز وذلك بغسله جيدا في اناء كبير و فركه باصابع اليد و زيد تكرري العملية حتان يولي الماء صافي حليه في الماء -منقوع - لمدة نصف ساعة على الاقل باش يليان يطيب بسرعة انا مجربة هذه الطريقة و مضمونة 100 بالمئة و تغليه كل كاس ضيفيلو كاسيم و نصف ماء مغلي و مملح قليلا و تقدري تطيبيه نصف طياب و تصفيه في الكسكاس و تشليه بالماء البارد و تكملي تفوريه باش يطيب و يبقى سخون حتى و ت التقديم تقدميه مع الصوص البيضاء او حمراء بالخضار او الدجاج او اللحم
و تقدري تحمريه في الفرن مع الدجاج و ذلك بعدما تعملي الخطوات السابقة و تصفيه و هو نص طايب و تجيبي الدجاج النيا المقطع تثقبيه بفرشيطة و تضعي التوابل من كمون و شوية قرفة و كركم -العود لصفر- و الثوم المفروم و الجانبو دجاج و الملح و الزيت تفركي المزيج جيدا بالدجاج و الباي تخلطي بيه الارز جتي يرفد كل البهارات خاصة الكركم او الزعفران و تحطيه في مول الفرن و تظيفي كاس ماء و كي يتحمر ادعيلي

[imene12]

موضوع راااائع و مفيد أنا راني نتعلم منكم

[nounoudjs]

merciiiiiiiiiiiiiiiiiiiiiiiiiiiiiiiiiii

[zineb hanifa]

هيا يارائدات منتدى الجلفة نريد المزيد من الافكار من فظلكن لا تبخلن وكل من لديها فكرة تضعها هنا فالمنتدي فيه مبتدءات على قول الاخت الوهرانية و جزاها الله خيرا.

[ام البنتين]

الرند يا جماعة الخير خليه دايما حاضر في كوزينتك يعطي نكهة جميلة جدا لبعض الاكلات.انا لا استغنى علبه

[ريم الفلى]

باش تجيك المرق بنينة لازم تديريلها ماء سخون او يغلي ماشي بارد فوق المكونات الي تكون تتقلى مليح

[mereyoucef]

انا دايما نطيب بالرند راهو يلدد بزاف مواكل

[Basketteuse]

ادا تحبي المرقة البيضة تجي عقادة وبنينة أمزجي صفار بيضة مع معدنوس مقصوص وعصير ليمون واضيفيه للمرق بعد ما تطفي وخليط بسرعة باه مايتكتلش الصفار

[Basketteuse]

الارز لازم يغلي في كمية كبييييرة تاع ماء لكي يتخلص من مادة الزرنيخ الموجودة فيه

[Basketteuse]

شربة الفريك نضيفلها الغبرة اللي تجي في الفريك ادا كانت كثيرة الماء باه تعقد . ونضيفلها النعناع اليابس في الاخير بعد مانحكو بين يديا ، يعطيها ذوق راااااائع