درت المقروط وكي طاب جاني يابس علاه

[منال 22]

لبنات درت المقروط وكي طاب جاني يابس علاه


ودرتو هكذا
3كيلات تشيشة وكيلة سمن وشوية ملح وخلطتهم مليح وخليتو ليلة كاملة يتشرب
وغدوا من ذاك عجنتو شوية بماء زهر +شوية ماء عادي وشكلتهم حرابش وحطيت فيه حربوش الغرس (والغرس كنت عاجناتو بشوية زيت)ومن بعد شكلتهم مقروطات بالمثال ودرتهم يطيبو على 180 درجة بصح كي طاب جاني يابس والغرس ثاني يابس فيه

واش هي السبة

اعطوني الطريقة الصحيحة للمقروط

بارك الله فيكم

[/زهرة عصفور الجنة/]

نظن طبختيه على نار هادية إتبعي طريقة أم رامي سينجح معكي إن شاء الله

[امل43]

أختي السبب في عدم نجاح المقروط ويبسيه هو:


1- السميد الي درتيه بيه يشرب الدهان بزاف، راهو كاين سميد نتاع المقروط يتباع بالكيلو أنا دايما نشريه واندرو بيه والله يجي مبسس

روووووووووووعة وكي تجي لعجينة بيضاء اعرفي موش رايح يصلحلك.

2- الغرس أشري الي تكون طريا كاينا نتاع 9.5 روعة وكي تعجنيها ديريلها ماء زهر وشويا نتاع الزيت.

3- حاولي انك تزيدي شويا دهان، ديري 1.5 مع 3 كيلات سميد.


أنا هذي هيا الوصفة نتاعي والطريقة نتاعي، وايجي مقروط يدوب فالفم مبسس وابنييييييييين


نتمنى نكون فدتك

[nour inasse]

بالاك كيما عجنتيه خطراكش هو يتلم برك بماء الزهر و مايتعجنش وتاني حسب نوعية السميد اللي استعملتيه أنا ندير 3 كيلات سميد بكيلة و نص يجي يهبل و يذوب في الفم

[nour inasse]

ايه نسيت نقوللك بللي الغرس أخدميه مليح بالسمن وماء الزهر وديريلو القرفة والطيب حتان يولي طري ماديريش الزيت ييبسهولك

['' أمة الرحمن '']

نصيحة السميد ديري الأحرش برك و ماتعجنيش اجمعيه فقط و الغرس ماتريش المرحي اشري الغرس عادي تمرات و نقيه و ارحيه و هكا يجيك المقروط هايل و يتفتت في اليد

[*أم كوثر*]

المشكل في السميد يتشرب بزاف كان لازم تزودي كمكية السمن
اما الغرس لازم تعجنيه بماء زهر وشوية سمن حتى يطرى

[فرح العمر]

انا نقولك المشكل و رانى ان شاء الله متاكدة 100/100 المشكل راهو الزيت اللى عجنتى بيه الغرس انا مرة صراتلى و نزيد نقولك السمن اذا كان فيه الماء راح يعملك مشكل احسن نوع سمن هو مدينة

[منال 22]

بارك الله فيكم

[arbre]

سلام أختي
جاك يابس لخطرش سميد ديالك شرب زيت يعني كان خاصو زيت

[ام كوكو]

منال طريقتك صحيحة 1000 في المئة و يبس للاسباب التالية
1-ديري كيلة سمن الا ربع و الربع زيت باه ما يتحلش في الفرن
2-ما تعجنيش غير خلطي باطراف اليد يجي مرمل
3-السميد ما شدش ليدام كي حطيتيه في الفرن تذكري خرج منو ليدام و لا لالا هكدا السميد ماشي مليح انا ننصحك بسميد سفينة للمقروض و البراج
4-الغرس يابس اعجنيه مليح بماء الزهر حتى يولي طري اكيد مع القرفة و القرنفل كي تحطيه داخل العجين راكي تحسي بيه طري و لا يابس
و الزيت ما دريش فيه استعمليها في يدك كي تخدمي الحرابش برك
5-و اخيرا و هذا سبب خطير الفرن لاعود كان بارد او طيبتيه لمدة طويلة حتى نشف و يبس
طيابه العاديكيما ندير انا 1/2 ساعة لا فوق على نار متوسطو و 15د على نار قوية