مشكلتي مع خطيبي

[مشكلتي]

السلام عليكم اتمنى ان تكون بخير و عافية مشكلتي مع خطيبي انا شابة في 21 من عمري
عاملة الحمد الله و المشكل هو تشدد خطيبي فهو يمنعني من كل شيئ رقمي تاع الهاتف حتي واحد معندو حتى ابي ة امي مخلنيش نمدولهم الخدمة باوقت الخروج مالدار مكاش الا لي درورة و لا كي نحب نشري حاجة هو يكون معاية هل هذا شيء عادي
و الامر الثاني في الوقت الحالى راه يطلب مني حوايج في حقيقة الامر لازم هو يديرهم
راه يقولي عيذيلي انت و لازم انت تفليكسي روحك و ليا مع العلم هو كان يفليكسيلي دايما بلا مانقلو انا و ثاني راه يقولي معنديش دراهم و مصروف راه عليا بزاف و انا مكاش لي عاوني راه كل مرة يقولي مديلي شوية مصروف باه ندور
مع العلم هو يتيم معندو ني باباه ني يماه و خدام الحمد الله و بدراهمو حاجة مخصتوش و هذي هدرة دايما نسمعها فتالي تاع الشهر و قولي انا منقدرش نتيح بنيفي لوخداخر يقولي انت كلش عندي و انت نرمال كي ندي ملعندك
انا كي نقلو على دراهمو لي مخبيهم يقولي هذوك تاع عرسنا و تاع كاش حاجة تجي يقولي هدوك ماشي وقتهم دروك
انصحوني في وجه ربي
ماذا افعل

[رزان.]

و عليكم السلام و رحمة الله تعالى و بركاته


رقم الهاتف لا أعطيه لأمي و أبي مستحيل؟؟؟؟؟؟؟؟؟؟ و أمر جد جد غريب... و من أأمن علي غيرهما ؟؟؟؟؟؟

و يطلب منك المال غريب و الله أمر هذا الشاب + أنه عامل و الحمد لله

استخيري أختي الله في أمرك

[سارة البوسعادية]

تفليكسيلووو علاش هو الراجل ولا انتي وكيما يقولو الي مامعاهوش مايلزموش
ماعندوش حق الفليكساج ما يحكيش اختي انفضي على روحك لغبار وحطيلو النقط على الحروف
ويفهم روحو شوي وزيد ماتعطيش رقمك لامك هدي عندها معنى اخر يعني بعد الزواج تاني ماتروحيش لعندهم
حطيلو حد بخصوص امك وابيك
والدراهم قلو انا ماعنديش راني تاني نوجد في صوالح ونعاون في دارنا وركزيلو عليها نتاع راكم عائلة متكاتفة ماشي مفككة

[النجمة القطبية]

السلام عليكم اتمنى ان تكون بخير و عافية مشكلتي مع خطيبي انا شابة في 21 من عمري
عاملة الحمد الله و المشكل هو تشدد خطيبي فهو يمنعني من كل شيئ رقمي تاع الهاتف حتي واحد معندو حتى ابي ة امي مخلنيش نمدولهم الخدمة باوقت الخروج مالدار مكاش الا لي درورة و لا كي نحب نشري حاجة هو يكون معاية هل هذا شيء عادي
و الامر الثاني في الوقت الحالى راه يطلب مني حوايج في حقيقة الامر لازم هو يديرهم
راه يقولي عيذيلي انت و لازم انت تفليكسي روحك و ليا مع العلم هو كان يفليكسيلي دايما بلا مانقلو انا و ثاني راه يقولي معنديش دراهم و مصروف راه عليا بزاف و انا مكاش لي عاوني راه كل مرة يقولي مديلي شوية مصروف باه ندور
مع العلم هو يتيم معندو ني باباه ني يماه و خدام الحمد الله و بدراهمو حاجة مخصتوش و هذي هدرة دايما نسمعها فتالي تاع الشهر و قولي انا منقدرش نتيح بنيفي لوخداخر يقولي انت كلش عندي و انت نرمال كي ندي ملعندك
انا كي نقلو على دراهمو لي مخبيهم يقولي هذوك تاع عرسنا و تاع كاش حاجة تجي يقولي هدوك ماشي وقتهم دروك
انصحوني في وجه ربي
ماذا افعل
الحقيقة منقدروش نحكمو على انسان منعرفوهش
ولكن الوضع من خلال كلامك غير مريح
يعنى مثلا متشدد ليست مشكلة لو افترضنا انها غيرة عليك لكن ان يكون متشدد على ابوك وامك هاذى مشكلة
كيفاش متعطيش رقم هاتفك لوالدك ووالدتك وانتى مازلتى تحت ولايتهم
يعنى ممكن يتقلقو عليك ممكن تتاخرى هم احق الناس بان يعرفو كل تفاصيلك حاليا الى ان تتزوجى
هو سبحان الله موافق على عملك وموافق على اخذ مصروفه حتى قبل الزواج ولا يوافق على برك لوالديك
انا نقولك احذرى هناك حدود للعلاقة مع خطيبك وهو ليس زوجك الى حد الان
ومزال غريب عنك
وفقك الله

[meriama13]

يا اختي هادا من درك قالك ماتمديش الهاتف نتاعك ني اماماك ني لباباك و غدوة ميت تكوني عنده يقولك نسايهم ماتروحي ليهم و يجيو ليك و يزيد يقولك اعطيني الدراهم علاش هو مليح و والديك لي رباوك و كبروك و صرفو عليك ماشي ملاح رقم الهاتف نتاعك مايعرفوهش
واش نقولك راكي في موقف ماتنحسديش عليه صلي صلاة الاستخارة و ربي يبينلك الطريق و زيدي قعدي معا روحك و خمي مليح و كيما قاتلك سارة انفضي الغبار على روحك

[jirardo]

يلزمي تفرضي شخصينك معاه؟ هدا قبل زواج هكدا؟
من بعد زواج كيفاه

[*نآدرة~]

الصح ياختي راه يتحكم بزاف،هذا قبل الزواج راه كيما هكا امال من بعد كيفاه
قضية رقم الهاتف والفليكسي غير قوليلو يلغيها راه بزاف صمطها
استخيري ياختي وزيدي سقسي عليه وحاولي تحاوريه وتفهميه بلي هاذ الحوايج لي راه يديرهم مايدخلوش في العقل خلاص
الله يهنيكم ويسعدكم

[Amira Marame 09]

و الله غير عجب
اختي انت راهي جاياتك نورمال تاع تعطيلو الدراهم و.....
افرضي روحك ضرك قبل مايفوت الوقت و تندمي

[الدكتور سام]

ادا حقا منعك تمدي رقمك لوالديك.فهدا انسان مريض بدون شك
ادا قالك تفليكسيلو و مش قاعد يصرف عليك فهو انسان بخيل
اخيرا اقول رب يصلح الاحوال

[محمد جديدي التبسي]

غرائب وعجائب
ما تمديش رقمك لوالديك ؟؟ !!!
يطلب تفلكسيلو من عندك !!!!
ممكن تعطيلنا إيجابية عندو في مقابل هاته الكوارث
الرجل الذي يطلب مال خطيبته ليس رجلا في نظري
ربي يصلح أحوالك ..

[naruto8001360]

السلام عليكم
أختي الكريمة يحرم على الفتاة أصلا أن تتكلم مع خطيبها قبل كتب العقد لأنها ما زالت أجنبية عنه

وفقنا الله لطاعته

[قضــــــــــــ وقدر ـــــــــــاء]

السلام عليكم
أختي هذا خطيبك فقط
أم أنه عاقد
أم ماذا لم أفهم؟
إذا كان مجرد خاطب
أين رأي والديك لم أفهم؟
الله يجيب الخير

[تهاليل]

شوفي أختي مرناش نحرشوا فيك عليه واصلا هو ليس بزوجك حتى تطيعيه في كل صغيرة وكبيرة وإضافة على ذلك لو صديقتك أو إحدى قريباتك ماتمديلهاش رقمك نقولوا معليش لكن والديك مستحيل وزيد بزيادة الراجل يرجع وتلقاي غيره أما الوالدين هما غير واحدين ومايرجعوش ويلا زعفوا منا واش يرضيهم فهميه غير والديك مستحيل ماتمديش رقمك لازم تمديلهم وزيد اعلميه مستقبلا زيارتهم مستقبلا وقضية تمديلو دراهمك مش لازم نيعني لازم عن طيب نفس منك مش بالغصب أعيدي حساباتك قبل مليقع الفاس في الراس وموفقة يارب

[nanou12]

لا حول و لا قوة الا بالله ... صلي صلاة استخارة أخيتي و عاودي حساباتك قبل ما اطيح الفاس في الراس... أظنه لا يعي تماما مفهوم الرجولة و التشدد.

[abdel02]

عجبا لرجال اخر الحال...الله المستعان.

[نور اليقين جيداء]

ربي يستر و خلاص وقت لحقناه
انا براي تهدر معاه و تقليلوي هذي مش خدمة راك دير فيها

[biologie2001]

هدا راه يبروفيتي عليك يا اختي ....كيما هو يحتاج الدراهم للعرس انت ثاني تحتاجيهم اكثر منو هو...... واش هدا انت تعطيلو المصروف انت تفليكسيلو..........

اما اللي كثر فيها و راه عدى الحدود هي كيفاه متعطيش الرقم ديالك لوالديك ؟؟؟؟؟؟؟ اسمحيلي اختي على هده الكلمات مي راه مريض و انت اكثر منو لانك موافقتيه على واش راه يدير..... لازم يعرف باللي هو في كف و والديك في كف ثاني و متنسيش باللي كفة الوالدين هي اللي تغلب...

اختي تفاهمو على كل شيء قبل الزواج

[ندى قدور]

اختي شاوري عقلك مليحححححححححححححححححححح واستخيري ونظن على حساب كلامك راكي مش مرتاحة راكي لسة في اول الطريق ربي يعينك

[سهيلة(2012)]

والله من خلال قرائتي لردود الإخوة والأخوات اسنتجت أن أغلب الردود انساقت وراء الجانب العاطفي.
يا أيها الإخوة هداكم الله مثل هذه الأمور لاتنجح إلا إذا كان المسار بطريق شرعي.
بمعنى كلام البنت كان واضحا فهو مجرد خطيب وعليه كما يقال أول القصيدة كفر!!!!!!!!!!!
وعليه يا أختاه والله من لم يجد السعادة في رحاب الله لن يجدها أبدا
الإجابة على طرحك تكون بعد العقد الشرعي

[السيدة اسيا]

حبيبتي نتي عندك 21 سنة معناها مازالك صغيرة علاه ترمي روحك هكااا اسناي بلاك ربي يجيبلك مكتوب خير منو و لا محبيتيش حاولي تصلحيه و قو ليلو بلي تصرفاتو ماهيش عاجباتك..........راهو زواج معناها عمر مشي عام و لا 2
..
....
..تقبلي مروري

[ليلى الأمل]

الباب باين من عنوانه

ردجل ينتظر ان تصرف عليه المرأة ويأخد مصروفه

رجل يمنعك من الكلام مع أهلك اين الخير فيه قبل حتى ان يكون زوجك شرعا يشرط وعامل سي السيد
سبحان الله رجال اخر زمن