الى كل حماة ....اريد ان اعرف فقط ...لم تتصرفين هكذا

[مباركة 1961]

سلام...
لقد مللت من قراة مشاكل الزوجات والازواج......واريد ان اعرف قبل ان ازوج ابنى ....هل ساصبح انا كذلك هكذا....ارى ان المراة تحب ان تعيش ابنتها مع زوجها فى سعادة تامة ...( سكن منفرد _حب_ احترام_ تقدير_ تحواس_ هدايا ...اى كل شيىء )....وهذا من حقها ...لكن مالاافهمه لماذا لاتحب نفس الاشياء لكنتها .....اليس فى سعادة كنتها سعادة ابنها .....اريد ان اعرف فقط قبل ان يصبح لى كنة ....عن قريب

[فقير و باغي نطير]

يا مباركة يا بنت عمي وش نقلك
انت باينة ما تعشريش المخلوقة من ضرك مادامك تهدري هكذا
ننصحك ما تزوجيهش ولا زوجيه و ديريلو دار وحدو خير ما تهبليه انت و مرتو

[hydraulique51]

انت تعرفي نفسك اكثر منا
رانا ملاحظينها جميعهن يقلن هدا لكن بعد الزواج
تكشرن عن انيابهن وتهاجمن زوجة الابن بشراسة
من الاحسن ان تتركيه يبني عائلة مصغرة لوحده

[z.abdo]

نعم كل شاب يفضل الإستقلالية والحرية

كذالك بعض الامهات يغيرن من طباعهم بعد زواج الإبن رغم أن الأم هي من إختارت أو على الأقل وافقت وبعد مرور الأيام تبدأ ذم زوجة إبنها أحيانا تحس أنها سلبت إبنها منها
لكن هذه سنة الحياة تلد الأم بنت تتزوج ويديها راجل

كذالك تجيب راجل يتزوج وتديه إمرأة لكن مش معناه راه ينسى الأم وإنكما يتغير بعض الشيء في طباعه لكن الأم احيانا تأخذه بحساسية أكبر

كذالك لاتنسي ان الرجل لما تزوج يحب يكون يفرض رأيه وإذا كان يستشير والدته في كل شيء أكيد الزوجة تشوفو ما عندوش شخصية طبعا طاعة الوالدين قبل كل شيء

لكن عندما أريد أن أخذ زوجتي عند أهلها ليس واجب علي أن أخبر أمي مسبقا لكن الأم تكبر الموضع تقول كيف لم يعد يستشيرني


أستاذة مباركة كنت أنا استشيرك في الحياة الزوجية الحين أنت استشيرني كيف يفكر الشباب هههههههه

على كل حال والله موضوع عجبني بزاف لأني نحب المواضيع من الواقع

بارك الله فيك

[نسائم الصباح]

هذا السؤال نحن من نسألكي عنه .لأنكي عندك أولاد في سن الزواج .
على كل حال هي الغيرة .لفطرها ربي في قلوب البشر .إبنك ملكك تأتي وحدة أخرة تأخد قلبُ وخيرات .أما بنتك هي ريحة تأخد قلب الرجل وخيرات .يعني بنتك تدي مشي تمد .والله أعلم

[مباركة 1961]

سلام...

الى الاخوين....والله مانى واعرة ...والدليل انى سكنت عند بيت زوجى اكثر من15 سنة...وكانت عائلة كبيرة متكونة من 20فرد ..وجبت اولادى الثلاثة الاولين عندهم ....ورانى هده الايام نقول لابنى اتزوج لان اللى يعرفها مازالها تقرا .....قلت له اتزوج وخليها تقرا مع اختك فى الجامعة وراهىكى اختك لها مالها وعليها ماعليها ....واصلا انا خدامة ماشى قاعدة للتنقريش نتاع العجائز ...ونرجع العشية للدار وماكان فى راسى غير اطفال المدرسة....ورانى مزوجة بنتى وزوجها يجى يشكيلى انا لما مايتفاهمش فى كاشما حاجة مع بنتى ...

[z.abdo]

أختي مباركة وكل الأعظاء أطلب منك الدعاء لأختي لأن بعد حوالي نصف ساعة ستجرى لها عملية قيصرية وهو مولدها الاول
أسألو الله أن يثبتها و تجرى العملية بنجاح

[مباركة 1961]

سلام...

الى عبدو ..شكرا على النصائح...رغم انى عودت اولادى على الاستقلالية فى اتخاد قراراتهم ...والديموقراطية فى اعطاء ارائهم وما على الا اسداء المشورة...حتى يتحمل كل واحد نتيجة قراراته انالما قلت لابنى اسكن عندنا كان لسبب وحيد هو انه مازال ماكملش سكنه التساهمى وعمره 28 سنة يعنى الى متى ..

والى نسائم...اشكرك كلى الملاحظة ولو انى اتمنى انو بنت الناس تديه وتديرلو السوق وتكمل مشوارى اللى بداته

بالعربية......حابة نتهنى منهم الكل فى اقرب وقت باش نحرق....فى السعودية ونبقى ثم يعنى نروح للعمرة ونبقى ثم نقولهم فقدت الداكرة.....واش رايكم نخليلهم الجمل بما حمل ...

[مباركة 1961]

هده بشرى مليحة... ان شاء الله تلد اختك وتخرج بالسلامة يارب احفضها واحفض مولودها وفرحها بيه وتخرج فى اقرب وقت ...وقولها مبروك مسبقا لانى انا كدلك غدوه رايحة مع بنتى للجزائر العاصمة لاجراء عملية جراحية على المبيض .ان شاء الله تنجح هده المرة ونفرح بمولود فى اقرب وقت ...يارب فرج على كل المؤمنين واشفهم يارب لاتترك احدا محتار يارب....

[ريمة89]

انا من واقع تجربتي ممكن تكون الحماة مليحة واخوات الزوج هوما اللي ماشي ملاح على حساب في حالتي عجوزتي انا راجلي قالي عمري ماكنت محط اهتمام كبير ليها هي تموت على الصغير والكبير بززززززززاف مي كي تزوج سبحان الله تبدلت 100 درجة تقول غير هدا اللي ولداتوا والله انو انا زوجي خدام في حانوتو يبقى حتى لليل يدخل على 23 تاع الليل وهي ترقد فالبيت تستناه حتى يجي واا عروسة جديدة نحب نحطلوا العشا ونفرح بيه ونقصر معاه والله العظيم انها تنوض من بلاصتها هوتجي للكوزينة تجري وكي نقعد قداموا تقولي عيب اقعدي مقابلاتوا وانا قلت عادي ومع الوقت ولات كي يجي تقولوا ماكالاه تعيطلها فالتيليفون انا نوجدلك العشا ونحطلك وكاين امور بزاف كي راني بالحمل فهمتهم وبحكم اني نسكن فوقهم مادابيها كلش هي اللولة حتى الطبيبة كي نروح 2 مرات تقولوا بزاف تدل تدي فيها بصح انا عدرتها انا مازلت ماولدتوش وراح نهبل عليه ههههههه
لكن وتم لكن الام كي توصل لبناتها تما تولي لاتسمع لاترى ولاتتكلم تشوفهم يظلموا فيك وماتنطقش والله والمشاكل كامل من البنات يدخلوا تحت ريسان يماهم ويلوحو الكلام للعروسة انا وحدة من الناس كنت مريضة والطبيبة اكدتلي نوا الحمل راح يكون صعيب عليا بزاف ورضيت بالواقع الحمد لله لما حملت لوستي الكبيرة عازبة خرجتلي للعيب ديركت علاه علاجال انا البيبي حابط زعندي خطورة اجهاض حتى ان الطبيبة طلبت تقابل راجلي باه تفهموا ودات يوم ناضت صباح عمبالها راجلي راح وانا نائمة انا وزوجي دخلت علينا في برطمتنا وهي مغلوقة بالمفتاح عجوزتي هي مدتهولها والله عايرتني بابشع الصفات لاني ماخدمتش الشغل 2 يومين والله العظيم وانا داري ايكيبي من كلش وحبيت نبقى مع عجوزتي راجلي ماخرج ماوالوا خلاها هدرت حتى شبعت كي جات رايحة خرج لقى يماه تسمع وساكتة تما داني لدارنا واله اعلم واش صرا كي جيت لقيتوا شرالي كلش ودارلي داري واختوا هدي صباح الخير مايقولهالهاش وعجوزتي قاتلي بلعاني خبيتيه فالشامبرة
ياترى تقوليلي العجوزة والله صعيب مع العلم انوا عندي 7 لواساتي مزوجين كامل بديارهم قاتلي مانحبش لبناتي الدل وانا ماشي بنتها مهما نعمل ومهمل ندير مالا ندير اللي يرضي ربي وزوجي فقط
المشاكل تقدر ماجيش من عندك تجي من عند بنتك الله غالب تشوفها تزوجت هادي دنيا وادا كنت مزوجة بنتك وانت خدامة مبروك عليك العروسة حاجة ماتقيسك
واللي راهي داوي ربي يشافيها ويعطيها الدرية اللي تفرح بيها

[نسائم الهدى]

انت تعرفي نفسك اكثر منا
رانا ملاحظينها جميعهن يقلن هدا لكن بعد الزواج
تكشرن عن انيابهن وتهاجمن زوجة الابن بشراسة
من الاحسن ان تتركيه يبني عائلة مصغرة لوحده
اسمحلي يا أخي نخالفك الرأي
موش الكل هكدا
حنا مثلا ماما ما تدخلش في خصوصيات زوجات إخوتي
صح الشي اللي يمس العايلة الكل تدخل فيه وهي القاضي الثاني في العائلة بعد أبي يعني حكمها لا نقض فيه (والله يشهد بأنها لا تظلم أحدا سواء بسواء إبنتها أو كناتها)
ولكن في الأغلب يكون تدخلها إذا حدث ما يخالف شرع الله أو مباديء أسرتنا
أمّا غير ذلك فهي تقول لإخوتي (هن زوجاتكم وأنا لا شأن لي بكم)
وحتى إذا تدخلت بطلب من زوجات إخوتي تتدخل لصالحهن وليس ضدهن
ومادام هناك ماما فأكيييييييييييييييد هناك غيرها
لذا لا تعتم الصورة من الآن على السيدة صاحبة الموضوع
بارك الله فيكم
وسلااااااااااااااااااااااااااااااام

[ريمة89]

أختي مباركة وكل الأعظاء أطلب منك الدعاء لأختي لأن بعد حوالي نصف ساعة ستجرى لها عملية قيصرية وهو مولدها الاول
أسألو الله أن يثبتها و تجرى العملية بنجاح
عندها عملية قيصرية الله يكون فالعون ان شاء الله ومبروك عليها الطفل بالصحة والهنا ان شاء الله تعمر دارها وربي يشافيها ويعطيها وقفة ساهلة يارب

[عربية الهوية]

انا امي سكنت مع جدتي 5 سنوات
لم تقل واحدة للاخرى اجبدي لهيه احترام متبادل امي دايرتها كيما امها و جدتي دايرة امي كما بنتها
ببساطة اخطيكم من هاذ التفاهات احترميها تحتارمك حبها تحبك ويدا مقدرتيش بعديهم و تهناي

[ريمة89]

[quote=عربية الهوية;9517707]انا امي سكنت مع جدتي 5 سنوات
لم تقل واحدة للاخرى اجبدي لهيه احترام متبادل امي دايرتها كيما امها و جدتي دايرة امي كما بنتها
ببساطة اخطيكم من هاذ التفاهات احترميها تحتارمك حبها تحبك ويدا مقدرتيش بعديهم و تهناي[/quote
اختي اتكلمي قبل ماتجربي ونورمالمون علابالك عصر ماماك وعصرنا ديفيرونس كبيييييييييرة
واللي انت توصفيهم بالتفاهات هادي حيلة ناس كاين اللي وصلوا حتى الطلاق ماتستهزاي بحتى حاجة الا ادا كنت مجربتها
والاحترام كاين كاين بصح بدرجات وانا وحدة قولك عن مشاكل الكنة مع الحماة تفهات والله اغضبنني بزاففففففف وبناءا على مادا على قصة ماماك

[مومي23]

الام تغير على ابنها مثل ما تغير الزوجة على زوجها و لهذا نجد المشاكل بين الحماة و الكنة
من هذا المنطلق تخرج كل المشاكل و تتعدد اسبابها

[نسائم الصباح]

,والله يأختي ريمة منكذبك فقد مرة عليا حلات كثيرة من حالاتك وذلك بسبب مكراللوسة او العجوز أو حتي زوجة او العروس
فهناك الطيب والدوني في كل مكان ومن كل الجهات .الحكيم ليصبر ويعرف يمشي حياة .ولكلمة الأخرة لقولتيها صحيحة .
متظلميش وطيعي ربي وزوجك .وعاملهم بالحسنا .ينصرك ربي إن شاء الله

[ريمة89]

,والله يأختي ريمة منكذبك فقد مرة عليا حلات كثيرة من حالاتك وذلك بسبب مكراللوسة او العجوز أو حتي زوجة او العروس
فهناك الطيب والدوني في كل مكان ومن كل الجهات .الحكيم ليصبر ويعرف يمشي حياة .ولكلمة الأخرة لقولتيها صحيحة .
متظلميش وطيعي ربي وزوجك .وعاملهم بالحسنا .ينصرك ربي إن شاء الله
يسلمك ختي العزيزة المجرب يعرف ويفهم والله نتقلق من الاعضاء اللي يشوفوها تفاهة وهي لازملك حكمة كبيرة وصبر باه تجوزي المشاكل
وانا وحدة من البنات مازال مازال ماقلتش باسم الله فزواجي وسمعت وشفت العجب نباة نحكي مانكملش ههههههههه
ان شاء الله ربي يهنيني ويهنيك ويهني كامل البنات ان شاء الله

[حلاوة_87]

سقسيت امي قالت لي ي نجيبو الكنة نوليو نعاندو ووقتاش نحكمو عليها غلطة باش نبينولها باللي غلطت ولازم تساعفنا احنا لاننا ببساطة حنا كبار ونعرفو هههههههههه وقالت لي كي الكنة متغلطش نبقاو نحفرو عليها الطياب مش هكذا وديريش هكذا عاودي وش خدمتي راه ناقص....الخ..
صراحة ضحكت بزاف لصراحة امي وزيد قالت لي نعطي الحق للكنة مهما قالو فيها والعجوز ديما ظالمة....

[طيبة نفس]

هي صح الدنيا تبدل وبنات ليوم ماشي كي بكري بح لو كان كل واحد يخاف من الأخر ويدير في بالو راه حاب المشاكل
ما تفراش الدنيا هذي هي كل العلاقات فيها المشاكل المسارين في الكرش و يدابزو كيما تقول ماما والواحد حتا يعيش هاني لازم مرات يسمح من حقو

الكنة تقول العجوز والبنات ماشي ملاح ........الحماة تقول الكنة شريرة وهي رايحة علاش الكنة ماديرش عجوزتها كي ماماها و هذوك خواتاتها وعلاش

وعلاش العجوز ماديرهاش كي بنتها اذا غلط واحد لازم لوخر يسمح وين راه الاحترام والرحمة

حنا مثلا راهي عندنا عروستنا في 6سنوات ماشاء الله مرات نتزاعفو بصح مانفوتوش بعضنا والله مرلت الحاجة بابا يقلعها من عندنا و يمدهالها

وماما شحال من خطرة تغلط معاهافي الهادرة و تفوتهالها لو كان حنا والله ماتفوتهالنا و هاك حنا تعلمنا بلي مادامها كنتنا يعني
اختنا واجبنا نحترموها ونحبوها لاخاطر يجي وقت نجو في بلاصتها وكما تدين تدان وكي تحقر تنحقر

والحق هي تاني مليحة والشهادة لربي سبحانو ماماة صحبتي تقولي لو كان نتوما ماشي ملاح هي ماتجيش مليحة
حبيبة مباركة انشاء الله ربي يجيبلك على حساب نيتك ويهنيك ويفرحك سمحيلي اذا طولت لعندك هنا
انشاء الله تسلك أخت عبدو تحياتي لكم جميعا

[نسائم الصباح]

أختي مباركة وكل الأعظاء أطلب منك الدعاء لأختي لأن بعد حوالي نصف ساعة ستجرى لها عملية قيصرية وهو مولدها الاول
أسألو الله أن يثبتها و تجرى العملية بنجاح

مبروك مسبقا .ربي يشافيها ويعافيها ويسلكها على خير ويرجعهلكم سلمة غانمة يارب

[نسائم الصباح]

سلام...

الى عبدو ..شكرا على النصائح...رغم انى عودت اولادى على الاستقلالية فى اتخاد قراراتهم ...والديموقراطية فى اعطاء ارائهم وما على الا اسداء المشورة...حتى يتحمل كل واحد نتيجة قراراته انالما قلت لابنى اسكن عندنا كان لسبب وحيد هو انه مازال ماكملش سكنه التساهمى وعمره 28 سنة يعنى الى متى ..

والى نسائم...اشكرك كلى الملاحظة ولو انى اتمنى انو بنت الناس تديه وتديرلو السوق وتكمل مشوارى اللى بداته

بالعربية......حابة نتهنى منهم الكل فى اقرب وقت باش نحرق....فى السعودية ونبقى ثم يعنى نروح للعمرة ونبقى ثم نقولهم فقدت الداكرة.....واش رايكم نخليلهم الجمل بما حمل ...

ماشاء الله عليك أختي مباركة .عقليتك متفتحة .بإذن الله مش ريحة تكون عندك مشاكل كبيرة مع كنتك .هل تعلمين لماذا لأنكي صريحة .الحياة إذا تبنات على الصراحة .مرحش يكون فيها مشاكل كبار .
أما جي للعمرة وتزرطي .ياوطبطب .هذه كانت زمان .ضرك قونين صارمة مكنش اللعب معاهم .لوكان يحكموك حبس وغرامة قدرها 30 أو50 مليون .ميفدك لاملك ولامعرفتك حتى دولتك ومتسلكش .

روحي جيبي عمرتك وحجك ورجعي لولادك وكنتك ربيها على يدك .وعلميها وفقهيها وكوني أمها الثانية .ربي يألف بينكم إن شاء الله

[مباركة 1961]

سلام............ا

اولا اسمحولى نسال عبدو على اخته واش راها واش جابت ومبروك المزيود والعقوبة لوليدى عبدو ان شاء الله العروسة اللى تملا عليه الدار درارى

اما نسائم راكى خلعتينى على مشروع العمرة اللى نويته رانى نقولك نلعبها فاقدة الداكرة ونقطع اوراقى الثبوتية ونتكلم معاهم بلغة غريبة وخليهم يلقاو

منين انا... اما بالنسبة لموضوعنا اشكر كل من شارك برايه (رانى مانعرفش اندير اقتباس ) ونقول لكل كنة كى تعيشى فى سلام مع حماتك _قريبة ولا بعيدة _اعرفى كيفاه تكسبيها برك وبقليل من الكلمات الطيبة وبعض الهداي البسيطة والمعاملات الحسنة رايحة تكون فى صفك وتعود تتعامل معاك كى بنتها
وادا مانفعش هدا معاها هدى فكرة بسيطة خودى كراس (اجاندة )وكل ماتصرى لك معاها سوء تفاهم سجلى الحكاية وكمليها بعبارات تكبرى بيها على قلبك مثل __ومع كل هدا مازالنى نحبك لانك انجبت لى شريك حياتى وربتيه احسن تربية___مهما يكن يجى الوقت اللى نولى انا ثانى حماة __على جال زوجى واولادى نحمل منك كل شيىء وو..و.. ارجو من الازواج الدكور المشاركة اكثر لان الموضوع يهمهم بالزاف...وياريت يشاركونا الحموات من الجنسين ....

[نسائم الصباح]

السلام عليكم .أنا صراحتا عجبني الموضوع .لأنه مسني .وحبة نأخد من خبرتك .
صراحتا حماتي لا تعاملني بقسوة ولكنها تعاملني بمكر .يعني تعطيلي اللسان الحلو ولكن رهي دمرني من واء ظهري .قدام الزوج تظهر طيبتها ورقتها وكي يخرج تعمل عمايل .أنا قتلك هكذا بش تعلميني أجتنبها وفي نفس الوقت زوجي ميقولش عليا رني مش مليحة .كنت نبلع ونخبي في قلبي ولكن ولتلي أعصاب وقلبي ولا يوجعني بزاف
أنا نخاف من غضب الله مش حبة نوصلها لأنها كبيرة وفي نفس الوق مش حبة نخصر زوجي

أما بالنسبة لموضوع العمرة وتمزيق الأوراق .لوكان يحكموك وميعرفوش هويتك يصفروك لأي بلد إفريقي .وشوفي كيفاه تعيشي
نحكيلك قصة حقيقية حصلة في السعودية وحتى أنهم عملوها مسلسل .إبن سعودي معندوش أواق تثبت بأنه سعودي وهو يعرف أهله .ولكن هو أسود وأهلو سمر .هذه العائلة كانت تهتم بالمظاهر .فستحو بمظهر أخوهم .فأهملوه وطردوه .عندما وجدته الهيأة بدون أوراق سفرات إلى أحد الدول الإفريقية .والمسكين هوسعودي .فما بالك أنتي .أعتدر منك إذا خيبت أملك ولكن من حبي لأولاد بلدي منحبهمش يعيشو مدلولين في بلاد الغير .

[زنجبيل11]

انا راي كاين الكنة الصالحة و كاين العجوز الصالحة
و كاين الكنة الطالحة و كاين العجوز الطالحة
بعض العجائز متسلطات فعلا على الكنة تريد ان تتحكم بها في كل شيء رغم ان الكنة لها كيانها الخاص
و يجب على الكنة الصبر و لاتعاندها ربما تتغير يوما
و هناك كنات بمجرد ان تتزوج تجرد زوجها من عائلته و هو يطيعها لانه يحبه
اقول لكم ان شابا يعد زواجه باربعة ايام شنق امه بيديه لان زوجته اشتكت له من امه بعدما طلبت منها الام تحضير قهوة الصباح
شيئا فشيئا استحوذت على عقله و اسكنته وحده بعدها بدات تطلب منه كل مرة اشياء حتى بددت ماله و ضيع عمله
هذه عقوبة عقوق امه
الكنة مهما اراد الزوج ان يبعد زوجته عن امها فهي لن تبتعد و تحب اهلها عازبة و متزوجة
هناك حموات يحبن كنتهن ربما اكثر من بناتهن تعطيها من المال و تنصحها و تاخذها معها للولائم تربي لها الابناء ان كانت عاملة
و بعض الحموات يسترن اخطاء كناتهن و لا يشتكين للابن و هناك حماة اعرفها كلم تكلمت امراة عن كنتها بسوء تقول الحمد لله انا عندي كناين ماشاء الله ما نتحرك حتى بنادوني للافطار
و لما مرضت و مرض زوجها كانت هي التي كانت تغسل لها النجاسة و اعتنت تلك الكنة بحماتها و حماها رغم وجود كناين اخرين لم تقبل ان يساعدوها و قالت انا كشفت سترهما و لن يغسل لهما احد
توفيت الحماة رضي عن كنتها و توفي بعد شهر حماها و ربحت تلك الكنة دعوة الخير و البر

يعني لا نحكم على الجميع الكنة لو كانت صالحة فئنها تكون مثل الزهرة تعطر البيت
و الحماة ان كانت صالحة فهي الصدر الحنون و النصح عن خبرة و حب يملا البيت راحة و سكون

و اقول للرجل كن وسطا في الحكم لا مع امك ولا مع زوجتك و اعطي كل واحدة حقها من الحب هو حق تحاسب عليه
و لاتدع زوجتك تذهب بعقلك و تجعلك عدوا لاهلك
و اقول للكنة اخترتي هذا الرجل للعيش معه تقبلي عائلته كما ان لكي اهل تحبينهم و تحاسبين على برهم هو ايضا يحاسب على بر اهله من الافضل لكي ان تعينيه لتنلا معا رضى الله خلقت الزوجة لاعانة زوجها فكوني كذلك
اقول للحماة ان كنتكي تركت بيت اهلها و امها و ابيها و هو صعب عليها جدا و عوضها الله بزوج فاتركيه يعطيها من حنانه ولا تغاري لان الحب للزوجة مختلف عن حب الام و كلا الحبين كبيرين و لكل شكل مختلف لكن بنفس المقدار
و للتحابو جميعا اقول كما قال رسول الله افشو السلام بينكم تتحابو
و نغض البصر عن بعض الخطاء و نجعل من الحبة الصغيرة قبة كبير

[مباركة 1961]

سلام....
اعتدر لتاخرى ..فلى سببان اعاقانى عن دلك اولها دهاب ابنتى المتزوجة الى الجزائر العاصمة لاجراء عمليةجراحية ......... وثانيهما كنت فى العمل....بالنسبة الى زنجبيل اشكرك على النصائح الطيبة وثبت الله لك بها الاجر والثواب ....بالنسبة لنسائم..الحل لحماتك هو ان تتكلمى بصفة عامة امام زوجك وبحضور حماتك عن نساء تعرفينهن يتصرفن حماواتهن مثل ماقلت ..وخلى حماتك تعرف قصدك يعنى بالمعنى فهميها بانك اشرت على احداهن ان تكشف الامر لزوجها .....او قولى انها (اى المراءة الوهمية )اقترحت ان تسجلها بالبورتابل وتوريها لزوجها ....وانظرى رد فعل حماتك من الموضوع ..يعنى ناقشى مشكلتك امام زوجك وامه باسلوب الغائب وحاولى توصليلها فكرة ان هدا اللى يعملوه الناس اللى مثلها موش مليح ويجى الوقت اللى ينكشف كل شىء....على كل فكرى فى كل الوسائل باش تغيريلها هادوا الطبايع....

[زهرة الاركيد]

اي حرب هذه ضد الحماة المسكينة اعجب منكم كيف تصبحون جلادين بالرغم من انكي يامراة كنت يوم طفلة او لوسة وليتي كنة واصبحت عجوزا ياريت انكي كلما مررت بمرحلة تكونين فعلا انت اي امراة طيبة:confused::confused::confused:

[أميال18]

ليس كل النساء هكذا أنا أمي ماشاء الله عليها لم تتخاصم يوما مع كنتها و لا نحن أيضا

الحمد لله

[انوارالحق]

خيرالكلام ماقل ودل كيما كنت تحبي حماتك تعاملك عاملي كنتك وكيما عاملتي حماتك رايحة تعاملك



ومشكور ة

[انوارالحق]

خيرالكلام ما قل ودل عامليها بالطريقة التي كنت تتمنين ان تعاملك بها حماتك وكما عاملتي حماتك سوف تعاملك

مشكورة

[مباركة 1961]

سلام للجميع...
انا عمري مانحب الحرب لامع الحماة ولا مع الكنة ولا مع اى انسان.......كل فى الامر طرحت الموضوع للنقاش لان احدى جاراتى تعمل فى كنتها العمايل اللى مايديرهم شيطان ...وكل ماتحكى لابنتى لانها صديقتها .نستغاض ...واعلاه هذا الكل لان هذه الحماة لما تتكلم على بناتها المتزوجات تقول انا قلتلهمما تحملوش الذل لا نتاع الحماة ولا نتاع السلفات ....راه دار باباهم مازالها مفتوحة واللى يحب مرتو يسكنها وحدها .....وعندما طلبت كنتها دارها وحدها قالت لبنها طلقها ....واش راه خاصها اهنا عندنا بنت الك.....(حاشاكم )...انا لما كنت ساكنة مع حماتى وسلافى كنت حاكمة قدرى لاننى ماتربيتش على الحساس.... لان زوجى كان مريض بمعدته والطبيب قاللو كون تتقلق تزيد تتقطعلك معدتك لانه داير عملية جراحية ....وحملت كل شيء...على جال زوجى واولادى والحمد لله راهم كبرو والان مايخصنى والو معاهم....وحبيت نناقشوا الموضوع لان كل مراة تحب تدى الراجل وتبعدو على اهله وتكرهو فيهم باش يبقالها وحدها اعلاه هذه الام ما تعبت ماسهرت ماكبرت ......ومانيش نقول هكذا باش المراة اللى تجى عندى تعبدنى ...الحمد لله انا مانحتاج والو ...بصحتى وبشهريتى ....ونجيب الخدامة تخدمنى بالدراهم بالصح العيب علاه....انا نحبها تفهمنى ونفهمها ...وتحبنى ونحبها بلا نفاق ...ونتعايشوا بالرحمة انتاع ربي .. اعلاه هذا مستحيل ....انا ثانى حابة نشوف اولاد ابنى ونهزهم ونشوف بنى ونعنقه ....انا رانى نقول اذا كان هذا محال .....ولا رانى غالطة......

[azako]

والله يا اختي ادا كنتي ناويه الخير لابنك وخاصة انك متعلمة ومثقفة فلا تخافي ولا تجزعي كوني لها اما تكون لك ابنة والمعني ان الابن عندما يتزوج فهو يبني اسرة جديدة كما فعلت انت ووالده من قبل والشئ المختلف ان جيلنا يحب الاستقلالية وادا عينت الام نفسها رقيبا علي تصرفات ابنها وكنتها فهنا ستبدا الحرب فالافضل ادا كان في الامكان الاستقلالية في السكن باه تنقص المشاكل وتبقاو عزاز

[zouaina]

والله هذا الموضوع استفزني ما قدرتش نشد روحي شوفي يا اختي كل واحدة وعقليتها ما كانش مراة تشبه اخرى مثلا انا امي العزيزة /ربي يرد غربتها ما شفتهاش عامين راني في حالة لا توصف/المهم كي تكون العجوزة مليحة تكون كنتها مش مليحة وكي تكون العجوزة ماشي مليحة تكون مرت وليدها مليحة اكتشاف شخصي ناتج من تجربتي القاسية مع عجوزتي و بناتها وراجلي معاهم انتي اروزمون معاك راجاك اماانا فكان هو والزمن عليا نصيحتي الذهبية :19:بعديهم عليك قيس ما تقدري من النهار الاول :mh31:

[مباركة 1961]

سلام...

مشكوين على التفاعل مع الموضوع واعطاء اراءكم .....ورانى طلبت من الكنة المستقبلية واش رايها ..قالتلى نسكن معاك على الاقل العامين الاولين.ومن بعد يديرلها ربى الف طريق.....بصح راكم خوفتونى بالزاف وكانى رايحة ندخل حرب......

[زنجبيل11]

ما تخافيش اختي مباركة
ادعي الله ان يالف بينكم كاملين كنة و بنت و ابن و ام
الشيطان يسوس لنا بافكار نعتقدوها صح و نبداو الحرب قبل ما تبدى
مرات نحبوا نعاندو و نسمعو قصص الحموات و الكنات
الكنة تقول راني مضلومة هي تحسها في مفهومها انها مظلومة حتى لو كان العكس
و الحماة ايضا تحس ان كنتها ظلمتها لخطرش هي كبيرة عليها و محترمة في دارها و لازم تحترمها كنتها و هذا من حقها
و الله شيء محزن عندما نرة امراة كبيرة في السن و تاتي كنتها الصغيرة و تحتقرها
من اعطاها ذلك الزوج اليست الحمات
واش نقول الله يرزقك بكنة صالحة و ربي يرزقك منها الحفدة الصالحين
الكنة اذا ما كانتش صالحة ما تفرح لا راجلها و لا اهله ولا حتى نفسها و الطامة الكبرى لو علمت اولادها و رباتهم تربية غير لا ئقة
لذلك ما تخافيش اختي راكي مؤمنة تصلي ادعي لوليدك ربي يعطيه مراة صالحة
لان دعاء الوالدين مستجاب
ما تنسايش فرحينا بعد العرس