من تعرف كيفية اعداد الحريرة ؟؟

[*أم كوثر*]

السلام عليكم ورحمة الله
ابحث عن وصفة الحريرة تع الغرب كليتها مرة وعجبتني
للي تعرف تقولهالي بالتفصيل ولها جزيل الشكر

[بنت الطيب]

وأنا أضم صوتي لصوتك أختي أم كوثر حابة نجربها

[goumar]

مساؤك سعيد الحقيقه انا ذايقه غير الحريره اللي نديرها انا ههههه بصح ممكن يكونو زايدينلها منكهات ممكن الكريمه او الحليب او المرق الجاهز لان الحريره نظن مبدؤها واحد و الله اعلم

[/زهرة عصفور الجنة/]

سر الحريرة في راس الحانوت لازم يكون مليح غداأعطيك وصفتي إن شاء الله

[*أم كوثر*]

ان شاء الله اختي منى بانتظارك
افيدنا بوصفتك اختي goumar

[أم عبير]

السلام عليكم: حريرة الغرب متكونة من :لحم دجاج او خروف، جزر قطع، حبة بصل، حبة بطاطا، لفت، كابويا، قصبر و كرافس، حمص منقوع، عود قرفة و يمكن اضافة حبات عدس. نضع كل هذه المكونات في الطنجرة مع اضافة ملح زيت و زعفران و نمرق ثم نتركها تنضج، بعد ذلك نصفي الخضر نطحن الخضر و نرجعها في الطنجرة و نضيف طماطم مصبرة +طماطم قطع ثم شوية قصبر و توابل كي نشوفها تغلي مليح نمزج الفرينة مع ماء حتى الذوبان و نضيفه للمرق و نتركها تغلي قليلا، يمكن ان نضع بدل الفرينةحفنة فارميسال اودشيشة هذه حريرتنا التلمسانية.

[/زهرة عصفور الجنة/]

نقلي حبةبصل مقطعة رقيق مع ملعقة سمن مع قطع لحم غنمي نخليه يتقلى على نار هاديةمع عرف كرافس نتبل بملح وفلفل أسود نضيض ربيطةصغيرة حشيش للقدر أضيفي الحمص المنقوع أضيفي معقة صغيرةمن راس الحانوت مرقي بالماء خلي اللحم يطيب أرحي 3حبات طماطم بعد ما يطهى اللحم ضيفيهم زيدي طماطم مصبرة تقدري تضيفي في هذا الوقت شوية فرميسال ولا مرمزكي يطيب حلي ملعقة فرينة في شويةماء وأضيفيها للحريرة مع الخلط لا تنسي نزع الحشيش زينيها بحشيش مقطع

[*أم كوثر*]

تسلموا اخواتي
اختي منى نظن اللي كليتها فيها بقوليات وخضار نسيت

[/زهرة عصفور الجنة/]

كاين لي يضيف العدس أنا مانضيفوش

[yarasmin.26]

الحل انتاعك راه عندي بصح حبيتي الحريرة تاع المرمز ولا الحريرة الفرينة الخفيفة مايدروش العدس يعطيك بنة مكياش مولفتها والسر كذالك في راس الحانوت

[goumar]

السلام عليكم الحريره نتاع الخضار البيضاء البصل و الثوم و الكمون و نوع الخضار اللي بغيتيه مع حبه او اثنين بطاطا و غليهم معا و منبعد مرقي و ضيفي شوي نعناع يابس و زعتر يابس و لما تقرب الطياب زيدي قرن فلفل بارد و لما يتلق البنه سكري و ارحي انا مانزيدلها والو الا مرق اللحم او الدجاج اذا كنت دايره زوجي يحبها بدون اضافات انا نرحيها بالصوص بكلش ماشي الخضره وحدها ومن بعد نضيفلهل الصوص الا اما نتاع الخضره الحمراء تديري عدة انواع خضر معا نغلي البصل و الثوم و الطماطم مصبره و الكمون و راس الحانوت المخلط موش الصافي و وعود القرفه و الرند و جدر فلفل و الزعتر و النعناع و ربطه حشاوش مربوطه و تمرقي و تلوحي الخضره و لما تطيب تنحي شوي صوص و نضيفلها دقيق الفريك غير شوي و ترجعيه للقدره بعدما تنحي ربطة الحشيش و ترحي الخضر و تلوحي فيها شوي عشبة شيخ وما تكثريش راها تطلق البنه بزاف بزاف وتخليها تغلي شوي فقط و راح تشوفي بلي عشبة الشيخ تغير كامل البنه و هاذو اللي ذقتي عندهم الحريره جيبي من عندهم راس الحانوت نتاعهم و ديه للعشاب يقلك منين يتكون باش تعرفي البنه منين تجي و فيدينا معاك ونتاع الباقوليات تديري من كلش شوي و معهم طماطم مصبره و قاع الاضافات اللي قتلك و دقيق الفريك في الاخير

[goumar]

ملاحظه ام كوثر انا مانيش من الغرب

[*أم كوثر*]

تسلموا اخواتي رح ندي من كل وحدة فكرة هههههه ونطيبها ونحطلكم تشوفو

ياراسمين اللي كليتها نظن فيها فرينة لا مرمز ولا فريك

[my lamis]

سلام عليكن
يا الغالية الحريرة من إختصاصنا و كان تذوقيها علابالي تعجبك بزاف
و الحريرة تاعنا هي بتشيشة المرمز
نطيبوها بلحم غنمي و هي مفيدة مليح بالعنزي
بالميكسور نرحو حبة بصل حبة بطاطا حبة قورجات حبة زرودية و 4 سنات ثوم و حبة طماطم طايبة مليح نديروهم فالكوكوطة مع قطع اللحم + التوابل فالفل ملح و راس الحانوت لازم تكون ريحتو قاوية و الحمّار و الزيت و طماطم مصبرة ثم نفرمو مليح القسبر و النعناع و نديروهم يتقلاو مع بعض مليح خليهم مدة طويلة و هوما يتقلاو من بعد ضفي الحمص و مرقي بالماء البارد و خليهم يطيبو
كي يطيب اللحم المرق ينقص زيديلو الماء حسب ما تحبي و خليه يغلي ثم ديري إرمي المرمز تاعك و خليها تطبخ مليح حتى تفوت نصف ساعة بصح عسيها تنشف و مرة على مرة خلطيها من بعد طفي عليها و ذرذليلها قسبر و بلعي عليها الكوكوطة و خليها حتى تلحق للتقديم
إذا صبتيها عاقدة زديلها شوية ماء
هذي هي الحريرة تاعنا قاع يحوسو عليها
و الله ذاك النهار جاونا جماعة من الجزائر و درنهالهم سخفو عليها و قالو فكرتونا في بنة رمضان
نشالله تعجبكم

[soumay12]

ام كوثر هاذي طريقتي في الحريرة والوصفة تكفي 6اشخاص

اولا ام كوثر وجدي الخميرة كنت ندير السميد لكن صعيب شوية

نفرض انك رايحة ديري الحريرة بالسبت وجدي الخميرة تاعها مساء الجمعة باش تجيك بنينة

الخميرة؟كاس ماء +4مغارف اكل فرينة مملوءة+2سنينات ثوم مبشورين+مغرفة قهوة خميرة كسرة+قطرات خل+رشة فلفل اسود
خلطي كلشي وخليه يتخمر

المرق؟لحم خروف+زيت +ملح+توابل+ثوم وبصل مبشورين+2مغارف اكل طماطم مصبرة+كسبرة مطحونة+كرات صغيرة لحم مفروم تكون واجدة عندك في المجمد وممكن الاستغناء عنها

الطريقة حمري اللحم في الزيت والملح مليح زيدي البصل والثوم ثم التوابل ثم الطماطم وخليهم يقلو بعقلهم وزيدة الدبشة المطحونة

بعدين مرقي بالماء الساخن وكي يغلى ضيفي الكرات تاع اللحم المفروم المتبلة زي الكفتة وافلقي الكوكوة 20دقيقة

بعدين حلي الكوكة نحي اللحم يكون طاب وراح ناخذ الخميرة ونحركها مليح نضيفلها ماء دافيء ونحرك وبعد نضيفها للمرق

مع التحريك المستمر حتى تبدا تخفاف ضيفيلها فلفل حار وخليها طيب بعقلها 20دقيقة

وبعدين رجعي اللحم والكرات وقدميها بالدبشة وبالصحة والهنا

هاذي طريقتي انشاء لله نحطها في المدونة تاعي ويستفادو منها كل الاخوات
http://commentcuisinernina.blogspot.com/

[ام امجد14]

السلام عليكم
اختى عاى حساب ما فهمت انك تردين حريرة الغرب لانك لقيتى فيها ذوق مميز
وسر فى هذا الذوق يكون فى البهارات اليكى السر
تحضرى الحريرة عادى
يعنى باللحم و البصل ةو الخضرالمتنوعة يعنى حبة حبة و يكون الجزر له حصة الاسد ههههه و الحمص طبعا
و بعدما تطحنى و ترمى التشيشة تاعك (مرمز او شعير)
ويدخلها الطياب
نضيف السر المتكثل فى راس الحانوت المتكون من ( زريعة البسباس و حبة الطيبة او حبة الحلاوة سكنجبير و تكون الكميته مضاعفة )
ناخذ المهراز ندير فيه الثوم و حشيش القصبر والفلفل الحا ر ( طبعا حسب الرغبة ) ودقوه مليح
ونضيفو التوابل مع الدرسة ونخليهم حوالى 5دقائق
هته اختى طريقتنا فى الغرب

[*أم كوثر*]

الله يبارك فيكم اخواتي الف شكر
رح نتقيد بنصائحكم كلها
في ميزان حسناتكم ان شاء الله

[بنت غليزان]

السلام عليك غالي و الطلب رخيص
شوفي أنا حريرتي تجيني روووعة مشي راني نشكر في روحي هههههههه
أول حاجة نقولهالك هي أنو الحريرة ما تجيش فيها الخضر بزاف و مانديروش فيها الحمص خلاص
لحم خروف + حبة بصل+ 2 جزر أو 3+ نصف حبة بطاطا + حبة طماطم كبيرة+ قصبر + رند+ حرور ملح فلفل عكري+ طماطم مصبرة +
في قدر ديري زيت و قلي اللحم ثم ضفي البصل و الجزر و الطماطم و البطاطا و حرور و فلفل عكري و قصبر و ملح كامل مع بعض و مرة على مرة قلبي على نار هادية حوالي 10 د
قائق ثم ضفي طماطم مصبرة محللة في قليل من الماء و بداي تمرقي بشوية ثم كي تشوفغي المرقة بدات تغلي على 10 دقايق و ديري المرمز حوالي فنجان و خليه يطيب مع الخضر و ما تبلعيش القدر تفيضلك
و كي تشوفيها بدات تثقال و طابت طحني الحريرة نتاعك و رديها فوق النار و بداي تحركي حتى تغلي باش ما تلصقش خليها 10 دقايق و ديريلها الدرسة المكونة من راس الحانوت + ثوم + شوية زعتر و قصبر مقطع
و رديلي الخبر

[أم عبير]

حريرة الغرب ما نديرو فيها لا حليب و لا كريمة

[ام رنا]

نعم ام كوثر يحطوا العدس وتجي حريرة لا يعلى عليها تفضلي حورة المطبخ دارتها نتاع الغرب على اصولها

http://www.youtube.com/watch?v=-doOKW5UGTY

http://www.youtube.com/watch?v=6WMjeZWLQu0&feature=relmfu
جربيها راهي تهبل

[ahlem_22]

أم كوثر حنا لي نديروها فيها الكرويا و الحلبة ريحتها تشميهااا من بعيييييييد راح نديرها ونصورهالك و لكن قريبا ان شاء الله

[souhir69]

مسائكم سعيد

بما اني من منطقة الغرب راح انمدلكم طريقة التحظير

جزر+ لفت+ بطاطا + قورجات+ كابويا+ طماطم حب + سنينات ثوم + بصل الخضروات على حساب الكمية تقلي و لا تكثري

+ لحم خروف او بقري او دجاج + زيت + زعفران+ فلفل احمر + ملح او بنة كنور بالنسبة لي هي المفضلة بنة الدجاج

تقلي الكل +الماء و تتركيها طيب

ميكسي الخضار + ماء مغلي على حساب القدرة المستعملة + الدشيشة تكوني غاسلتها و تخليها طيب

وجدي العقدة و هي القصبر مقطع رقيق + معدنوس+ راس الحانوت + طماطم مصبرة + الثوم مرحي + بنة كنور

تكوني محضرا من قبل الخميرة الماء + الفرينة + قطرات ليمون + بين لصباع سكر + زعفران قليل جدا

لما طيب الدشيشة زيدي الخميرة مصفيتها و حركي بسرعة باه ما تتكورش الحبات اتركيها ثم زيدي العقدة و حركي و اتركيها طيب حتى تعقد

و ذوقي الملح اذا لازمها زيدي وفي الاخير قبل ما طفيها بخمس دقائق زيدي ملعقة كروية + نجمة لرض+ عود قرفة + قصبر

و هذا هو سر حريرتنا

ارجوا ان اكون قد افدتك يا ام كوثر

[*أم كوثر*]

بارك الله فيكم اخواتي الف شكر
نحربها ونردلكم

[achouak11]

الحريرة لي تحوس عليها أم كوثر هي الحريرة المغربية أنا مرة عرضوني في وهران عند عائلة مغربية كليت حريرة بنينة بزاف لحد الآن مانسيتش الطعم نتاعها و فيها العدس ، و الحريرة لي موالفين نديروها في تلمسان ما فيهاش العدس عبارة عن لحم تقليه مليح مع البصل و ضيفيله خضر جزر، بطاطا، لفت، قرعة خضراء طماطم حبة و حمص منقوع و فول يابس القليل برك و تزيدي حزمة مكونة من الحشيش و الكرافس و التوابل ملح فلفل أسود و راس الحانوت سكنجبير مرحي و لما يطيبو تصفي الخضار و الفول و ترحيهم و لا حبيتي ترحي تاني الحمص هذا اختياري تعاودي تقطعي الحشيش و تخليها تغلي من بعد ضفي طماطم مصبرة و تعملي خليط من الفرينة و الماء و ضفي الكمون و راس الحانوت و السكنجبير و ضفيه للقدر مع التخليط باش متتكورش الفرينة و عينك ميزانك ما تجي ثقيلة ما تجي خفيفة

[racha_2011]

حنا لحريرة تاعنا نديروها بالفرينة و التشيشة كيما تحبي نتي تقدري ما ديريهاش

[بنت غليزان]

حريرة الغرب ما يجي فيها لا لفت لا زعفران لا كريمة لا فول و لا حمص انا راني بنت الغرب

[هاجر 76]

سلام اختى ام كوثر رايحة نعطيك وصفة الحريرة وان شاء الله تعجبك احنا منراطوهاش في رمضان ديما هى الاولى على المائدة
عندك اما تديريها باللحم الخروف ولا الدجاج ما شي مشكل المهم يكون عندك راس الحانوت مليح وادا بغيتى نقولك كيفاش تشكليه وحدك يجي معطر احسن من المشري


لقدرة نتاع 6 لتر لازمك 2 حبات بصل كل وحدة على ربعة ماشي شرط مقتتة لخطرش من بعد رايحة تتطحنى الكل بالميكسور

4 حبات طماطم(البصل والطماطم شباح الحريرة)
3 حبات جزر متوسطين الحجم او 4 صغار
مغرف ونصف اكل طماطم مملوءة جيدا
2 ملاعق اكل عدس (نعم عدس يعطى بنة هايلة للحريرة عكس الحمص)
قضبة قصبر تخلى منها شوية من بعد تقتى شوية اوراق من الفوق
حبة لفت (يكن الاستغاء عنها
بالنسبة للعطور الاولى
الملح عينك هى ميزانك -الفلفل تانى -القرفة نصف ملعة قهوة -ربع ملعقة قهوة سكنجبير-ربع ملعقة قهوة كركم-راس المغرف حب الرشاد(يمكن الاستغناء عنه)-ملعقة صغيرة ماشى مملوء جيدا حلبة حب ملعقة قهوة فلفل احمر وزعفران اما الشعرة ادا كان عندك ولا العادى(راس المغرف) راس المغرف كبابة يعنيك قرصة فقط
ملعقتين زيت فقط
الطريقة سهلة تحطي كل المقادير مرة واحدة وتخليهم يتقلاو مع بعض فى قدرة ومعاهم كوب ماء ساخن لمدة عشر دقائق حتى تشوفى الخضر بدات تطلق الريحة تضيفى الماء وهنا نقولك ادا كنتى رايحة تستعملى طنجرة الظغط ديرى 3 لتر ماء بالكتير لخطرش تزيد تنقص الكمية
وخليهم لمدة نصف ساعة فقط هدا ادا كنتى دايرة لحم الدجاج او اكتر ادا كان لحم الخروف ولا البقر (يبغى بزاق الوقت لطياب)وطبعا الماء يكون شوية بزيادة
مين تطيب تنزعى القصبر واللحم وتطحنى الخضر كلها بالميكسور الاد اللفت احنا ننزعوه
وترجعى الكل على النار وتضيفى برشة جوزة الطيب ومغرف قهوة مملوءة كروية مطحونة ومغرف قهوة ماشي مملوءة جيدا راس الحانوت ومن بعد ترمى عليهم الخميرة تكونى حضرتيها من قبل بشوية فرينة ورشة خميرة الخبز وقطرات من الخل وتخليهم يخمرو جيدا ليلة
ومن بعد ترميى قليلا على الحريرة بصح لازم تكون تغلى على النار وتخليهم حتى تتقل شوية والا ترمى شوية تشيشة ملقتين اكل 3
وان شاء الله نكون فهمتكم على الحريرة نتاع الغرب

ملاحطة = كاين لى يديرو القرعة ولا البطاطا احنا مانديروهاش تغير البنة

[جوجو88]

شوفي طاطا ام كوثر السر كامل يكمل في توابل الحريرة حنا عندنا يبيعها العطار تجي فيها 7 اعشاب زعتر ولويزة والقرطوفة وحوايج وحدوخيرن انا نديرها هكا نحكم كسرونة نقطع فيها لحم غنمي ادا حابتها تجيك بنينة لازم بلحم مشي بدجاج نقطع بطاطا زرودية بصل حبة طماطم ثوم معدنوس حمص كمون راس حانوت ملح فلفل حمر حار وبارد جوزة الطيب شوي كروية شوية قرفة مش بزاف عود صغييير نمرقها بل ماء نشعل عليها نار هادية بعد وقت ندير تومات مصيرة والتوابل الي قتلك عليم شوي مش بزاف كي طيب الخضرا ولحم نطفي عليها نطحنها وندير تشيشة انا نحب الرقيقة كامل وادا كانت خشينة نديرها طيب مع الخضرا ونطحنهم كلمل كي دير تشيشة عسيها بويسكة تلصق اقعد حركي فيها حتة تعقاد شوي وطيب التشيشة ديري ربطة حشيش اها تانيك رند نسيتو وطفي عليها ودير القارص والتوايل الي قتلك عليهم وشوفي كيفاش تجيك يا طاطا

[chinwiya27]

انا من الغرب و راني جديدة بيناتكم
فيما يخص الحريرة احنا نديرو..الجاج ولا اللحم انت الغنمي + البصل +الجزر + البطاطا +حمص طبعا و لي زبيس انتاوعها الملح+الحرور +راس الحانوت +و القصبر لازملها و طماطيس +مغرف كبيرة طماطم مصبرة و نخليهم ينقلاو مليح
ثم نمرقوا بماء غالي و مين يطيب اللحم مع الخضر نقلعو اللحم و نطحن الخضرة و نديروا قد نصف فنجان تشيشا نتع المرمز و نخلوها طيب مليح و نخلطو باستمرار باه ما تلصقش و مين تقدميها قطعي فوقها القصبر و شهية طيبة
تنجمي ترمي التشيشا قبل ما تطحني الى خوفتي ما طيبلكش مليح بويسكو هي تبغي طياب بزاف على الاكثر 1ساعة

[gigi-bonoise]

mama ta3raf
ana a3ychine fi oran
dork ngolha wa ngolam
domage ana mazel mana3rafch

[دانية لينة]

وصفتي لحريرة اولا نبدا بقطع اللح و بصل و طماطم ثوم و قليل من الزيت نقلي نضيف التوابل ملح فلفل أسود عرف قرفة راس الحانوت و فلفل احمر ثم لخضار لي عندي كامل حبة 0ة بطاطا خردل سنأرية جريوات كرافس و عدس احمر جي الذ و روز و حمص على حسب تحي ترحيه او لا ان نحب نرحيه يمد بنة للحريرة كي يطيبو نحي اللحم و لكافس و ارحي تجي لذيذة جدا

[دانية لينة]

راس الحانوت و القرفة هم السر ان جابولي راس الحانوت من بريكة روعة يزيد النص فالماكلة

[حياة نور الدين]

السلام عليك اختي ام كوثر انا ماشي من الغرب لكني تزوجت هناك وعجبتني حريرتهم وعلمتهالي عجوزتي سرها في المكونات المضافة لها كالتشيشة او الفريك كالزعتر والفليو ونعناع يابس وهادو يمدولها بنه ومتعرفيش بلي زعتر او فليو او ....تفضلي رابط الوصفة

http://www.djelfa.info/vb/showthread.php?t=1837197

[فاتي تيارت]

الحريرة ماشىمراس الحانوت ليقلها الخبرة اولها شمخى الحريرة ثانيها نار خفيفة ثالثا لازم يبقاو الخضر يطبو مليح مليح

[ام سوهيل]

السلام عليكم ورحماتو الله وبراكته

ام كوثر وكل الاخوات الكنا الحريرة التي ورثتها من امي ربي يحفضها ويشافيها

انا بي صراحة انديرها بلا لحم نحتاجو بصلة او 2 حسب الكمية الي ريحة ديريها مع حبات طماطم يكونو مستوين مليح وقصبر قلي مليح مع مغرف ااو تنين زيت حتي تطلق الطماطم الماء انتاعها

ضيفي زريعة البسسباس انا نفضلها حب خير من البودرة مع راس الحنوت والكمون والحرور وفلفل حمراء وحبة الطيبة وحبات حلبة وزعتر او زعيترا لكين الي تكون حامل متحطش
الزعتر وقلي ومن بعد ضيفي مغرف طماطم مصبرة وكركم اورشة زعفران وقلي ومن بعد مرقيبي بي ماء دافي وضيفي الخضر الي هي جزر وقرعة كما نقولو احنا الكورجات

وخليهاكي تبدا تغلي ضيفي التشيشة نكونو غسلنها وخليها طيب على نار قليلة مع التحريك مرة على مرةباش متلصقش

وكي تشوفيها طابت وتقلت ارحيه في الرحيا تع الخضر خير ملي تمكسيها وعاودي رديها للنار وكي تبدا تغلي ضيفي مغرف تع القهوة نوخة وهدا هو السر تع الحريرة مع ساشي

تع ماجيقو او قطع تع جمبو انا نفضل الماجي في الحريرة ورابي سنة ثوم وحطي قصبر عينك ميزانك بلا متقطعيه باش تنحيه عند التقديم وكي تعمري في لبول ضفي عصير

القارص

وهادي حريرة من مطبخي اليكنا الصورة

http://c.top4top.net/p_154i1ok2.jpg

وهنا قدمنها للضيوف كنت عندنا عرضة

http://b.top4top.net/p_154dnse1.jpg

واي سوئل انا في الخدمة ممكن الاخوات يجربو كميا قليلة قبل رمضان ومن بعد يحكمو بي انفسيهنا

دعوة خير تكفيني

اعتضر مكتبتش الملح بسح متكتروش لانو الماجي مالح واليم حامض

[goraya]

السلام عليكم مرحبا بك امنا ام كوثر انا اعرف ماذا تقصدين انا ثاني ذقتها وابحثت عنها ايطيبوها بلحم والخضار كيما قالو الاخوات عادي وامبعد يرحوهم ويضيفو تشيشه الشعير كيما الحرشايه وعندها التوابل انتاعها وفي الاخير ايديرولها شويه فرينه علبالي تقصدي هاذي انا ثاني ذقتها وعجبتني بزاف