مشكلتي مع أختي

[مشكلتي]

سلام عليكم
مشكلتي مع اختي
انا اكبر من اختي ب 3 سنوات و شكلتي معاها بدات كي جاو يخطبوها المهم ماكانش واحد ماقتلوش غير انا ماقلتليش بلاك راكم تقولوا ماقلتليش خاطر خافت لا نغير سرتوا كي عدت اكبر منها وبصح هدا ماكنش منوا خاطر انا تاني راني نتخطب بصح مازال مكتبش ربي وزيد بزيادة انا عمري ماكنت عندي مشكل شكون يتخطب لول و هي علابلها بهدا
وليزاد الامر تعقيد انها كيتكون تهدر في موضوع مع ماما كيتشوفني دخلت تسكت هدا راهوا نرمال بالصح ليماشي نرمال انها تاني كي تشوفني ندخل تسكت كي تهدر مع مرت خويا وواحد الخطرا لقيت صحبتها قالتلي بلي راهي عيطتلها و قتلها المهم غاشي كامل قالتلواا غير انا لي من مفروض نكون اول وحدة تقلها خاطر انا اكبر منها هدا اولا و ثانيا كانت كل ماتحتاج حاجا جي ليا وعمري ماحشمتها سواء في النصيحة او في الدراهم
غادتني بزاف هدي جاست منها وقلبتها على بكاء و الانعزال و السكوت ووليت نقصت هدرا معاها

[z.abdo]

ننصحك اختي
راكي غلطت بزاف كي قلتي انك نقصتي الكلام مع اختك هذا اكبر خطأ
هذا التصرف راح تقول اختك انك راكي غايرة نتاع الصح

نعطيك التصرف الصحيح اللي لازم تديره

هو انك لازم تتقربي من اختك اكثر واكثر وديري روحك ما علابلك بأي شيء يعني مكان حتى حاجة في قلبك

وخليك من كلام الشيطان والله راح يفرق ما بينكم وهكا راح الأم تحزن وتغظب منكم وتدو دعاوي الشر هكا


بما انك انت كبيرة مالازمش تكوني حساسة تعاملي بعقلك الكبير وما تعامليش بعقيلة صغيرة

ولما الأخت الأصغر منك تشوفك فرحانة معاها ومش جابدة روحك تولي هي تحكي قدامك عادي لأنها هي خافت تجرح شعورك او تتحسك

كذالك ممكن عقليتها صغيرة شوية لهذا تكلمت مع صديقتها بهذاك الكلام

ولهذا انت تعاملي معها بعقلية اكبر مع النهارات راح تعرف انها غلطت

واهم شيء اختي تكلمي مع اختك عادي خلاص مثل من قبل يعني وكان شيء لم يحدث

وديري في باللاك يجي النهار ويصبح عندكم أولاد انت واختك يعني ويصبح هذو النهارات ذكرى
واللي ربح العيب مع خوه هو اللي يندم
ســـــــــــــــــــــــــــــــــــــــــــــــــ ــــــــــــــــــــــــلام

[الواثق]

هذا ان دل على شيء فيدل على ان اختكي تحبكي ولاتريد ان تجرحكي بابسط الامور ............وهاذي عادي بين الاخوة ان مرة احتجت مبلغ مالي في وقت ضيق فاستلفت هذا المبلغ من جاري فعندما سمع اخي وكان حاظرا لم اشئ اخباره بحاجتي فقلب الدنيا عليا في البيت لدرجة انه خاصمني ..............وانا لم اغضب منه بل بالعكس زدت احتراما له .............لربما نخطء في تقدير الامور لكن اوصيكي باختكي والخصام يزيد المشاكل فاذا كنت انت الكبيرة فوجب عليكي المسامحة قبلها لانكي الاعقل .............والله المستعان

[الدكتور سام]

يا اختي هده اختك و لازم تحبو بعضاكم.من كلامك فهمت ان اختك ماتحبش تتكلم على هدا الموضوع خوفا عليك من ان يصيبك شيئ من الحزن لم هي اتى نصيبها و انت لا.والله واضحو وضوح الشمس و تاكدي انها تدعيلك باه انت كدلك يجي مكتوبك و تفرحو مع بعضاكم.رب يخليكم لبعضاكم و يهب لكم ازواج صالحين.امين يا رب

[achwak.1993]

بالتوفيق أختي وإن شاء الله تلقاي مكتوبك

[ranitta]

حتى انا نقولك اذا هيا حاولت تتهرب منك نتي لازم تجبديها ليك

هكدا تصير ما تخبي عليك والو

ولازم تصبري عليها

اضحكي معاها ونتي احكيلها اسرارك

كتشوفك تحكيلها راهي حتى هيا تبدا تحكيلك

انا كنت كيماهاك ختي كنت ما نحكيلها ونحكي لصحاباتي

وديما كنولو نهدرو وتدخل نبدلو الموضوع باسكو كنت نخاف الى ما تحبش

تسمع هدرتنا

وممبعد وحد نهار جات تحكيلي على اشياء صارت معاها واسرارها

يمالا حتى انا وليت نحكيلها كلشي وما نخبي عليها وااااااالو

اعرفي برك كيفاه تتصرفي معاه هاذي راهي ختك

جامي تفكر باه تكرهك ولا تحبك الشينة هذا الشيطان راهو يكبرلك فيها

وربي يخليكوم لبعضاكم

[ريحان الجزائر]

السلام عليكم و رحمة الله و بركاته أختي لماذا لا تتكلمي مع أختك و صارحيها بكل ما ترينه و كل ما تحسينه نحن الجزائريين ليس لدينا أسلوب المحاورة و نحبو المشاكل تتحل أخرجي انت و أختك و عزميها على فطور وحكيو و صارحو بعضاكم صدقيني راح تحسو ببعضاكم أكثر لأنك انت لي راح تدوميلها و تحسي بيها ماشي مرت خوك المهم الله يفتح و يفرج و يهدينا و يوفقنا لما يحبه و يرضاه

[فتـ حييةـاة]

هي غير خافت على شعورك هذا ماكان بصح بحكم انت الكبيرة عليها تقربي ليها وضحكي في وجهها وبينيلها بلي راكي فرحانتلها رايح تولي نورمال معاك ماتحسسيهاش بالذنب هذا مكتوب ربي حتى انتي ربي ضرك يجي مكتوبك كي تبغي الخير للناس ربي يعطبك على حساب قلبك واي ناس هاذي اقرب الناس واعزهم اختك

[Mohamed12013]

نظن بلي أختك تحبك بزاف و خايفة عليك و على مشاعرك علبيها راها تتجنب في هذا الموضوع معاك