موت أختي دمرني

[مشكلتي]

السلام عليكم
جمعة مباركة على الجميع
ربما يكون عنواني محيرا واعلم جيدا ان الموت حق على الجميع لكن ..........
نحن اسرة من 5افراد 2 بنتان وولد والام والاب
كنا لاباس علينا عايشين وحمدين ربي كيما كامل الناس مع الشهرية القليلة بصح الهنا ماخلانا نحسوا بوالوا الحمدلله على كل حال
حتى لحقت 2008 كنت انا مخطوبة وخويا خرج من المسيد وختي الله يرحمها عندها 15 سنة تقرا 2 متوسط جات من المسيد ماتت
ايه ماتت قرات الصبح وزادت العشية وكملت على 14 وعلى 15 كانت عند مولاهاوماتت قدامي كانت تهدر معايا طاحت رحت لقيتها ماتت
والله ماعلابالي ادا راح تفهموا هدرتي راني نكتب ومارانيش نركز الله غالب وماتت ختي واحد ماعلابالوا علاه ولا كيفاه الدنيا تهولت المسيد الحومة المهم دفناها ربي يرحمها وجازوا اليمات وبدات الدنيا تسماطلي وتكحال عليا واللي كملها خويا ماقدرش يقعد قالنا الميزيرية ونزيدوا نموتوا انا البلاد هدي ماعندي حتى قعدة فيها شهر مور الموت تاع ختي راح حرق للغربة
وبقيت انا برك مع بابا ويما اللي كانوا مشوكيين من الموت ومن وليدهم الكبدة تاعهم تحرقت وانا تحرقت من الداخل برك كنت 19 سنة رفدت مسؤولية بابا ختي هدي الله يرحمها هي المفشة كي ماتت ماولاش بابا المسجد والصلاة والخدمة وماما البكاء على وليدها ولا على بنتها قرايتي تدهورت زماكنتش نقدر نبكي على ختي نخاف ماما يزيد عليها الحال وهي تشوف فيا برك وتقولي انت اللي مصبرتني وانا واحد ماقدر يصبرني نقوللكم الصح ماما وبابا دوكا راهم الحمدلله بصح انا تعقدت على خاطر ماخرجتش واش صرا كلش خبيتوا فقلبي والله نحس النار فقلبي كي نتفكر ختي ونتفكر بلي اني وحدي ماعندي ختينهدر معاها و زدت تزوجت ياه ربي عالم واش في قلبي حياتي راحت حتى خطيبي اللي راهو زوجي دوكا سوفريتوا حاجة ماتفرحني طعم الحياة ماعنديش والله زواجي مافرحت والوا مايفرحني نحس روحي في ظلمة نستغفر ونقرا قران بصح قلبي تحرق على ختي ومانقدر ليومنا هدا نحكي لحتى واحد حبيت نحط مشكلتي هنا باه نبرد قلبي شوية
وخممت نروح لطبيب نفسي خاطر راني الا كتب ربي قريب نصير ام ومانيشس حابة نعيش ولادي فالكابة والحزن
جيت ليكم طالبة مساعدتكم ورايكم

اسمحولي طولت

[asil333]

اصبري يا اختي لان الموت حق على كل نفس عليك بالاستغفار و قراءة القرءان يوميا

كلنا راح نموتو البقاء لله

الله يصبرك

[ام نسمة]

والله الشي اللي قلتيه صعيب بزاف ربي يصبرك ان شاء الله وفكرة جيدة انك اتزوري طبيب نفسي راح تساعدي نفسك وتساعدي طفلك من الكابة وربي يسخر لك زوجك باش يوقف معاك في ظروفك النفسية والله راه احسن من الطبيب ادا وقف معاك واش انقولك ربي ايكملك ويوفقك ان شاء الله

[حنان شلفية]

اختى العزيزة انا حاسا فيه ولو بجزء صغير انا تانى كنت نقرا في ليسي تارمينال كنت انا وصحبتى الله يرحمها ووسع عليها نقراو خرجنا على 4 كيما اي يوم انا رحت لدارنا وهي راحت لدارهم حتى عيطتلي ختها وقاتلي حنان لامية صحبتك الله يرحمها انا تما حسبتها راهي تتمسخر ماعرفتش واش ندير تما حسيت بلي حياتى تبدلت انصدمت ماعرفت واش ندير وهي تانى ماتت بلا سبا هكدا موت فجئة واش نقولو قضاء وقدر هدى شي ربي كتبو ومحتمة علينا
اختى انتى اقراي القران وادعية حاولي تقولي بلي انا لازم نعيش لازم نفرح وراح نقلك حاجا تانيا كي تشوفي وليدك في يدك راح تنساي راح تشوفي حياة جديدة تنخلق في داخلك ووالديك راح يحسو انو بنتهم ولا وليدهم رجع ليهم
ربي يسهلك ويبعد عنك حزنك يارب العالمين

[الامل في الله]

كما قالت الاخت زهور الفل لم لا تزوري طبي نفساني و اكثري من الاستغفار و قول انا لله و انا اليه راجعون
و لم لا تحاولي رقية نفسك و الله انها نافعة بادن الله احسن من الطبيب النفسي

[ريحان الجزائر]

الله يصبرك أختي كلنا راحونا لي عزاز علينا و انت الله يبارك تزوجتي و قريب تصيري أم إن شاء الله هاد المولود راح يعوضلك أيامك لي فاتو عليك حزن و تفرحي و تعيشي و مالازمش تكوني كئيبة و لا دايما حزينة راهو زوجك يكره هكا تلقاياه كيما يسيي يدير باش يفرحك يقول لالا ماشي هكا و انت يا أختي الله يهديك علابالك الحياة تمشي و ربي سبحانو دار الصبر و النسيان و إن شاء الله ربي يأجركم و يفرحك يا ربي و إن شاء الله تجيبي لبنات و سمي على اسم اختك و راح يملؤو عليك حياتك و تكوني أم سعيدة إن شاء الله داومي على الإستغفار و والديك ربي يعوضهم و يصبرهم و خوك ربي يهديه و يرجع لماليه و لا تنسي أن الله لا يضيع عبده مادام أنه خلقه في هذه الدنيا التي تصعب على الكثير فلن يضيع أي عبد حتى و إن قلت أنني لم أصبر فهذه سنوات مرت و الميت لازملو الدعاء و الصدقة ماشي ديما البكاء و تكوني حزينة على جالو يا أختي الله يصبرك و إن شاء الله المولود هدا يملأ عليك أيامك أنت و زوجك و تتعمر دارك فرح

[بنت غليزان]

الله يصبرك اختي مع انو من طاك اليوم راكي تزيدي تخمي ننصحك اختي بزيارة طبيب نفسي و بالعقل تلقاي روحك مليحة هو راح يساعدك لانو اذا زاد الشيء ما تقدري تديري و الو روحي دركا احسن و نفس المشكل صرالي كي مات اخي كاكانش مريض هو تاني لكن راني الحمد لله

[سجل أنا جزائري]

ربي يرحمها أختك ان شاء الله و يوسع عليها و يرجعلكم خوك في أقرب وقت ان شاء الله

اختي علابالي حاجة صعييبة باش تنساي وش صرالكم لكن

الدنيا ما تتوقفش على موت واحد حتى و لو كان عزيز علينا

لما تعيشي حياتك ما يعنيش راكي نسيتي أختك لا لا

أختك وصل الأجل تاعها كيما راح نروحو ليه كامل لكن نتي مزالت حياتك قدامك و مزلتي صغيرة

أعز انسان على وجه الأرض محمد صلى الله عليه و سلم مات و كل المسلمين حزنت عليه لكن لوكان بقاو غير يبكيو عليه ما وصلنش الاسلام ذرك ؟

نتي ثاني حاولي انك ترجعي لحياتك الطبيعية لكن بإيمان أكبر ، أختك الأن مش راح ينفعها البكاء تاعك لكن ينفعها دعاء لها ، التصدق

لها، على الأقل فرحي والديك اللي تعبو عليكم و مبعد كي كبرو يلقاو ولادهم بدون مستقبل ؟

كوني أنتي الأمل تاعهم ، افتحي صفحة جديدة في حياتك

ربي يكون معك أختي و يفرج عليك

[اسعى لرضى الله]

يا اختي المومن مصاب ولازم نصبرو , حبيب الله محمد عليه الصلاة والسلام ابتلاه ربي وينك يا حنا . وين يبان بلاء تاعنا قدام ابتلاء الانبياء والرسول صلى الله عليه وسلم , صح العبد ضعيف ويحب كلش يكون مريقلي ومعدول بصح هدي هيا الدنيا صدقيني اختي اي واحد في الدنيا هدي ملقاها كما بغا واش هو لازم علينا نطيحو ونوقفو نكملو واش بقالنا في الدنيا هدي كيعاد رانا كي المسافرين وواحد معلابالو وكتاش يكمل السفر تاعو لازم علينا نخدمة لاخرتنا وديري في بالك ختك هدي لا بغيتي تفرحيها صدقي عليها وادعيلها وديري في بالك بلي الموت مش معناه منزيدوش نلقاو العباد اللي ماتو لالا ان شاء الله تتلاقاي بيها في الجنة وتفرحي , دك يا اختي لازم متخليش الشيطان يسودلك حياتك وتقعدي عايشة في الماضي ختك حبها ربي داها ودك اي في الجنة ان شاء الله بجوار ربها دك اعرفي بلي عندك مسؤولية تاع راجل وولاد جايين في الطريق متخليش روحك تخسري راجلك اللي هو سندك في الدنيا هدي, مهما صبر وصبر هو ثاني عبد وعندو حقوق عليك وماذابيه يشوفك تضحكي وفرحانة وقايمة بيه وبدارو ويجي يشكيلك وتنحي عليه متخليش الماضي يدمرك حياتك دك عيشي حياتك وختك كي تتفكريها ادعيلها بالرحمة وديري في بالك او جاي نهار وتلقايها في الجنة وتفرحو وتضحكو , ودك الشيطان يا اختي او ماذابيه يخليك حزينة باش متخدميش لاخرتك ويخليك دمري حياتك وتخسري راجلك وصحتك وتعيشي في تعاسة

من ليوم ابداي صفحة جديدة وحتى نفسك اي عندها حق عليك حرام عليك تعيشي روحك في الحزن

[جيهان13091991]

يا اختي استغفري مولاك ياخي انت مؤمنة باله و بالقدر انك تحبسي حياتك راهو كفر على خاطر شغل تعترضي على مشيئة ربي و راني معاك روحي لطبيب نفساني راح يساعدك باش تفوتي هاذ المحنة انت لي ضرك انك مانجمتيش تبكي على اختك كيما حبيتي و هذا رجع عليك ذرك , ابكي بردي قلبك حتى تخرج الحرقة هذيك على اختك , ربي مايشوفني لي عشتيه حتى انا عندي اخت واحدة و اخ واحد كيما انت و ربي يرحم اختك و حنا كل رايحين هاذي هي الدنيا و ذرك انت راح ترزقي بابن و الا ابنة واش الذنب تاعها و الا الذنب تاع زوجك علابالي صعية ما يحس بالجمرة غير لي كواتو و خلي ايمانك في ربي قوي و ربي يفرج عليك و يكون في عونك

[محمد مولاي]

الله يعطيك الصبر

[بني بلعيد]

اصبري وصابري فالله معك ، لاتيأسي وانظري للحياة بإيجابية سيفرج الله همك وكربك.

[نجمة ساطعة]

ربي يصبرك و يفك عليك يا رب

[hamzagolf6]

اختي ديري ربي في قلبك وختك ربي يرحمها و خوك ربي يرد غربتو

[غليزاني 26 سنة]

ربي يصبرك اختي

[فتـ حييةـاة]

http://www.alajir.net/uploads/gallery/1152011-035638AM-1.jpg

[سفيان الثوري السلفي]

السلام عليكم و رحمة الله و بركاته..اما بعد..اخية قال تعالى: (وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ * الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ * أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ) .
"إنا لله وإنا إليه راجعون" علاج من الله عز وجل لكل من أصيب بمصيبة دقيقة أو جليلة , بل إنه أبلغ علاج وأنفعه للعبد في آجله وعاجله فإذا ما تحقق العبد أن نفسه وماله وأهله وولده ملك لله عز وجل قد جعلها عنده عارية فإذا أخذها منه فهو كالمعير يأخذ عاريته من المستعير فهل في ذلك ضير؟؟
لا .. والذي رفع السماء بلا عمد , ثم إن ما يؤخذ منك أيها العبد المصاب المبتلى محفوف بعدمين , عدم قبله فلم يكن شيئاً في يوم من الأيام , وعدم بعده فكان ثم لم يكن , فملكك له متعة مستودعة في زمن يسير ثم تعود إلى موجدها ومعيرها الحقيقي سبحانه وبحمده:
(ثُمَّ رُدُّوا إِلَى اللَّهِ مَوْلاهُمُ الْحَقِّ أَلا لَهُ الْحُكْمُ وَهُوَ أَسْرَعُ الْحَاسِبِينَ).
فمصير العبد ومرجعه إلى الله مولاه الحق , لا بد أن يخلف الدنيا وراء ظهره يوماً ما , ويأتي ربه فرداً كما خلقه أول مرة بلا أهل ولا عشيرة ولا مال .. ولكن بالحسنات والسيئات نسأله حسن المآل .. هل علمت هذا أخي المصاب المكروب ؟
إن علمت حقاً فكيف الفرح الزائد بمتاع الدنيا أياً كان ؟ ثم كيف الأسى على أي مفقود أياً كان ؟
يكفيك من ذلك تفكيرك في بداية العبد ونهايته علاجاً وبلسماً لكل همٍ وغمٍ وكرب ومعها "إنا لله وإنا إليه راجعون" فهي الصلاة والرحمة والهدى ونعم العدلان ونعمت العلاوة , فهِم ذلك السلف حق الفهم رضي الله عنهم فاسمع ..
عبدالله بن مطرف لما مات ولده قال :
"والله لو أن الدنيا وما فيها لي فأخذها الله عز وجل مني ثم وعدني عليها شربة من ماء لرأيتها لتلك الشربة أهلاً , فكيف بالصلاة والرحمة والهدى ؟
إذا مالقيت الله عني راضياً ........ فإن شفاء النفس فيما هنالك
ثم اسمع اخي لبعض أحاديث المصطفى صل الله عليه وسلم ففيها الدواء لما بك من الكروب والأشجان والهموم والأحزان إن وعيتها كشِف الكرب وكأنه ما كان ... روى مسلم في صحيحه من حديث أم سلمة رضي الله عنها قالت سمعت رسول الله صل الله عليه وسلم يقول :
( ما من عبدٍ تصيبه مصيبة فيقول إنا لله وإنا إليه راجعون اللهم أجرني في مصيبتي واخلف لي خيراً منها , إلا آجره الله في مصيبته وأخلف له خيراً منها " قالت : فلما توفي أبو سلمة قلت : ومن خيرٌ من أبي سلمة؟ صاحب رسول الله صل الله عليه وسلم , ثم عزم الله علي فقلتها .. فما الخلف؟ .. قالت : فتزوجت رسول الله صل الله عليه وسلم ومن خير من رسول الله)
صل الله عليه الله جل جلاله ....... ما لاح نور في البروق اللمّعِ
وفي الصحيحين عن أبي سعيد الخدري وأبو هريرة رضي الله عنهما عن النبي صل الله عليه وسلم أنه قال : ( ما يصيب المؤمن من نصب ولا وصب ولا همٍ ولا حزن ولا أذىً ولا غم , حتى الشوكة يشاكها إلا كفر الله بها خطاياه ).
وفي صحيح ابن حبان عن سعد بن أبي وقاص رضي الله عنه قال : سئل رسول الله صل الله عليه وسلم أي الناس أشد بلاءً؟ قال:
( الأنبياء ثم الأمثل فالأمثل , يبتلى الناس على قدر دينهم , فمن ثخن دينه اشتد بلاؤه , ومن ضعف دينه ضعف بلاؤه , وإن الرجل ليصيبه البلاء حتى يمشي في الناس وما عليه خطيئة )...رزقك الله الصبر اخية.

[ليلى الأمل]

السلام عليكم

اختي الكريمة الموت يدق في كل بيت

الموت حق من منا لم يفقد العزيز

انا فقدت اعز شخص والدي الحبيب صحيح الامر صعب ومرير والقلب ينفطر كل مااحس بالشوق لحضنه

لكن في نفس الوقت اقول اننا لن نخلد في هده الدنيا هم السابقون ونحن اللاحقون

لله مااعطى ولله ماأخد فاصبري واحتسبي اختي

الدنيا لا تقف عزيزتي لفراق شخض غالي بل تستمر تستمر بالصبر على الابتلاء والايمان والتقرب من الله

عليك بالصلاة والقران والادكار وعيشي حياتك مادنب زوجك اختي لاتعيشي في جو الكابة والحزن لان الحزن لن يرد العزيز

وان لم تستطيعي التغلب على حالة الكابة اختي انصحك بشدة بزياة طبيب نفسي يساعدك على تخطي المحنة بادن الله لكي لاتتطور من اكتئاب لشيء اخر لا قدر الله

عزيزتي يكفي ان تري مايحصل في سوريا عائلات باسرها تموت ليل نهار وعشرات الفلسطينيين يسقطون كل يوم و و و

في كل مكان اختي فمن نحن لكي لا نبتلى الموت حق علينا وهو قضاء الله وقدره وماعلينا الا ان نحمد الله ونشكره واعلمي اختي ان بعد الابتلاء

والصبر عليه كل الخير ان شاء الله

[zineb.star]

قصتك حزنة والموت علي كل واحد صبري وعندك زوجك هوالي قادر ينسيك احزانك وكامل خسرنا الناس الي نحبوهم وراهم في قلوبنا ادعيلها وترحمي عليها ودرك تخلق عندك طفلة ولا طفل وينسيك الدنيا كامل عيشي مع راجلك وعائلتك بساعدة وكن جا الحزن يرجع لينا الناس الي نحبوهم درك نحزنوا كامل والطبيب النفساني مهوش حل

[نورالهدى**]

ربنا العالي اذا احب عبده ابتلاه

البلاء يختبر الصبر

وارى ان والدك وخاك قد فشلا في الاختبار

الدنيا قصيرة لما نتذكرها في الآخرة تكون ساعة لا اكثر

اختي احس بعذابك لكن اقنعي نفسك ان اختك لم تمت وانما انتقلت من الحياة الدنيوة الى الحياة الاخروية

وان شاء الله هي سعيدة الآن بفضل دعائكم لها وصدقاتكم عليها

ربي يثبتك ويصبرك