2 مشكلتي مع أقرب الناس الي 2

[مشكلتي]

السلام عليكم

أنا صاحبة هذه المشكلة

http://www.djelfa.info/vb/showthread.php?t=878177

أود اعلامكم أني زرت المفتي و أفتى لي بالزواج من جاري

و بالنسبة لمن سأل عن عمومي و خوالي

فلي خال طاعن في العمر بالكاد ينهض عن السرير

و أبي وحيد والديه لذا ليس لدي عموم

صليت الاستخارة و ارتحت في بداية اليوم ، و لكن ما لبث أن فسد هذا الارتياح بسبب والدي الذي جاء بخبر تقدم ذاك الرجل لي ، عارضت الامر فصفعني و قال لي: ياخي أنا يالي جبتك للدنيا ، تمشي كيما نقول أنا و خلاص

و أدهى من هذا أنو الراجل قالو أني نحي الحجاب و بابا قالي نحيه

و هذا من المستحيلات ، نفظل نموت جمرا و ما نحيش حجابي

أختي أم ظافر أشكر اقتراحك عزيزتي ، لكن هناك سببين منعاني من تطبيقه

الاول : الا يعتبر الامر رشوة ؟ وددت أن أسأل المفتي و لكن أخي كان برفقتي و لن يسمح لي القيام بهذا ان سمع بالامر

الثاني : من أين سأجلب المال عزيزتي ؟ فوالدي يأخذ اجرتي كاملة و لا أخذ منها شيئا

ولله حتى الاشياء يالي نحتاجوها كنساء تمدهملي أم جاري ربي يذكرها بالخير

مانسعى غير السلسلة تاع ماما و مستحيل نتخلى عنها

أمو تاع جاري اقترحت عليا اقتراحك من قبل و عرضت عليا المال من عندها

بصح ولله حشمت كيفاش ندي الدراهم ، كون يسمع خويا مسكين ما يلقاش وين يحط وجهو

دورك راهو لقا خدمة في الصحرا بصح ماحبش يروح و يخليني وحدي مع بابا

أنا حابة نزرب في القضية تاعي غير على جالو

بصح نهار الاستخارة شفتو كيفاش عدا ، وش تقتارحوا عليا ؟؟

بالنسبة لجاري راني متأكدة مية بالمية المشكل ني فيه هو ني في عيلتو ، نشوف منهم غير الخير

إذا صرات حاجة بعيد الشر علابالي تجي من بابا و مرتو

واذا قبلت بالزواج ، كيفاش نعيش ؟ رانا جيران ، و مهما ندير رايحة نصادف بابا

علابالي بيه مش رايح يخليني نتهنى ، ولله حرت !

[السيدة كرمين]

يا بنتي أتمي موضوع الزواج وعلى الأقل في البداية يكون يعقد شرعي و رسمي - البلدية -

واخيك موجود الله يطيل في عمره هو وليك واياك وتقبلي تحت اي مسمى تزويجك من ذلك الفاسق

لأنه لا طاعة لمخلوق في معصية الخالق والله وقلبي معاك

بالنسبة للأمور المادية اكري اشي لي تجهزي بيه وخلي من والدة جارك والدتك

ومش مشروط تعملي عرس وطنطانة المهم الستر عند راجل يقدرك ويحترمك



بالنسبة لوالدك مهما يصير تقبلي منوا أي شئ ولا تقاطعيه أبدا أبدا

بل زوريه وهاديه

وربي يهنيك ويسعدك

[/زهرة عصفور الجنة/]

لا طاعة لمخلوق في معصية الخالق مدام المفتي سمح لأخيك أن يكون وليك فتزوجي وربي يهنيك ويهدي باباك

[عُضو مُحترم]

يا اختي بما ان الشيخ قاللك تزوجي بالجار

فاللهم بارك

و ابوك يأمرك بالمعصية و نزع الحجاب

فلا طاعة لابيك في معصية ربك

و اذا على المشكل المالي رانا هنا نعاونو اختنا

دينار دينار و نديرولك عرس ما شاء الله

نهار تعوّلي ان شاء الله و تتم الخطبة و العقد

ابعثي رسالة لاختنا ام ظافر مثلا

فيها ccp تاع اخوك او تاعك

ونحن باذن الله نبعث لك نقود في الحساب

على الاقل انا سافعل حسب مقدرتي

و متأكد ان الاخوة و الاخوات هنا سيساعدونك

و ان شاء الله نفرحو بيك



و باباك ربي يهديه

المهم انتي احسني اليه ما استطعتي

و لكن لا طاعة لمخلوق في معصية الخالق

[ام رحوقة]

تزوجي يا اختي وربي يخليلك اخوك ان شاء الله ربي يفرج عليك عاجلا غير اجل يارب
واياك ان تقبلي بهذا الرجل الي في اولها يقولك نحي الحجاب يا درا بعد الزواج واش يطلب الله يهدينا

[اسعى لرضى الله]

يا اختي انا نقولك اياك وياك تقبلي بهداك ............. كيعاد الوحدة كي تزوج تحوس على واحد يعينها في دينها ويدخلها للجنة وتعيش هانية مش يدخلها لجهنامة انا في رايي ازربي تمي الزواج من جارك خاصة انو باين وليد فاميليا وعارف ظروفك كااامل اموان ديري عقد شرعي باش ميقدرش باباك يزوجك بهداك ................ وتكوني في ذمة جاركم انا هكا رايي كيعاد لا ديتي هداك ..... مترتاحي متقدري تخدمي لاخرتك كما يقولو
ولازم عليك تصبري الفترة هدي سيرتو لا عقدتي مع جاركم كيعاد تكون شويا صعيبة بصح اعرفي بلي جاي ان شاء الله يكون خير وخير , احسن من انك تقبلي بهداك .........راح يعيشك في جهنم وتجيك في فترة تصبيرها خير ما تجيك في عمرك كامل يروح هكاك .
اما في خصوص واذا قبلت بالزواج ، كيفاش نعيش ؟ رانا جيران ، و مهما ندير رايحة نصادف بابا

علابالي بيه مش رايح يخليني نتهنى ، ولله حرت !
اقبلي وصاي الباقي خليه على ربي متقلقيش روحك في الامور هدو كيعاد ربي ان شاء الله لا سهلك في الزواج منو راح يسهلك في كلش ان شاء الله واتوكلي على ربي وصاي هدي نصيحتي ان شاء الله يا اختي نتمنى ربي يفرج ربي ويسهلك في زواجك ان شاء الله يا رب ومتقلقيش روحك يا اختي كلش في يد ربي انتي ادعيه ومستحيل يتخلى عليه ولا يخلي اي واحد يضرك وبغيت نقولك ملاحظة انو كون كانت يماك حية مستحيل انها ترضى انك تفسدي مستقبلك وحياتك وهيا كي وصاتك بباباك مش معناها تفسدي حياتك على جالو وهدي ما يرضاها لا ربي لا العبد وان شاء الله المرة الجاية تقولينا انك عقدتي مع جاركم بالتوفيق اختي

[اسعى لرضى الله]

يا اختي بما ان الشيخ قاللك تزوجي بالجار

فاللهم بارك

و ابوك يأمرك بالمعصية و نزع الحجاب

فلا طاعة لابيك في معصية ربك

و اذا على المشكل المالي رانا هنا نعاونو اختنا

دينار دينار و نديرولك عرس ما شاء الله

نهار تعوّلي ان شاء الله و تتم الخطبة و العقد

ابعثي رسالة لاختنا ام ظافر مثلا

فيها ccp تاع اخوك او تاعك

ونحن باذن الله نبعث لك نقود في الحساب

على الاقل انا سافعل حسب مقدرتي

و متأكد ان الاخوة و الاخوات هنا سيساعدونك

و ان شاء الله نفرحو بيك



و باباك ربي يهديه

المهم انتي احسني اليه ما استطعتي

و لكن لا طاعة لمخلوق في معصية الخالق

كما قال خويا انتي عولي ان شاء الله وحنا رانا هنا كما عايلتك وراح نديرو واش في مقدورنا بحول الله ان شاء الله

وبارك الله فيك اخي على الفكرة

لانو واحد مو راح يتاخر في ادخال الفرحة ليك ان شاء الله كيعاد كامل رانا خاوة هنا

[z.abdo]

نقلك حاجة بما أن والدك خرج للعيب
انا نقلك روحي لمركز الدرك الوطني واحكي كامل واش صرى هذا هو الحل وإيك تتردي والله غير راح تتدمر حياتك لو تتزوجي ولازم تبعدي على أبيك الحمد لله أصبحت كاين حقوق المرأة لازم تعفسي على قبلك ولازم يروح معاك خوك هطا هو الحل لازم السطلة اللي تقر تعاونك وطبعا الإتكال على الله

[ام ظافر]

شوفي حنونتي
بما انو اهلك تفكيرهم مادي خلينا حتى حنا نفكرو مثلهم
خبري زوجة باباك حتى هي تخبر باباك انكم خلاص مليتو وفاضت بيكم وانو خوك لقى خدمة في الصحراء ورايح ليها يعني خوك خلاص شهريتو طارت من يد باباك وانت ثاني راح تروحي تعيشي معاه ومن ثم يزوجك خوك والامام تاع المسجد من الي ترضاه نفسك وتقبلي بيه ماشي الي جابهولك باباك يعني حتى شهريتك انت راح طير من يدو وهنا ما يبقالو خير الريح
ممكن زوجة باباك تحسبها وتلقى روحها خاسرة في لافار وهنا ترجع على باباك وتقولو على الاقل نضمنو شهرية واحدة خير من يروحو في زوج لانها كارثة بالنسبة ليهم
وشوفيها واش راح تتصرف ولكن خليك على موقفك لانو الراجل الي يشرط نزع الحجاب ماشي راجل تعشريه وهدديهم انك غير تتحسن ظروف خوك في الصحراء تروحي عندو وانك باقية معاهم قضية وقت فقط
اما الباقي اختي الي تحدثتي عليه ما تهزيش هم حاجة مازالت ماصراتش عيشي يومك وما تخميش في مشاكل المستقبل لانو في يد ربي سبحانو وهو قادر بين ساعة وساعة تقوم الساعة
تفكري بلي عندك خاوة وخواتات هنا وقت الشدة تصيبيهم واكثري من الدعاء والاستغفار

[جيهان13091991]

شوفي اختي انا في رأيي ازوجي و باباك متسمعيش بيه , الشرع على حسب قول الامام يجيز ذلك فلا مشكل في ذلك لأن اباك عضل و لا سبب في رفضه لمن يريدك زوجة له الا اضرارا بك , من الناحية القانونية العقد يبرم عادي لانكي راشدة و الراشدة تبرم عقد الزواج بنفسها و الولي هو مجرد شرط يعني يكفي حضوره و الراشدة لا يأخذ بعين الاعتبار ترتيب الاولياء بمعنى ان حضور اخيك يكفي لكي تبرمي عقد زواج مدني او قانوني ماكانش مشكل من هذه الناحية , معصية كلام امك رحمها الله لو رات هذا الظلم لزوجتك بنفسها يا اختي راح يحطملكم حياتكم راكم كبار و تعرفوا صلاحكم و اخوك كون شاف حاجة ميش مليحة فالراجل ماهوش راح يقبل في الاخير انت اخته و باباك قتلوه الماديات مايهموش شارب خمر و الا مخدرات و الا زير نساء المهم عندو الدراهم , انا نتمنالك من كل قلبي ربي يفرج عليك و اقبلي و بربي راح تعيشي مهنية و تنساي لي فات كل و يعوضك ربي , و ربي يهدينا والدينا , حاجة نسيتها العرس ديري حاجة بسيطة لي يهم هو الاستقرار العرس ليلة و تفوت و ماتخافيش من باباك و توكلي على ربي

[محبة التعلم]

يا أختي نقولك غير كلمة وخممي فيها مليح

لوكان جات أمك الله يرحمها عايشة في ميزك كانت غادي تقولك طيعي باباك في موقف كما هدا ؟

سقسي روحك

[محمد جديدي التبسي]

وفقك الله أختي

لا تتراجعي أبدا وكوني صلبة وقوية

وأكثري من الدعاء بهداية والدك وبتعجيل فرجك

موفقة بإذن الله

[titaya05]

لا طاعة لمخلوق في معصية الخالق
اختي اذا كنتي حابة ترضي باباك بعصانك لربي هذا شي غير معقول
و ادعي ربي يسهل امورك و يرشدك للطريق الصح و يهدي الوالد ان شاء الله

[خولة لبابة]

و لله ابكيتني كثيرا يا اختي.....انا اقول لكي ان الامام شرع عليكي .....لذا فليكن اخوكي وليّ أمركي و تزوجي من جارك ....اذا رأيت فيه كل صفات الزوج الصالح....للاسف ....اما عن ابوكي الله يهديه خير ان شاء الله....
اياكي و اياكي ان تتزوجي بالشخص اللذي اتى به والدكي........لا طاعة لمخلوق في معصية الخالق.......حجابكي ....عفتكي.....اولى من طاعة والدكي...رضى الله في رضى الوالدين .....لكن في هذه الحالة لا تطيعي امر والدكي....حذاري ان تسقطي في نهر و تغرقي فيه و مستقبلا لن تجدي من ينقذكي....الحمد لله هناك أخوكي.....ستركما الله جميعا ....

[nour_20]

إن شاء الله ربي يعطيك الزوج الصالح أحزنتني قصتك ربي يكون معاك استعيني بالله أكثري من الدعاء وصلي صلاة الاستخارة خمي مليح وتوكلي على ربي سبحانوا استعيني بمن تثيقين به ربي يهدي باباك مهما كان هو والدك

[ريحان الجزائر]

لا حول و لا قوة إلا بالله العلي العظيم السلام عليكم و رحمة الله و بركاته أختي أأسف لما تعيشين فيه و الحالة التي فيها أنت و أخوك هدى الله والدك أختي لا تتركي الدعاء في الصلاة ادعي ربي يهدي الوالد تاعك و ادعي ربي يبعد عليك هاد الخاطب لي جابهولك الوالد واعلمي أختي بصفتي دارسة للعلوم القانونية أن أول ركن في العقد هو الرضا و انعدام الرضا في عقد الزواج يعني زواج باطل حابة نقول أن إيلا مالقيتيش كيفاه تستعيني بناس يساعدوك و جا هاد الراجل لازم تفتحوا لما يجي الإمام يقرا الفاتحة راح يسأل كلا الطرفين يمكن تكوني موجودة في مجلس العقد و يمكن لا المهم تقدري انت بنفسك تخبري الإمام أو أخوك يخبر الإمام بلي انت ماراكيش حابة تتزوجي و هاد الزواج زواج إجباري الإمام هنا راح يتوقف و ما يفتحلكش أختي لانعدام رضا الزوجة فهمتيني يعني يمكن حتى تصرخي باش يسمعك الإمام ماعليش ماتحشميش هاذي حياتك راح تتدمر و انت فتاة عفيفة راح يعطيك لواحد سكران هذا عدم التكافؤ أختي هذا الزوج غير كفؤ و يمكن لك أن تتزوجي بجاركم هذا بدون رضى والدك لأنه ليس رجل كفؤا إستعينوا بأئمة المساجد خليهم يحكيو معاه يفهموه و الدعاء أختي يعني الدعاء لله هو لي راح يخلصك من هاذ المشكل و لو دخلتي لقسم غرفة العرائس و حطيتي المشكل تاعك و قلتي لبنات يدعولك صدقيني راح يواسيواك و يدعولك من قلب لأنوا ماتعرفيش من أي لسان راح يستجاب الدعاء الله يفرج عليك أختي عاجل غير آجل و يبعد عليك هاذ الرجل و يهدي والدك و زوجته و يقدر أخوك و يرزقوا لي راهوا حابها وصية والدتك صح لازم تنفذوها من ناحية الطاعة في غير معصية الله برك لأنك اختي لوكان تقبلي بهاذ الرجل لأن والدتك قالت لكم خودو راي باباكم ماراحش تخرج عليك لأن والدتك لوكان كانت حية الله يرحمها ماكانتش راح ترضى بهاذ الرجل السكران ياخذ بنتها العفيفة مالا طيعو الوالد تاعكم في حدود الطاعة لكن لما يصل الأمر للزواج برجل غير كفؤ و تعافينه و لا ترضينه هنا استعملي كل الوسائل حتى تبتعدي عن هذا الرآي الذي لا ترضينه أختي لماذا لا تكلمي مع والدك ؟ حتى و إن استحيتي و إذا جابلك هاد الرجل أهدري و صوغي و قولي فرغي قلبك كيفاه تنزعي خمارك و العفاف تاعك على جال الدراهم و الله يا أختي غير قد مانهدر بالاك قليل ربي يهدي الوالد تاعك و يفرج عليك أختي و نوصيك ديري كل الطرق حتى لا تتزوجي بهذا الرجل و ربي ييسرك أمورك و يفرج عليك عاجل غير آجل

[عبد العزيز البدري]

ياختي انتي تخلطين لامور فطاعة الوالدين تكون في ما يخصهم هم وليس بما يتعلق بأمورنا الخاصة ولا طاعة لمخلوق في معصية الخالق
مثال ان تطيعي والدك ادا اراد منك خدمته كا اعداد الطعام له ....... الخ
اما في ما يخصنا نحن مدا ناكل ومادا ندرس فهدا لا يدخل في طاعة الوالدين
وادا افتاك لامام توكلي على الله واكملي حياتك فهدا اب ليس بصالح ليكون ولي امرك حسب قول المفتي وقولك

[أم محمد و آيه]

الله يفرج عليك اختي ..والله غير قتلتيني.......:o

راني هنا باش نساعدك اختي ولوكان نحي من روحي ونعطيك ...

بعتيلي ccp وان شاء الله نساعدك ....

ربي يعطيك الهناء ان شاء الله ياربييييييييييييييييييييييييي

ويهدي باباك ...

[karimto]

مادام قالك الإمام تقدري تتزوجي روحي قابليه يعني الإمام مع خوك و اطلبو منو يشكل جماعة نتاع خير و دخلو بعض أطراف العائلة معاكم و يروحوا أولا لأبيك يطلبوا منوا المجيئ لدار البلدية باش يحضر العقد نتاعك و إذا رفض يقولولو احنا رانا رايحين نزوجوهم و بنتك ما تسمحلكش يوم القيامة و تزوجي في أقرب وقت ممكن و خلي الباقي على الله يتولاه و ما تعتاقديش بلي راكي مذنبة من جهة أبوك و عيشي حايت مع زوجك و الله يحفظكم

[أبو أنس المسيلي]

أسال الله ان يفرج كربك ... ويعوضك خيرا