يناير على الأبواب ماذا تحضرون له ؟

[ام ريان]

سيحتفل الشعب الأمازيغي والجزائري برأس السنة الأمازيغية يوم الخميس 12 جانفي لذا اطلب من كل عضوة ان تكتب وصفة خاصة بالمناسبة والمنطقة سواء اكلة شعبية ام حلوى وشكرا وكل سنة وانتن بالف خير اسقاس امقاز

[my lamis]

مشكورة ختي على هذا الموضوع باش نعرفو تقاليد بعضانا
حنا عادتنا نديرو الطعام بالجاج ولا الرشتة بالبيض مغلي كل واحد يدي زوج حبات و كي نتعشاو نجيبو المخلط راهو باين كوكاو حلوى شيكولا جوز ..... بلا ما ننسا الفاكية و عندنا عادة ثان كي نكونو ناكلو فالمخلط نقيسو القشور تاع الكوكا و الجوز .....فالأرض و نخلوهم كي نجو رايحين نرقدو نلموهم و إذا كانت دار زيادة تخليهم للصباح و ثان كاينة عادة أخرى الطعام اللي يبقى مالعشا أمي دير تعبرو بيد وحدة ترفد و تحسب شحال كاينة من حفنة يد و تخبيه و الغدوة من ذاك تعاود الطريقة و تشوف إذا صابت الزيادة تقول عام تاع خير و العكس و ثان الماعن تاع العشا منغسلوهمش نخلوهم للصباح
بكري ثان كانت عادة مليحة نمدو قاع للجيران و نتبادلو عشا بعضانا بصح هذا الوقت يحسراه تبدلت القلوب
أما بالنسبة للقاطو حنا ميش من عادتنا قاطو مميز لهذي المناسبة بصح إذا حبينا نديرو حاجة حلوة باش عامنا يدخل حلو
هذي هي عوايدنا ختي و نشالله أخواتنا يشاركونا

[ام ظافر]

انا عرفت هذه العوايد غير هنا في ولاية النعامة كل وين يلحق الناير او خشوش العام مثل ما يسموه هنا يشمخو من قبل شوي لوبيا وحمص وعدس وجلبانة وقمح وفول ويطيبو بيهم ليلة الناير مردود او عيش او طعام غليظ مع الخضر واللحم وفي الاخير يرميو معاه حبات تمر غير قليل ما تبدلش الطعمة تاع العيش
ويحاولو يرسلو منو للجيران والاهل ويذوقو من بعضاهم . ويسهرو بالخلطة تاع المكسرات والتين الجاف والحلوة والبلوط ويستبشرو بالعام الجديد وكل عادة عندها معنى عندهم

[*أم كوثر*]

هدي ثقافة جديدة عليا
عموما سمعت بيه العام الماضي فقط هنا لا نسمعو بيه و لا نحتفلو بيه
كما يقولو اسقاس امقاز
ومنكم نتعلموا

[جوهرة الايمان28]

الله يبارك هاذا كل صاير في بلادي وماعلباليش

هذا جديدة مانعرفهاش ؟؟؟؟؟؟؟؟؟



على العموم بصحتكم كل عام ونتوما بخير حنا نحتافلو بمحرم وعاشوراء برك

تحياتي

[zamilio]

السلام عليكم احنا عادتنا انديرو طعام بالجاج او الخليع (هو لحم نيبسوهبالملح)ونديرو المسمن ولا سفنج ونشرو الحلويات والمكسرات وندعو ربى يكون عام خيروانشاء الله اكون عام خيرعلى جميع المؤمنين

[فرح العمر]

انا نعرفو بصح مانيش مالفه نحتفل بيه بصح هاذا العام ان شاء الله رانى معوله نحتفل بيه و راح نهز اكثر وصفه تعجبنى و نطبقها و واش رايكم كل واحده تبعث تطبيقها نهار 12 يناير

[طائر النورس مغتربة]

حنا في عاداتنا اليوم العاشر نديرو فيه الشرشم لي هو الفول والقمح طايبين فلماء بعد تنقيعهم لمدة يومين واليوم الحادي عشر نطيبو الجاج بطعام ولا العيش اي البركوكس وفي اليوم الثاني عشر نديرو الخالوطا ونستناو هدا النهار بفارغ الصبر اي تتكون من مختلف المكسرات والفواكه الموسمية التمر الدراجي وو نحطو الخالوطا في طبق كبير
وكبير العايلة هو لي خلط الطبق ويمد كل واحد حقو ناكلو ومن بعد كل واحد يخبي حقو المتبقي تحت المخدا ههههه فينا عادة باش مانسرقوش بعضنا بعض اه ما احلاها ذكريات شكرا لكي ام ريان لطرحك الموضوع

[** موحدة 02 **]

حنا كنا نحتافلو بيه في الدار و من نهار سمعنا بللي راه ما يجوزش بطلنا

[ريحانتي]

حنا مانحتافلوش بيه
سمعنا بلي لا يجوز

[الكرناوية]

السلام عليكم
حنا في عين الدفلى نديرو في الليل المردود بالجاج ونحمرو الدجاج و كاين لي يدير الطعام بالدجاج ونديرو الكور و هو ماوش معروف بزاف و يشبه للمعكرة تاع الغرب وهذه طريقته : نحمص السميد المتوسط و نحمرو كيما تاع الطمينة ونزيدولو الغرس يكون منقي و كلما كثرتي يجيك مليح + شوية عسل + شوية زيت ( ماعندناش عبر معين في هذه الوصفة ) + السكر حسب الذوق + الزبدة و كاين لي يدير فيه شوية زبيب + شوية راس الحانوت + شوية فلفل أسود و تلميه بالبيض حسب الحاجة
حذاري تكثري السكر و البيض لأنه يجيك يابس من بعد تكوريه كرات متوسطة و تفوريه بصح ما تحطيش الكرات فوق بعضها ، مدة الفوران من 7 حتى 10 دقائق و ناكلوه بعد ما يبرد و الله غير يجي يهبل هذاك واش يستناو في ناير
و نديرو كذلك المخلط و الحلويات و الكبير يقسم بصح العادات هذي نقصت بزاف ماهيش كيما الزمان .

[azade]

موضوع جميل أختى حنا نديرو الرشتة بلجاج و السفنج و الشاى المكشرات للسهرة و الفواكه......الخ

[حلم جميل]

انا مندير والو
بصح جارتي تبعثلي لغريف كل عام
مالا نهار لخميس نسناها ههه

[ام كمال]

السلام عليكم احنا تانى نحتفلوبصح ماشى شرط نهار 12 لا انا دايما يا نقدمه يا ناخره المهم ليس بالضبط نهار المطلوب لانى سمعت انه بدعة انا ندير من اجل ادخال البهجة والفرحة للبيت لا غير ندير طعام والبيض وكامل الخضرا فى القدرة ودجاجةكاملة وندير البيض ونخلط المخلط والفاكهةمن كل الانواع ونخرج للجيران وللاهل ونعتبره صدقة فى سبيل الله ونجوزو ليلة زاهية بالضحك وحكايات وقت فات كانو يقلو ما يغسلوش ماعن انا لا من بعد العشاء نغسل ونخمل مطبخى ونروح نرقد ويبقى هداك المخلط كل ليلة ناكلو تقريبا 4او5 ليالى واحنا نقصرو مع مخلط ان شاء الله الصحة والعافية لكم جميعا وكل عام نحتفلو نزيدو ربي يحفظنا ويحفظ امتنا ويحفظ بلادنا

[امراة لاتقهرها الاحزان]

سلالالالالالالالالام
حنا نحتافلحو فيه ولكن ماشي نقدسوه هوا مجرد قررناه يوم نتاع العام نتاعنا المقصووود انو
حنا كل عام طيح العرضة في دار معينة ونتلمو وناكلو ونضحكو ونروحو اذن المقصود عندنا حنا في هاذ العام
انو نتمناو هاذ العام دوم محبتنا ونحاولو نلمو بعضانا في هاذ الوقت الصعيبة

نرجع للموضوع حنا نديروووو شخشوخة يعني المورقة واكيد سلايط وديسير الي كان اما القاطو حنا لالا
ومن زهرنا هااااااااااااااااااااااااااذ العام دالتنا حنا الى راح نعرضووووووووووووووووووووووووووووووووو
هههه
موضوع مميز شكرا

[chawiya]

السلام
احنا نديرو نهار 12في الليل بربوشة بالخليع و نسموه اليوم القديم
و غدوة هديك اي شيء باللحم الجديد و ما نديروش اي نوع من انواع الطيور لازم لحم احمر و نسميوه اليوم الجديد يعني اساميهم بالشاوية و انا ترجمتهم بالعربية و نزيدو الشرشم كاين الي يديرة بالمرقة اخنا نديروه حلو نسميوه اخلاصت هي قمح طايب بعد مايطيب نصفيوه من الماء و نخلطوه مع شوية غرس و زبدة الحرة و الروينة او البسيسة و تجي كل حبة قمح فيها شوية غرس و بسيسة
تقريبا الناس في باتنة (ثنية العابد)و لات ماتحافظش على هده العادات الي ادا كانت فايت الستين مثل الولدة لحد اليوم مازالت محافظة و بقينا مثلها

[اللؤلؤة النادرة]

الإحتفال به حرام ولا يجوز......... المسلمون لهم عيدين عيد الفطر والأضحى