الطمينة في انحاء البلاد

[yasmina dz]

السلام عليكم

قربت الزيادة ديال أختي ومانكذبش عليكم ما نعرفش ندير الطمينة قلت تساعدوني

حابة نعرف كيفاش نطيبها

كاين نتاع الحمص و السميد و مرة ذقت عند وحدة بالخبز يابس مرحي

ارجو اخواتي تساعدوني اي بأي وصفة نتاع الطمينة

باقيلها قل من شهر دعولها تقوم بالسلامة

شكرا مسبقا

[*أم كوثر*]

ربي يقومها بالسلامة
عندنا في الشرق نديروها بدقيق القمح
نحمصو القمح و نرحوه
ديري عسل و زبدة يسيحو ع النار و تضيفي دقيق القمحو خلطي على النار كي تتجانس نحيها و حطيها في صحن و زينيها بالعسل من فوق و المكسرات و حلوة الترك

[yasmina dz]

ربي يحفظك ام كوثر نجم ندير الحمص في بلاصت القمح ؟؟؟

[***star***]

حنا في الغرب نقولو تقنتا ولا طمينة
تgلي السميد المتوسط في مقلات
من جهة نحضري خليط بالعسل والزبدة وتسقي السميد وتزيني بالقرفة والمكسرات ودراجي
بالاطبع كل عائلة او منطقة تختلف طريقتها ولديها لمستها الخاصة

[*أم كوثر*]

الله يسلمك اختي هنا كاين اللي يخلط حمص و قمح و تجي بنينة تهبل

[yasmina dz]

حتى انا من سيدي بلعباس و شكرا على طريقة السميد مشكورة

[yasmina dz]

شكرا ام كوثر على التوضيح

[أم نديم]

احنا في الاوراس نقولولها الزريز ونديروها بالقمح المقلي والحمصالمقلي ثاني وانا فيالزيادة انتاعي الاخيرة زادت يما فيها الروز والجلجلانية محمصين وجات روعة الناس كل عجبتهم ويسقسيو عليها ومع العلم انو تخلطيم مع الزبدة والعسل السخونين

[ivaoran]

السلام عليكم

حنا في الغرب نسموها تقنتا
taknetta

طريقة تحضيرها سهلة جدا

اقلي السميد المتوسط في طاجين ولا مقلة
و وجدي الزبدة مع العسل

و ثم خلطي كلش
و حطيها في اطباق و زينيها بالقرفة


كاين اللي يحيرو الفرينة و يخلطوها مع الكاوكاو المهرس
و يضيفو ليها الزبدة و السكر و تزين بالدراجي و المكسرات


على فكرة انا عمري ما عرفت ان الطمينة تندار بالحمص
ممكن تقولولي كيفاش تندار؟؟
مشكورات مسبقا

[yasmina dz]

أم نديم (http://www.djelfa.info/vb/member.php?u=334974)
شكرا حبيبتي على الوصفة كثرا مين فيها الجنجلان حيت عندي كمية كبيرة منه و ما عرفت واش ندير بيه

ivaoran (http://www.djelfa.info/vb/member.php?u=290637)

صحا بنت الغرب نحمصو الحمص حبات و القمح حابات و نطحنوهم و نغربلوهم و نخلطوهم و نحمو العسل و الدهان و و نضيفولهم الخليط الحمص مع القمح ماتجيش جارية و ما تجيش يابسة تجي هايلة

[ivaoran]

أم نديم (http://www.djelfa.info/vb/member.php?u=334974)
شكرا حبيبتي على الوصفة كثرا مين فيها الجنجلان حيت عندي كمية كبيرة منه و ما عرفت واش ندير بيه

ivaoran (http://www.djelfa.info/vb/member.php?u=290637)

صحا بنت الغرب نحمصو الحمص حبات و القمح حابات و نطحنوهم و نغربلوهم و نخلطوهم و نحمو العسل و الدهان و و نضيفولهم الخليط الحمص مع القمح ماتجيش جارية و ما تجيش يابسة تجي هايلة


شكرا لك اخيتي بارك الله فيك
نجربها و نردلك الخبر

[yasmina dz]

ان شاء الله اختي

[أم أسرار]

بسم الله الرحمان الرحيم
أختي ربي يطلع أختك على 1000 خير و إنشاء الله سلاك و صفة الناس
حنا طمينة نعملوها كالأتي
1-تحمصي دقيق متوسط و باش تعرفي أنو خلاص تحمص أحكمي شويا و دوقي كي يقرمش بين أسنانك تعرفي أنو تحمص مليح و كذالك يكسب لون محمر
2-تاخدي كاسرول و تحطي العسل و السمن حتى يدوبو و ضيفي القليل من القرنفل المرحي و خلطي كلش
3-نحي الكاسرول من فوق النار و فرغي الدقيق لي حمصته في الداخل و ملازمش تكتري باش ما جيكش ناشفة
وبصح و الهنا أتمنى ان تجربها و تنجحي فيها و ارجو اني وفقت في الشرح

http://img104.herosh.com/2011/12/06/369798084.jpg

[yasmina dz]

حب و ويصال (http://www.djelfa.info/vb/member.php?u=292139)

شكرا اختي راكي شهيتيني

[أم أسرار]

و الله كيف كيف حتى انا تشهيت و بإذن الله لعشيا نخدمها فأنا نموت عليها

http://img105.herosh.com/2011/12/06/768437478.gif

[chiraz16]

ساء النور حنونة ربي يسلك اختك على خير او يرزقها بالدرية الصالحة يارب

بالنسبة للطمينة احنا في العاصمة نحمسو السميد وسط (تشيشة موايان) في المقلة او الطاجين بدون توقف حتى تكتسب اللون الدهبي (بالاكي تحمريها )

ثم تاخدي (كيلة زبدة مضاف اليها ملعقة اكل سمن+ كيلة عسل ) ودوبيهم مع بعض وهدا هو السر باش تجي بنينة اوماتجيكش الطمينة حلوة بزاف)

وخلطي كلش بلا ماتعقديها بزاف لازم تبقى جارية شوية باش ماتيبسلكش وادا حبيتي زيدي القليل من المكسرات ( بودرة اللوز او الكاوكاو

اوالبيستاش والقليل من حلوة

الترك بالخلطة اتزيد في البنة وشبحيها حسب دوقك انا نحطلها حلوة الترك ونرش عليها مكسرات و ليدغاجي انا هكدا درتها في السبوع اتاع

ولادي وتجي بنينة

اوماتقهمش جربي او رديلي بالخبر

نعطيق عفسة سيي طبسية صغيرة من كل طريقة عجباتك ملي طاوهملك الاخوات او ديري الي عجباتك هكدا ماتحيريش بلا ماتنساي الي عندهم مرض السكر مساكن

يشتهيو او ايقدروش ايدوقو عيب علينا ننساوهم انا في عيلة راجلي كاين بزاف الي عندهم السكر صغار وكبار همالا نشري العسل الخاض بيهم ونديرلهم حقهم حتى

الحلوة نديرلهم مودال ليهم و مشروب لايت اسمحيلي حنونة على تدخلي والاطالة فهو مجرد اقتراح٠٠٠سلام

[fati 17]

احنا ايصا في الشرق ندروها بالقمح والحمص والكاوكاو مقليين ومرحيين مع العسل والزبدة والجلجلان ربي يقومها بالسلامة

[yasmina dz]

ساء النور حنونة ربي يسلك اختك على خير او يرزقها بالدرية الصالحة يارب

بالنسبة للطمينة احنا في العاصمة نحمسو السميد وسط (تشيشة موايان) في المقلة او الطاجين بدون توقف حتى تكتسب اللون الدهبي (بالاكي تحمريها )

ثم تاخدي (كيلة زبدة مضاف اليها ملعقة اكل سمن+ كيلة عسل ) ودوبيهم مع بعض وهدا هو السر باش تجي بنينة اوماتجيكش الطمينة حلوة بزاف)

وخلطي كلش بلا ماتعقديها بزاف لازم تبقى جارية شوية باش ماتيبسلكش وادا حبيتي زيدي القليل من المكسرات ( بودرة اللوز او الكاوكاو

اوالبيستاش والقليل من حلوة

الترك بالخلطة اتزيد في البنة وشبحيها حسب دوقك انا نحطلها حلوة الترك ونرش عليها مكسرات و ليدغاجي انا هكدا درتها في السبوع اتاع

ولادي وتجي بنينة

اوماتقهمش جربي او رديلي بالخبر

نعطيق عفسة سيي طبسية صغيرة من كل طريقة عجباتك ملي طاوهملك الاخوات او ديري الي عجباتك هكدا ماتحيريش بلا ماتنساي الي عندهم مرض السكر مساكن

يشتهيو او ايقدروش ايدوقو عيب علينا ننساوهم انا في عيلة راجلي كاين بزاف الي عندهم السكر صغار وكبار همالا نشري العسل الخاض بيهم ونديرلهم حقهم حتى

الحلوة نديرلهم مودال ليهم و مشروب لايت اسمحيلي حنونة على تدخلي والاطالة فهو مجرد اقتراح٠٠٠سلام

ربي يحفظك اختي و ماطولتي ما والو العكس راكي نبهتيني لحوايج بزاف منهم المرض مساكن ربي يخليلك عايلتك

شكرا

[oum ali khalifa]

كل واحد وطرقتو حنا ندروها =نحمصو القمح مع شوية حمص نرحيوهم رطبين نخلطو معاهم كاس كوكاو كاس جلجلانية هاذو كامل مرحين نذوب زبدى مع العسل مع شوية ماء ورد نكب المواد الجافةمع الزبدة والعسل نخلط مليح حتى يتشربالمواد السائلة نضع في صحن صغير ونزينها حسب ذوقكي وباصحتكم

[yasmina dz]

شكرا اختي الغالية ربي يخليك على الوصفة

[هاجر 76]

الله يقوم اختك بالسلامة ويفرحكم
احنا طمينة فى الغرب نقولولها التقنتة وعائلتنا كاع نفورو السميد اولا تم نgلوه فى الطاجين ومن جهة نحضر المكسرات من الافضل الجوز وحلوة الترك وندبو الزبدة ونخلطوها مع العسل ومن الفوق اما نديرو القرفة مع الدراجة او نشبحوها بالمكسرات

[yasmina dz]

شكرا حبيبتي

[zizou74]

حنا في بلادنا بلاد الشاوية نحطو في كاسرونة الغرس بعد ماتكوني ناحيتيلو نوى نتاعو و الزبدة على نار قليلة حتى تذوب الزبدة معا لغرس مليح و ف نفس الوقت في مقلات تحمصي السميد حتى يتحول اللون نتاعو للبني تحطيه في قصعة نتاعاك و تحطي فوقو الزبدة و الغرس و تعجنيهم مليح تجي طرية و بنينة

[mama43]

ana men ain defla hna nfawrou smid chwiya metwaset bechwiya melh apres nhamsouh fe makla hata yweli doré apres nbesouha bezebda mlih w ndirlha halwet tork ki techrob zebda sakhni 3ssila y dirilha men l fouk aye naw3 men mokasaret w bsahetkoum

[OU SS AMA]

الله يقومها بالسلامة ويرزقها الذرية الصالحةيارب حنا نسميوها هاكذا البيسيسة والطريقة مثل لي وضعتها الاخت ام كوثر فقط نصيحة لما تخدمي البسيسة لنافس مديريلهاش الحمص لان النافس تصاب بالامساك يؤثر عليهاومايساعدهاش لذا البسيسة الخاصة بالنافس عبارة عن قمح محمص + عدس محمص نعم عدس مفيد جدا ولديد احنا نطحنوه برا +ملعقة صغيرة زعتر مرحي رطب + شوية كوكاو محمص ومرحي دوبي الزبدة تاع البقرة وخليها تركح ونحيلها الحليب وحطيها في بلارة زجاجية واستعمليها وعلبة عسل الشفاء والطريقة ذوبي الزبدة + العسل +وضفي القمح المرحي مخلط مع العدس وضفي ملعقة كوكاو تكوني رحتيه لتو جي ريحتو مليحة وجديد +ملعقة الزعتر فائدة الزعتر علبالكم بلي النافس يديرلها لوجاع تاع الام وهكذا رايحة تفيدها طبعا لنافس برك مش لضياف هههههههه واتمنى نكون افدتك ولو بالقليل وسلميلي عليها وقوليلها قالتلك ام اسامة قراي سورة مريم كي ينوضلك لوجاع والله عن تجربة تسلكي على خير وجيك الزيادة ساهلة

[الصوامعية]

حنا نسموها الطمينة
أول مرة نسمع الطمينة يديروها بالخبز اليابس .

[wafa.wafa]

احنا الطمينة نتاعنا نففوروها ولما تنشف نحمسوها ونحطولها الزبدة ال\ايبة ونبسوها مليح حتى تدخل فيها الزبدة ومن بعد نزيدولها العسل يكون خفيف شوية ولما تشربو نزيدو لها العسل الثقيل ونخلوها منالاحسن ليلة كاملة ومن بعد ضفيلها المكسرات المطحونة وحلوة الترك ومن فوق لك حرية التزيين وربي يسلك اختك ويفرحها