نقاش دار بيني وبين خطيبي [الأرشيف] - منتديات الجلفة لكل الجزائريين و العرب

imane1

2011-07-07, 22:37

السلام عليكم ورحمة الله وبركاته

أولا باركولي اتشوفو كي نجحت في الباك

الحمدلله اديتو ب 15

:)

صلب الموضوع :

كنت أتحدث الى خطيبي فتناولنا موضوعاً لنتناقش فيه (وهذه عادة جيدة أنصح الجميع بها لانها

تخلوكم تعرفو طريقة الاخر في الحوار والجدال وتعلمكم مبادئ مليحة وتاني تخليكم تكتشفو شخصية الاخر)

المهم

خطيبي قالي تخيلي راكي في الدار وعيطلك زوجك اللي ماشي من عادتو يجي يفطر في الدار الا نادرا

وقالك اليوم نجي على ال12 نتغدى ..

لحقت ال12 وفاتت والزوج هدا ماجاش

واش تكون ردة فعلك ؟

أجبت باندفاع : " ناكلو "

:1:

فصمت لبرهة ثم قال : دون أن تعرفي اعذاره ؟

قلت على عجل : لا عذر يُبيح له تركي انتظر دون ان يحمل هاتفه على الاقل

يتصل ويقول لي يا فلانه راني مشغول .. زوج كلمات وهي فرات

قالي لما لا تتصلين أنتِ وتسألين عن سبب عدم حضوره؟

قتلو ما انتصلش طبعا ... المنطق والعقل يقولو بلي هو اللي يتصل

هو اللي اتأخر

هو اللي خلف الموعد ديالو ...

إذا هو المطالب بالتوضيح

قالي بل المنطق والعقل يقول انه لا حساب بين الزوجين

وأن الحكيم من الناس لا يخلق مشاكلاً من لاشيء

قتلو : مشاكل ؟؟؟

قالي طبعا ، يدخل الزوج لعشيا يلقى مرتو مشنفة عليه

وما تهدرش معاه

يزيد يعيى كتر ، وادا كان داخل بنية الاعتذار يتقلب مزاجو ويخرج يقضي كاش شغل اخر

قتلو يعني هو يتصل بزوجتو يقوللها نجي نفطر

هي ادا كانت هداك النهار ناوية تتغدى بشوية خبز وكاس ما

اتنوض اطيب مالذ وطاب وتقعد تستنى غير في ال 12 <<<<السيد ماشي كل يوم يفطر في الدار :1:

وامبعد هو يطيحلو شغل ما يروحش للدار وما يعيطش لمرتو

ويخليها تستنى في الفراغ ما يقيمها ما والو

وكي يدخل للدار يحب يلقاها تضحك هاهاها .. انا شخصيا مانقدرش ..!

قالي صحا كي تقلقت تعطيلو هي ...ياك كيفكيف!! بالعكس كي تعيطلو يفرح كتر

يزرب يكمل شغلو باش يدخل للدار

تعطيلو ثقة في نفسو قال مازالت أعتمد عليك ..

وكي تعيطلو وحدو وحدو يقوللها يافلانة اسمحيلي والله غير كنت جاي بصح الله غالب

قتلو الله غالب هادي كيفاش ، الله غالب ما قدرتش نحكم التلفون ونقولك زوج كليمات : راني مشغول ؟

انا مانحبش حاجة واسمها الانتظار ..

وهو اذا حاب يتنهنى يتصل ويقوللها ما نجيش وهي تتفهمو بلي كانت وما اديرلو حتى مشكل !!برك يعيط

قالي صحا انا عندي بزاف ناس نتعامل معاهم يعطوني موعد ومايجوش فيه

نتصل بيهم ونسأل كيفاش وماندير حتى حاجه في بالي ..بالعكس يفرحو كي نسقسي عليهم

قالي لوكان انتي كيفاش تتصرفي ؟

قتلو : اذا كان الشخص مولا كلمة وماشي من عوايدو اخلاف الوعود والمواعيد

اذا اتأخر راني نعيطلو نسقسي واش مالسبه

لكن اذا موالف ينشغل ومنين يعطي موعد ما يلتزمش بيه ما نعيطش

واذا عفست على قلبي وعيطت راهي مزية ودرتها ، لان الواجب هو ان يتصل هو لا انا

قالي لغة الواجب هذه لا تمشي مع الاقارب والاحباب والصحاب

تمشي مع البراني ربما ...

واذا قلتِ لن اتصل فذلك لانك لا تعرفين طبيعة عمل الرجل

ومعنى انشغال الرجل

حين ينشغل الرجل ينسى الدنيا بأكملها

يسمح في كرشو

الضغط اللي يكون عليه ينسيه في كلش

وكي يدخل للدار ماذابيه زوجتو ما اديرلوش مشكل من لا شيء

تعطيلو على الاقل فرصة باش يشرح الموقف ..

المهم ، الآن النقاش مفتوح أمامكم للتعليق والتعقيب والاثراء ..

هل يجب على المرأة ان تتصل بزوجها وتسأل عن سبب تأخره(بفرض انه متعود على التأخر عن مواعيده )

أم ان الزوج هو الملزم بالاتصال والاعلام على الاقل ، طالما انه هو صاحب الخلل ..؟

أي اضافات اخرى مرحبا بيها

abdel02

2011-07-07, 22:48

هده هي مشكلة اغلب بنات الجزائر...يعتقدون ان الراجل هو الواجب عليه ان يتصل وان يبادر وكانها انزلت في القران...

نورسين.داية

2011-07-07, 22:50

أولا مبروك و ألف ألف مبروك على النجاح
أما قضيتكي عزيزتي كاالتالي :
سوف اعطيك حل أراه الأفضل من كل هده التساؤلات
وجبب ان تتفقى مع الزوج بحكم العادة أنه لو تجاوز الزوج 12:30 و لم يعد للمنزل فإعلمي أنه لن يأتي ....................و الغداء الدي حضرته و تعبتي من أجله
أتركيه للعشاء و إنتهت القضية ههههههههههههههههههه أرجو أني حللت الإشكال (لا تشناف لا خسارة و لا هم يحزنون ) و لا تنسي أن الإتصال أحيانا يزعج الزوج
و أنا صراحتا لست من النوع الدي يتصل
أرجو اني أفدتكي و لو بشيئ بسيط بارك الله فيكي عزيزتي

abdel02

2011-07-07, 22:55

و أنا صراحتا لست من النوع الدي يتصل

اكتشفت شيء جديد اليوم..

abonement

2011-07-07, 23:02

السلام عليكم و رحمة الله تعالى و بركاته أختي الكريمة...
أولا :مبارك عليك شهادة البكالوريا و نتمنى لك مزيد من النجاحات في مشوارك الدراسي
ثانيا : أثناء القيلولة كنت أستمع إلى حصة في الإذاعة الوطنية و كان موضوعها حول الطلاق
و من خلال الإستجوابات التي قام بها صحفي الإذاعة مع ضحايا الطلاق تعجبت لما وصل إليه
حال مجتمعنا الجزائري من تفكك أسري لأسباب تافهة فعلى سبيل المثال لا الحصر
قالت إحدى السيدات أن زوجها طلقها لأجل أنها أحرقت طعام الفطور...
ما أود الوصول إليه أختي الكريمة هو أنه لا يجب على المخطوبين أو الزوجين أن يتخذوا من
هاته الأمور التافهة معيارا و يجب عليهم أن يغضوا الطرف عن بعض الأخطاء من كلا الجانبين
لأن الكمال لله عزوجل...
مجرد رأي.

نورسين.داية

2011-07-07, 23:05

اكتشفت شيء جديد اليوم..

هذا على إعتبار أن الزوج ينزعج من الإتصال ، إذ يكون الإتصال عادة إلا لضرورة ملحة و ليس من أجل الغداء
لأنه علم جيدا أنه وقته و تأخره دليل عدم ألتزامه أما لإنشغال أو بسبب المواصلات أو أي سبب آخر
المهم هو ف التفاهم مسبقا لا أقل و لا أكثر ...........أليس كذلك ؟؟؟؟؟؟؟؟؟؟؟ هههههههه

abdel02

2011-07-07, 23:07

هذا على إعتبار أن الزوج ينزعج من الإتصال ، إذ يكون الإتصال عادة إلا لضرورة ملحة و ليس من أجل الغداء
لأنه علم جيدا أنه وقته و تأخره دليل عدم ألتزامه أما لإنشغال أو بسبب المواصلات أو أي سبب آخر
المهم هو ف التفاهم مسبقا لا أقل و لا أكثر ...........أليس كذلك ؟؟؟؟؟؟؟؟؟؟؟ هههههههه
والله اضحكتني وانا مانيش قادر...

البتول سمية

2011-07-07, 23:14

ألف مبروك على النجاح المزيد من التفوق إن شاء الله
لازم تنازلات بين الاثنين مرة هو و مرة هي

المتوكل محمد

2011-07-07, 23:22

الوفاء بالوعد واجب شرعا ومن حصل له ظرف لم يستطع الالتزام بالوعد فيجب عليه الاعتذار ولايجوز له ان يترك الآخر ينتظر
والحكم الشرعي لايفرق بين ذكر ولا انثى وبين موعد بسيط ولا مهم فالوعد لايتجزأ والوفاء به واجب
وفقنا الله تعالى لكل خير

روح القلم

2011-07-07, 23:28

السلام عليكم اختي الكريمة
و حقا إستمتعت بموضوعك و طرحك و من الاخر هذا الخطيب يريد أن يفهمني بعض الامور

و هي عدم التسرع

عدم تأويل الأمور إلى أمور أخرى خاطئة أو بعيدة عن الواقع

و أيضا أن تكوني أكثر تفهما لهكذا ظروف و حتى ما أبسط من ذلك

أما مسألة الوعد أعتقد ان الوعد يقطعه في أمور اكثر أهمية و ليس في أمور بسيطة و عليك أن تضعي في الحسبان أن الله هو الذي يخلق لنا الظروف بمشيئته فلا تصري كثيرا عليه بانه قد أخلف وعده لك لكن فقط عليك أن تتفهمي ظروفه و أن تحرصيه على الاهتمام بكل التفاصيل بينكما حتى لو كانت تافة ... و طبعا بأسلوب رقيق - نعرفك تقدري ديرها -

و مبارك عليك النجاح و بالتوفيق في حياتك

تقديري

عُضو مُحترم

2011-07-07, 23:35

خطيبك يفكر بالمنطق و تفكيره سليم و يُعجبني

و يكره المشاكل

و اذا خلقتي مشكل من شيء تافه كهذا ( تافه في نظري انا)

فانتي ستفسدين عليه حياته

اعتقد انه كان واضحا في هذه النقطة

لا تُغفليها

خطيبك يحب التفكير المنطقي و يكره المشاكل
===========================

عُضو مُحترم

2011-07-07, 23:36

ممكن انتي مقلقة و زعفانة كي ما جاش على 12:00

و هو ربما راه في المستشفى صرالو حادث مرور؟؟؟

sarah

2011-07-07, 23:37

السلام عليكم

مبروك عليك و لوالديك حنونة الباك ان شاء الله تفرحي في حياتك ..

عااااااااااااااااااااااااااااااااااادي جدا نتصل ونسقسي عليه ياك هاداك راجلك ..العكس تبانلي هو خطاء لوكان ما تسقسيش عليه ...هادي مافيش نيف ولا ..بالاك صراتلوا حاجة ولا

يا سيدي عيطيلوا واسمعي منوا شا يقولك ومن بعد الا راح تزعفي وهو غادي يجي يراضيك وهادا هو الحال...........عادي ختي ماكانش حدود بين الزوجين ....

بالتوفيق ختي مع خطيبك .ان شاء الله

سلااااااااااااااام

^^prIncessA

2011-07-07, 23:55

nti chaki khssra hakoliw khalilo hakko ki yji sakhnihlo

عُضو مُحترم

2011-07-08, 00:04

nti chaki khssra hakoliw khalilo hakko ki yji sakhnihlo

:19::19::19::19::19::19::19::19::19::19::19::19::1 9::19::19::19::19::19:

wassila21

2011-07-08, 10:57

أختي مانوافقكش الرأي، بما أنه أعطالك كلمة و قالك نجي في هذاك الوقت، بالحق تتقلقي عليه و أنتي تبادري و تعيطيله، فلا سمح الله صراله حادث، و أنتي راكي تخممي في حاجة أخرى و راكي مقلقة منه بما أنه ماوفاش بكلمته حتى يجيك خبره ،ماشي تندمي مع الأخير؟؟؟؟؟؟؟؟

أنا خطيبي لوكان يغيب نصف نهار و مايعيطش نتقلق و نروح نجري نعيطله، بالعكس راح يحس بالإهتمام ديالك، و لكن ماشي تتهجمي عليه و تبداي تشتكي، بالعقل قوليله غير الخير؟؟؟ تقلقت عليك هذا ماكان؟؟؟ ماشي تدخلي عليه وين راك ؟؟؟؟؟ و تتمسخر بيا و ماعندكش كلمة، التم تسمعي مالايرضيك

أختي نحي هذه الفكرة من راسك، إذا راكي حابة تعيشي متهنية

ياسين البرج

2011-07-08, 11:05

الذي سبق الاخر أخذ الأجر
وتستمر الحياة الجميلة

* زهرة البنفسج *

2011-07-08, 11:08

المشكل موش تعيطي او لا

المشكل كي تعيطي وما يهزش عليك

ثمة وين تجني وتكسري لبورتابل وتقعدي توكلي في روحك :mh5858::mh5858::mh5858:

وكي يروح على 3 وتسقسيه واعلاه ما عيطيش :confused::confused::confused::confused:

يجيبهالك بضحكة :D:D:D:D ماعنديش لكريدي وما قعتش باش نشرجي

انت : واعلاه مالا ما هزتيش عليا :mad::mad::mad::mad:

هو: ياااااااا ما سمعتوش عملتو مود سيلونسيو ونسيتو:mh93::mh93::mh93:
انت : ولغدا لي من الصباح وانا ندير فيه :(:(:(ه:(

هو : ما عليش ديريلي سندويش نديه معايا اني زارب وجماعة يستنو فيا

تروحي للكوزينة٠٠٠٠وانت قريب تكملي تسمعيه يعيط

اعملي 3 سندويشات خرين لجماعة لي معايا :24::24::24::24:

واش تعملي :eek::eek::eek::eek: (الصبر)

اسفة لاني طولت حبيت نلطف الجو قليلا

يا حنونتي بعد الزواج تتغير معادلة الحوار الهاديء الى مشاكسات متتكررة

تسمى البهارات ٠٠ساعات تكون بنينة وسعات حااااااااارة .............وتستمر الحياة

الف مبروك النجاح وربي يهنيك

قَاسِمٌ.قَاسِم

2011-07-08, 11:10

طرطرك الله يا صاحبة الموضوع

ناصرالدين الجزائري

2011-07-08, 12:44

حسب رأيي فإن كلا الطرفين أخطأ ..
المرأة لا يجب أن تغضب على زوجها اذا تخلف عن موعد دون اخطارها مع اصرارها عدم الاتصال به . لأنها لا تعلم الغيب و قد يكون حصل له مكروه أو أنه نسي بكل بساطة فالرجال عندما ينشغلون بشئ ينسون كل شئ " حقيقة علمية http://www.djelfa.info/vb/images/icons/icon10.gif "

و الرجل اخطأ عندما وعد زوجته بالحضور و أخلف . فكلفها عناء تحظير غدائه و انشغال بالها بغيابه عن الموعد فقد يكون رصيد الهاتف انتهى و لا تستطيع التصال به فهل يتركها مشغولة البال عليه دون أن يكلف نفسه عناء الاتصال بها لاخطارها انه سيتخلف . و ان غضبت فليس من اجل الغذاء بل لاحساسها أنه لم يقيمها حتى بكلمتين عبر الهاتف لطمانتها

كلا الطرفين أخطا لكن هذه ليس جريمة لا تغتفر و الواجب التعاطي مع مثل هذه الحالات بحكمة و تسامح و ان يحاول كل طرف اتخاذ الاعذار للطرف الثاني ... و لا يمكن اعتبار هذا الامر مشكل بل هو سوء تفاهم يحدث خصوصا لحديثي الزواج و مع الوقت يتعرف كل طرف على طبيعة الآخر و عيوبه و يتاقلم معها كان تعلم المراة ان زوجها ينسى الاتصال عندما بتأخر فتسصبح هي من تبادر بالاتصال . أو أن يعلم الرجل أن زوجته تغضب عندما يواعدها و لا يحضر و لا يتصل فيتحمل غضبها او يحاول تغيير عاداته ...
هذه هي الحياة الزوجية .. الصبر على عيوب الآخر و التاقلم معها و اعانته على تجاوزها بالرفق . و هذا لا يعني أن نعتبر أن أخطاء اي طرف لا تؤثر على الآخر لمجرد أنهم متزوجين فللصبر حدود و لا تكثر على الملوك حتى يملوك ...

imane1

2011-07-08, 12:54

هده هي مشكلة اغلب بنات الجزائر...يعتقدون ان الراجل هو الواجب عليه ان يتصل وان يبادر وكانها انزلت في القران...

أخي عادل ، مرحبا بيك

أنا كنت واضحة في طرحي أخي الفاضل انا لا أجادل في مسألة الاتصال (العادية )

انا راني نسأل على موقف كهذا ، وحبيت نتخيلوه ونتجردو من العاطفة تاعنا ونخمو بالعقل والمنطق

هل الزوج هذا اللي متعود يمد موعد وما يجيش فيه ويقول كلمة وما يديرهاش

ويخلي زوجتو تستنى ..

هل زوجتو مطالبة في كل مرة بالاتصال به للإطمئنان ؟

وتسمع منو في كل مرة نفس الاعذار : نسيت ، تغديت مع واحد ، عجزت نجي ..الخ

ولا هو اللي مُطالب يتصل بيها ويقولها يا فلانه ما نجيش .. يقولها برك هكذا ما قلنا يعتذر ما والو

انا في بالي انو لوكان يتصل

راح يخاليها تفهم بلي راجلها مولى كلمة ، وما يتغيبش هكذاك مهمل

اذا غاب فبعذره ..

نهار اخر كي هو يغيب ، او يتأخر .. هي اللي تهز التلفون وتسألو " غير الخير " ؟

تتقلق وتقعد تروح واجي في الدار وتقول " ماشي من عوايدو "

لكن اذا ماشي متعود يتصل بيها كي تكون تستنى فيه ومايقدرش يجي

يبرد قلبها وتقول موالف ..ماتفكرش في شيء تاني تقول اكيد كيما عادتو

(وتصرفات الزوج سبب هذا التفكير )

وادا قعدت تخمم مع روحها بالاك تولي تشوف بلي زوجها اللي دايما يوعدها وما يجيش

ماشي عاطيلها قيمة

فماااااااا المشكلة لو اتصل الزوج للتوضيح ؟ وهو الملزم بالاتصال حقاً ؟
<<<<<< ولا مشكلة في اتصال الزوجة لكن هي ماتكونش ملزمة ..

imane1

2011-07-08, 13:00

أولا مبروك و ألف ألف مبروك على النجاح
أما قضيتكي عزيزتي كاالتالي :
سوف اعطيك حل أراه الأفضل من كل هده التساؤلات
وجبب ان تتفقى مع الزوج بحكم العادة أنه لو تجاوز الزوج 12:30 و لم يعد للمنزل فإعلمي أنه لن يأتي ....................و الغداء الدي حضرته و تعبتي من أجله
أتركيه للعشاء و إنتهت القضية ههههههههههههههههههه أرجو أني حللت الإشكال (لا تشناف لا خسارة و لا هم يحزنون ) و لا تنسي أن الإتصال أحيانا يزعج الزوج
و أنا صراحتا لست من النوع الدي يتصل
أرجو اني أفدتكي و لو بشيئ بسيط بارك الله فيكي عزيزتي

مرحبا بيك أسماء :)

اسما اختي انا الموقف ما صراليش لانني لم أتزوج بعد (الطرح وضعية تخيلية بحتة من اقتراح خطيبي)

والحل اللي اقترحتيه مليح ومرضي ..

بصح صلب الموضوع اسماء ماشي مصير الغداء المحضر

هداك كي نحيرو فيه خلاص نروحو نصدقوه وهي فرات :1:

والاتصال الذي يزعج الزوج هو هداك الاتصال تاع " وين راك ؟" معامن راك ؟" واش راك ادير "

احنا رانا نسألو عن الاتصال الذي غرضه الاطمئنان على الزوج

الذي وعد بانه سيحضر للغداء ولم يأتِ (وعرف بلي ماراحش يروح وما اتصلش بزوجتو )

انا نشوف انو من اللباقة ان يتصل .. باش يعود زوجتو انو ما يغيبش بلا سبة

ما نظنش اني خرجت المألوف بتفكيري هذا :rolleyes:

imane1

2011-07-08, 13:06

السلام عليكم و رحمة الله تعالى و بركاته أختي الكريمة...
أولا :مبارك عليك شهادة البكالوريا و نتمنى لك مزيد من النجاحات في مشوارك الدراسي
ثانيا : أثناء القيلولة كنت أستمع إلى حصة في الإذاعة الوطنية و كان موضوعها حول الطلاق
و من خلال الإستجوابات التي قام بها صحفي الإذاعة مع ضحايا الطلاق تعجبت لما وصل إليه
حال مجتمعنا الجزائري من تفكك أسري لأسباب تافهة فعلى سبيل المثال لا الحصر
قالت إحدى السيدات أن زوجها طلقها لأجل أنها أحرقت طعام الفطور...
ما أود الوصول إليه أختي الكريمة هو أنه لا يجب على المخطوبين أو الزوجين أن يتخذوا من
هاته الأمور التافهة معيارا و يجب عليهم أن يغضوا الطرف عن بعض الأخطاء من كلا الجانبين
لأن الكمال لله عزوجل...
مجرد رأي.

وعليكم السلام ورحمة الله وبركاته ..ربي يبارك فيك (وفي الاخوة اللي باركولي من قبل )

أوافقك الرأي ..

الأسباب المؤدية للطلاق في وقتنا الحالي تافهة لا تستوجب حتى الغضب

ما بالك الطلاق

بصح انا نشوف بلي المراة هاذي اللي حرقت الفطور لم تتطلق بسبب حرقها الفطور

نظن كانت كاينة خلفيات اخرى للموضوع بينها وبين زوجها

وحرق الافطار ماهو الا القطرة التي أفاضت الكأس

من جهة أخرى

التغاضي عن الأخطاء والهفوات مهم

فالزوجة اذا اتصل بيها زوجها وقاللها ما نجيش

تطبيقا لكلامك " لا تنزعج ولا تجادل ولا تحدث مشكلا "

لان الموضوع ما يستهلش ...يعني نوافقك الكلام 100 بالمية

بصح كي ما يتصلش بيها خلاص

ويخليها تستنى في الفراغ (وماشي المرة الاولى اللي يدير هكا مثلا)

هل تُلام إذا انزعجت ؟ وتحاسب لأنها لم تتصل بهِ لتسأله عن سبب عدم حضوره ؟

imane1

2011-07-08, 13:09

ألف مبروك على النجاح المزيد من التفوق إن شاء الله
لازم تنازلات بين الاثنين مرة هو و مرة هي

الله يبارك فيك سمية

نعم مبدأ جميل ولازم لاستمرار الحياة

أشكرك على المداخلة

imane1

2011-07-08, 13:12

الوفاء بالوعد واجب شرعا ومن حصل له ظرف لم يستطع الالتزام بالوعد فيجب عليه الاعتذار ولايجوز له ان يترك الآخر ينتظر
والحكم الشرعي لايفرق بين ذكر ولا انثى وبين موعد بسيط ولا مهم فالوعد لايتجزأ والوفاء به واجب
وفقنا الله تعالى لكل خير

بارك الله فيك

نفس رأيي تماماً

كأنك الوحيد الذي فهمت ما كنت أرمي إليه

شكرا على المداخله الطيبه

imane1

2011-07-08, 13:16

السلام عليكم اختي الكريمة
و حقا إستمتعت بموضوعك و طرحك و من الاخر هذا الخطيب يريد أن يفهمني بعض الامور

و هي عدم التسرع

عدم تأويل الأمور إلى أمور أخرى خاطئة أو بعيدة عن الواقع

و أيضا أن تكوني أكثر تفهما لهكذا ظروف و حتى ما أبسط من ذلك

أما مسألة الوعد أعتقد ان الوعد يقطعه في أمور اكثر أهمية و ليس في أمور بسيطة و عليك أن تضعي في الحسبان أن الله هو الذي يخلق لنا الظروف بمشيئته فلا تصري كثيرا عليه بانه قد أخلف وعده لك لكن فقط عليك أن تتفهمي ظروفه و أن تحرصيه على الاهتمام بكل التفاصيل بينكما حتى لو كانت تافة ... و طبعا بأسلوب رقيق - نعرفك تقدري ديرها -

و مبارك عليك النجاح و بالتوفيق في حياتك

تقديري

أختي الفاضلة سعدت بتواجدك كثيراً

قلتِ أن الوعد الذي يجب ان نفي به يكون في الامور العظيمة فقط ولا دليل على ذلك لا من عقل ولا من دين

وقلـت بانه يجب علينا تفهم ظروف الاخر وعدم لومه وأوافقك الرأي تماماً

ولكن نتفهمو ظروفو كي يقولنا عليها

كي يتصل ويخبرنا بلي راهو مشغول

ماشي يخلينا نقدرو في المحال كيما يقولو

انا عن نفسي ، يتصل برك ماشي بزاف

وامبعد انا اللي نقولو ربي يعاونك ويسهلك ونخلفهالك بعشا شباب ان شاء الله

لكن اذا ما اتصلش وخلاني نستنى في الفراغ

سأنزعج بلا كذب ..

الامل في الله

2011-07-08, 13:16

انا نشوف المشكل اصغر من هدا بكثير هو ما عيطش بلاكي لاتي بلاك طاحت لاشارج تاع البورتابل ماهندوش صوارد في البورتابل و الا نسى بحكم انه غير متعود الغداء في الدار المفروض هي تعيط و تسال عليه و تشوف السبب و ادا راح يتاخر شوي تستناه و ادا راح ما يجيش تتغدى و الا تعمل زيي ما تاكلش اما ادا كان ماهوش تاع مواعيد يعني يخلف ما تعيطش و تتغدى وفرات و راهو زوجها ما شي راح تتطلق على هدي و انا ارى انه بين الاحبة لازم تكون تنازلات الى اقصى حد طبعا لا تصل الكرامة و ما نقولوش لازم و لازم لانه ادا درنا لازم مع الزوج و هو اقرب الناس فعلى الدنيا السلام و لازم حسن النية الى ان يثبت العكس و الله اعلم

الامل في الله

2011-07-08, 13:19

اما بالنسبة ان المراة لا تتصل لان الزوج لا يحب دلك فهده موجودة فهناك من يستهزأ بالرجل ادا زوجته تعيطلو بزاف لكن يكون هناك تفاهم من البداية مثلا الاتصال مايكونش طويل

imane1

2011-07-08, 13:22

خطيبك يفكر بالمنطق و تفكيره سليم و يُعجبني

و يكره المشاكل

و اذا خلقتي مشكل من شيء تافه كهذا ( تافه في نظري انا)

فانتي ستفسدين عليه حياته

اعتقد انه كان واضحا في هذه النقطة

لا تُغفليها

خطيبك يحب التفكير المنطقي و يكره المشاكل
===========================

نعم ، يحب ذلك وهذه نقطة إيجابية في شخصيته (الحمدلله )

بصح التزم موقف حيادي اخي الفاضل :d

وقولي : ما ضره لو اتصل ليعلمها بأنه لن يتمكن من الحضور ؟

باش يولفها بلي هو ما يغيبش بلا سبة ، وما يخلفش وعودو ومواعيدو بلا مبرر

حاول برك تفهم ما أرمي اليه من الموضوع

(المسألة ماراهيش مسألة بيني وبين خطيبي راهي وضعية اشكالية مطروحة لنتناقش عليها
انا غدوه ان شاء الله اذا دار شوية روطار أتصل به لانه حتى الان " مضبوط في مواعيدو وكلامو "
بصح كاين ازواج عودو زوجاتهم على الغياب الغير مبرر حتى ولات هي كي يقوللها نجي ما تستناهش
وتقول بااااين ما يجيش ..وصح ما يجيش وادا جا ، جا غلطة :1:)

imane1

2011-07-08, 13:26

السلام عليكم

مبروك عليك و لوالديك حنونة الباك ان شاء الله تفرحي في حياتك ..

عااااااااااااااااااااااااااااااااااادي جدا نتصل ونسقسي عليه ياك هاداك راجلك ..العكس تبانلي هو خطاء لوكان ما تسقسيش عليه ...هادي مافيش نيف ولا ..بالاك صراتلوا حاجة ولا

يا سيدي عيطيلوا واسمعي منوا شا يقولك ومن بعد الا راح تزعفي وهو غادي يجي يراضيك وهادا هو الحال...........عادي ختي ماكانش حدود بين الزوجين ....

بالتوفيق ختي مع خطيبك .ان شاء الله

سلااااااااااااااام

وعليكم السلام ورحمة الله وبركاته

الله يسلمك اختي ساره .. ربي يجازيك خير

عيطيلوا واسمعي منوا شا يقولك ومن بعد الا راح تزعفي وهو غادي يجي يراضيك وهادا هو الحال.

تقولين أتصل به وأسمع منه ثم أقرر أغضب أم لا

أقترح بديلا جيداً عن هذا :

يتصل ويخبرني بأنه لن يأتِ لانه انشغل

ولا أفكر في " الزعل " مطلقاً ..

ولن يكون بحاجة الى اعتذار او مراضاة

imane1

2011-07-08, 13:29

nti chaki khssra hakoliw khalilo hakko ki yji sakhnihlo

:1:

جات في حقو ولا حقي

ولا في الغدا اللي تعبت عليه وما حضرش ليه

الخطب أعظم لو غصت في ابعاد الموضوع

imane1

2011-07-08, 13:33

أختي مانوافقكش الرأي، بما أنه أعطالك كلمة و قالك نجي في هذاك الوقت، بالحق تتقلقي عليه و أنتي تبادري و تعيطيله، فلا سمح الله صراله حادث، و أنتي راكي تخممي في حاجة أخرى و راكي مقلقة منه بما أنه ماوفاش بكلمته حتى يجيك خبره ،ماشي تندمي مع الأخير؟؟؟؟؟؟؟؟

أنا خطيبي لوكان يغيب نصف نهار و مايعيطش نتقلق و نروح نجري نعيطله، بالعكس راح يحس بالإهتمام ديالك، و لكن ماشي تتهجمي عليه و تبداي تشتكي، بالعقل قوليله غير الخير؟؟؟ تقلقت عليك هذا ماكان؟؟؟ ماشي تدخلي عليه وين راك ؟؟؟؟؟ و تتمسخر بيا و ماعندكش كلمة، التم تسمعي مالايرضيك

أختي نحي هذه الفكرة من راسك، إذا راكي حابة تعيشي متهنية

أختي مانوافقكش الرأي <<<<<<<<<< معليش الاختلاف مليح

بما أنه أعطالك كلمة و قالك نجي في هذاك الوقت، بالحق تتقلقي عليه <<<<<<<< اذا كان مولى كلمة ، ملتزم بما يُخرجه من فيه

ماشي تدخلي عليه وين راك ؟؟؟؟؟ و تتمسخر بيا و ماعندكش كلمة<<<<<<< انا أكبر من التجريح ، وأعرف كيف أناقش في المشكل وحده

عموما رأيكِ وأحترمه ..

الموضوع مازال ما لقاش اللي يفهمو كيما يلزم

بعيدا عن المثالية والافكار المسبقة اللي رانا ادايينها عن المخطوبين وما يحصل بينهم من مشاكل

شكرا وسيلة على المداخله

imane1

2011-07-08, 13:36

الذي سبق الاخر أخذ الأجر
وتستمر الحياة الجميلة

:)

صح

رغم ان ردك مختصر جدا لكن ما ورد فيه صحيح

شكراً على الحضور أخي ياسين

imane1

2011-07-08, 13:38

المشكل موش تعيطي او لا

المشكل كي تعيطي وما يهزش عليك

ثمة وين تجني وتكسري لبورتابل وتقعدي توكلي في روحك :mh5858::mh5858::mh5858:

وكي يروح على 3 وتسقسيه واعلاه ما عيطيش :confused::confused::confused::confused:

يجيبهالك بضحكة :d:d:d:d ماعنديش لكريدي وما قعتش باش نشرجي

انت : واعلاه مالا ما هزتيش عليا :mad::mad::mad::mad:

هو: ياااااااا ما سمعتوش عملتو مود سيلونسيو ونسيتو:mh93::mh93::mh93:
انت : ولغدا لي من الصباح وانا ندير فيه :(:(:(ه:(

هو : ما عليش ديريلي سندويش نديه معايا اني زارب وجماعة يستنو فيا

تروحي للكوزينة٠٠٠٠وانت قريب تكملي تسمعيه يعيط

اعملي 3 سندويشات خرين لجماعة لي معايا :24::24::24::24:

واش تعملي :eek::eek::eek::eek: (الصبر)

اسفة لاني طولت حبيت نلطف الجو قليلا

يا حنونتي بعد الزواج تتغير معادلة الحوار الهاديء الى مشاكسات متتكررة

تسمى البهارات ٠٠ساعات تكون بنينة وسعات حااااااااارة .............وتستمر الحياة

الف مبروك النجاح وربي يهنيك

صح هاذاك مشكل آخر ..نسأل الله ان يرزقنا العقل والحِلم ..

يا حنونتي بعد الزواج تتغير معادلة الحوار الهاديء الى مشاكسات متتكررة<<<<إذا كان الزوجين من هواة المصارعة :1:

شكراً لكِ عزيزتي

على خفة مرورك

imane1

2011-07-08, 13:40

طرطرك الله يا صاحبة الموضوع

رغم انني لم أفهم أول كلمة منه

لكن :

شكراً على مرورك أخي قاسم

:)

imane1

2011-07-08, 13:49

حسب رأيي فإن كلا الطرفين أخطأ ..
المرأة لا يجب أن تغضب على زوجها اذا تخلف عن موعد دون اخطارها مع اصرارها عدم الاتصال به . لأنها لا تعلم الغيب و قد يكون حصل له مكروه أو أنه نسي بكل بساطة فالرجال عندما ينشغلون بشئ ينسون كل شئ " حقيقة علمية http://www.djelfa.info/vb/images/icons/icon10.gif "

و الرجل اخطأ عندما وعد زوجته بالحضور و أخلف . فكلفها عناء تحظير غدائه و انشغال بالها بغيابه عن الموعد فقد يكون رصيد الهاتف انتهى و لا تستطيع التصال به فهل يتركها مشغولة البال عليه دون أن يكلف نفسه عناء الاتصال بها لاخطارها انه سيتخلف . و ان غضبت فليس من اجل الغذاء بل لاحساسها أنه لم يقيمها حتى بكلمتين عبر الهاتف لطمانتها

كلا الطرفين أخطا لكن هذه ليس جريمة لا تغتفر و الواجب التعاطي مع مثل هذه الحالات بحكمة و تسامح و ان يحاول كل طرف اتخاذ الاعذار للطرف الثاني ... و لا يمكن اعتبار هذا الامر مشكل بل هو سوء تفاهم يحدث خصوصا لحديثي الزواج و مع الوقت يتعرف كل طرف على طبيعة الآخر و عيوبه و يتاقلم معها كان تعلم المراة ان زوجها ينسى الاتصال عندما بتأخر فتسصبح هي من تبادر بالاتصال . أو أن يعلم الرجل أن زوجته تغضب عندما يواعدها و لا يحضر و لا يتصل فيتحمل غضبها او يحاول تغيير عاداته ...
هذه هي الحياة الزوجية .. الصبر على عيوب الآخر و التاقلم معها و اعانته على تجاوزها بالرفق . و هذا لا يعني أن نعتبر أن أخطاء اي طرف لا تؤثر على الآخر لمجرد أنهم متزوجين فللصبر حدود و لا تكثر على الملوك حتى يملوك ...

يعطيك الصحة

مداخلة قيمة جداً تدل على بُعد نظرك

وحسن تصورك للموقف من الجهتين (المرأة والرجل )

لحل هذا الخلاف يوجد حل من اثنين :

1/ ان يتصل الرجل بزوجته في كل مرة يعدها بشيء ثم يتعذر عليه (باش يخلي صورتو مليحه مش مهزوزة قدام زوجتو)

2/ ان تمارس المرأة لعبة اللامبالاة ، وتولف روحها على الوضع (وهادي ماراحش تنجح بزاف ، تبقى دايما ترسبات ويجي النهار وين تشعل فيه)

:1:

ويبقى كلامي مجرد رأي لا ألزم به أحداً

مرة اخرى شكراً أخي الفاضل

سعدت كثيرا بمداخلتك

نسائم الهدى

2011-07-08, 13:49

هده هي مشكلة اغلب بنات الجزائر...يعتقدون ان الراجل هو الواجب عليه ان يتصل وان يبادر وكانها انزلت في القران...
الحمد لله يا أخي فتحي أنني لست من بين تلك الأغلبية :1::1::1:
:dj_17:
أولا ألف مبروك أختي إيمان
ثانيا أنا لا أتفق معك في هذا وسأخبرك لماذا
أبي لديه محل ومواعيد غدائه وعشائه غير منتظمة ففي بعض الأحيان يتصل ويقول لماما بأنه قادم ليتغدى وعلينا تحضير غدائه فنحضر له الغداء ونبقى ننتظر وننتظر وننتظر ولا يأتي إذا ماذا نفعل نحن؟؟؟
لا نغضب منه بل نقلق عليه ونبدأ في الإتصال به وسؤاله عن سبب تأخره سواءا أنا أو ماما وعندما يأتي للبيت ويدخل من الباب نهرع إليه لنسأله لماذا تأخر وليس بلهجة غاضبة بل بلهجة قلقة فهكذا تربت ماما وهكذا ربتني أنا عندما يتأخر شخص ما لا نغضب منه بل نقلق عليه وكما يقول رسول الله صل الله عليه وسلم إلتمس لأخيك سبعين عذرا أليس كذلك؟؟؟.
ولمعلومك لو حدث هذا مع زوجي مستقبلا لاتصلت به ليس مرة واحدة بل 20 مرة ولفرحت عندما يعود للمنزل فكما أقول لأبي وإخوتي دائما المهم ترجعوا انتوما للدار وحتى حاجة اخرى ما تهمني.
لذا يا أختي لا داعي لخلق مشكل من أمر تافه مثل هذا فالحياة فيها ما هو أهم وأكبر من مجرد نسيان موعد وستعلمك الأيام والسنين ذلك.
ربي يجيب الخير
ربي يكمللكم بخير انتي وخطيبك
والسلاااااااااااااااااااااااااااااااااام عليكم

imane1

2011-07-08, 13:51

انا نشوف المشكل اصغر من هدا بكثير هو ما عيطش بلاكي لاتي بلاك طاحت لاشارج تاع البورتابل ماهندوش صوارد في البورتابل و الا نسى بحكم انه غير متعود الغداء في الدار المفروض هي تعيط و تسال عليه و تشوف السبب و ادا راح يتاخر شوي تستناه و ادا راح ما يجيش تتغدى و الا تعمل زيي ما تاكلش اما ادا كان ماهوش تاع مواعيد يعني يخلف ما تعيطش و تتغدى وفرات و راهو زوجها ما شي راح تتطلق على هدي و انا ارى انه بين الاحبة لازم تكون تنازلات الى اقصى حد طبعا لا تصل الكرامة و ما نقولوش لازم و لازم لانه ادا درنا لازم مع الزوج و هو اقرب الناس فعلى الدنيا السلام و لازم حسن النية الى ان يثبت العكس و الله اعلم

مرحبا بك أختي الفاضلة

الامر لم يصل الى حد الطلاق ، ولا الى الغضب المُغلق

لم أشر الى شيء من هذا

ولا يُعقل أن ينفصل زوجان لسبب كهذا

!!!

أسأل فقط عن الاتصال .. من يتصل بمن (في النورمال )؟

نسائم الهدى

2011-07-08, 14:02

مرحبا بك أختي الفاضلة

الامر لم يصل الى حد الطلاق ، ولا الى الغضب المُغلق

لم أشر الى شيء من هذا

ولا يُعقل أن ينفصل زوجان لسبب كهذا

!!!

أسأل فقط عن الاتصال .. من يتصل بمن (في النورمال )؟

أولا مرحباااااااااا ببنت بلادي راكي جارتي يا اختيتو إيمانو
ثانيا ما تسمعي لحتى واحد يقولك كرامتك وكبرياؤك وغير ذلك
بل اتصلي به إذا تأخر أو حتى إذا أخلف موعدا معك فهذا سيشعره بمدى حبك وسيقابل ذلك الحب بحب أكبر صدقيني فقد نصحت بها فتاة قبلك ونجحت النصيحة مئة بالمئة.
وليس هناك شيء نووووووووووووورماااااااااااال في الزواج فسحر الزواج كما أقول لزوجات إخوتي دائما أنه لا شيء فيه نووووووووووووووورماااااااااال بل كل شيء فيه مبتكر وجديد لأن كل علاقة تكوّن قصة منفردة فلا يمكن أن يشتبه رجل وامرأة في أي علاقتين لذا تتغير الأحداث والنتائج مع تغير الطرفين
لذا فأنت أدرى بشخصية خطيبك ولا أحد يستطيع أن يعلمك أو يخبرك كيف تعاملينه.
أتمنى أن لا يزعجك ردي
ربي يكملك بخير انت وخطيبك
والسلاااااااااااااااااااااااام عليكم

imane1

2011-07-08, 14:17

:dj_17:
أولا ألف مبروك أختي إيمان
ثانيا أنا لا أتفق معك في هذا وسأخبرك لماذا
أبي لديه محل ومواعيد غدائه وعشائه غير منتظمة ففي بعض الأحيان يتصل ويقول لماما بأنه قادم ليتغدى وعلينا تحضير غدائه فنحضر له الغداء ونبقى ننتظر وننتظر وننتظر ولا يأتي إذا ماذا نفعل نحن؟؟؟
لا نغضب منه بل نقلق عليه ونبدأ في الإتصال به وسؤاله عن سبب تأخره سواءا أنا أو ماما وعندما يأتي للبيت ويدخل من الباب نهرع إليه لنسأله لماذا تأخر وليس بلهجة غاضبة بل بلهجة قلقة فهكذا تربت ماما وهكذا ربتني أنا عندما يتأخر شخص ما لا نغضب منه بل نقلق عليه وكما يقول رسول الله صل الله عليه وسلم إلتمس لأخيك سبعين عذرا أليس كذلك؟؟؟.
ولمعلومك لو حدث هذا مع زوجي مستقبلا لاتصلت به ليس مرة واحدة بل 20 مرة ولفرحت عندما يعود للمنزل فكما أقول لأبي وإخوتي دائما المهم ترجعوا انتوما للدار وحتى حاجة اخرى ما تهمني.
لذا يا أختي لا داعي لخلق مشكل من أمر تافه مثل هذا فالحياة فيها ما هو أهم وأكبر من مجرد نسيان موعد وستعلمك الأيام والسنين ذلك.
ربي يجيب الخير
ربي يكمللكم بخير انتي وخطيبك
والسلاااااااااااااااااااااااااااااااااام عليكم

وعليكم السلام ورحمة الله وبركاته

ربي يبارك فيك اختي كريمه

والدك يتأخر لا بأس ، باين راهو في المحل تاعو جاوه مشترية ماعرفش يليكيديهم

هكذا تقول والدتك بادئ ذي بدئ

تتصل به تسأل عنه يخبرها بأنه انشغل ..

يتكرر الموقف ثانية وثالثة ورابعة تنزعج الام قليلا ، تستاء ولا تبدي استيائها حتى تمشي الحياة كيما يقولو

حتى توالف ما تستناهش (!) اذا قال انه سيحضر تتوقع عدم حضوره وترجحه (!)

صح ما تزعفش لان الامر لا يستحق كل ذلك

بصح ماذا بيها لوكان يجي ، ماذا بيها لوكان يتصل ويقوللها ما نقدرش نجي

باش ما يقلقها ما يقلق ولادو

الراجل ولا المراة اللي يمد موعد ولا وعد ويتخلف عليه لازم يعيط للي راهو يستنى فيه (بنادم كيما هو )

يقولو يا فلان مانقدرش نجي ..

ما يخسر عليه والو غير هاد الزوج كلمات ..

باش لاخر ما يطونديش في الفراغ ، ويروح كاش ما يقضي كاش شغل بدل ما يقعد يبني ويهد

نظن الشي بديهي وأعيدها لا أظنني أبالغ ولا اظنني خرجت عن المألوف بما أقوله هنا

شكرا لحضورك كريمة

* زهرة البنفسج *

2011-07-08, 14:50

اختي ايمان حبيت ندير مداخلة تخصني بعد اذنك :mh31::mh31:

انا الان وفي هذه اللحظة اتصل بزوجي لانه مسافر الى مكان بعيد شوي ٠٠راح يوصل شخص الى المطار .............اريد ان اطمئن عليه

لكن قداه من مرة نعيط يصوني و ما يهزش :mad: :mad: :mad:

ماذا افعل الحل الوحيد اني نكسر التليفون كيما قتلك قبل قليل

ومن هنا تبدا المشاكسة :mh5858::mh5858::mh5858: هههههههااااااهههههههاااا

تقبلي احترامي ولن اثقل عليك

mohamed160

2011-07-08, 14:52

ههههههههههههههههههههههههههه

abdelmoumen_2010

2011-07-08, 14:55

السلام عيكم
مبروك عليك وعلى كل من ضفر مقعد في الجامعة

imane1

2011-07-08, 15:03

اختي ايمان حبيت ندير مداخلة تخصني بعد اذنك :mh31::mh31:

انا الان وفي هذه اللحظة اتصل بزوجي لانه مسافر الى مكان بعيد شوي ٠٠راح يوصل شخص الى المطار .............اريد ان اطمئن عليه

لكن قداه من مرة نعيط يصوني و ما يهزش :mad: :mad: :mad:

ماذا افعل الحل الوحيد اني نكسر التليفون كيما قتلك قبل قليل

ومن هنا تبدا المشاكسة :mh5858::mh5858::mh5858: هههههههااااااهههههههاااا

تقبلي احترامي ولن اثقل عليك

ههههههههههه

شوفي اكيد راهو مجيني ، معاه كاش واحد يعني

انتي درتي اللي عليك واتصلتِ

خليه حتى يعاودلك كي يلقى المكالمة ديالك

ما تتقلقيش

:)

مرحبا بيك في كل وقت

imane1

2011-07-08, 15:06

السلام عيكم
مبروك عليك وعلى كل من ضفر مقعد في الجامعة

وعليكم السلام ورحمة الله وبركاته

ربي يبارك فيك

ممكن تشاركنا برايك فيما يخص الموضوع ؟

ام ايمان16

2011-07-08, 15:33

اولا مبروك عليك الباك واتمنى لكي مزيدا من النجاح في حياتك
(بصح ماحطيتيناش حتى حبة حلاوة :mh31:)

رايي انه اذاقاللها انو جاي على لغداء وهو ماهوش موالف يجي وماجاش على 12 نورمالمو يعطيطلها ويقوللها اذا كان راح يتاخر او ماهوش جاي (هذا اذا ماصرالوولو كالحادث لاقدر الله او التيليفون طاحتلو لاشارج او خلاصلو لكريدي او شيئ اخر.........)

وبالنسبة للمراة لما تشوف فاتت 12 وماجاش تعيطلو تسقسيه عن سبب التاخير وتقولو(خير ان شاء الله) وتسالو اذا كان جاي ولاماهوش جاي بدون تكبير الموضوع (وهذا من باب الاطمئنان عليه انه لم يحدث له شيئ
ومن المفروض ان تكون الزوجة تعرف طبيعة عمل زوجها اذا كان يستدعي تاخيره عن موعده اذا حصل له طارئ خاص في عمله وانها تكون معتادة على طريقة عمله
وربي يجيب الخير ويحفظك ويسرلك امورك
شكرا

madrilan

2011-07-08, 15:38

ههههههههههه حاجة باينة المرأة لتتصل بلاك الرجال مات

** دنيا الأمل **

2011-07-08, 19:25

قالك ندخل للدار على 12
مافيها والو 11:45 عيطيلو وشوفيه وين راه
شوفيه و اش يقول
من بعد على 12:00 زيدي شوفيه
وشوفيه واش يقول اذا قالك مانجيش نورمال
بصحتك مالذ وطاب :19: مي خليلو شوية
واما زيدي عيطيلو مرة ثانية على 12:15
حتى اذا قالك مانجيش نفطر ....قلقيه قوليلو الفطور قريب يبرد ....اكيد يدير سباق السرعة مع الزمن

على كل حال مافيها والو انت و لا هو
المهم هذه ليس مشكلة و حذاري ديري منها مشكلة
سينو مايزيدش كامل يقولك نفطر في الدار

نسائم الهدى

2011-07-08, 19:55

قالك ندخل للدار على 12
مافيها والو 11:45 عيطيلو وشوفيه وين راه
شوفيه و اش يقول
من بعد على 12:00 زيدي شوفيه
وشوفيه واش يقول اذا قالك مانجيش نورمال
بصحتك مالذ وطاب :19: مي خليلو شوية
واما زيدي عيطيلو مرة ثانية على 12:15
حتى اذا قالك مانجيش نفطر ....قلقيه قوليلو الفطور قريب يبرد ....اكيد يدير سباق السرعة مع الزمن

على كل حال مافيها والو انت و لا هو
المهم هذه ليس مشكلة و حذاري ديري منها مشكلة
سينو مايزيدش كامل يقولك نفطر في الدار

:dj_17:
ما شاء الله
ونعم الرأي
شكرا لك أختي
والسلااااااااااااااااام عليكم

Hicham Ahmed

2011-07-08, 21:01

السلام عليكم

من المفروض الزوج هوالذي يتصل، لكن اذا لم يتصل... وجب علىالزوجة ان تتصل..

افهمو حاجة برك... الزواج كل واحد داير مزية في الطرف الأخر.. (عذرا لكتابتي بالعامية... ربما هذا أبلغ)

إذا كنت ما ذا قلب قنوع..... فأنت ومالك الدنيا سواء

تاج الوقار16

2011-07-08, 22:14

مبروك نجاحك اختي
ولكن تحبي رايي راكي غالطة 100 في الساعة
الغائب ايا كان تلتمس له اعذار
ثاانيا انا لا افضل المراة التي لا تهتم بلباسها وماكلها في غياب زوجها وكان حياتها كلها مرتبطة به او تعيش لاجله
فانت باذن الله ستحيين مع زوجك لا لاجله
كما ان عدم حضوره حري به ان يبعث فيك نوع من القلق عليه فربما حدث له مكروه لا قدر الله
وان تتصلي فهذا طبع نبيل وليس هدرا للكرامة والكبرياء
كما انه بعد دخوله ليس واجبا عليك ان تكوني المحاتكم او الشرطي
فهو قد اتى الى السكينة فلتقدمي له طعاما ثم ليرتاح والاكيد انه وحده من سيبرر موقفه
تقبلي رايي

welam

2011-07-09, 22:31

عزيزتي ، أولا مبروك عليك الباك و بالتوفيق في دراستك الجامعية ................ ثانيا ، و حسب تجربتي ، فأنا لما يتأخر زوجي عن موعد الغداء أتصل به لأستفسر عن سبب تأخره ذون أن أنتظر اتصاله ، و هذا شيء عادي ، فهذه تفاهات لا يجب أن تعكري بها حياتك الزوجية ............. أما إذا كان رده أنه قادم : أنتظره .............و إذا قال لي بأنه مشغول و لن يتناول الغذاء في المنزل ، أقول في نفسي : الحمد لله ، لن أحضر العشاء .

rearose

2011-07-10, 10:23

هههههههههههه بعد الزواج راح تتعودي على كثير من الأمور انشاء الله ربي يوصلك ويكملك وتجربي هاذي المواقف وبعدها عاودي اكتبي نفس الموضوع بصح من وجهة نظر واحد مجرب ومبروك على الباك:19::19::19::19:

ندرومة49

2011-07-10, 13:40

اولا مبروك عليك النجاح

وثانيا
مادام لم يتصل حاولي الإستفسار لماذا تأخرت...........ممكن عذر طارئ

لكن بعد مافاتت 12 كنت أنت تتصلي به...لتثبتي حبّك له

ولا يعدّ هذا تطياح قيمة لك أبدا

اللهمّ إذا أنت حابة تفرضي على راجلك أنك متطيحيش روحك ليه

فهنا..........ربي يستر

imi02i

2011-07-10, 14:48

عندك الحق أختي
تفوت 12 وميجيش
كوليه بيدك وسنيك
وحذريه
المرة الثانية إذا عاودها جيبي
البيا وتيري عليه
واحد ما يكسرلك راسك
أنا لوكان جيت في بلاصتك ندير كما هكذا

ندرومة49

2011-07-10, 14:53

عندك الحق أختي
تفوت 12 وميجيش
كوليه بيدك وسنيك
وحذريه
المرة الثانية إذا عاودها جيبي
البيا وتيري عليه
واحد ما يكسرلك راسك
أنا لوكان جيت في بلاصتك ندير كما هكذا

يا لطيف
بشوي أختي:sdf::sdf::sdf::sdf::sdf:

هذا خطيبها:mh31::mh31::mh31:

انصحيها نصيحة تاع وحدة عاقلة

ماشي تقتلو البيا

ربي يلطف إذا تفكري كي ماهاك :1::1::1::1:

مالو كان جيت انتي تهردت:1::1:

انظن بالاك غير تهدري

ومحال تخمي هاك:1::1::1:

imi02i

2011-07-10, 14:58

يا لطيف
بشوي أختي:sdf::sdf::sdf::sdf::sdf:

هذا خطيبها:mh31::mh31::mh31:

انصحيها نصيحة تاع وحدة عاقلة

ماشي تقتلو البيا

ربي يلطف إذا تفكري كي ماهاك :1::1::1::1:

مالو كان جيت انتي تهردت:1::1:

انظن بالاك غير تهدري

ومحال تخمي هاك:1::1::1:
هذا هو الصح
ولا جايلك ربي نسايس عليه ونكلمو
هذي مكانش في المصلح نتاعي كامل
ديجا راني درت دوموند على مكحلة من ذرك

زهير بوعلي

2011-07-10, 15:09

أعتقد ان الزوجة الذكية في هذه الحالة هي من تبادر بالاتصال...
1- تزيد محبة وتقدير زوجها لها..
2- تظهر له مدى اهتمامها به وانشغالها لأمره...
3- ترتاح هي من القلق والحيرةن وفي الوقت نفسه تتأكد ان لامكروه قد حدث له - لاقدر الله-...
مبروك عليك الباكن لاتنسي حسن اختيار التخصص الذي سوف تدرسينه...بالتوفيق.

WIN32

2011-07-10, 15:18

أولاً الف مبروك النجاح، ومبروك مسبقاً بالزوج الصالح وربي يرزكم الذرية الصالحة.

هنا مشكل الأزواج * الجزائريين بالخصوص*

أين المشكل إذا لم يتصل المهم من واجبك تحضير الفطور وانت تقولي انه من غير العادة الإفطار في البيت بمعنى هذه أوال مرة توجدي الفطور وراكي مديرونجيا، ياسيدي نفترضوا ماهوش زوجك وخلينا نتكلم بصراحة يكون خطيبك ويقلك نتلقاو في المطعم الفلاني نفطرو مع بعض !!! ولما دخلتي للمطع لم يحضر خطيب !!!! هل تبادرين بالإتصال أم تبقي في الإنتظار ؟؟؟؟ جاوبي بصراحة

شيء أخر إذا لم تستفد الزوجة من هذه المواقف وتكون لها وقفة مرأة مع زوجها فمتى تكون ؟؟ فزوجك هذا لم يطلب المستحيل فلماذا نصنع من أشياء تافها مشاكل، هل حقاً انتي لم تجدي حل لهذا الموقف ؟ سهل جداً هو خسر عليك Unite وقالك وجدي الفطور أخسري عليه Unite وقوليلو ويكتاش تجي وهي فرات ههههههههه

ندرومة49

2011-07-10, 15:37

هذا هو الصح
ولا جايلك ربي نسايس عليه ونكلمو
هذي مكانش في المصلح نتاعي كامل
ديجا راني درت دوموند على مكحلة من ذرك

هههههههه
علاه السيد هدا راه يطايش
والله يحكمك
يدورلك البيا على راسك

قدّري بالملاحة ولا لقباحة.............بالاك عندو ظروف علابيها ماجاش...ممكن أوبان تاع السيارة ........ ماشي تقتليه

وعشب الليل ماشي قاع أخضر

ندرومة49

2011-07-10, 15:38

أعتقد ان الزوجة الذكية في هذه الحالة هي من تبادر بالاتصال...
1- تزيد محبة وتقدير زوجها لها..
2- تظهر له مدى اهتمامها به وانشغالها لأمره...
3- ترتاح هي من القلق والحيرةن وفي الوقت نفسه تتأكد ان لامكروه قد حدث له - لاقدر الله-...
مبروك عليك الباكن لاتنسي حسن اختيار التخصص الذي سوف تدرسينه...بالتوفيق.

مشاركة جيّدة شكرا لك أخي

imane1

2011-07-10, 16:54

اولا مبروك عليك الباك واتمنى لكي مزيدا من النجاح في حياتك
(بصح ماحطيتيناش حتى حبة حلاوة :mh31:)

رايي انه اذاقاللها انو جاي على لغداء وهو ماهوش موالف يجي وماجاش على 12 نورمالمو يعطيطلها ويقوللها اذا كان راح يتاخر او ماهوش جاي (هذا اذا ماصرالوولو كالحادث لاقدر الله او التيليفون طاحتلو لاشارج او خلاصلو لكريدي او شيئ اخر.........)

وبالنسبة للمراة لما تشوف فاتت 12 وماجاش تعيطلو تسقسيه عن سبب التاخير وتقولو(خير ان شاء الله) وتسالو اذا كان جاي ولاماهوش جاي بدون تكبير الموضوع (وهذا من باب الاطمئنان عليه انه لم يحدث له شيئ
ومن المفروض ان تكون الزوجة تعرف طبيعة عمل زوجها اذا كان يستدعي تاخيره عن موعده اذا حصل له طارئ خاص في عمله وانها تكون معتادة على طريقة عمله
وربي يجيب الخير ويحفظك ويسرلك امورك
شكرا

ربي يبارك فيك اختي اللفاضلة

سعدت بداخلتك كثيراً

اذا توافقين بأن مسؤولية الاتصال تقع على الزوج المخلف وعده بالدرجة الاولى

وتتحملها المرأة في حال ما تعفف عنها لسبب او لآخر تفضلاً ..

شكراً لتواجدك

وشكراً لتعقيبك الفعال

imane1

2011-07-10, 16:56

ههههههههههه حاجة باينة المرأة لتتصل بلاك الرجال مات

لا قدر الله ..

اذا متعود يتخلف عن مواعيدو

صافي هاد الراجل كل يوم نعيطولو ؟

واش ؟ كل يوم يموت ..؟

شوية عقل من فضلك ..

:1:

imane1

2011-07-10, 16:59

قالك ندخل للدار على 12
مافيها والو 11:45 عيطيلو وشوفيه وين راه
شوفيه و اش يقول
من بعد على 12:00 زيدي شوفيه
وشوفيه واش يقول اذا قالك مانجيش نورمال
بصحتك مالذ وطاب :19: مي خليلو شوية
واما زيدي عيطيلو مرة ثانية على 12:15
حتى اذا قالك مانجيش نفطر ....قلقيه قوليلو الفطور قريب يبرد ....اكيد يدير سباق السرعة مع الزمن

على كل حال مافيها والو انت و لا هو
المهم هذه ليس مشكلة و حذاري ديري منها مشكلة
سينو مايزيدش كامل يقولك نفطر في الدار

لم تفهمي الاشكال الذي حمله الموضوع

أريد اجابة بقدر السؤال لا حلولاً لمشكل لا وجود له أصلاً

أريد سبر آراء ليس الا ..

الاكل المطبوخ الذي لم يحضر اليه الزوج لا يشكل (كما سبق وأدليت)مشكلا على الاطلاق

فاضلتي

من حيث الأخلاق و اللازم كيما نقولو

يتصل كي يشوف روحو ماراحش يروح باش يخبر زوجتو

ولا يخليها تستنى ؟

imane1

2011-07-10, 17:05

السلام عليكم

من المفروض الزوج هوالذي يتصل، لكن اذا لم يتصل... وجب علىالزوجة ان تتصل..

افهمو حاجة برك... الزواج كل واحد داير مزية في الطرف الأخر.. (عذرا لكتابتي بالعامية... ربما هذا أبلغ)

إذا كنت ما ذا قلب قنوع..... فأنت ومالك الدنيا سواء

نعم أخي الفاضل هشام

أمر بديهي كما يقال

لم أتوقع ان يختلف عليه اثنان ..

والمشكلة كل المشكلة أن الرجال يرون بأن الزوج المتأخر ملزم بالاتصال

والنسوة يذهبن الى ضرب من التفكير يعفي الزوج من الاتصال ويحل له التأخر كل مرة عن مواعيده

دون الحاجة الى الاتصال والاعلام (لا اقول التبرير والاعتذار ..)لانهن سيتصلن به

نعم لا مشكلة في اتصال المراة بزوجها .. هو زوجها ومن حقه عليها ان تطمئن عليه

لكن في حالة كهذه الامر مختلف تماماً ...

ثم ان هي اتصلت في ظرف كهذا فهل ينبغي ان تجعل اتصالها به عادة طالما انه جعل اخلاف مواعيده عادة ايضا؟

أقول شخصيا ... لا اتصور هذا ..

انا عندي مبدأ

يعطيني موعد ثم يتأخر عنه او لا يحضر اطلاقا لانه انشغل

لا بأس .. أعانه الله ويسر أمره

لكن فليتفضل مشكورا

مُباركا ان شاء الله

يتصل بي

يقولي يا بنت الناس ما نجيش ما تستناينيش

راني مشغول ..

واش نقولو ؟

أعانك الله ويسر لك امرك

أمر في غاية البساطه

شكرا لك جزييييل الشكر أخي الفاضل هشام

Nesrine-nina

2011-07-10, 17:06

هده هي مشكلة اغلب بنات الجزائر...يعتقدون ان الراجل هو الواجب عليه ان يتصل وان يبادر وكانها انزلت في القران...

هههههههههههههه هذا اكثر رد اعجبني لكنني متفقة مع خطيبك في الحوار 100/100 اذا درنا حسابات في كل طالعة و نازلة مانتهناوش فشوية عليه و شوية عليك الا باعذار مقنعة من احد الاطراف و اكيد الطرف الاخر يتفهم الوضع و يسمح في حقو فلا ارى اي مشكل ان اتصلت انت او هو كيفكيف

شكراااااااااااا مزيدا من التالق

imane1

2011-07-10, 17:09

مبروك نجاحك اختي
ولكن تحبي رايي راكي غالطة 100 في الساعة
الغائب ايا كان تلتمس له اعذار
ثاانيا انا لا افضل المراة التي لا تهتم بلباسها وماكلها في غياب زوجها وكان حياتها كلها مرتبطة به او تعيش لاجله
فانت باذن الله ستحيين مع زوجك لا لاجله
كما ان عدم حضوره حري به ان يبعث فيك نوع من القلق عليه فربما حدث له مكروه لا قدر الله
وان تتصلي فهذا طبع نبيل وليس هدرا للكرامة والكبرياء
كما انه بعد دخوله ليس واجبا عليك ان تكوني المحاتكم او الشرطي
فهو قد اتى الى السكينة فلتقدمي له طعاما ثم ليرتاح والاكيد انه وحده من سيبرر موقفه
تقبلي رايي

1/ربي يبارك فيك

2/ماكانش مخطئ ومصيب كاين الرأي والرأي الآخر ..انت تتصلي نورمال انا لا اتصل ..

3/اتصالي بزوجي المتخلف عن موعده ليس فيه هدرٌ لكرامتي اطلاقا (ولا كرامة بين الأزواج ..)

4/اذا دخل الى بيته يجد زوجة في انتظاره تستقبله وتريحه ولكن بعد ذلك تناقشه في عدم حضوره

وتسمع منه أعذاره وتخبره بأنه من الافضل ان يتصل بها في المرة المقبلة حتى لا تقلق عليه ..

5/ شكراً على مداخلتك ..رأيك وأحترمه

imane1

2011-07-10, 17:14

عزيزتي ، أولا مبروك عليك الباك و بالتوفيق في دراستك الجامعية ................ ثانيا ، و حسب تجربتي ، فأنا لما يتأخر زوجي عن موعد الغداء أتصل به لأستفسر عن سبب تأخره ذون أن أنتظر اتصاله ، و هذا شيء عادي ، فهذه تفاهات لا يجب أن تعكري بها حياتك الزوجية ............. أما إذا كان رده أنه قادم : أنتظره .............و إذا قال لي بأنه مشغول و لن يتناول الغذاء في المنزل ، أقول في نفسي : الحمد لله ، لن أحضر العشاء .

ربي يبارك فيك اختي يعيشك

انت تتصلين به هذا امر جيد ( انصح به جميع الزوجات )

بصح في النورمال . في العادي يعني , شكون اللي لازم يتصل انت ولا هو ؟

انا نشوف بلي هو ..

كاين واحد راهو يستنى فيه وهو شاف روحو بلي ما راحش يروحلو

فليتصل به لاعلامه بذلك حتى لا يبقيه مشغولا

اذا لم يتصل (وهذا امر سيء)

تتصلين به انت لا بأس لا مشكلة ليس في الامر اهانة

وانتي ولا هو كيفكيف

وما نحو ذلك من كلام

لكن في النورمال , حري به هو ان يتصل ..

imane1

2011-07-10, 17:16

هههههههههههه بعد الزواج راح تتعودي على كثير من الأمور انشاء الله ربي يوصلك ويكملك وتجربي هاذي المواقف وبعدها عاودي اكتبي نفس الموضوع بصح من وجهة نظر واحد مجرب ومبروك على الباك:19::19::19::19:

ان شاء الله

ربي يبارك فيك ..شكراً

=================================

حتى وإن تعودت على الوضع كما تقول

يبقى للحق وجه واحدٌ

فكلامي الذي اقوله ليس سراً يُذاع للمرة الاولى

شيء بديهي كيما يقولو

===================================

شكرا على مشاركتك
وحضورك ..

salim789

2011-07-10, 17:18

أردت معرفة أمر اخر، مبروك البكالوريا و هل سينتظرك خطيبك حتى تنهي الدراسة الجامعية، و بما أنك متفوقة ممكن تكملي ماستر و الدكتوراه، أم قررت الزواج و أنت في الجامعة؟؟؟؟
تساؤلات أرجو الإجابة إن لم يكن هناك حرج

imane1

2011-07-10, 17:18

اولا مبروك عليك النجاح

وثانيا
مادام لم يتصل حاولي الإستفسار لماذا تأخرت...........ممكن عذر طارئ

لكن بعد مافاتت 12 كنت أنت تتصلي به...لتثبتي حبّك له

ولا يعدّ هذا تطياح قيمة لك أبدا

اللهمّ إذا أنت حابة تفرضي على راجلك أنك متطيحيش روحك ليه

فهنا..........ربي يستر

ربي يبارك فيك ..

اتصالي به (اقولها للمرة العشرين) ليس فيه اهدار لكرامتي

وعدم اتصالي به ليس فيه حفظ لكرامتي ..

رانا نحكو بلغة اللازم .. الواجب كيما يقولو ..

مارانيش عارفه اذا فهمتني ولا لالا لكن فضلا اخي الكريم ميلود

تابع ردودي ستفهم وجهة نظري اكثر

شكراً على مداخلتك الطيبة

imane1

2011-07-10, 17:21

عندك الحق أختي
تفوت 12 وميجيش
كوليه بيدك وسنيك
وحذريه
المرة الثانية إذا عاودها جيبي
البيا وتيري عليه
واحد ما يكسرلك راسك
أنا لوكان جيت في بلاصتك ندير كما هكذا

:1:

عينُ الجنون

:1:

بطريقة كهذه لا تستمر الحياة

لا اتصل به نعم , وانزعج من عدم اتصاله لتوضيح سبب تأخره نعم

لكن بعد ما يمر الموقف شيء اخر ..

نولو نتناقشو عليه باش ما يتكررش

ماشي باش نجرحو بعضانا ولا نفتحو بيه باب للمشاكل ..

هذا هو الزواج ..

شكراً ايمي ..مرور خفيف الظل كما يُقال

imane1

2011-07-10, 17:26

أعتقد ان الزوجة الذكية في هذه الحالة هي من تبادر بالاتصال...
1- تزيد محبة وتقدير زوجها لها..
2- تظهر له مدى اهتمامها به وانشغالها لأمره...
3- ترتاح هي من القلق والحيرةن وفي الوقت نفسه تتأكد ان لامكروه قد حدث له - لاقدر الله-...
مبروك عليك الباكن لاتنسي حسن اختيار التخصص الذي سوف تدرسينه...بالتوفيق.

نعم

اذا كانت المرة الاولى التي يغيب فيها دون تبرير

اذا كان متعود راح تكره مع مرور الوقت
دايما تستناه وما يجيش
تعيطلو يقوللها نفس الحكاية اللي قالهالها على مدار كذا سنة

لكن

اذا كان معودها يتصل وغاب عن موعده مئة مرة
ويتصل بها لاعلامها عند كل مرة تسمح له ظروفه بالاتصال
فانها هي من ستتصل به في المرات التي لا يتسنى له الاتصال فيها
وتكسب حبه وتزيد ثقته و و و

ما رأيك ؟
تعارضني؟

الاستاذ سالم

2011-07-10, 17:30

الاحرى ان يبادر احدهما
مثلا لو كان سبب تاخر الزوج لا يعطيه الفرصة للمهاتفة تبادر الزوجة ولا راه كاش ما صرا فيه بعيد الشر
واذا كان سبب يسمحلو المهاتفة الاحرى به ان يبادر الزوج

imane1

2011-07-10, 17:34

أولاً الف مبروك النجاح، ومبروك مسبقاً بالزوج الصالح وربي يرزكم الذرية الصالحة.

هنا مشكل الأزواج * الجزائريين بالخصوص*

أين المشكل إذا لم يتصل المهم من واجبك تحضير الفطور وانت تقولي انه من غير العادة الإفطار في البيت بمعنى هذه أوال مرة توجدي الفطور وراكي مديرونجيا، ياسيدي نفترضوا ماهوش زوجك وخلينا نتكلم بصراحة يكون خطيبك ويقلك نتلقاو في المطعم الفلاني نفطرو مع بعض !!! ولما دخلتي للمطع لم يحضر خطيب !!!! هل تبادرين بالإتصال أم تبقي في الإنتظار ؟؟؟؟ جاوبي بصراحة

شيء أخر إذا لم تستفد الزوجة من هذه المواقف وتكون لها وقفة مرأة مع زوجها فمتى تكون ؟؟ فزوجك هذا لم يطلب المستحيل فلماذا نصنع من أشياء تافها مشاكل، هل حقاً انتي لم تجدي حل لهذا الموقف ؟ سهل جداً هو خسر عليك unite وقالك وجدي الفطور أخسري عليه unite وقوليلو ويكتاش تجي وهي فرات ههههههههه

ربي يهنيك ويبارك فيك

شكراً بحجم السماء

:)

اذا واعدني خطيبي (وضعية تخيلية لان الشرع لا يبيح ذلك) ولم يحضر أسلك سلوكا من اثنين بحسب الحالة /

1/ اذا كانت المرة الاولى التي يعطيني فيها موعدا ولا يحضر اليه , اتصل وأسأل عن الاسباب

2/ اذا كان متعودا على التأخر عن مواعيده لن أتصل ..ولا ابقى في الانتظار بل أنصرف ..

ثم /

لا أدري عن أي مشكل تتحدث اخي الفاضل ..

هذه وضعية تخيلية صرفة طرحها خطيبي لنتناقش حولها ولم تجر أحداثها في الواقع ..

لا أبحث عن طرق أدير بها مشاكلي او اتعامل بها مع الاحداث

بقدر ما ابحث عن وجهات نظركم

من أولى بالاتصال ؟

الزوج ام الزوجة ..

الامر ليس معقدا كما تصفون ..

شكرا على حضورك

imane1

2011-07-10, 17:37

هههههههههههههه هذا اكثر رد اعجبني لكنني متفقة مع خطيبك في الحوار 100/100 اذا درنا حسابات في كل طالعة و نازلة مانتهناوش فشوية عليه و شوية عليك الا باعذار مقنعة من احد الاطراف و اكيد الطرف الاخر يتفهم الوضع و يسمح في حقو فلا ارى اي مشكل ان اتصلت انت او هو كيفكيف

شكراااااااااااا مزيدا من التالق

احنا اذا تزوجنا وصرى المشكل نولو ما نديروش حساب للنازلة والطالعة كيما تقولي

لكن مادمنا في مرحلة التأسيس والاتفاق (مرحلة الخطوبة )

فالكلام يختلف ..

لم تجيبي عن السؤال الذي خصصت له موضوعا بأكمله ..

رغم ذلك شكراً على حضورك

الذي أسعدني جداً

ببارك الله فيك

imane1

2011-07-10, 17:39

الاحرى ان يبادر احدهما
مثلا لو كان سبب تاخر الزوج لا يعطيه الفرصة للمهاتفة تبادر الزوجة ولا راه كاش ما صرا فيه بعيد الشر
واذا كان سبب يسمحلو المهاتفة الاحرى به ان يبادر الزوج

يعطيك الصحة

أوجزت وأجدت ..

:)

شكراً لتفاعلك مع الموضوع

:)

imane1

2011-07-10, 17:42

أردت معرفة أمر اخر، مبروك البكالوريا و هل سينتظرك خطيبك حتى تنهي الدراسة الجامعية، و بما أنك متفوقة ممكن تكملي ماستر و الدكتوراه، أم قررت الزواج و أنت في الجامعة؟؟؟؟
تساؤلات أرجو الإجابة إن لم يكن هناك حرج

الله يسلمك , ربي يبارك فيك

نعم أتزوج ان شاء الله وانا بالجامعة

وأكمل دراستي باذن الله وتوفيقه ..

خطيبي لا يعارض ذلك

لا حرج أخي .. هل وراء سؤالك شيء ما ؟

Hicham Ahmed

2011-07-10, 17:55

السلام عليكم

أنا أرى أن النقاش بدأ يخرج عن مساره...؟!

imane1

2011-07-10, 17:56

السلام عليكم

أنا أرى أن النقاش بدأ يخرج عن مساره...؟!

قليلاً

سؤال ورد في الموضوع لم أستطع اهماله

ربما في نفس السائل حاجة يريد الاستفسار عنها

ربما ..

نأسف لانقطاع البث اخي الفاضل

:)

تاج الوقار16

2011-07-10, 18:59

1/ربي يبارك فيك

2/ماكانش مخطئ ومصيب كاين الرأي والرأي الآخر ..انت تتصلي نورمال انا لا اتصل ..

3/اتصالي بزوجي المتخلف عن موعده ليس فيه هدرٌ لكرامتي اطلاقا (ولا كرامة بين الأزواج ..)

4/اذا دخل الى بيته يجد زوجة في انتظاره تستقبله وتريحه ولكن بعد ذلك تناقشه في عدم حضوره

وتسمع منه أعذاره وتخبره بأنه من الافضل ان يتصل بها في المرة المقبلة حتى لا تقلق عليه ..

5/ شكراً على مداخلتك ..رأيك وأحترمه
اثرت حوار جد شيق وهادف اختي
وقد تعرفنا فيه على عدة وجهات نظر ذكرية وانثوية
جزيت الخير الوافر ووفقك الله وزوجك
http://www.yazgulu.com/Guller/146.swf

imane1

2011-07-10, 22:04

اثرت حوار جد شيق وهادف اختي
وقد تعرفنا فيه على عدة وجهات نظر ذكرية وانثوية
جزيت الخير الوافر ووفقك الله وزوجك
http://www.yazgulu.com/guller/146.swf

مرحبا بيك مرة اخرى اختي اسماء

فعلا الموضوع الحمدلله لقى تفاعل وعرفنا فيه وجهات نظر كثيرة

رغم انو عياني بزاف ..:)

لان البعض لم يجب حول السؤال باعتبار التفاصيل التي كنت ذكرتها

البعض تخيل انني وقعت في مشكلة مع زوجي

وابحث عن مخرج منها ..

فجاءت النصائح منهم كي يحفظو بيتي من الانهيار

من جملة تلك النصائح لا تعتبري التوافه من المشاكل ويجب ان تتنازلي وبادري انت بالاتصال و و

وهكذا كنت لأجيب على شخص وقع في مشكل كهذا

لكنني في الحقيقة لم أواجه المشكل

أنا طرحته كوضعية لابين للرجل كيف تفكر المراة

وابين للمراة كيف يفكر الرجل

حتى لا تحصل صدامات

المهم اسماء يعطيك الصحة اختي على الوردة

وعلى المرور الكريم

ندرومة49

2011-07-11, 08:39

:1:

عينُ الجنون

:1:

بطريقة كهذه لا تستمر الحياة

لا اتصل به نعم , وانزعج من عدم اتصاله لتوضيح سبب تأخره نعم

لكن بعد ما يمر الموقف شيء اخر ..

نولو نتناقشو عليه باش ما يتكررش

ماشي باش نجرحو بعضانا ولا نفتحو بيه باب للمشاكل ..

هذا هو الزواج ..

شكراً ايمي ..مرور خفيف الظل كما يُقال

أحسنت الرد

بورك فيك

rearose

2011-07-11, 10:36

انا اخاطبك من جهة وحدة مجربة لأنه قبل الزواج ما كانتش تفوت ساعة وما يتصلش فيها خطيبي ويقوللي وين راه وانا ثاني لكن بعد الزواج تغيرت الأمور لأن التعود ليس على هذه المواقف ولكن على طباع الشخص ذاته لأن العشرة تعمق المعرفة بالآخر وفي بعص الأحيان لن تحتاجي الى تفسيرات أو تبريرات لتعرفي ما حدث لأنه راح يكون بامكانك تخمينها
حتى أنه اذا تأخر عليك مرة ممكن جدا تعرفي مكان تواجده ومع من بدون ما يحكيلك
ارجو ان تكون فكرتي قد وصلاتك