من عادات وتقاليد الشاوية

[souhila.zs]

في الأوراس "بلاد الشاوية" تتمتع بعدة عادات وتقاليد اعتبر بعضها خرافات عجائز لكن البعض الآخر قمة الجمال والروعة وهذه لمحة عن بعض عادات ونبدا بالاعراس: عند الذهاب الى دار العروس يوم الاربعاء يحنيولها اهل العريس وبفرغو في سينية القشقشة (حلوى- جوز – لوز- كاوكاو ...)يحطو فوق راس العروس شاش وتهز وحدة من أهل العريس حفنة حلوى وتحطها فوق هذا الشاش والحبات اللي طاحو من راسها هي عدد الاولاد اللي حتجيبهم في المستقبل، ولازم تخبي العروس هذي الحلوى. ونهار الخميس لما تجي العروس لدار عريسها لازم تكسر برجلها بيضة أو تلصق فوق الباب قطعة ******دة وتدخل الدار بالرش بماء الزهر والحلوى والزغاريت.أما بنهار الجمعة اللي نسميوه "الصباحة" لازم تعمل العروس قطعة من الغرايف (البغرير) اذا ماوسختش روحها فهي فحلة واذا سيحت فهي خايبة، او عند بعض الناس يديوها تسقي الماء من البير سابقا بصح ضرك يديوها للحوش وتعمر بدون ماء، وهذه تبقى كلها عادات ممكن تظنوا انها لا معنى لها لكن اكبر معنى لها هو الاستمتاع و المرح..
ويوجد عادة أخرى فيما يخص الأسنان: لما طفل صغير ينحي سنيه تقولو جدته يرميها في السما ويقول "يا شمس هاكي سنين لحمار (حاشاكم) واعطيني سنين لغزال" باش يخرجو سنيه معدولين لكن هذه فعلا خرافة لامعنى لها.وكلك ساعات يتجرثم الفم فتظهر حبات على اللسان(هذا هو التفسير العلمي) لكن تفسير جداتنا هو انه لما تظهرلك هذي الحبات فانه كانت عندك حصة طعام مخبية ليك وكلاها غيرك علابيها ناضتلك حبة أو لما تنوضلك سخانة في فمك فانك سخفت على حاجة ولازم تاكلها.
أما بالنسبة للمواليد الجدد فمن عاداتنا أن الجدة ترفع هذا المولود في السما من رجليه وتحسب ل7....
والله في الحقيقة كل هاته العادة عفوية وجميلة ممتعة و عندها أكيد تفسيرات ...
أرجو أن تعجبكم لمحتي عن عادات الشاوية وهذه فقط قطرة من بحر ومن يعرف غيرها فلا يتردد بمشاركته معنا فالأوراسيون لهم عادات كثيرة لايمكن الاستغناء عنها لانها تعبر عن شخصيتنا العربية والامازيغية ......

[شهاب]

فعلا هي عادات جميلة
وان دلت على شيء
فإنما تدل على صفاء نية
أجدادنا وعفويتهم

[حفِيدةُ الشُّهدآءْ]

شكرا لك ويارك الله فيك...

[ملكة الاحساس بسومة]

شكرا لك على العموم
لكن لفت انتباهي البغرير تاع العروس يوم الصباحة حنا عندنا في خنشلة بيوم الصباحة اهل العروس يجيبوا معاهم الغداء وهو الشخشوخة عاملتها العروسة وامها مسبقا وياكلوا منها اهل العريس
المهم كلها جزء من تقاليد جزائرنا الواسعة

[ikram403]

تقاليدنا روعة

[سليم المبتسم]

نتمنو نشوفو هذه المنطقة في اقرب وقت ممكن

[rahmani28k]

نعم هذه هي تقاليدنا نحن الشاوية راهي متعة

[senisna aymen]

ممتازة شكرا لك

[الشاوية الخنشلية]

ايا انا نزيدلكم حاجة بالظبط من خنشلة مدة الفاتحة او الخطوبة تدوم 3 ايام اليوم الاول عشاء لاهل الدار مع سهرة الرحابة والبارود ما يخطي القعدة


اليوم الثاني نروحو في كورتاج للدار العروس نديرولها الحنة ونلبسولها الخاتم او ندولها ثاني لباتسري او قالب حلوى نص تديه لعروس والنصف الاخر نردوه معانا للعريس او كي نرجعو للدار لعريس نديرولو الحنة مع الزغاريد والغناء الشاوي الاصيل مع الاستماع الى فرقة الرحابة الاصيلة


واليوم الثالث لازم يحضرو النساء لكبار باه يحضرو الطمينة لي نقصدو بيها الفال تاع الفاتحة مع وقت لغدا يجيو والدين لعروسة يذوقو الفال او لعريس علبالكم واش يدير

اسيدي لعريس لعزيز يسرق روحو او يروح للعروس تاعو بالخفية او يعطيها لكادو تاعها او هاد لكادو من خيارو او على حساب قدو


او خلاص فلانة صبحت نتاع فلان


نستناو لعرس



رانا نهييو لحلويات او نجمعو لمال باه نكفيو لجهاز

[الشاوية الخنشلية]

راهو وصل لعرس تاع لعرسان لخيار


عراس الشاوية او ولاية خنشلة يقولو عليها 7 ايام او سبع ليالي



نبداو بيوم الاحد يعمل لعريس عشا في دارو لاهلو وصحابو

يوم الاثنين السهرة مع فرقة الرحابة والبارود

الثلاثاء نوصلو الكبش للعروس مع حوايج البرمة

يوم الاربعاء نروح في كورتاج نديرو الحنة للعروس او نلبسولها الخاتم او نديولها القفة او لجهاز نتاعها او ماننساش القشقشة او لمقياس والسلسلة +الذهب لي يدير اي عريس على حساب حالو كي نرجعو لدار العريس نديرو او ركاسترا ولا رحابة بالبندير والغناي والبارود او في هاذ الاثناء توزع الحلويات والشاي على الصبيان



ايا يوم لخميس نروحو في كورتاج هايل بالزرنة والفرس نجيبو لعزيزة تاع الدار كي نوصلوها للدار نسهرو مع الرحابة



يوم الجمعة ولا يوم الصباحة كيما نقولو يجيو اهل لعروس يجيبولها لغدا تاعها لي هو شخشوخة واطباق اخرى يعني لغدا على لعروس

او مبعد يجي اخ العريس او اي واحد من اهل العريس يحزم لعروس او يلصقولها دراهم فالحزام كيما نقولو هنا نحزمولها

يوم السبت تبدا الاسرة الجديدة

ايا لعقوبة لكل واحد او وحدة


في امان الله

[الشاوية الخنشلية]

عندكم لا تنساوني هيا شوي تعاليق

[الشاوية الخنشلية]

.................

[بلقاسم سوف]

ربي يصلح حال كل المتزوجين والمتزوجات

[princess kabylie]

والله في الحقيقة كل هاته العادة عفوية وجميلة ممتعة و عندها أكيد تفسيرات

فعلا

يعطيك ربي الصحة

[botate]

من عادات اهل جيجل ايضا فى اليوم السابع تاتي امها لزيارتها مع مجموعة من الاحباب و الخالات والعمات ومعهم ما لد وطاب ثم تخرج العروس لاول مرة من غرفتها وهي ترتدي اجمل الالبسة التقليدية ووووووووو على تحمل على راسها قصعة من حطب فيها مكسرات و بيض نىء و قمح شعير شموع حلوى اي كل ما يرمز للخصوبة والخير والجميع يغني اغنيات تقليدية حننينة ما اروعها ثم تقوم برمى ما القصعة تحت وابل من الزغاريد و التولوىل والضحك لان هناك من يصبها اى نوع من القدائف خاصة البيض النيء واخىرا وهو المهم في نضري تتشرف بغرس غصن شجرة زيتون سواء في الحدىقة او في محبس المهم البركة ثم يعودون بها تحت وابل من الزغاريد و الغناء وضربات البارود علما تتم هده الفرجة امام الماء كالبئر او الحنفية والعقو بة لكل الشابات و الشباب امين

[lamine chawi]

شكرا موضوع رائع ...ما اروع تقاليدنا...

[و يبقى الامل]

اذا على تقاليد الشاوية فهي لا تعد ولا تحصى عندنا بزاف شكرا على الموضوع جيت نزيد عييت واش نقول و واش نخلي وعندنا ثاني كي ينبت الطفل السنين يديرولو الشرشم وهو اكلة مصنوعة من القمح و تحكلو جداتو بحبة سنتوا الي خرجت

[ziaya]

في اعراس الشاوية اخر يوم( الجمعة) يطيبوا العصيدة او يرميو في القنصل00 5فرنك او لي لقاها زهروا مليح ولا هو راح يزوج عما قريب
مبصح العفسة تاع العسا هادي علا حساب العروسة نهار الجمعة جديدة تاع الجيل هادا
واش اللي خير العشا ولا العصيدة

[انانيس]

لي ماتعرفش تدير البغرير راحت عليها هههههه عادات هايلة ولكن هل هي موجودة الى الان ؟

[yousra flower]

شكرا على الموضوع فكرتيني بروايات جارتنا العجوزة ربي يرحمها لما كنت صغير كانت تحكيلي و قولي اياك تنساها و حنا رحلنا للغرب من وقت كنت صغيرو شفت عادات مختلفة بعض الشيء و موضوعك ردني لحنين الأوراس و بلاد الشرق ربي يحفظك

[fateh2dz]

merci khouya 3la tathkir lah yahfdak

[tafethi]

شكرا على الموضوع

[سليلة الغرباء]

يا أختي هذه العادات أكثرها إن قيست بميزان الشرع تعتبر جاهلية لأن فيها اعتقادات قد تكون شركية ،،، فمن أخبرهم بالغيب عندما تسقط حبات الحلوى من على رأسها ويقال أنها بعدد الاطفال التي ستنجبهم مستقبلا ،،، لعلها تكون عقيما أصلا

يعني فيها عادت شعودة توارثناها والعياذ بالله
عادة اإلصاق الزبدة على أعلى باب الدخول أيضا عندنا وهي أيضا اعتقاد جاهلي

عادة الحزام وهي عادة في نظري قبيحة لأن من يحزمها لازم يكون من أهل بيت زوجها ذكر من حمو أو اب الزوج أو عم الزوج وتصوري لما يكون رجل يمسك محزمة ويديرها على خصر العروس وهي في كامل زينتها ويغلقها على وسطها ،، وكاين اللي يضرب شطحة بعد التحزيم وسط النساء وهذا واقعنا الذي قبلناه على أنه عادة ضرورية للأسف

كيف يكون الذوق السليم وكيف تتقبل الفطرة هذا الامر إن كانت فطرة سليمة

يعني شيء مخزي ومقزز ولا حول ولا قوة إلا بالله

[issam touati]

فعلا هناك عادات لها علاقة بتصرفات شركية من جهة وغير اخلاقية من جهة اخرى ....هناك ما اخجل من ذكره ولكن الناس تصر على فعله بحجة انه من العادات...اللهم اهدنا لصالح الاعمال