مناقشة أمر الغش (التنقال) في الباك

[maher rezzig]

حاب نسقسي على التنقال في الباك بالنسبة للتواريخ والمصطلحات :confused::confused::confused::confused:

[khouloud_25]

راك شفت واش دار سي بوزيد ماكفاهش 10 ملاحظين في كل ليسي زادلهوم اعوان الشرطة للتفتيش+امراة شرطية خاصة بالبنات ربي يهديهم
تقول رانا في غوانتنامو

[nacer dj]

أنا المصطلحات و الشخصيات و التواريخ نقلتهم....و سكانيتهم من كتاب الوجيز و المكمل.

[AYACHI39]

انا التواريخ والمصطلحات والشخصيات حفظتهم ونقلهم من راسي هههههههههه:19::19:

[chinoui]

هادي اهانة للمترشحين لازم نرفضوا هاد القرار ماشي من حقهم

[يارب رحمتك]

يعني يا اخي مايجوز الغش او التنقيل كما سميته

ولكن والله ربي يصلح حال التعليم في الجزائر ..ماهو الفائدة من حفظ التواريخ ؟ باليوم والشهر والسنة

صراحة انا حفظت تواريخ الحرب الباردة وخلاص ..اما الثورة وغيرها الله غالب مارانيش آلة

ونصيحة ماتنقلش حاول هاد الايام فهم وخلاص اما التواريخ فالله اعلم عليهم نقطة فقط يعني لواحد مايقلقش روحو علاجالهم

لكن مافهمتش واش دخل الشرطة في الوسط ؟ الايكفي الأساتذة ؟

انا فهمت راهم معولين علينا هاذ العام والله يسطر....لاعتبة وتشويش كبير ووو

[stous]

من الغريب و العار ان يتعرض الاستاد النزيه إلى الاهانة و محاولة الاعتداء بالسلاح الابيض لانه لم يسمح للتلميد بالغش ( التنقال كما يقولون) الله يهدي تلاميد هدا الزمان و اعان الله اساتدتهم عليهم

[يارب رحمتك]

من الغريب و العار ان يتعرض الاستاد النزيه إلى الاهانة و محاولة الاعتداء بالسلاح الابيض لانه لم يسمح للتلميد بالغش ( التنقال كما يقولون) الله يهدي تلاميد هدا الزمان و اعان الله اساتدتهم عليهم

آه يعني لعلهم لهذا استدعوا الشرطة ؟

إن كان كذلك فليكن ....

الله يهدي التلاميذ واللذين كذلك خلاو التعليم يصل إلى هذا المستوى ...انا من عائلة الاساتذة..وعلى دراية بمعاناتهم ...فالاستاذ لايحق له الضرب ...ولا الطرد ...ولا اي شيئ ....والنتيجة تمرد التلميذ ...

إذا وصل الامر بالتللميذة تتحرش بالاستاذ في القسم ...فماذا بقي في التعليم ؟

إذاوصل الامر بالتلميذة تقول امام التلاميذ وفي القسم عندما سالها الاستاذ مابك؟ تقول له اريد الزواج ....

الله يسترنا

[manel de annaba]

انا والله العظيم نشوف فالغاش كامل يجري ورا التنقال ويصرف في دراهم ويجري في كل بلاصة وهوا كون غير كرس وقت الجري لشويا مراجعة خير تفيدو
مبصح من وجهة نضري وحسب جيل اليوم والله فئة قليلة برك لي راهي تقرا من اجل الثقافة والتطور اما الباقي الراكاي يقرا من اجل ينجح وبرك ليسونسيال ديت الباك بفففففففففف ههههههه على باك دزاير راكم تشوفو في حالة الجامعة اليوم الضرب والررخس وخلي منزيدش نكمل الجامعة ريحة تنفجر وتلميذ ناجح بالغش ولا بطريقة اخري قصدي البيستون اوكي مبصح هاذي هيا لبلاد ربي يجيب الخير للالجيال القادمة وتحسن مستوى الجزائر وخاصة شهادة البكالوريا
وفي الاخير ادعولي بالتوفيق والنجاح في شهادة البكالوريا 2011 يارب يارب

[amira3914]

نصيحة توكلو على ربي بربي الباك في يدك والله *من عشنا فليس منا *جماعة احلى النجاح من عرق جبينك اختكم اميرة

[taha Dz]

خويا نصيحتي نقل لتقدر عليه

وكونك فايق ماشي طنه

[محمد الأوراسي]

من الغريب و العار ان يتعرض الاستاد النزيه إلى الاهانة و محاولة الاعتداء بالسلاح الابيض لانه لم يسمح للتلميد بالغش ( التنقال كما يقولون) الله يهدي تلاميد هدا الزمان و اعان الله اساتدتهم عليهم

الاساتذة كيما يكونوا في دور الحراس تلقاهم يطبقوا القانون بحذافيرو وكي يجي دورهم باش يمتحنوا في امتحان تحسين المستوى يبان عارهم تلقاهم جابدين الكتب و يغشوا بكل وقاحة .بالطبع كاين ليبذل مجهودو في الطرفين التلاميذ و الاساتذة و ربي يعينهم. انا اعتقد انا الخطا في البرنامج لاني مجرب و عندي خبرة [ 2bac sc exact + 4 bac sc natur +license+pharmacien ] الانسان عندو قدرة كيفاش تطلب منوا يحفظ هذا الكم الهايل من المعلومات ليراح ينساها بعد الامتحان مباشرة .لازم يكون البرنامج خفيف و ظريف كيما يقولو و هاذي مسؤولية المختصين اذا كاينين.نتمنالكم النجاح

[fatma88]

عندك حق خويا هاذى هي بلادنال الله يجعل الخير

[al-annabi]

لا انصحكم بالغش و لكن ارجوا ان يخف المصححين ايديهم قليلا خاصا مع الاحرار لانه كل مرة كانت تنقصني نقطتان او ثلاتة عن النجاح و الله اكبر عداب

[atmaneprof06]

الله يرحمك يا التعليم و التربية في الجزائر

[djihade]

والله انا صرااحه اذا قدرت انقل يعني الدنيا كامله مغشوش فيها جات غير في التنقيل

[النقاء]

التعليم في الجزائر .........إنا لله وإناإليه راجعون

زمان تعليم تع الصح

اليوم تعليم من أجل ......راكم عبالكم

والله ماني خايف من واحد

خايف نعصي ربي

[ام ايمان16]

http://up.a7bk-a.com/img2/itl54750.gif

[MOKHTAR MSTAFA]

[]مجياش واحد راقد كسول مايتعبش او يربح يا اساتذة الي ينقل لازم ايخلص زيروا رواحكم[/

[seif2121]

انا الدروس كامل مزوميهم لغير المصظلحات راح نعقب اوراسي فارغ امبصح كاين الزوم افك

[yara.bibi45]

wach ngolak twakal 3la rabi alah yjib lkhir

[amrane30]

انا مانكذبش على خاوتي فالاجتماعيات جبدت زوم فيه الدروس كل وفالفلسفة درت الكيت وفالشريعة جابولي الاسئلة مي الرياضيات والانجليزية والفرنسية مادرت والو

[بنت عمار]

جبدت الزوم و ما فاقوش بيك
نحن و الله االحالة مزيرة النفس ماكانش يشك فيك يقلك اوقف و يفليك وكان زوم ينحيهم و كان كيت ينحيهولك
ربي ينجحنا

[SOUMA 04]

والله انا صرااحه اذا قدرت انقل يعني الدنيا كامله مغشوش فيها جات غير في التنقيل

منين جاتك النظرية هادي؟؟؟
علاه ربي قال كي تنتشر المعصية ماعليش مسموح .......

[ferasferas]

الغش في البكالوريا او اي امتحان في الجزائر اصبح موضة يفتخر بها
حتى اولياءنا تشجع ذلك بحجة الرداءة في الجزائر
الكثير منا نجح بهذه الطريقة وتقلد مناصب عليا في الدولة وفي جميع قطاعاتها
لكنه عاجز عن اداء مهامه كما ينبغي ولا يستطيع ان يؤديها ولن يؤديها
لانه وبكل بساطه يعلم علم اليقين في داخله ان هذا المنصب ليس له بل هو لغيره
والكارثة ان الجميع يطالب بالاصلاح وهو في الاصل يحتاج الى اصلاح
رحم الله ايام الجزائر عندما كان المعلم يخرج من القسم ولا يتجرؤ تلميذ عن الغش
ليس لانه لا يستطيع وانما يعلم ان هناك رب يراقبه

[خولةalgér]

بن بوزيد كاش مخلى فيها جو تع امتحان والله تقول علينا ارهاب ترفد راسك تلقى العسكر كل واحد منين مقبلك حتى المعلومة الي عندك طير
بصح حتى ولو كانت فيه فرصى للغش لازم الشخص يعتمد على روحو وينجح بتعبو وقرايتوا

[hani23]

يا ناس اتقوا الله و اخشوه..إن ما بني على باطل فهو باطل..الذي يغش فهو لا يستحق شهادته و بالتالي فكل ما يتحصل عليه فيما بعد هو باطل و المال الذي يجنيه من عمله إن كان قد تحصل على عمله من خلال الشهادات فهو مال حرام و العياذ بالله لأن شهاداته كانت بالغش و العياذ بالله..هذا ما أعرفه و الله أعلم..اتقوا الله و لا تستعملوا الغش فتندمون..السلام عليكم

[kada1]

الله يعفو عليكم انا نعرف بعض المناطق يكتبوا ليهم الاجابة على السبورة