مساعدة كيف احضر شوربة فريك

[فاتي ميسون]

السلام عليكم اريد معرفة سر نجاح شوربة افريك متميزة

[يُنبوع~العطآء]

السلام عليكم
اختي تقطعي حبة بطاطا صغيرة، بصلة ،راس فلفل ، جزر، ثوم طماطم حب
تحطي كامل هادي الخضر +زيت + فلفل + ملح + كمون + عقاقر الشربة +حمص + اللحم
تحطيهم على نار هادية حتى تنشف من الماء ومن بعد حطي الطماطم المصبرة
وتولي تشمي في ريحة مليحة
زيدي الماء وكي تولي تغلي حطي شربة فريك
وخليها تطيب
هكذا نديرها
واستناي البنات واش يردوا

[*بيتي مملكتي*]

هذه شربة فريك تاع ومضان تاع البساكرة:

رطل لحم خروف مقطع قطع متوسطة
5 سنينات ثوم مفرومة
2 حبات طماطم مرحية
4 ملاعق أكل زيت
2 ملاعق أكل طماطم مصيرة
نصف ملعقة راس الحانوت
ربع ملعقة فلفل أسود مرحي
ملح


ضعي كل المقادير في طنجرة مع ربع كاس ماء و دعيها تتقلى مليح
ثم امرقي بالماء حوالي 2 إلى 3 لترات ماء
دعي اللحم يطهى ثم ضفي ملعقتين إلى ثلاث حسب عدد لترات الماء فريك و دعيه يطهى حتى تخثار

زينيها بالحشيشة المقطفة و قطع ليمون من الفوق وبالصحة و الهناء

[ام ظافر]

اختي نعطيك سر شربة الفريك تاعي وانت حرة
اولا ما تكثريش الزيت واذا اللحم مشحم انزعيلو الشحم
انا ما نديرش فيها الخضر ( اقصد الجزر والبطاطا والجريوات ) لان الفريك من بعد راح يعقدها ما تحتاجش للخضرة تبدل طعمة شربة فريك
ثاني لما تشوفي اللحم طاب صفي المرقة من كل الشوائب في كسكاس لازم تكون المرقة صافية من البصل والثوم وقشور الطماطم وحتى التخ تاع التوابل صفيه
ثم كيلي الفريك تاعك في غرفية وديريلو شوي زيت مثل المعجنات ومن ثم اغسليه بماء سخون ماشي دافي ومن بعد لوحيه على المرقة وخليه يطيب ولما تشوفيه طاب عقدي المرقة وثقليها بغبرة الفريك الي كي تطحنيه وتغربليه تسقط التحت واذا ما عندكش ارحي شوي في رحاية القهوة وخليه ديما للشربة تاعك وزيدي قرن فلفل حار يطلق الريحة تاعو
استعملي فلفل عكري (حمر حلو ) لكي تنقصي من الطماطم وما يجيش حامض من الطماطم ولكن لازم يكون العكري نوعية جيدة
وفي الاخير كي طفي النار افركي بين صباعك 2ورقات نعناع ناشف وشمي الريحة الزينة وذوقي البنة الهايلة

[فاتي ميسون]

اشكركن اخواتي من كل قلبي و دمتم بود

[ام شرفو]

هاذي الطريقة تاعي
اللحم لازم غنمي تحطيه مع البصل و الدبشة( الحشيش او القصبر) والطماطم مصبرة و الحمص و فلفل اسود و ملح مع 2 مغارف ماء قليهم مليح
وزيدي 2 كيسان ماء سخون خليهم ربع ساعة على نار هادية
و قبل ما تنشف حطي الماء (امرقي) تغطي اللحم خليها تغلي شوية ثم نقصي النارحتى يطيب اللحم ما تخليهاش تنشف
ناخذ قيس فنجان تاع الحليب ناقص شوية فريك نسوموه كيما الطعام ( نزيل الشوائب) وانزيدوه للمرق حوالي 15 دقيقة لما تشوفيه اثقال المرق حطي حوالي مغرفة قهوة او حسب الذوق نعناع يابس مع شوية دبشة وطفي
- ملاحظة سر نجاح الجاري اللحم خروف والفريك الجيد

[بتول8]

هناك فرق بين الشربة و الحريرة بالخضر نسمةها حريرة و بالفريك فقط شربة

[allmaza]

http://www.djelfa.info/vb/showthread.php?t=505605