الشخشوخة ماصلحتليش افيدوني

[ريماس]

سلام ينات واش راكم
لبنات قبل يومين طبخت الشخشوخة البسكرية الي يعملوها الكرسة تاعها زي الرقاق ويفتتوها مي جات روووووووووووعة السبب الي خلاني ماعجبتنيش هو انا لما درتها في الاصوص بعد مانحيت ليها اللحم وصفيتو وحدو حبيت نجمرها يعني زي التليتلي شغل تعجنتلي ولسقت
انا حبيت نعرف من شكون الي جربتها تقولي اسكو هي تتحط في صحن ويضاف ليها الاصوص ولا تعمل زي ماعملتها انا



بالرغم من انو مانحبش الشخشوخة ههههههههه وكل العجائن ..............
انتظر ردودكم

[selena]

بصحتك أختي هي تتعمل كيما درتيها نت يصح بالاك مادرتيلهاش الويدة قبل ما تحطيلها المرقة
أو ما فارتش مليح
بصحتك

[ريماس]

علا هي لازم تفور ؟؟؟؟؟؟؟؟؟؟؟؟؟؟؟؟؟؟؟؟؟

[zenouba]

اكيد لازم تفور و لازم كدلك ملتجمريهاش بمعنى تحطيلها المقرة غير بشوية ماشى تعوميها و بعيد على النار تخليها تشرب المرقة بشوية انا هده الطريقة نتاعلى

[Roumyssa]

علا هي لازم تفور ؟؟؟؟؟؟؟؟؟؟؟؟؟؟؟؟؟؟؟؟؟


لالالا اختي الشخشوخة البسكرية ما تفوووورش مي حطي المريش (يعني الرقاق المفتت) و اسقيه بالصوص و زينيها بطراف اللحم و قدميها هكاك

[lamis932]

لالالا اختي الشخشوخة البسكرية ما تفوووورش مي حطي المريش (يعني الرقاق المفتت) و اسقيه بالصوص و زينيها بطراف اللحم و قدميها هكاك


ايه مام حنا نطيبوها هكا
الرقاق مايتفورش جامي هادي غلطة كبيرة

[OU SS AMA]

سبحان الله احنا نفوروها مرة وحدة ونسقيوها واحنا نسميوها النعمة كل واحد عندو طريقة وعندو اسم والشخشوخة عندنا تاع الضفر هي لي نرجعوها شوية على النار تتجمر وتشرب المرقة

[طيب القلب]

لالالا اختي الشخشوخة البسكرية ما تفوووورش مي حطي المريش (يعني الرقاق المفتت) و اسقيه بالصوص و زينيها بطراف اللحم و قدميها هكاك
هذه الطريقة الصحيحة للشخشوخة

[ام شرفو]

هي رقيقة بزاف بعد ما تتفور تحطيها في الصحن وفوقها اللحم و الحمص اذا تحبوها مشمخة سقيها مليح واذاتحبوها ناشفة نفصي لاصوص كيما الطعام(الكسكسي) حطي لاصوص بجنب الصحن وزيدي حسب الطلب

[nourmaram]

السلام عليكم عندنا نفوروه لانو الرقاق هداك فيه زيت باش ميجيش ميدم ومتخليهشيفور بزاف يتشمخ
وسقييه وحطي بالصحة واحنا عندنا نسموه الرفيس ونفضلوه بالجاج ماش لحم

[ام خديجة1]

احنا اختي نسموها النعمة وتتفور مرة واحدة ونضعها في صحن التقديم ونضع اطراف اللحم او الدجاج ونسقيها شوية باش ما تتعجن واللي يحبها زيادة في لاصوص قدمي لاصوص في صحن جانبي ويسقيها كيما يحب وبصحتكم على فكرة هذا النوع من العجائن لا يجمر كاين التليتلي وشخشوخة الظفر هما ليتجمرو

[sonia.morchid]

أختي حنا نقول لفتات و أنتم تقول الشخشوخة البسكرية المهم التسمية فقط تختلف طريقتها نفتت الرقاق(لفتات وكاين لي يقول تاني الرفيس) تم نفوره مرة وحدة ونحط في صحن ونسقيه بالمرق حتى يطرى جربيها هكدا وانشاء الله تصلحلك المرة الجاية وبصحتك.نسيت ما قولتلقش تضيفي شويا زبدة ولا سمن للرقاق قبل ما تضيفي لصوص ما تكثريش الزبدة.

[ريماس]

مري لبنات على النصائح يعطيكم الصحة ان شاء الله المرة الي جاية تصلحلي ونرجع ليكم
مرسسسسسسسسسسسسسسسييييييييييييييييييييييي

[ملك اريج]

اختى ريماس الشخشوخة لي فالصورة تتسقا ماتدارش كي تليتلى
http://img102.herosh.com/2011/03/17/174659472.jpg (http://www.herosh.com)

[ريماس]

ايه زي الي درتها انا قلب درك نعود نسقيها ومرسي

[ام جويرية ورقية]

مساء الخير يااخت شخشوخة متتغلاش كي تلتلي لخاطر رقيقة تسقى بركراهي رقيقة تعجنلك ولا حبتي تغليها لازم تكون خشينةمتكونش رقيقة

[asmahane b]

مساء الخير لا شخشوخة بسكرة متتعملش كيما التليتلي لان الرقاق او الفتات رقيق مش كيما التليتلي
الشخشوخة تتسقى هادي البسكرية على عكس الشخشوخة البوسعادية الي تتخلط المرق مع الرقاق

[janna]

السلام عليكم و رحمة الله و بركاته . . . راهم كاين أخوات مافهموش وش هو الرقاق و حسبوه شخشوخة الظفر (المقص)، الشخشوخة البسكرية هي تع الفطير هاذيك هي الرقاق.
شخشوخة الظفر تتفور تتخلط في المرقة كيما قالت الأخت Celena و الأخت Zenouba . . أما الشخوخة البسكرية ما تفورش تتحط في صحن و تسقيها بالمرقة و الخضرة و تزينيها كيما قالت الأخت Roumyssa.
بالتوفييييييق.

[ريماس]

اوووووووووووووووووووووكي راني فهمتكم لبنات بارك الله فيكم

[nouhati]

السلام عليكم اختي الشخشوخة او بالاحرى الفتات مايفورش لاخاطر راه جديد و لين تحطي الرقاق المفتت في صحن التقديم او القصعة و تسقي من الفوق لاصوص و تزينيها بالشيء اللي درتيه في لاصوص مثل البطاطا اوغير دلك و تزينيهبالفلفل الاخضر الحار اما ادا درتي الفتات وخليتيه في الكونجيلاتور او خليتيه يبس مليح هديك تقدري تفوريه اما الجديد جامي تفوريه

[ريماس]

مرسي اختي بارك الله فيكم كفيتو ووفيتو

[chaymoum-17]

لالا اختي الشخشوخة المورقة جامي تجمريها بلاصوص الشخشوخة البسكرية ولا الشخشوخة الشاوية ما تتجمرش تقطعيها مستطيلات او مربعات با المقص ومنبعد تسقيها بلاصوص

[سوسو الطموحة]

راكم دوختو المخلوقة .......ظرك تحلف ماتعودهاش.....................هههههههههههههههههههه ههههههه.

[ريماس]

هههههههههههههههههفهمت اريج قصدهم الي تتورق زي الي وريتي هالي ماتتفورش تتحط في صحن وتتصقى
ولاخرة تاع المقس الي يطيبوها لقسنطينية ماتتورق تجي قرص قرص وتجي بيضة شوي وتتقص بالمقص ولا الظفر وتخليها ايامات تشيح وبعد تتفور وتتجمر هذي جربتها وصلحتلي فور
بارك الله فيكن

[nihal2011]

:mh92: طريقة تحضير الشخشوخة البسكرية


جيبي الدقيق بليه بالماء وخليه يتبت 10 دقايق ثم عاودي ابداي اعجني فيه وكل مرة زيديلو الماء حتى يترخف يشوية ماشي ياسر وامباعد ملحيه وحطيه قرصات قرصات اشوية وابداي لوحيه على شكل اوراق فوق بعضها البعض وكحيه واخيرا فتييه.
اما المرق جيبي اللحم قطعيه زيديلو الملح والدواء الرقيق والبصل مكرفش والثوم تاني والفلفل الحار الاحمر والزعفر وطماطم الاطة والزيت واعلا نار هادية5 الى10 دقايق زيديلو الماء واغلقى الكوكوطة ولما يطيب اللحم نحيه وحمريه فى المقلة بالزيت وجيبي الباطاطا والجريوات والحمص مقطعة قطع كبيرة ولوحيها في القدرة لما تنضج اخلاص قطعي راس بصلة كبير وجواوات فلفل اخضر كامل موش امقطع .
كيفية التحضير .جيبي الصحن او التاجرة وضعي الفطير( الكسرة) فيها ضعي المرقة فها وزينيه بالخضرة واطراف الحم وشهية طيبة.........

ملاحظة الشخشوخة البسكرية ما فيهاش التفوار هاذيك انتاع قسنطينة ماش انتاعنا انا بسكرية دوريخين وماكانش عندنا بالسلامة.:mh31::mh31::mh31::mh31::mh31::mh31::mh31 ::mh31::mh31::mh31::mh31::mh31::mh31::mh31::mh31:: mh31::mh31::34::34::34::34::34::34::34::34::34::34 ::34::34::34::34::34::34::34::34::34::34::34::34:: 34:

[ام سامي15]

مري لبنات على النصائح يعطيكم الصحة ان شاء الله المرة الي جاية تصلحلي ونرجع ليكم
مرسسسسسسسسسسسسسسسييييييييييييييييييييييي

سمحيلي ختي ريماس


المشكلة ماشي في التفوار


المشكلة نتاعك كي جمرتيها


و هذا هو الخطأ


أنا جربت المفورة و جربت لي ما شي مفورة عادي


و لكن لا تجمريها أبدا أبدا تفسد

[اسراء02]

الشخشوخة البسكرية تفور شوية تحطى المرق شوية لانها رقيقة

[ريماس]

بارك الله فيكن

[zakia05]

الشخشوخة ما تفورش و لكن تسقى بالمرق

[ريماس]

مرسي عليكم
جعلها الله في ميزان حسناتكم

[allmaza]

سلام ينات واش راكم
لبنات قبل يومين طبخت الشخشوخة البسكرية الي يعملوها الكرسة تاعها زي الرقاق ويفتتوها مي جات روووووووووووعة السبب الي خلاني ماعجبتنيش هو انا لما درتها في الاصوص بعد مانحيت ليها اللحم وصفيتو وحدو حبيت نجمرها يعني زي التليتلي شغل تعجنتلي ولسقت
انا حبيت نعرف من شكون الي جربتها تقولي اسكو هي تتحط في صحن ويضاف ليها الاصوص ولا تعمل زي ماعملتها انا



بالرغم من انو مانحبش الشخشوخة ههههههههه وكل العجائن ..............
انتظر ردودكم

هي ما تفورش و ما تتجمرش غير تسقيها برك

[ريماس]

مرسي اختي ................