قصة عبد القادر( أستحلفك بالله أن تقرأها) [الأرشيف] - منتديات الجلفة لكل الجزائريين و العرب

مشاهدة النسخة كاملة : قصة عبد القادر( أستحلفك بالله أن تقرأها)

kad_oma

2011-03-09, 23:05

حياة الشاب الجزائري
1980(0 سنة) : ولد المدعو عبد القادر و يا فرحت والديه بيه يكبر ويخدم عليهم :D
1986(6 سنوات): دخل المدرسة وتحصل على المرتبة الأولى فرحوا بيه والديه وشراوله بيسيكلات. :)
1992:(12سنة) انتقل إلى المتوسطة ( إنه ذكي و سيكون إطارا في المستقبل) :mad:
1996:(15 سنة) ربح شهادة التعليم المتوسط و سينتقل إلى الثنوية إنها خطوة مهمة :mh31:
1999: (18سنة) لقدد حقق حلم والديه ربح الشاب و سينتقل إلى الجامعة الحمد لله :1:
2004(23 سنة) أنهى الدراسة الجامعية و أصبح مهندس أد الدنية :cool:
---------------------------- بداية الفلم---------------------------------------------------------------
سبتمبر 2004
الشاب: ذهب إلى الشكنة : راني حاب نفوت لارمي
العامل : تخرجت هاد العام ، آآآآ لا لازم تقارع حتى لمارس
الشاب: و واش ندير دروك
العامل : نعطوك سورسي و كي يجي مارس نعيطولك
الشاب: :confused:
مارس 2005( 24 سنة)
عاد الشاب إلى الثكنة : راني ستنيت و ما عيطتوليش؟؟؟؟؟؟؟؟؟؟؟؟؟؟؟؟؟؟؟؟
العامل : جماعتك مازال ، لازم نفوتوا لي قبلكم
الشاب: و ما هو الحل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
العامل : زيد صبر لسبتمبر مالك مقلق.........؟؟؟؟؟..............
الشاب :mad: ( كرهت مازلت ندي المصروف على الشيباني أنا كرهت)
الأم: مالك عبد القادر
عبد القادر: مكان والو قالولي لسبتمبر، ما تقلقيش روحك
الأم: روح الله يهنيك منها يارب ، نصلي و ندعيلك
لقى عبد القادر خدمة تاع anem ب 12000دج
عبد القادر : ماعليش خير من والو :o
ما عيطولهش في مارس و جا سبتمبر
سبتمبر 2006( 25 سنة)
الدركي: أنت عبد القادر.
عبد القادر : نعم
الدركي : هاك la convocation جاتك في شرشال.
عبد القادر: يما تبقي على خير، راني رايح نفوت لارمي.
الأم : :o روح الله يردك بالسلامة...
مارس 2008(27 سنة)
خسر عبد القادر عام و نص من حياته و مازال ما دار والو.........................................
عبد القادر: يما راني وليت و كملت لارمي
الأم: مرحبا الحمد لله أدخل ريح خاصك، نزوجك دروك يا ولدي
عبد القادر : مازا الخدمة يا يما ما تتقلقيش
الأم: ما عليش ، نخطبلك و كي تخد تزوج.

2009 (28 سنة) 2010 (29سنة) 2011 (30سنة)عبد القادر مازال يحوس على خدمة و الخطيبة تاعوا سمحت فيه
يحسن عونها ما قدتش تزيد تصبر تزوجت واحد خضار على الأقل عنده دراهم و يقد يعيشها
خير من هاد المهندس اللي حاصل في روحه
من زهر عبد القادر صحابه سمحولهم في لارمي (إعفاء للذين أكبر من 30 سنة) مسكين ما عندهش الزهر.
عبد القادر: :sdf: قتلتني الرشوة و المعريفة الحل هو نحرق روحي
واش تقولو فيها :mh5858:

alilou85w

2011-03-09, 23:10

والله رانا قاع كيما هكا في هادي البلاد بصح كون يتفاهمو ليجان راح نلغو الخدمة الوطنية والله غير زيادة مادام كاين كونتراكتيال على بلعاني يطولو بينا الحبل و يميزرونا بلا سبة

الناصر لدين الله

2011-03-09, 23:37

قصة مؤثرة تعبر عن واقع وحال الشباب الجزائري اليوم
كان الله في عون الجميع

عاشقة السكـون

2011-03-10, 00:07

عبد القادر: قتلتني الرشوة و المعريفة الحل هو نحرق روحي
واش تقولو فيها

لالا خويا احرقهوم هوما ماتحرقش روحك انت اسمحلي لكن اذا حرقت روحك واحد ماراح ييبكي عليك ولا يشوف لحالك غير والديك ونفسك ربي يوفقك والدنيا "دوارة" وكل واحد ان شاء الله يدي على حساب نيته " يمهل ولا يهمل"

djoo81

2011-03-10, 00:13

أنا راني كثر عليك من 2004 وأنا نسانا في 2006 خدمت بري أو مبلوا ماشي anem عام كامل وما سلكتوش حتى اليوم ودرت دوسي تاع الكفالة عام كامل وهوما يجريو فيا باه حكموه في 2008 فت لا كوميسيو واعطاوني لا كارت جون ونهار هزيت شهادت إعفاء مؤقتة والله لغدوا نحاو لا كارت جون من الخدمة وهزيت لا كارت في مارس 2010 وعقبت حوالي 70 كونكور عبر كامل التراب الوطني ويوم قررت نفتح مكتب محاماة بعد 7 سنين بطالة خرجت ريزيلطا تاع كونكور في مديرية التشغيل نجحت فيه وراني عندي شهر خدمة في المديرية اللي ما سلكتنيش للعلم انه يوم تلقيت اتصال من المديرية ليخبروني بنجاحي كان يوم الخميس ويوم الجمعة انتفض الشباب الجزائري وخفت الريزيلطا يحرقوها مع المديرية وربي راه ستر

خويا ربي راه كبير ورزاق ما تيأسش للعلم المنصب الذي تحصلت عليه كان بشهرين من خطبتي جابت الرزق التاعها

حسينة 36

2011-03-10, 01:30

بالعقل خويا ربي معاكم

Diblino

2011-03-10, 10:49

توشاتني ليستوار

el arbi nasse mlah

2011-03-10, 10:58

اففففففففففففففففففففففففففففففففففففففففف ربي يجيب الخير

BAROUD

2011-03-10, 11:06

ربي يلطف بنا انا تقريبا عندي la copie تاع هذ l'histoire
الله غالب البلاد معوجة من الفوق حتئ التحت

aminosaidi

2011-03-10, 11:20

كاين الألاف القصص مثل هده في بلادنا بصح العيب فينا رضينا بهادا الواقع المر وسكتنا عن حقوقنا وأبسط حقوقنا هو الشغل لازم نديرو اليد في اليد لإسترجاع حقوقنا المهضومة

القدس تنادينا

2011-03-10, 11:21

ربي يجيب الخير اخي وثق بالله لا محال تفرج

احمد مستغانم

2011-03-10, 11:27

لاتحرق نفسك اخي ربي يهديهم المشكلة انه العنصر النسوي هو السبب

nino404

2011-03-10, 12:03

ربي معاك أخي

بن جابر

2011-03-10, 12:42

صحيح الشباب يعني....قتل النفس حرام.
مشكلتنا الأولى بعدنا عن تقوى الله وعدم إتخاذ الأسباب....توجد المعرفة والرشوة والمحسويبة لكنها لاتغير في قدر الله وقضائه شيء.

medmay86

2011-03-10, 13:47

و الله واش نقول ل اخي أصبر و ربي درك يفرج.

yaya41

2011-03-10, 14:01

تحرق روحك وعلاه خمم في والديك لكبروك مش في الكلاب تاع المسؤولين هوما ليتحرقوا في جهنامة ان شاء الله قولوا ان شاء الله معايا

dreamboydz

2011-03-10, 18:26

ندعو الله جل جلاله أن يفتح باب الخير و أن يرزقك من حيث لا تحتسب

اقتصاد

2011-03-10, 19:41

وسع بالك وهاذي هي الدنيا المهم انتا خلي اتكالك على الله و اصبر -ان الله مع الصابرين-

الماريشال

2011-03-10, 19:57

السلام عليكم إخواني و أخواتي الأفاضل
كلنا مسلمون و الحمد لله ولدنا على فطرة الاسلام
و هذه أول نعمة من الله الواحد القهار

يا جماعة دار الدنيا ما هي إلا امتحان لنا
دار الدنيا ما هي إلا سويعات فانية للمرور إلى دار الآخر دار الخلود

يا جماعة الخير الحمد لله أن كل شيء بمشيئته
فهو الخالق عز و جل و هو المسير و المدبر للكيان.
و الانسان عبد ضعيف لا حول و لا قوة له

يا جماعة الصير فالصير إن الله مع الصابرين

يا جماعة لو كل واحد منا يتفكر الموت (و التي هي نعمة من نعم الله أيضا) مرة واحدة على الأقل يوميا لما أضحت حالة الانسان المسلم على هذا النحو من الجهل و من النفكير في الانتخار و الحرق و القتل و غيرها من الأمور الجهلية التي تتناهى مع الشرع الاسلامي..

المهم يا جماعة توكلو على الله القادر على كل شيء
و المظلوم منا يتحسب ربه الذي يقول للشيء كن فيكون.

أخي الكريم لست وحدك المتخبط بين أيدي الظلم و التعسف و التهميش و غيرها
إذا عمت خفت
فقط التناصح بما فيه الخير و الصلاح

دمتم بود
و السلام عليكم

mourad28009

2011-03-10, 20:20

الله المستعان

kad_oma

2011-03-10, 20:31

sidahmed29

2011-03-10, 20:41

[QUOTE=kad_oma;5240846]حياة الشاب الجزائري
1980(0 سنة) : ولد المدعو عبد القادر و يا فرحت والديه بيه يكبر ويخدم عليهم :D
1986(6 سنوات): دخل المدرسة وتحصل على المرتبة الأولى فرحوا بيه والديه وشراوله بيسيكلات. :)
1992:(12سنة) انتقل إلى المتوسطة ( إنه ذكي و سيكون إطارا في المستقبل) :mad:
1996:(15 سنة) ربح شهادة التعليم المتوسط و سينتقل إلى الثنوية إنها خطوة مهمة :mh31:
1999: (18سنة) لقدد حقق حلم والديه ربح الشاب و سينتقل إلى الجامعة الحمد لله :1:
2004(23 سنة) أنهى الدراسة الجامعية و أصبح مهندس أد الدنية :cool:
---------------------------- بداية الفلم---------------------------------------------------------------
سبتمبر 2004
الشاب: ذهب إلى الشكنة : راني حاب نفوت لارمي
العامل : تخرجت هاد العام ، آآآآ لا لازم تقارع حتى لمارس
الشاب: و واش ندير دروك
العامل : نعطوك سورسي و كي يجي مارس نعيطولك
الشاب: :confused:
مارس 2005( 24 سنة)
عاد الشاب إلى الثكنة : راني ستنيت و ما عيطتوليش؟؟؟؟؟؟؟؟؟؟؟؟؟؟؟؟؟؟؟؟
.................................

انا راني في هذه المرحلة :30:

univ-fisdis

2011-03-10, 20:45

مانحكيلكش مالا أنا قصتي ياخو؟؟؟؟

محمد1482

2011-03-10, 21:02

رانا صابرين حتى يفرج ربي و الناس الي اكلو لنا مناصبنا و حقوقنا نوكلو عليهم ربي ...............

hocine hasen

2011-03-10, 21:21

خويا عبد القادر يوم 20 مارس 2011 روح للعاصمة واحرق وانا معاك مقر الحكومة حكومة السرارقة واصحاب البطون الكبيرة والرؤوس الثملة وراح تشوف التغيير ياك ماقالولكش باللي في هاذ البلاد الواقف هو اللي يعيش يعني تحرق نعطيولك خدمة (نسكتوك بخدمة ماتديرش النش).
بـــــــــــــــــــــــــــــــــــــــــــــــــ اي بـــــــــــــــــــاي على هاذ البلاد حسيــــــــــــــــــــــــــن البرايجـــــــــــــي

abdel02

2011-03-10, 22:49

صبرا يا عبد القادر فان الموعد جنة نعيمها لا يفنى و شبابها لا يشيب و حور عين لو رايت احداهن لعفت كل نساء الدنياها قد انقضت من عمرك30 سنة مادا بقي10 20.ايام معدودات ثم يقبر كل واحد منا لا ياخد من دنياه الا عمله.ولا تنسى ان معظم اهل الجنة من فقراء الدنيا....

salamasaida

2011-03-10, 22:57

ngolek haja ga3 rana abdelkader
karhoyny fhad lbled
raby ijyb lkheir

mimi-dz

2011-03-11, 14:46

لا حول ولا قوة الا بالله
اخي اصبر واحتسب و وادعي ربي يفرج عليك
ماتحرق روحك ماوالو ان شاء الله يجي نهار ربي يفرج وتلقى خدمة وتولي تقول كنت
نت برك ما تيأسش اسعى وربي ما ينسى حتى واحد
وخويا الي يقول العنصر النسوي هو السبب انا وحدة بحاجة لخدمة باش نصرف على والديا ونعاون بابا يخلص ديونو وراني لحد الآن صابرة 8 سنوات ضاعوا من عمري رفضت الزواج علجال الخدمة وفي الأخير ما حصلت والو
المهم انا مازلت نصبر ومؤمنة بلي الرزق الي كاتبهولي ربي يلحقني
علبالي مارناش كيف كيف نت راجل وانا امرأة ونت الأولى بالخدمة ولكن انا تاني واحد ماراهو يصرف عليا خاوتي الدكور كل واحد لاهي بروحو

في الأخير ندعي ربي يفك أزمتك وأزمة كل شاب في الجزائر ويرزقك بخدمة يارب

بقداد

2011-03-11, 15:42

ربي يجيب الخير

mohelil

2011-03-11, 15:45

اصبر وربي يجيب الخير :mad: انا يظهرلي راح يصرالي وش صرالك

geld

2011-03-11, 15:56

شكراااااااااااااااااااااااااااااااااااا

حسين القعقاع

2011-03-11, 16:53

ربي يجيب الخير اخي وثق بالله لا محال تفرج

maam24

2011-03-11, 17:26

سلام الله عليكم ورحمته وبركاته........صحيح انها قصة و نموذج واحد من بين الاف نماذج الشباب الجزائري ...ولكن للاسف ما بيد حيلة ....... لان كل شيء بمقدار واجل....ولا تقولو لي ان بسبب المعريفة او الرشوة...لا والف لا ...كفانا شرفا اننا ما عنداش بصح ما يخصناش لانهم ياكلون في الحرام والعياذ بالله....وضدقونني ان كل شيء مكتوب ومقسم بيد الله عز و جل...يجب علينا الصبر والدعاء الا ان ياتي الله بساعة الفرج من عند الله فقط لا غيره....كل شيء مكتوب من عند الله لا معريفة ولا اكتاف ولا اي شيء.....في معنى الحديث النبوي....اذ اجتمعت امة ان ينفعوك بشء لن ينفعوك الا بشيء كتبه الله لك ...واذ اجتمعت امة على ان يضروك بشيء لن يضروك الا بشيء كتبه الله لنا .....واختم حديث بمايلي ...اطلبوا حوائجكم بالعزة فان المقادير تسير بيد الله عز وجل ...واللهم فالق الحب والنوى ات كل واحد منا ما نوى امين امين

naziha.zio

2011-03-11, 21:13

الله ينورك خويا ويعطيك غير الخير ان شاء الله ..

وربي يرزقك الهنا والصحة ان شاء الله من بعد الدراهم ....

الله يهنيك

لاتحرق نفسك اخي ربي يهديهم المشكلة انه العنصر النسوي هو السبب

وانت راه جايك الحال على النساء ..كل خطرة واش دير ..موضوع ..رد

السبة مراهيش فينا خويا ....السبة راهي في البلاد تاعنا والمسؤولين

....مشي قاع رانا نخدمو رانا في دار والدينا

.....

الله يهدينا

nooriman

2011-03-12, 18:29

ربي يفرج عليك أخي و يعوض صبرك خير قولوا
آميييييييييييييييييييييييين

mohamed.adel0

2011-03-12, 20:37

اصبر خويا ودير الثقا في ربي صبحانو

mostapha08

2011-03-12, 21:02

بسم الله الرحمان الرحيم ( من يتقي الله يجعل له مخرجا ويرزقه من حيت لا يحتسب ومن يتوكل على الله فهو حسبه ) صدق الله العطيم
يا شباب الجزائر راني نكتب وقلب تاتر كلنا جامعين صرتلنا نفس القصة رغما المممتلين يختلفوا لكن الحمد لله ارجوا من كل شاب ان يتقي الله ويعلم ان الرزق بيد الله وهو وكيلنا فنعم الوكيل واكتروا من استغفرا يفتح بها ابواب السموات ويرزقنا باموال وبنين انشاء الله

ali 28

2011-03-13, 00:13

انا راني كيفك لكن شعارنا الفقر و السعادة راهي مهيش دايما لحتى لواحد وربي يجيب الخير

**د لا ل**

2011-03-13, 13:00

وإن بعد العسر يسر

*نآدرة~

2011-03-13, 13:06

زيد اصبر خويا
ربي يجيب الخير أنت واحد من بين الآلاف. الله يعفو ويصلح الاحوال

le chardon

2011-03-13, 14:41

عيشتنا خويا في الغبينة كيما قالها المرحوم
بصح نوكلو ربي سبحانه
واش نقولك كيما قال كمال
يا حصراه عليك يا الدنيا فيك حكاية و حكايات
ساميني و اقعدي حذايا و احكيهملي في ثبااات

سعادي 48

2011-03-13, 14:51

انا ثاني مهندس باشا ياود في المحروقات..............................راني خايف يصرالي كيما صرالك......وها ماسلكيني..

hoho40

2011-03-13, 15:05

سبحان الله ، انها نفس القصة تتكرر مع جميع شباب دزاير انا ثاني مررت بنفس مراحل القصة بالتفاصيل وكأنني انا الذي احكي هذه القصة ، هو مسار مرسوم وعبارة عن تحصيل حاصل اذن اقول للأجيال القادمة ، يا خاوتي لي راهو زوالي ويقرا من اجل به يتوظف نقولوا غير ماكن لاه ، القرايا مليحة لواحد شبعان ومهوش محروم من ادنى ضروريات الحياة، وفي بلادنا الزوالي ماهوش راح يحتاج مستوا دراسي عالي باه يعيش ، يكفيه يقرا شوي باه يتوعى ومبعد يتوجه للحياة العملية مباشرة اختصارا للوقت ولجهد والتكاليف، مع احترماتي لكامل الزوالية كيما انا ونقولهم معليش هدا هو الواقع ولاز يكون لواحد ابن وقتو بش يقدر يكمل يعيش ولا داعي لنرجيسيات والجري وراء الأحلام

rachod

2011-03-13, 17:01

السلام عليك يا اخي الفاضل ادا حكيت لك قصتي فسوف تتالم كثيرا انا كدلك من مواليد 1980 و حاصلبة على شهادة الدراسات التطبيقية في المواصلات السلكية و الاسلكية سنتة 2002 و بما انني كنت الاولى على الدفعة اكملت شهادة مهندسة دولة عام 2006 و بعدها توفي والدي في 15-اوت 2006 وبما انني كنت كدلك الاولى اكمات دراسة الماجيستار في نفس التخصص تخرجت في 2009 وانل حاليا احضر في شهادجة الدكتوراه وفي - اكتوبر 2010 توفيت والدتي رحمهما الله عز و جل مقامه وانات لغاية الساعة احمد الله على نعمة الصحة اتمنى من المولى ان تدوم اتنشاء الله لغاية يوم في حياتي و يا اخي اقول لك اتننتي محبطة و يئسة ولكن لن اقدم على فعل مخالف لديني الاسلام فسوف كون اسفل السافلين ف اتركنتي من العمل و الدنيا فهل الدين الاسلامي يحلل قتل النفس فلا تكن فريسة للشيطانت ونتحن من جهة اخرى جزائريون ما نعاندوش البلدان العربية الاخرى فامنا الجزائر كفاها الما و حزنا و شكرا لكل من اصغى الى حكايتي البسيطة و الله هو الرزاتق لا العبد وشكرا

rachod

2011-03-13, 17:05

السلام عليك يا اخي الفاضل ادا حكيت لك قصتي فسوف تتالم كثيرا انا كدلك من مواليد 1980 و حاصلة على شهادة الدراسات التطبيقية في المواصلات السلكية و الاسلكية سنة 2002 و بما انني كنت الاولى على الدفعة اكملت شهادة مهندسة دولة عام 2006 و بعدها توفي والدي في 15-اوت 2006 وبما انني كنت كدلك الاولى اكملت دراسة الماجيستار في نفس التخصص تخرجت في 2009 وانا حاليا احضر في شهادة الدكتوراه وفي 08 - اكتوبر 2010 توفيت والدتي رحمهما الله عز و جل مقامه وانا لغاية الساعة احمد الله على نعمة الصحة اتمنى من المولى ان تدوم انشاء الله لغاية يوم في حياتي و يا اخي اقول لك انني محبطة و يئسة ولكن لن اقدم على فعل مخالف لديني الاسلام فسوف اكون اسفل السافلين ف اتركني من العمل و الدنيا فهل الدين الاسلامي يحلل قتل النفس فلا تكن فريسة للشيطان لعنه الله و اخزاه ونتحن من جهة اخرى جزائريون ما نعاندوش البلدان العربية الاخرى فامنا الجزائر كفاها الما و حزنا و شكرا لكل من اصغى الى حكايتي البسيطة و الله هو الرزاتق لا العبد وشكرا

قنوان دانية

2011-03-13, 17:11

لاتحرق نفسك اخي ربي يهديهم المشكلة انه العنصر النسوي هو السبب

والله غير ضحكتني يا أخي....نكتة تقصد ولا وشنو يعني...

فعلا...الناس تضربني...وانا نحصلها في مرتي...

النساء هوما السبب وي عندك الحق...كل حاجة حصلوها فيهم...ماعلابالكش باللي هوما السبب في مصر وتونس والعراق وليبيا...؟؟؟

المهم راني قلتلك اذا ماكانش علابالك...

ربي يهدينا....

قنوان دانية

2011-03-13, 17:14

حياة الشاب الجزائري
1980(0 سنة) : ولد المدعو عبد القادر و يا فرحت والديه بيه يكبر ويخدم عليهم :d
1986(6 سنوات): دخل المدرسة وتحصل على المرتبة الأولى فرحوا بيه والديه وشراوله بيسيكلات. :)
1992:(12سنة) انتقل إلى المتوسطة ( إنه ذكي و سيكون إطارا في المستقبل) :mad:
1996:(15 سنة) ربح شهادة التعليم المتوسط و سينتقل إلى الثنوية إنها خطوة مهمة :mh31:
1999: (18سنة) لقدد حقق حلم والديه ربح الشاب و سينتقل إلى الجامعة الحمد لله :1:
2004(23 سنة) أنهى الدراسة الجامعية و أصبح مهندس أد الدنية :cool:
---------------------------- بداية الفلم---------------------------------------------------------------
سبتمبر 2004
الشاب: ذهب إلى الشكنة : راني حاب نفوت لارمي
العامل : تخرجت هاد العام ، آآآآ لا لازم تقارع حتى لمارس
الشاب: و واش ندير دروك
العامل : نعطوك سورسي و كي يجي مارس نعيطولك
الشاب: :confused:
مارس 2005( 24 سنة)
عاد الشاب إلى الثكنة : راني ستنيت و ما عيطتوليش؟؟؟؟؟؟؟؟؟؟؟؟؟؟؟؟؟؟؟؟
العامل : جماعتك مازال ، لازم نفوتوا لي قبلكم
الشاب: و ما هو الحل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
العامل : زيد صبر لسبتمبر مالك مقلق.........؟؟؟؟؟..............
الشاب :mad: ( كرهت مازلت ندي المصروف على الشيباني أنا كرهت)
الأم: مالك عبد القادر
عبد القادر: مكان والو قالولي لسبتمبر، ما تقلقيش روحك
الأم: روح الله يهنيك منها يارب ، نصلي و ندعيلك
لقى عبد القادر خدمة تاع anem ب 12000دج
عبد القادر : ماعليش خير من والو :o
ما عيطولهش في مارس و جا سبتمبر
سبتمبر 2006( 25 سنة)
الدركي: أنت عبد القادر.
عبد القادر : نعم
الدركي : هاك la convocation جاتك في شرشال.
عبد القادر: يما تبقي على خير، راني رايح نفوت لارمي.
الأم : :o روح الله يردك بالسلامة...
مارس 2008(27 سنة)
خسر عبد القادر عام و نص من حياته و مازال ما دار والو.........................................
عبد القادر: يما راني وليت و كملت لارمي
الأم: مرحبا الحمد لله أدخل ريح خاصك، نزوجك دروك يا ولدي
عبد القادر : مازا الخدمة يا يما ما تتقلقيش
الأم: ما عليش ، نخطبلك و كي تخد تزوج.

2009 (28 سنة) 2010 (29سنة) 2011 (30سنة)عبد القادر مازال يحوس على خدمة و الخطيبة تاعوا سمحت فيه
يحسن عونها ما قدتش تزيد تصبر تزوجت واحد خضار على الأقل عنده دراهم و يقد يعيشها
خير من هاد المهندس اللي حاصل في روحه
من زهر عبد القادر صحابه سمحولهم في لارمي (إعفاء للذين أكبر من 30 سنة) مسكين ما عندهش الزهر.
عبد القادر: :sdf: قتلتني الرشوة و المعريفة الحل هو نحرق روحي
واش تقولو فيها :mh5858:

نقول يا أخي...عسى في ذلك خير...

ربي هو لي علابالو واش راهو يستنى فينا....

ارضى بقاضاء ربي...تربح من جيهتين...هو يرضى عليك...وابليس يخطيك...وتعيش مهني...

ان شاء الله القادم أحسن....

وهذي خطيبتك لي خلاتك...باينة راح تجيك وحدة أحسن منها...تأكد من ذلك...

والإنسان اذا غضب او زعف بلهجتنا...يزعف على الدنيا وحالها...ماشي على ربي سبحانه...

أحمد ربي يا أخي...راك خير من نااااااااااس بزاف....هوما وين وانت وين...

دعواتي لك بالتوفيق والفرح قريبااااااااااااا يارب...

kad_oma

2011-03-14, 12:03

واقع مر لكن أين هو الحل

حسينة 36

2011-03-14, 12:29

الصبر مفتاح الفرج

kad_oma

2011-03-14, 21:33

سؤال يبقى مطروح:
هل المشكلة في الشعب الجزائري أي فينا أم في الحكومة الجزائرية
فينا: لأننا قبلنا الذل حسب مبدأ هكذا ولا كثر
أم في الدولة: الله غالب العين بصيرة و الإيد قصيرة

ام سلمة

2011-03-14, 21:33

الحل هو تقوى الله الحل هو الصبر الحل هو قيام الليل والدعاء حتى البكاءالحل هو الثقة في الله الحل هو البدء بمشروع حفظ كتاب الله الحل هو العيش للاخرة فهناك الجنة و السلام والرزق في الدنيا ما هو الا من الله كيف تقنط وتحزن وربك الله

جيدول

2011-03-15, 12:02

عسى أن تكرهوا شيئا وهو خير لكم

غزة ارض العزة

2011-03-15, 13:12

هيا نقوموا بثورة كلنا رانا قاعدين الحقرة و التهميش و العدالة المزيفة تروح تشتكي تدخل للحبس
تروح للوكيل في لحظة يعملك متهم يخلقلك تهمة تصبح تواجه في عقوبة احلاها مر السجن او الغرامة
تنتظر الجلسة الوكيل و القاضي عندهم خدمة وحدة اهانة الشعب
بقى و كيل واحد وسيبقى الا الابد هو ربي و رلكم و اسمه الوكيل

david300

2011-03-15, 15:04

نضحك او نبكي
كل شيء بالقضاء و القدر
انا نفس الشيء مع عبد القادر ....

عبد الهادي قادي

2011-03-15, 21:01

قصة مؤثرة تعبر عن واقع وحال الشباب الجزائري اليوم
كان الله في عون الجميع

والله غير ارانا هم واحد يا اخينا الله يفرج همنا

djoo81

2011-03-22, 18:11

السلام عليكم و رحمة الله. أنا كاتب قصة عبد القادر
أشكركم على هاته الردود التي تعكس مدى رجاحة عقل الشاب الجزائري أستسمحكم على هاته القصة المتشائمة
لكن و الله أني عندما قرأت بعض الردود أحسست أن الدنيا مازالت بخير و أنا لطالما تنبأت في شباب الجزائر خيرا.
خاصة ما ورد في حديث أحد الإخوة أنه تميزر من سنة 2003 لكنه تحصل أخيرا على منصب في مكان حساس و هنا أعاكس الكثيرين الرأي
فأنا و أعوذ بالله من قولة أنا أرى أن الخروج إلى الشارع لن تكون له النتائج المرجوة.
مع العلم أننا في هذا المنتدى من طلبة و خريجيين و إطارات يمكن أن نأتي بالتغيير و هذا بسيط جدا..
عدنا أمام الله و أمام ضميرك أنك عندما تحصل على مهنة أنك لن تصبح مثلهم و أنه لن تغرك الأموال أو الرشاوي و أنك ستقوم بوظيفتك و أمنيتك أن تخدم أخاك و هنا سأضمن أن إبني و إبنك لن يتلقى البيروقراطية و اللا مبالات التي تلقيناها نحن و من هنا يبدأ التغيير.
نعم، إنها كلمات صغيرة لكن لها أبعاد كبيرة.
إذا قبلتم العرض فسنرى الجزائر الحقيقية بعد 10 أو 20 سنة و السلام خير ختام.

يا إخوتي الشباب الجزائري معظمه في المعاناة ولكن الفرق في ترتيب الأحداث فقط لكن النتيجةواحدة هي البطالة وربي يرزق الناس أجمعين ولو كره المسؤولون كل واحد يجيه الرزق التاعو لكن وجب على وفى رزقه الاهتمام أكثر بمحاربة البيروقراطية والمعرفة رانا في مرحلة صعيبة بزاف بصح ما راهيش دايمة صدقوني أنا كنت نفرح كي نوضع ملف مسابقة ونلقى شاب يستقبلك بصحكة وظرافة ومعا بعض شوية بشوية نعدلوا البلاد ولو ب 10 % . ربي يرزق الشباب من فضله لان كل نفس تستوفي رزقها قبل مماتها هذه عقيدتي. بالتوفيق للجميع في كل شيء

mus2008

2011-04-06, 23:38

الفرق الوحيد بيني وبينك اني مولود في 1981 اماالحكاية كوبي كولي معايا انا بديت نلاشي وليت نهدر وحدي في الشارع

رابح ش

2011-04-07, 00:10

ياربي ياربي ياربي افتح علينا .خويا رانا قاع في نفس السيناريو والله الشبيبة فقدت الامل في هاذ البلاد ليعاشو فيها غير النساء تخرج تلقى خدمة والشباب الف تعرقيلة امامه. الله يستر وربي ينتقم من كل ظالم .. ان الله يمهل ولا يهمل واللغ غير يخلصوها غالية هاذ المسؤولين ... والله يهدي خواتاتنا كرانا سترناهم وسترنا رواحنا

علي دي

2011-04-07, 10:00

الله يهديك انا عقبت اكثر منك او مازلت نعقب اللي كاتبو لك ربي راك تلقاه