المولد النبوي الشريف [الأرشيف] - منتديات الجلفة لكل الجزائريين و العرب

مشاهدة النسخة كاملة : المولد النبوي الشريف

ghalem kadi

2011-02-11, 13:44

السلام عليكم انا انفال و : دخلت باسم اخي
حبيباتي حبيت نعرف كل واحدة واش يديرو وكيفاه تفوتو ليلة المولد النبوي الشريف هكذا
نعرفو كامل العادات تااع بلادنا
ارجوا التفاعل

sarahmmmm

2011-02-11, 14:02

السلام عليكم
حنا عندنا نديرو شخشوخة الظفر ولا شخشوخة بسكرية و نسميوها النعمة

ونشريو قشقشة و هي خليط حلويات و مكسرات و الطمينة و نشعل الشمع بصح مانترتقوش المحارق
ممنوع عندنا في الدار

هههههههههههه

zoubidaas

2011-02-11, 14:37

حنا خطرا نديرو رشتة ولا شخشوخة الفطير اذا تعرفيه (الفطير هو المسمن ) ونديرو طمينة ونشعلوا شموع ونحطوهم في البالكون ولا كي نكونو في البلاد نديرو كيما قتلك ونخلو الذراري يلعبو في الجنان على خاطش عندنا فيلة وما نطرطقوش كااامل المحارق على خاطش ممنوعين في الدار وايضا حراااام

ghalem kadi

2011-02-11, 15:06

اما حنا فنديرو رشتة وتلمو كامل العائلة في دار جدي
ونديرو سهرة مليحة بصح ندير المحارق لازم
الجو في هاذيك الليلة يجي هايل
نتمنى من كامل البنات يقولولنا عاداتهم

jonon89

2011-02-11, 15:21

انا من الجنوب ونديرو الكسكسي و نوزعو على الجيران الكسكسي و هوما يبعتو لنا و الصغار نححطولهم الكسكسي فالحومة في كسرونة كبيرة و لي جا ياكل و نقسمو الحلوى و معجنات كيما ميني بيتزا و و نوزعو دراهم وفالدار نخدمو تارت كبيرة و بعد العشاء نقطعوها فالسهرة

أم هبة الله

2011-02-11, 15:26

احنا نديرو الرشتة والطمينة ،ونشعلوا الشموع

ونلعبوا بالمحاااااااااارق في السطح:)

كمانتذكر خصال النبي صلى الله عليه وسلم

ياسمين177

2011-02-11, 15:32

حنا نديرو رشتة ولا شخشوخة الرقاق ونديرو لمخلط ونشعلو الشمع وندير الحنة لصغار وغدوة من داك نديرو الطمينة والعيش

srour

2011-02-11, 16:42

أنا من الشرق الجزائري الأغلبية يعملو شخشوخة أو لفطير ويحمرو الدجاج. ونشعلو الشموع على البالكونات ونزينو.ونلعبو بلمحارق بالنسبة لي نخاف منهم نقعد نتفرج على البالكون والله المنظر هايل تقول رانا في نيويورك. خاصة وأني نسكن في طابق عالي نشوف كل المدينة.ومبروك مسبقا للجميع

نينا الجزائرية

2011-02-11, 17:03

حنانديرو الرشتة ولا شخشوخة
السنة نديرو شخشوخة
نشعلو شمعة في كل بيت
نديرو طمينة
ونشعلو محارق وذراري صغار نولات
وكي كنا صغار نطبلو بدربوكة ونغنو مديح نبوي

nabila.ha

2011-02-11, 21:16

احنا نديرو الطعام (الكسكس) و نشعلو الشمع و نديرو الدراس يعني انواع الحلوى و الشيكولة و كل المكسرات و نشعلو لمحارق على انوعهاو غدوة من ذاك نروحو دار جدي و نتلمو كامل عندهم

ام احمد

2011-02-11, 21:21

اما انا نعرض دار شيخي +لوسي الصغير مع زوجته و اولاده و اي واحد من العايلة يقدر يجي يجينا في الغالب ندير شخشوخة بساكرة
و ممكن رشتة حسب الضيوف واش يحبو و نحمرو الدجاج و يلعبو الاولاد مع اصحابهم و نحن ممنوع المحارق اقنعنا الاولاد انهم حرام
و بالمقابل اي حاجة يحبوها نشريهالهم و في الصباح ندير الطمينة و تكون لمة ممتازة ربي يدومها
ربي يحفظ الجزائر امممميييييييييييييييييييييييييييييييييييييييييين

وداد100

2011-02-11, 21:47

بمناسبة المولد نديروا عشاء اما شخشوخة النعمة اوالظفر او تريدة المهم حاجة تتفور ونشروا الشموع والبخور والمحارق رانا كبرنا عليهم وحنا نحبوا نديروا سهرة وتتلم كامل العائلة فيها التاي والحلويات ونديروا الحنة والصباح نديروا السفنج ولا الطمينة

تينا ماريا

2011-02-12, 21:06

السلام عليكم

احنا في ميلة كنا نديرو الشخشوخة يا نحمرو الدجاج على حساب الافراد واش يحبو و مبعد ف السهرة نبخرو و نصلو على النبي (صل الله عليه وسلم ) و نشعلو في كل بيت شمعة

اما الاولاد و حتى الكبار يديرو العاب نارية محارق المهم يصدعونا (الحق الفرجة تسخف)

غدوة نديرو طمينة .

المهم مبعد ياخي الحمد لله تطورت الدنيا و رجعت اي حاجة الواحد يبحث عليها يلقاها و زيد ماشاء الله القنوات الدينية ماشاء الله اصبح

جلي لكل الناس ان الاحتفال بالمولد النبوي الشريف بدعة و الصحابة رضي الله عنهم لم يثبت قط انهم احتفلو بهده المناسبة

و بالتالي العام هدا بعد ما تزوجت قررت اني اي عادة او بدعة نتخلى عليها و انا ادعو الجميع للبحث في الامر و التخلي عن كل ما هو مبتدع , نحاولو ديما نرجعو للدين ماشي لعادات والدينا و اجدادنا.

و الله اعلم.

و لمن يريد الاطلاع فليتفضل الى هدا الرابط
http://www.islamway.com/?iw_s=Fatawa&iw_a=view&fatwa_id=13547

الربط 2 اكتب الكلمات التي تريد البحث عنها و اعمل بحث
http://www.islamway.com/?iw_s=Fatawa&iw_a=advanced-search&page=1&q=%C7%E1%C7%CD%CA%DD%C7%E1%20