اختلاف مهر الفتاة من منطقة الى اخرى في الجزائر

[mounia 85]

السلام عليكم اخواتي موضوعي هدا هو موضوع فضولي فقط لا اكثر ولا اقل وباش نتعرفوا على الاختلافات الموجودة رغم اننا في بلاد وحدة

مالا كل وحدة فيكم تقوللنا المهر اللي يقدم للعروس في ولايتها او منطقتها
مثلا حنا هنا في ميلة المهر يكون مابين 10 و 15 الى 16 مليون

وفي الاخير يبقى الهنا هو كلش


ارجو التجاوب مع الموضوع
وشكرا لكم

[samasima]

الشرط كل واحد ومقدورو من 8 ملاين وطلع

[sofiane2075]

10ملاين و مقياس للحنة و لوازم الجرية او التبق طبعا بلا ما ننساو هدايا العيد

[maiar]

sah hna 3ndna fi mila twsal l 15 milion mais ana 3ndi sahbti costantinoise mahr t3ha 22 milion meme khalti fi franca tmadat bkimat 25 milion DA malgré tzawjet bmarouki

[نور الصفاء]

في الغرب الجزائري المهر يكون ما بين 4 ملايين الى 6 ملايين....بصح العريس هو اللي يشري الدهب .....
و انتوما شكون يشري الدهب في ميلة وقسنطينة العروسة و لا العريس...........

[hamida dz]

merciiiiiiiiiiiiiiiiiiiiiiiiiiiiiiiiiiiiiii
bcp

[heart of darkness]

حنا في بسكرة 8 _10 ملايين وذهب يشريه العريس ولكن المهم هو الهناء بين الزوجين

[نفيسة1982]

حنا عدنا 8 حتى 12 بصح العروسة تشري منو كلشي يعني الذهب الفراش كلشييييييييييييييييييييييي

[ندى 11]

حنا في الشلف عندنا المهر بين 10ملايين و20مليون مع الحنة وكل مناسبة جيبولها الحوايج
اما الذهب و الحوايج الباقيين تشريهم العروسه

[مريومة 52]

صحيح انو المهر يختلف من منطقة لأخري باختلاف العادات والتقاليد
احنا في بلاصتنا كاين يمد العريس كل شئ للعروس يعني ***مقرقب**** يقولولو وهي تشري الذهب والصوف ومنهم المهر تاعها من 15 ل 18 مليون والا انو يمدو الشرط عادي من 4ل8 ملاين كل عايلة وكيفاه وصوف من قنطار ونص لزوج قناطر والذهب كاين لي يشرط مقياس وخاتم العقد وكاين لي يشرط على قد الجهد تاع العريس

ويبقي هذا اختلاف من بلاصة لبلاصة ومن عايلة وعايلة

[sorour2]

حنا في قالمة بين 4و6 ملاين و قنطارين صوف و مقياس للحنة و لوازم لعطية -العشاء و الفاليزات و خاتم والا سنسلة - وحاجة ذهب في الفاتحة وخاتم العقد و ايضا هدايا العيد.


وكاين اللي يمد غير دراهم على الاكثر 30 مليون و لعروسة تشري بيهم كلشي من دهب و صوف و لعطية..


و ربي يهنيكم

[khadija la brune]

salem kirakom çava labnet ana rajli dfa3 fiya 8mlayine mais ghi taw3i w howa nhar l 3arse yachri swalah al makla w ydirli esni w ydirli dheb 3ad rani ghalite 3lih bazef hna 3andna fi wahran achira yadaf3ou fiha ghi 4milion cè tout

[mounia 85]

شكرا لكم على الردود بالنسبة لينا المرا هي لي تشري الذهب من شرطها بصح عندها حاجة ذهب يحنيولها عليها من عندو وتاني في الاعياد يجيبولها الهدايا والا عندو يجيبلها الذهب فالعيد والا ماعنوش يجيب غير كسوة

[mounia 85]

sah hna 3ndna fi mila twsal l 15 milion mais ana 3ndi sahbti costantinoise mahr t3ha 22 milion meme khalti fi franca tmadat bkimat 25 milion da malgré tzawjet bmarouki


هادو لي لاباس بيهم ..انا بنت عمي عطاوها 55 مليون هي منا من ميلة بصح تخطبت لتقرت

[¨°o.رغـ{د الاسلامـ .o°¨]

احنا في شلف مابين 10حتى 30 بنت عمي عندها عام ملي تزوجت اعطاوها ب 35 مليون

[wassila21]

يا حوجي :confused: راني نشوف غير بال 10 و 20 و 30 مليون :1:

أنا ناس داري من عين الدفلى و راح يدفعو فيا 10 ملاين منهم كلش ، و الذهب من عندي
حنا في عادتنا نطلبوا 5 ملاين و ذهب من كل حاجة وحدة، سلسلة ، خاتم ، مناقش زويجة، و 2 مسايس

و كيما قلتو الصح في الهنا

[samasima]

يا حوجي :confused: راني نشوف غير بال 10 و 20 و 30 مليون :1:

أنا ناس داري من عين الدفلى و راح يدفعو فيا 10 ملاين منهم كلش ، و الذهب من عندي
حنا في عادتنا نطلبوا 5 ملاين و ذهب من كل حاجة وحدة، سلسلة ، خاتم ، مناقش زويجة، و 2 مسايس

و كيما قلتو الصح في الهنا

شفتي يا وسيلة الحالة دونجي هههههههه

[مريومة 52]

الفايدة في الصحة والهناء تالي هذا أكل راهي عادات وتقاليد جدودنا لازم نحافظو ونكملو بيها مي وقت بكري يختلف على درك بزاااف ولاو يخافو الرجال من الزواج غير على جال الامور هذي هههههههههههههه
انا راجلي قبل عيد الاضحي درنا فاتحة جابلي خاتم ونهار لعيد دابلي عيدي خاتم ومعاها مكسرات وريحة صابون شامبو سيري دوف ولحم طبعا تاع العيد وطبق حلو
والضرط شرطنا عليهم زوج قناطر صوف ومقياس للحنة وخاتم للعقد و4 ملاين مهر وهذوك الفاليزات وحوايج اللي يجو مع الطبق الحنة من عندهم وطبعا هنا عندنا كي نديرو للحنة للعروس نهار الكسوة يحنولها على زوج حبات لويز يعني يحطو لحنة وفوق منها كعبة اللويز مندري في المناطق لخري كاينة ولا لا ؟
وان شاء الله ربي يهني كل وحدة ويباركلنا في ازواجنا ويرزقنا الذرية الصالحة

[zara201]

اختي mounia 85 انا من قسنطينة وخطبني واحد من ميلة عطاني الشرط 15 مليون وجابلي براسلي تاع اللويز في الشوفة وخاتم كبير في الخطبة وفلايك طوال في العيد ومازال العقود والحنة وتعيشي اختي احكيلي شويا على تقاليدكم وربي يهنينا كامل

[mounia 85]

شكرا على التفاعل مع الموضوع

[mounia 85]

اختي mounia 85 انا من قسنطينة وخطبني واحد من ميلة عطاني الشرط 15 مليون وجابلي براسلي تاع اللويز في الشوفة وخاتم كبير في الخطبة وفلايك طوال في العيد ومازال العقود والحنة وتعيشي اختي احكيلي شويا على تقاليدكم وربي يهنينا كامل


كلشي مبروك وربي يهنيك ان شاء الله
شوفي ختي على العادات والتقاليد انا الوالدة تاعي قسنطينية وخوالي اكل تما وعاداتكم وعادات ميلة كيف كيف
على خاطر رانا تقريبا بلاد وحدة ...مكان حتى فرق على حساب واش شفت انا

[سوفية والفخر ليا]

احنا في وادي سوف

ما بين 10ملايين الى 15 مليون

[f_ati]

احنا في غليزان يمدو من 9ملاين حتي30مليون وانا مدولي 19 مليون كلشي وانا نشري الدهب

[صديقة الصغار]

احنا يمدو 10ملايين و2خواتم وسنسلة والهدايا في كل المنسبات

[عزتي في ديني]

ما شاء الله نحن هنا في غرداية شوي رحمة ربي ، المهر بين 8 و 15 مليون كأقصى حد و منه تشري العروسة ذهبها و الفراش و التصديرة و .....كل شيىء و العريس يجيبلها خاتم و هدايا في الأعياد و المناسبات و في العرس يهديلها خاتم آخر... كيما قالوا الأخوات المهم في الهنا و العبرة ليست بالأغلى....أقلكن مهرا أكثركن بركة.

[بلقيس90]

حنا لكان يمدوا 100 مليون و مايقنعوش

[remale]

تندوف يطلبوك المستحيل

[nssma]

احنا في الشرق يشوفوا العروس بحاجة ذهب (خاتم) + نقود من عند اب العريس ثم الشرط 8 ملايين و طلع و مقياس بـ 20 مليون و طلعو خاتم تاع الفاتحة و خاتم تاع العقد و الجرية اقل شيء 2 تبادل الوحدة اقل شيء 600 الف للوحدة و كرباية احذية و كرباية ريحة و كرباية ماكياج و القائمة طويييييييييييييييييييييييييييييييييلة و الصوف 3 قناطر و ماطلا بريزيدون و كل مناسبة يجيبوا حاجة ذهب في العيد الصغير ، الكبير، المولد ............................ الله يعين الشباب.

[داليا ياسمين]

حنا في سطيف من 10 إلى 15 مليون ماكسيموم

[saidabio]

السلام عليكم
عندنا في منطقة سيدي خالد المهر يتراوح من 8ملايين حتى 16 مليون ويختلف من عايلة الأخري مثلا إذا كانت راح تتزوج واحد من العايلة الشرط مايفوتش 10ملايين أما إذا خرجت من العايلة الشرط يكون 14 ولا 15 و16 على حسب كل عايلة والعريس يدفع الشرط ومعاه 2 خواتم واحد للخطبة واحد للعقد والعروسة تجهز كلش من شرطها الذهب والصوف والشورة ويبقى الهنا هو كل شيء

[ga3da asila]

سلام بنات حنا في مدينة مستغانم الشرط يتراوح ما بين 6 و 10 ملاين بلا دهب الراجل يشريه ي ايما باغوغ (parure )+ خواتم تاع الكلمة و تاع الفيونصاي يا ايما سنسلة و مسيبعات و منقوش و خاتم بالاضافة الى الطبق فيه اللباس التلمساني ولا كراكو ولا قسنطينية و منصورية و جلابة و الصبابط دوغي و اغجون و ديزابيي بالصابو تاعو و لي نويزات و الروايح والمكياج الكوسمتيك و يجيبو معاهم القاطو نهار الحنة هدا هو و الا نسيت حاجة نزيدها .

الفائدة فالهنا

[sinda]

salam habibati hna fi familti yachartou 4mililon mahr ou 3million ta3 fatha khater ma yjibouch kach fiha ghir khatam ou kountar wala2 souf ou dhab ou jhaz ou dhab ya makyass ou khatam ou 2wizat wala sansla ou khatam ou msayes ou les boucles

[omar_moubarki]

حنا عندنا من 8الى 15 مليون قال الرسول صلى عليه وسلم اقلكم مهرا اكثركم بركة المهم الهنا

[ليلك الروح]

سلام لبنات ......
عندنا فى الوسط وفى المدية بالتحديد عيب نشرطو يعنى اهل العريس هوما يحدو المهر
ويكون من 10 حتى 20 مليون معاها التبق فيه دوزان الحنة وحاجة ذهب وفاليز مع مونتو وصباط ولا طايور انا دفعو عليا 12 مليون مع خاتم وجابولي لويزة حناولى بيها والذهب على الطفلة انا كنت موجداتو من قبل الحمد الله يعنى الى ما عندهاش والله صعيب تدير الذهب وتجهز روحها مع هذى الاسعار
الصح كامل فى الهنا ومبروك على كل وحدة معطية والعاقبة للى مازالو

[الصوامعية]

حنا في خميس مليانة 10 ملاين

[rima racha]

salem bon ici 10million+parrure et parfoi + lhana" tbague hakda darouli fi erssi

[موجو جوجو]

ةةةةةةةةةةةةةةةةةةةةةة

[amoula2011]

في وادي سوف المهر راه يدير من 10 الي 16 مليون وهدا في ابلايص يمدلها المهر وخلاص وفي بلايص يمدلها 8ملايين ومعاها ذهب كيما سلسلة و خاتم ومناقش

[موجو جوجو]

مازال ما طلع المهر
راه غير يغلا و يزيد في بعض المناطق الجزائرية