كتاب الفوائد في العوائد و القواعد و العقائد

[حسين البجاوي]

الكتاب الأول: في تربية الأولاد
الفصل الأول: البشارة قي عمارة الدار
من عادة المسلمين كي تولد المراة يكون الراجل غايب من الدار. يبعثوا ليه بشار يقول له البشارة مبروك ما زاد عندك راهي الدار عمرت. يجاوبه الله يبارك فيه الله يفرحك كيما فرحتني. و إذا بشره بلي زيدت ولد يفرح فرح كبير و يكافي ذاك البشار مكافية مليحة، و إذا بشره بطفلة يكافيه قليل. على خاطر المسلم من عادته يفرح بالولد أكثر من البنت. حتى النساء الحاضرين في وقت الزيادة اذا كانت طفلة يولولوا عليها مرتاين و إذا طفل ثلث مرات. و يقولوا في وقت الزيادة يكونوا الملايكة حاضرين، طالعين، و هابطين. إذا زاد ولد يطلعوا رافدين سناجق محلولين و هما فرحانين يولولوا. و إذا زادت طفلة يطلعوا منكدين و ساكتين. و عند البدو إذا زادت بنت ما يذبحوش عليها و إذا زاد ولد يذبحوا عليه. و المراة اللي تولد غير البنات تستحي بالبنت في قبال والدين الراجل و ناسه و يقولوا: (تفرخ له غير في البنات). و الحضر بالمثل بالجزايريين الكثرة منهم ما عندهم فرق بين البنت و بين الولد. يقولوا: (اللي عطى المليح مليح). و زيد يقولو: (طفلة وجهها ناير خير من طفل حاير).
الفصل الثاني: ليلة السبع أيام
من عوايد المسلمين، بابات الولد يدير ماعون متاع سيدي عبد القادر في ذيك الليلة، يشري دقيق و سمن و لحم من عند الجزار، و اللي يكون غني يذبح كبش يعرض اقاربيه و الاعيان يجيوا. يحط لهم الكسكس باللحم. هذا اللي يقولوا عليه ماعون سيدي عبد القادر و هو مشهور عند المسلمين في كل عمالة. هذا من عند بابات المزيود. و في ذيك الليلة يكونوا اقاربيه و نسبانه و احبابه يجيبوا له العشاوات: كي البغرير و الرشتة و المقارون بر الترك و المشلوش. و يجيبوا ذاك الطبصي عليه الياسمين و إلا الزهر. ياكلوا من ذوك العشاوات الكل نصيب. كاينين اللي هما يكونوا غنيا يديروا حضرة بالفقرة و بالمداح، يسميوها حضرة سيدي عبد القادر. على خاطر الكثرة اللي يديروا الفقرة متاع سيدي عبد القادر، يجيب لهم كاشي نسيب منارة و لا ثرية يعلفوها في وسط الدار تبات تشعل حتى يختم المداح. و إذا كان بابات الولد طالب يجيب الطلبة يباتوا يقراو في القصايد. و إذا كان أمي يجيب الاخوان يذكروا و المداح يمدح في النبي و الاوليا. و قي ذيك اللية لابد من المداح يمدح زيادة النبي، ليل كامل حتى يطلع النهار. و الفقرة و المداح و الناس الكل يدعيوا للمزيود و بابات المزيود يقولولو له الله يجعله طويل العمر و ذرية صالحة و يفترقوا.
الفصل الثالث: يوم السبع أيام ـ غسيل المزيود
بعد ليلة السبع أيام كي يطلع النهار، يكونوا دخلو النسا. و تجي القابلة تغسل المزيود المرة الأولى. يجيبوا الحشيش في القدرة. و يزيدو طزينة أولاد الجاج يطيبوهم مع الحشيش. من بعد يقلعوا اولاد الجاج و يصفيوا ذاك الما. و تكون الحنة واجدة و الكحل و طبق نتاع الحوايج اللي باش يلبسوهم للمزيود و زوج شمعات كبار متاع عيد المولود. من بعد يجيبوا نافخ بالنار و البخور. و كسا متاع الصوف يديروها على القابلة و الولد كي القيطون، و إلا كالقبة يجعلوها فوق راس اعواد متاع الخشب، و الا زوج نسا يشدو عليهم هذا الكسا. اذا زمان الشتا يدخلو ذاك النافخ تحت الكسا. و اذا زمان الصيف ما يدخلوهش. من بعد يشعلوا الشمع تحت الكسا. و القابلة تعري للمزيود و تقول بسم الله الرحمان الرحيم و تغسل له. ترمي على جسده الما بيدها اليمنى و بيدها اليسرى شادته و تدعي و تقول: (يا سيدي عبد القادر يدك سبقت يدي...يا صلاح البلاد يا مولى البلاد). و تربط له يديه و رجليه بالحنة و تكحل له عينيه بالكحل و تحرفس له و تلبس له الحوايج الملاح و تمدو للنسا يبوسوه. و عماته و خالاته يقدموا عليه يعني يغينوا الغنية متاع التقدام و يولولوا. قبل ما يديروا له الحنة في يده اليمنى يحطوا له في كفه ربيع و إلا فرنك يعني فضة، يقولوا باش يخرج ذاك المزيود مرزاق.
و ذيك الحنة كي يقلعوها للولد ينحيوا له نصيب منها و يخبيوه ينصاب اذا كاشي عاتق قعدت بلا زواج تبخر بذيك الحنة متاع الصغير تتزوج. و الفضة اللي ينحوها للمزيود يعطيوها للقابلة. و الما اللي يشيط من غسيل المزيود لا بد يعطيو منه للنافسة تغسل وجهها و يديها بذاك الما اللي يبقى من ما الحشيش.
و القمجة اللي يلبسها المزيود في وقت اللي يزاد كي يقلعوها يوم السبع ايام ما يرميوهاش، يخزنوها في الصندوق على خاطر تنفع للمزيود اذا كان مرض يلبسوهالو يبرى. تسمى ذيك القمجة الحرازة.
الفصل الرابع: يوم السبع ايام ـ خروج المزيود
بعد الغسيل، القابلة تاخذ الولد في حجرها و تدير مرايا فوق منه على صدره و فوق المرايا مفتاح و مغزل متاع الطعمة و كميمسة متاع النيلة و شوية ملح. و تزيد تدير في فمها شوية كمون. و تبدا تدور بالولد في الدار. توقفو عند باب البيت تسبعه عليها و تسبعه على بيبان البيوت الكل في ذيك الدار باب السقيفة و باب الكنيف و باب الدار من داخل. و اذا كاشي بير في قلب الدار تسبعو فوق منه و في وسط الدار على المجيرية. و في كل مكان تبزق من ذاك الكمون اللي في فمها و تقول: (يا اللي تولدي و تربي بينانتا ربي، ما تهلكيني ما نهلك) يعني للجانية اللي ولدت معاها في وقت واحد.
و تزيد تحلل في الجنون تقول: (يا موالين الدار هذا وليدكم حنوا عليه، البخور نعطيو لكم بخوركم، و العشا نعطيوا لكم عشاتكم، ما تاديونا ما نذيوكم). من بعد تعطي الولد في يد يماه باش تديرو في المهد. ينجمو يخرجوه من ذاك الوقت. هذاك التسبيع خوف من الجان. من بعد يجيبو اولاد الجاج الطايبين في ما الغسيل. تسمى صدقة على الجان: القابلة تاخذ زوج حبات. الاخرين يقسموا الحبة على زوج، يعطيوا للذراري و اللي بقى يقسموه النسا اللي حاضرين الكل نصيب نصيب. و الما اللي انغسل بيه المزيود يجيبوا قرعة يعمروها من ذاك الما و يديروها في المهد عند راس المزيود. و بعد الماكلة متاع اولاد الجاج ياكلو الكسكس. و يحطوا لهم سنيوة القهوة و الشاراك يعني حلاوات. بعد كي يقربوا للمرواح النسا تطلع النافسة و القابلة معاها فوق البنك. ترقد النافسة المزيود تحطوا في حجرها و تحط محرمة قدامها. يبداو النسا يعطيو التاوسة في المحرمة كل واحدة واش تعطي دراهم. و يهنيو النافسة و يفتحو لها و لوليدها، يقولو: (الله يجعلوا بالربح و السعادة و طول العمر، العاقبة للختانة ان شا الله)، و يروحوا لديارهم.

يتبع إن شاء الله

[جمال 19]

بارك الله فيك

[algeriano85]

بارك الله فيك

[يزيد17]

بارك الله فيك
مشكووووووووووووووووووووووووووووووووووووووووور

[فريدرامي]

بارك الله فيك

[..عبد الاله..]

http://up.fr7.com/uploads/images/fr7-9534e5ac14.gif

[حسين البجاوي]

الباب الخامس: التقدام متاع المزيود
كي يربطوا الحنة للمزيود يوم السبع أيام يقدمو عليه احبابو، يعني كي عماتو و الا خالاتو و الا الجيران، تقول واحدة منهم: (بسم الله بسم الله و الصلاة على رسول الله، وين خالاتو، وين عماتو أياو تفرحو بوليدكم، لعقوبة لختانتو).
ذاك الوقت يولولو النسا تولويلة واحدة، و تزيد اللي تقدم تقول: (ختن يا الختان أو ختن لا تخاف، خرج لي وليدي من تحت الايزار) تولويلة.
و تزيد اللي تقدم:
جايزة على المريجة * أو راشق نوترها
ذي مرتك يا وليدي * من البنات اختارها
تزيد واحدة أخرى تقول: (جاياتك هاذ المباركة تربح و تسعد عليها و تربي الاولاد)، تولويلة. تقول واحدة أخرى: (روحو روحو يا السلف و عروستي راهي جاتكم، و الله يا شعر عليها ما تسعى عند بناتكم)، تولويلة.
و تقدم واحدة أخرى تقول:
أوليدي ثوب الحرير * أو مرتو قطايته
ما يتقطع ما يحول * ما يرخس عن سومته.
الحاصل أن النسا يقدموا في يوم السبع أيام التقدام اللي يقدموه تاني في الختانة و في التزويج. عندهم فال في هذا الشي يقولو باش يكون ذاك المزيود طويل العمر و يسعد في عمره.
الباب السادس: تسمية الولد
ناس بكري يسميوا اولادهم في الثلث ايام الاولين على خاطر قانون الفرانساوي. و يقولوا ان ناس بكري يسميو اولادهم في ليلة السبع ايام. في ذيك الليلة بعدما ياكلوا الناس العشاوات يوقف بابات المزيود و الا بابات باباه (على خاطر المزيود اذا عنده جده باباه ما يتصرف حتى في حاجة). قلنا يوقف و يقول لكاشي مرابطين: واش تسميوا لنا المزيود. يسقسيوا إذا كان هذا هو البكر. اذا هو البكر نسميوه محمد، و اذا بنت بكرة يقولولها فاطمة الزهرة. و الا يقولوا لجد المزيود نسميوه عليك. على خاطر هذي عادة لازم اسم الجد يبقى. كاينين اللي ما يحبوش يسميوا الولد على اللي ما زال في الحيات غير اذا مات الجد يخلفوا ذاك الاسم متاعو. و اذا مات واحد الولد في العميلية و يزيد اخر يسميوه على خوه اللي مات باش يبقى ذاك الاسم مذكور في قلب الدار. كاين اللي اذا زاد عنده ولد يروح لكاشي مرابط يقول له نحبك انت تسمي لي وليدي بركة، باش يعيش له ذاك الولد...حاجة أخرى، بزاف من ناس برا ما يسميوش اولادهم الا حتى يصنتوا للفال باش يسميوه. يعني اذا سمعوا واحد يزقي احمد يسميوا وليدهم احمد، و الا الراجل اللي يتلاقاو بيه هو الاول في الطريق يسميوه عليه...عادة قديمة البدو الاسماوات متاعهم موخوذين من الشهر اللي زاد فيه المزيود، بالمثل اذا زاد في الربيع يسميوه الربيع، هكذا رجب و شعبان و رمضان و العيد و عاشور و مولود. و سمعنا بواحد أصله مغربي يسمى مايو...اذا زاد المزيود يوم الجمعة اللي في شهر عاشورا يسميوه بوجمعة. و عند ناس القبلة اذا زاد بالجمعة اللي في شهر عاشورا يسميوه الحاج...و مع هذا الكل الكثرة من الناس اللي يسميوا اولادهم باسم الوالي اللي مولي بلادهم بخصاص اذا كان الولد مشري على ذاك الوالي لازم يسميوه على الوالي اللي شراو عليه.
الباب السابع: الاسم عند المسلمين
المسلمين ما يسميوش أولادهم على أسامي الملايكة كي جبريل و ميكاييل، على خاطر حديث النبي: (لا تسموا أولادكم إلا بأسماء أهل الدنيا).
قلنا من قبل كاين بزاف اللي يسميو اولادهم على اسماء الوالي متاع ذيك البلاد اللي يسكنوا فيها. أشحال من واحد يسمى عبد القادر على خاطر سيدي عبد القادر عندو مقامه في كل بلاد و كل دشرة. كي الدزيريين يسميوا اولادهم عبد الرحمان، التلمسانيين الغوثي و لا بومدين، البليديين أحمد و لا احمد الكبير، الشراشلية ابراهم و لا الغبريني، المليانيين احمد و لا بن يوسف، المدانيين بركان و لا السحراوي، القليعيين علي و الا مبارك، الوهارنة الهواري.
ينعرف واحد الراجل اللي أصله زواوي كي يسمى أكلي و لا مزيان و الا قاسي...الخ، بني مزاب ما يسميوش الولد عبد القادر على خاطر وقيل يغشوه، يسميوه بكير، زكري، عدون، حمو، باكلي، عمار، أسامي الوصفان: مبارك، سالم، بركة، فراجي، مرزوق بلخير. أسامي الاتراك: لادهم، عثمان، عصمان، نور الدين، توفيق، مراد.
الرومي اذا استسلم يسميوه عبد الله، الروميات اذا استسلمو يسميوهم باية، صالحة، فيفي، و زيد يسميوهم بأسامى المسلمات...بزاف من المسلمين اللي يسماو عبد الرزاق، عبد اللطيف، عبد المجيد، على خاطر قال الرسول صلعم خيار الاسم حميدة أو عبيدة.
و اللي هما متشددين في الدين يختاروا اسم النبي محمد، و أساميه المشهورين ثلاثة: في الارض محمد، و في السما أحمد، و في الجنة بلقاسم، و عندو أسامي بزاف مثل: مصطفى و الطاهر و البشير و الحبيب.كثرة الناس يساماو على أساميه على خاطر هو خير المخلوقات وقال صلعم من كان اسمه على اسمي المشهور لم تأكله النار، و قال أيضا من ولد له ثلاثة ذكور و لم يسم أحدهم علي فقد جفاني.
من قوة اللي يحبوا ذاك الاسم الانسان اذا زاد عندو زوج يسمي كل واحد محمد، و يولي عندو في دارو زوج محمدات، يعطيو للكبير اسم محمد، و للصغير منو اسم محمد الصغير، و في كل بلاد يبدلو ذاك الاسم باش تكثر تسميته، بالمثل القبايل يسميوا الولد محمد و يسميوه محامد و موح و محند...الخ. الاتراك يسميوم ماماد محمود حمدان على حساب منطقهم، و يقولوا على خاطر عندهم اسم محمد عزيز. قليل اللي يخليوه يسمي ابنه محمد يخافوا الا مولى ذاك الاسم ينسب و ينسب معاه سيدنا محمد صلعم.
الباب الثامن: تبديل المزيودين
يحكيوا العجايز يقولوا هذا تبديل المزيود كاين منه، و القابلات ثاني يقولوا صحيح منه ما فيهش الشك. هاذي عادة الجان اذا كاشي ولد شباب خلاوه والديه وحده قبل الربعين يوم متاعه يسرقه الجان و يحط في موضعه ولد من الجان اللي زاد معاه. و النسا عندهم علامة يعرفوا بها المزيود اذا تبدل لهم. الاول البكا متاع المبدل. يخرج البكية ذيك بصريش. و الحواجب يطلعو للسما. و يشيان بزاف يبقاو فيه غير الجلود. ثانيها العينين متاعه يرجعوا يرهبوا الادمي و هو كلي يشوف ناس اخرين. كاين قانة الولد اللي ساقاط من يديه و رجليه يقولوا هذا الولد ليهم يعني للجنون. الكثرة من المبدلين اللي يموتو، من الستة شهور ما يزيدوش على هذا الحساب.
و من عادة المسلمين الولد المبدل يحطوه في وسط البيت على القاعة و يكنسوا عليه الزبل متاع الربع أركان، و يجيبوا قفة يرفدوا ذاك الزبل و يديروا المبدل داخل فيه. زيد هذا الشرط يمات المبدل تكنس كل ركنة وحدها و تجيب الزبل بالقفة و المزيود معاه، لابد من يماه هي اللي تكنس و ترفد. و تكون يمات المبدل موصية مراة أخرى بلي تصيبها عند الزوبية يعني كي تجي يمات المبدل باش ترمي قفة الزبل و الولد في في قلب الزوبية تلاقيه المراة الاولى ما تخليش المزيود يطيح في الارض. شرط أخر ذيك الرمية يرميوها يوم الجمعة وقت الصلاوات يعني على الثناش.
بعدما رماته يماه تقول: (يا ناس هذا الزوبية اعطيونا وليد الخوابي و اديوا علينا وليد الزوابي). و المراة اللي لاقاته و ما خلاته شي يطيح تجيبه لدارهم. تجيبه على طريق أخرى ماشي من ذيك الطريق اللي دواه منها. و اذا برا الولد ذاك يقولوا: (ردوا لنا وليدنا هذوك المومنين لله يحننهم علينا).
ثاني حاجة أخرى. يحفروا في الزوبية كي القبر و يدفنوا ذاك المزيود، يخليوا غير راسه يظهر و يدفنوا معاه عظم جيفة. قبل ما يدفنوا العظم يكسروه على تسعة و تسعين طريف، و يبعدوا عليه. من بعد شوية يرجعوا ليه ينحيوه من ذاك القبر و يحسبوا ذاك العظم. اذا صابوا تسعة و تسعين كيما دفنوه، وليدهم ما يزيدشي يرجع و ذاك الولد يموت. و اذا صابوا مية و الا مية و واحد ولدهم يرجع ليهم و يكون طويل العمر.
و اذا شكوا في الجنون موالين البير بدلوا لهم وليدهم يربطوا قفة بحبل كبير و يديروا المزيود المبدل في القفة و يدربيوه في قلب البير. ا ذا زقى في المرة الاولى و الا الثانية ما يزيدوش يدربيوه يقولوا يرجع لهم وليدهم ويعيش. و اذا ما زقى شي الكل سبع مرات يعرفوا بلي ذاك الولد ما يعيش شي و يموت.

[jackin]

بارك الله فيك

[الجليس الصلح]

شكراااااا بارك الله فيك