لا أعرف تقطيع البوزلوف......النجدة

[عزتي في ديني]

السلام عليكم و رحمة الله و بركاته
عزيزاتي عضوات منتدى الطبخ أتشرف بالإنضمام لكن و قد استفدت كثيرا و تعلمت كيفيات كثيرة و عندي لكن طلب أتمنى أن لا تخيبوني و هو كيفية تحضير و تقطيع رأس الشاة ( بوزلوف )للأسف زوجي و أهله يحبونه كثيرا و أنا لا أعرف طريقة تقطيعه كل مرة أتحجج بسبب لأتهرب من الإحراج فأمي متوفية و أختي أصغر مني و أنا لازلت مبتدئة و أهل زوجي لو اكتشفوا هذا لنشروني عند القاصي و الداني...:sdf: لست متكبرة لكن للأسف والدي لا يحبه لذا لا نحضره في البيت....أرجوكم أريد الطريقة بالتفصيل و شكرا

[ام انيس2]

السلام عليكي اختي الكريمة ومرحبا معكي معنا
اولا تحكميه من جهة الفك وتقطعي بالموس حتى التحت يعني حتى الادنين ومن بعدتحليه مليح لازم قوة كبيرةانا يجبدو معايا زوجي
كي شغل تحليلو فمو راهو يتقطع كمليه بالموس ضرك راكي قسمتيه على زوج تحكمي الشاقور وتقسمي الجزئين كل واحد على حدة
كيما حبيتي على اربعة ارجو ان اكون قد اوصلت لكي الفكرة وشهية طيبة

[عزتي في ديني]

تسلميلي عزيزتي أم أنيس 2 بعد ما نقطعوا على اثنين كيفاش نكسر الجمجمة و كيفاش ننزع المخ و الأذنين نرميهم و لالا و الانف كيف انظفه ؟

[موسى2207]

بعد ما تقصي الفك السفلي تضعي الشاقوربين الاذنين وتضربي ضربات قوية ويبان لك المخ تنحيه
الاذنيين ماتيشهمش والانف نظفيه فقط جيدا

[ام انيس2]

كما قال لكي الاخ المخ راح يبانلك وحدو والانف اخبطيه مليح على الجهة السفلية حتى يخرج كل واش كان فيهومن بعد اغسلي الاجزاء مليح حظ موفق

[عزتي في ديني]

شكرا سيدي موسى2207 ربما بدأت أفهم ( أنا راسي بوزلوف قاسي)

[عزتي في ديني]

نعم و من بعد أضع كل الأجزاء في قدر كبير و نغليها ثم أنزع اللحم من العظم و أفتته .....أليس كذلك؟

[samasima]

وتديريلوا لاصوص غلتيه فيه راح يجي روعة

[sofiane2075]

كيما قالت لك ام انيس عندما تقطعيه على 2 جهة الانف اعملي خط بالعرض شوي تحت الادنين قطعي تبقى الادنين و العينين تضعي خط بالطول اي بين العينين تقسميبالشاقور اخرجي المخ ثم اقسمي كل جهة على اتنين ان شاء الله نكون وضحتلك بالتوفيق ما تخافيش انا كنت نراقب عجوزتي عندما كنت ما نعرفش و تعلم ت دون ان تلاحظ انتي اعملي متلي و كل ما كانت الفرصة مناسبة باش تتعلمي ما تضيعيهاش متلا في الاعراس لو دخلتي المطبخ بحجة المساعدة اكيد راح تتعلمي

[♥ وآثقة الخطــــى ♥]

السلام عليكي اختي الكريمة ومرحبا معكي معنا
اولا تحكميه من جهة الفك وتقطعي بالموس حتى التحت يعني حتى الادنين ومن بعدتحليه مليح لازم قوة كبيرةانا يجبدو معايا زوجي
كي شغل تحليلو فمو راهو يتقطع كمليه بالموس ضرك راكي قسمتيه على زوج تحكمي الشاقور وتقسمي الجزئين كل واحد على حدة
كيما حبيتي على اربعة ارجو ان اكون قد اوصلت لكي الفكرة وشهية طيبة

[عزتي في ديني]

شكرا لردودكم samasimaو sofiane2075 و الفراشة المحلقة والله شجعتوني سأشتري بوزلوف في أقرب وقت و أجرب ....شكرا مرة ثانية و جزاكم الله خيرا .

[نينا الجزائرية]

مشي حاجة تحشم هو اصلا الزليف لازم راجل يعاونك باش تقسميه متقدرش مرة تقسمو وحدها خاصة بالشاقور

نزيدك حاجة لازم كي تغليه ديرلو ثوم بقشورو وبوكي غارنيي زعيترة ورند باش يطلق بنة مليحة للزليف

[فتـ حييةـاة]

ربي يعاونك اختي شوفي وحدة من جاراتك تخدمو قدامك باش تتعلمي وايلا مكانش اشري واحد وتعلمي فيه كي تكوني وحدك فالدار ساهل غير مين اول مرة برك

[mayaarifi]

لا لا ماشي ساهل لانك رايح تستعملي الشقورة اخذاري لازملك كذلك اللوحة الي تفدر عليها لكن يجب عليك ان تتعلمي الصنعة مرة واحدة من واحدة معلمة اولا ثم ادخلفي الميدان وحدك انت البوزلوف احذر لان الصح راه كتخرج المخ سلاما ت يا اختي رادي بالخبر انشاء الله شوية اراد راك رايح ثحطم الرقم القياس في الاعياد بالتوفيق

[ابتهال 33]

شكرا لك
لكن انا اكره البزلوف لا اطيقه اطلاقا
لكن ربما يوما سيطلب مني تحضيره
الله يعيني على ذلك
تحياتي

[nada.n]

السلام عليكم

نحي الاذنين بالموس وحدهم و قصي الجزء العلوي على اثنين بحيث يكون الانف وحد و الجمجة و حدها و طيبي الجمجمة بلا ما تقصيها و مبعد كيما طيب الجمجمة قصميها على لثنين تجبدي المخ طايب و ديري لا صوص حمرا في مقلا مع شوي حار و تلوحي هذاك المخ يطيب و الراس يتقسم الى 4 اجزاء و هي :

1:الفك السفلي و هو اللسان و حنا في جهتنا يكلوه الرجال اي خنشلة

2:الانف

3:الاذنين

4:الجمجمة

اما على النظافة فالاذنين كي تقصيهم احرقيهم مليح الداخل و مبعد اغسليهم مليح

اما الانف لوحيلو الما السخون الداخل كي طيبيهم او كلش يخرجو الما المغلي و تنجمي كي تخرجيه تلوحي في الفور بش يذوبو الدهون

و اما العينين كي يطيب الجمجمة دكي الموس في الثقبة انتاع العينين و خرجي كل عين و حدها و حليها و خرجي هذاك لكحل طيشيه و لبيض يتكل بالهناء و الشفاء

اتمنى اني شرحت لكي بالتفصيل حتى لا يشرشحوك اهل زوجك

و شكرا

[sofiane2075]

والله اول مرة نسمع بالمخ يطيب داخل الراس احنا كل عام ندبحو انحي المخ و البوزلوف يطيب في الماء و الملح فلفل اسود بصل و توم صحيح و توابل حسب الرغبة كاين اللي يحبو هكدا و كاين للي يقطع اللبوزلوف بعد ما يطيب و يديرو في لاصوص بصحتكم اولادي ما يحبوهش

[damdah]

بعدما تقطعيه و تغسليه ديريه يغلي مع راس ثوم بقشورو والحمص وراس فلفل احمر يابس احضري لا صوص بالثوم والكمون ..................ومرقيه بالماء لغليتي فيه البزلوف يخرجلك روعة

[بعلي ع]

السلام عليكم اشكركم على كل ما تقدموه من اجلنا شكرا لكم صحا عيدكم وكل عام وانتم بخير عيد اضحى مبارك

[BACHIRA2]

الطريقة الصحيحة هي كما ذكرت من قبل الاخوات ما رايك في تحمير البوزلوف

[aya0906]

قطعيه كما قالتلك ام انيس2 ولاكن انا نقطعو بالمنشار لاتفادىالعضام

[fati 17]

كل اصحاب الردود مشكورين فقط عند استعمال الشاقور لا تضعي اصابعك اسفل اي تحكمي بيهم تفاديا لاي ضرر خاصة انك غير معتادة على الشاقور

[أم نورين]

اختي والله ما فيها حتى حشمة خاصة وانك يتيمة اطلبي المساعدة من الاهل والجيران انا تربيت يتيمة في سن14 لكن بشطارتي واسئلتي عن الاشياء تزوجت في سن19 والله اناعلمت عجوزتي بعض الاشياءفي المطبخ والتدابير المنزلية كون راكي قريبة ليا انعلمك كيما بنتي ربي يوفقك

[أم ماجد]

http://www.djelfa.info/vb/showthread.php?t=1167112

اليك وصفتي لعلها تساعدك اختي وحظ موفق

[asma28hd]

استعملي منشار اللوح احسن من الشاقور العظام ماش رايحة تتكسر والمخ يخرج نظيف ومايتفتتشونفس الشيئ للحم قطعي اللم بالموس ومكان العظم قطعيه بالمنشار