البوقالات .....من العادات و التقاليد الجزائرية الثقافية [الأرشيف]

هاني_سات

2010-01-08, 09:47

لا تحظى أية لعبة تسلوية في الجزائر بالشعبية
الكبيرة التي تحظى بها لعبة «البوقالة»، و تزداد شعبيتها كلما حل الشهر
الكريم شهر رمضان ، إذ تعود لتحتل مكانتها الحميمية وسط النسوة في سهراتهن
فوق أسطح القصبة العتيقة أو في وسط دويرتها ومنازهها وأفنيتها . فتجتمع
النسوة في بيوت العاصمة الجزائر وحدها دون غيرها من مدن القطر حول أطباق
البقلاوة وقلب اللوز وأكواب الشاي الأخضر والقهوة، و تسترسل تلك التي تحفظ
البوقالات على ظهر قلب في تلاوة أشعارها قبل أن تغرق المدينة في سباتها
وتعود كل واحدة إلى دويرتها وهي تتأمل في أن يتحقق الفال الجميل الذي كان
من نصيبها .

وتحرص العازبات من النساء على
المداومة على لعبة البوقالة كل سهرة رمضان، إذ تجدهن يسرعن ترتيب المطبخ
وإعداد سينية الشاي الأخضر بالنعناع، وتحضير الأجواء المناسبة لهذه اللعبة
رغبة منهن في التأمل خيرا من الأبيات الشعرية الرقيقة والعذبة التي تتلى
على مسامعهن من عجائز ومتزوجات .

وليست هذه اللعبة التراثية سوى أشعار شعبية
جزائرية تشكل أساس ما يعرف منذ التاريخ القديم بالعاصمة الجزائر ب
«البوقالة»، تشاع في الأوساط العائلية النسوية ، وغالبا ما يكون فحواها
حول الحب العفيف والحزن على فراق الأحباب والخلان والأمل بعودتهم . وتتطلب
لعبة البوقالة تحضير الأجواء الحميمية الملائمة التي تساعد المشاركات فيها
على فتح مخيلتهن وفسح خواطرهن وشرح صدورهن للفال الطيب والأمل والرجاء
والحلم.

ولعل أهم ما يميز هذه اللعبة هو
ضرورة أن تعقد النساء المستأنسات بمقاطعها الشعرية اللطيفة المعنى، ما
يسمى ب «الفال»، ومعناه أن تعقد المرأة النية داخل قلبها بالتفكير في شخص
من الأشخاص زوجا كان أو إبنا أو أخا بعيدا أو أما أو في أي من الأصفياء
والأحباب بل حتى في الأعداء والخصوم، بمحاولة إسقاط معنى أبيات البوقالة
الموجهة لها، على شأن الاسم الذي نوته، مع الرجاء أن يتم ذلك حقا.

ومن أساسيات «البوقالة» أن لا تنال المرأة حظها من الأبيات الشعرية إلا
بعدما تمسك بجزء من خمارها أو تنورتها أو أي قطعة قماش أمامها وتصنع منها
عقدة صغيرة مرة واحدة قبل أن تفتح هذه العقدة بعد الاستماع إلى البوقالة
والكشف إن أرادت عن اسم الشخص الذي أسقطت عليه هذا الفال.

وتأخذ لعبة البوقالة تسميتها من الإناء الفخاري المعروف باسم «بوقالة»،
الذي كان وما يزال يستخدم في هذه اللعبة، بعد أن يتم ملؤه بقليل من الماء
يرفق ب «الكانون» أو «النافخ» للتبخير بكل أنواع البخور من جاوي وعنبر
والألّوة.

وبدأت لعبة البوقالة تأخذ طريقها إلى الزوال سنة بعد أخرى منذ نهاية
الستينات قبل أن يعاد لها الاعتبار في الخمسة رمضانات الأخيرة بالأخص بعد
خروج الجزائر من مأساتها الوطنية، إذ عادت بعض الأوساط العائلية في
الجزائر العاصمة بالأخص في أحيائها الشعبية بالقصبة وباب الوادي وباب عزون
وبلكور وسالم باي لتهتم ثانية بهذه اللعبة لكن بتجريدها للأسف من بعض
الجزئيات التي تصنع خصوصيتها، إذ جردت بعض العائلات لعبة البوقالة من
الإناء الفخاري ومن بعض الشكليات ولم يحتفظوا إلاّ بتلاوة الأشعار التي
تحفظها النساء والفتيات على ظهر القلب، والنظر والتأمل في معانيها
والاستمتاع برونقها .

ولعل أهم ما يجب ذكره بخصوص هذه اللعبة أن قائلها أو قائلتها يظلان
مجهلين، إذ لم يتمكن أي باحث إلى يومنا هذا بالرغم من الجهود التي بذلت في
هذا الشأن من تحديد هوية مؤسس هذه اللعبة بما في ذلك تاريخ نشأتها ومكانها
وأصل الأبيات المتلوة فيها .

وكان أول من اهتم بلعبة البوقالة من حيث تتبع تاريخها واستنباط أهدافها
الباحث الجزائري قدور محمصاجي المنحدر من الأسر العاصمية العريقة التي
تربت وترعرعت في قلب القصبة العتيقة، وأعد محمصاجي حصصا قائمة لذاتها حول
هذه اللعبة في الإذاعة الجزائرية مطلع السبعينيات إلى الثمانينيات ولقد
حرص الباحث الذي أصدر كتابا حول هذه اللعبة العام 1989 باللغة الفرنسية
بعنوان «لعبة البوقالة .. مساهمة في معرفة أحسن لهذه التسلية التربوية
والشعبية» على تنبيه جمهور المستمعين إلى أنه لا يحق اعتبار اللعبة ضربا
من حصص التكهن والشعوذة والتدجيل والعرافة عن طريق الماء (الهيدرومنسيا)
استنادا إلى بعض المظاهر والشبهات.

وتبقى البوقالة التي سعى الكثير من الباحثين إلى تهذيب لغتها والإرتقاء
بها من الدارجة والعامية إلى العربية السهلة، كما سعوا إلى تنقيتها من
الأبيات التي تتضمن دعاء موجها للأولياء الصالحين الناجم عن جهل العوام،
بحيث تكون لها معنى مستقيم لا يخدش الشعور التوحيدي القاطع الذي يقوم عليه
الإسلام، تبقى جزءا هاما من تراث شفوي جزائري زاخر بالجواهر الأدبية
الشعرية من أمثال وحكم وأغان وقصائد وتعابير وأحاجي .

ولا تكتمل الصورة حول لعبة «البوقالة» إلا بعد تقديم نماذج من أبياتها
الشعرية التي تتنوع تبعا لتنوع الحالة والمقام، ولا تسترسل النسوة في
تلاوة هذه الأشعار ما لم تبدأ بالتعويذة والصلاة على الرسول (صلى الله
عليه وسلم) لافتتاح جلسة البوقالة وهذا نموذج منها :

باسم الله بديت

وعلى النبي صليت

وعلى الصحابة رضيت

وعيّطت يا خالقي

يامغيث كل مغيث

يارب السماء العالي

ومن البوقالات التي تقال تعبيرا عن هّم الإرتباط بالقريب من ابن عم أو خال أو عمة ما يلي :

راني راني

في وسط جناني

السرّ والبهاء

ريته بعياني

راني راني

حالفة بالرباني

هذه المرة

ما نأخذ غير البراني (الغريب)

وهنا نموذج من بوقالة تقال في حسن جمال المرأة وطلب القرب منها :

يا لالّتي (سيدتي) فاطمة يالالّتي فطوم

سبحان خالقك

ريت النجوم في السماء

حسبتهم ساقك

العين تبكي عليك

والقلب مشتاقك

نموذج من بوقالة تقال في استقبال الغائب:

السفينة اللي جات

باش أنكافيها

باللوز والسكر

نطعم غاشيها (أي ناسها)

وبالزباد والعطر

نطلي سواريها

ونطلب ربي العزيز

للحج يدّيها

وهذه بوقالة للتشفي في الأعداء والفرح بالآتي :

حبطت إلى قاع الجنان

وفرشت زربية

حرقست بحرقوس الذهب

حتى الى وذنيّا

افرحي يا يمّا

سعدي ولّى ليّا

نتشفى في العدو

كما يتشفى فيّا

بوقالة في ألم الفراق ..

بعثت لك يا شباب

دموعي قرنفلة حمراء

ياعدو بن عدو

بدّلتني بامرأة

قال لي والله يا لالة

ما نبذلك بالغير

محبتك في قلبي

حتى يشيب الطير

في طلب القرب..

عندنا شجرة

معمرة بالياقوت

وعندنا فوّارة

معمرة بالحوت

اعطوني ابنتكم

أو نطيح نموت

نشيدة 23

2010-02-11, 15:22

تقبلو مشاركتي بهذه المجموعة من البوقالات:

· نطلب ربي الفتاح يعطيني نحل البيبان و نشوف الهناء و نرتاح .
· هبطت لقاع البحر ، فرّشت زربية ، خرجت لي جنية ، قالت لي واش بيك يا البنية ؟ قلت لها راحوا حبابي و خلاوني وحدانية.
· لو كان السعود تنغرس بالعود نغرس ميات عود في وطيّة ، بصح السعود بيدّك يا معبود . يا سقام السعود سقم لي سعدي.
· طلعت للغابة ، صبت الضّرو يابس ،قتلوا يا ضرو القمر يمشي ولا حابس ، قالي مفرش زربية وحذاه طاوس .
· رشّيت عتبة الباب بالزهر و الطّيب ، وسقيت كل الأحباب بالعسل و الزبيب ، و كي نسيت جاني جواب كنت نستناه من عند البعيد.
· مدّيت لقاع البير و فرّشت زربية ، حرقست حرقوس ذهب من راسي لوذنية ، فرحي يا يما سعدي زها ..و استشفاي في العدو إلى استشفي فيّ .
· يما يما ديريلي تويقة في وسط الحديقة باش نشوف زهري كي تجيبو ذيك الوريقة.
· ديديو..ديدو..أنا سعدي مليح ، قنديلي ضاوي ، البنيان إلى بنيتو كامل سجالى ، بنياني فوق غرفة و لي يخصني يكملهولي العالي .
· عسل يا عسل في باقة خضرا ، يا شميمة العاشقين يا قمرا ، حلف سيد الملاح ما يرأس أمر غير إذا جات غزالته باش تكمل الحضرة.
· الدالية دلات ..و دلّ العنقود ، خلي القمر ينكشف ، والسحاب يذوب ، و خلي لالات النسا تنال المرغوب.
· خرجت نهار الجمعة ، في يدي شمعة ، قالولي أمسحي ذيك الدمعة ، و انساي الخلعة ، قريب يتلموا احبابك و صحابك و يفرحوا معاك الجماعة .
· الناس تنده بالرجال و الوالي ، وانا ننده بربي العالي .
· حوم حوم يا حوام ، حوم فوق السطح العالي ، و قول لها يا لالة يا زينة لبنات خدودك براقة ، و عيونك غرّاقة ، صارت كل القلوب ليك سبّاقة.
· كلام على كلام و الكلام على سقيلة ، العين في العين و الدّعوة مقبولة.
· يا شمس واش بيك ذابلة ، إلا بيك الزين راني نفكر فيك ، و اذا بيك الزهر ربي ما يخليك.
· محبس منقوش ، مربي على الفشوش ، ما يحمل الهانة ، أصبر يا خاطري حتى يفرّج مولانا .
· لزّيت لباب الرياض ، الورد عالباب ، النرجس باسني ، الزهر عنقنى ، و الياسمين ما بغَى يكلمني .
· قطّعت اللحم بيدى و عملت بذور ، و سمعت الكلام بوذنى و عرفت من قالو ، يا قايلين الكلام القبيح واش تربحوا ، أنا طاوس في القصر و انتم خفاش النهار ما يضوالو.
· جزت على جنية ، قالت لي واش تحوسي يا ولية ، قلت لها مانى نحوّس لا على مال ولا على جاه، نحوس على من ضيّعت قولي ليّ .
· جايز على باب دارنا ، لابس تلمساني ، قتلو يا شيخ بالاك تنساني ، قال لي والله ما ننساك ، ونصيبك على ربي جاه و سلطاني.
· امّنت بالله ، و المنام رؤية من عند الله ، حمامة بيضا جات ترفرف عليّ ، معاها حصان توقّف بين يديّ .
· نبعث لكم دموعي في مشوار ازرق، و نبعث كلامي في برية تحرق، ما ننساكم يا ناسي بحق إله مكة ببلاطها لزرق.
· سمعت قر الحمام في قاع السّجنة ، لا من سقاه الما ولا من عطاه شعير ، يا قمر ..الحمام يعي و يحن ، وتتعمّر النافورة ، ونعودوا لزمانا كيما كنا .
· خرجت ليلة الجمعة ، في يدي شمعة ، خرج لي ملاك حنين قالي : يا بنت السحاب حاجتك راهي مقضية ، قلت ليه : يا سيدي طالت المدة ، قالي : روحي لدارك تصيبيها قدّامك .
· خرجت بدر البدور تتزعبل في المور ، تلقت هذوك الشعور ،على الخد إلى ينوّر مثل التفاحة.
· دارنا في الجبل ، مقابلة مكة ، مفتاحها من ذهب ، يشعل ما يطفي .
· لالة يالالة ياريش النعام يا اللي مربية في القطيفة والرخام ملّي شفتك وعشقتك مابقالي منام.
· أنا مهري غالي اللي يحب يديني يحسب النجوم ويسهر الليالي ولي يبغيني يبنيلي قصر في العلالي.
· جابولي الرمان مغلف في وراقوا وأنا وحبيبي في بلاد وحدة والقلب مشتاقوا.
· ما نديها طويلة سلوم راشي ، ما نديها قصيرة فكرون ماشي، نديها مربوعة قد كي علم الباي ماشي .
· مشيتي عالية وطولتي دالية شبان ورجال يتبعو فيا ويمشو مذلولين يتبعوا فيّ...ومن غير المولى وحبيبو ما في مين يعلى عليا .
· خرجت في الليل نطلب في الله صبت النجوم دايرين وقالولي صلي على رسول الله *صلى الله عليه و سلم * واللي تستناهم راهم راجعين .
· قالي طبيبي بلاما يدري تداوى يا عليل ، ودايا ودوايا عند حبيب لمحبتو بخيل ، وقتاش يا عمري ترحمني وترحم دموعي لي تسيل؟؟؟
· الاسمر يا لسمر يا شباب الحومة وشبيك غضبان علينا، احنا ما نسواو بلا بيك ، لوجه ربي راضينا وارض علينا .
· قريب الرفيقة يا قريب الرفيقة ، بيني وبينك تويقة ، يا مخلي في قلبي شقيقة روح وين تروح و تعيا ترجع ليا ونرد لقلبك الحريقة .
· ما ناكلش من جنان الجنة لو يشهيني وما ناخذش الشيخ ولو يغنيني ناخذ الشباب أبيض ولا أسمر المهم هولي يملالي عيني .
· دزيت باب الحبيب دفة على دفة فراشو من حرير نرقد وندفا، بوقالو من ذهب نشرب لا نروى، وكلامو من عسل غير نسمع نشفى.
· انت سبيبط وانا خويط فيك، انت سنيسلة وانا خامسة تحميك، انت خويتم وانا حجرة تبهيك، وين تروح تلقاني وغير انا لي نديك.
· راني راني في وسط جناني السرّ والبهاء الرباني ريته بعياني، راني راني حالفة بالرباني هذه المرة ما نأخذ غير البراني .
· باسم الله بديت وعلى النبي صليت وعلى الصحابة رضيت وعيّطت يا خالقي يامغيث كل مغيث يارب السماء العالي بيك أستغيث ارحمني في هاذ الدنيا و سقملي السعد ديالي.
· سبحان خالقك ،ريت النجوم في السماء حسبتهم ساقك،العين تبكي عليك والقلب مشتاقك
· بعثت لو دموعي قرنفلة حمراء ،ياعدو بن عدو بدّلتني بامرأة ، قال لي والله يا لالة ما نبذلك بالغير محبتك في قلبي حتى يشيب الطير.
· عندنا شجرة معمرة بالياقوت وعندنا فوّارة معمرة بالحوت اعطوني ابنتكم ولا نطيح نموت.
· في الدار صندوق مخبيء فيه الذهب و المرجان و روبة قضيفة قالولي ليمن راك مخبيها قلتلهم لهاديك مولاة الشان و المشية الضريفة.
· خرجت نطلب الله صبت النجوم تطلب في رسول الله واحد ما يدي غير ما عطاه الله.
· حبيبي يا حبيبي قطعوا فيك تقطاع البصل حتى سمعو بيك ناس جيجل و القصر، والله ما نسمح فيك يا نور القمر.
· قالوا نقتلوك و في بير نغبروك، قلتلهم انا شجرة حب الملوك ولي يحب الشوك يدنا ليا.
· لو انت بحر انا حوتة فيك ، لو انت جنان انا وردة تبهيك، لو انت ليلة انا نجمة تضويك ، لو انت تحبني انا نموت عليك .
· طلبت من الله العافي يرسي كل مغبون بمينا ،ويكسي كل عريان وحافي ويبعد لهموم علينا، رد الفال لا تخافي عندي تخلاص الغبينة، دير النية بالقلب الصافي والنية باقية في القلوب الزينة ، ياربي بارك في كل وافي وغرس الخصايل فينا، بالفال تعود وافي وبالنية باقيا الدنيا زوينة.
· رفدت النعناع مع الحبق وعرق الياسمين لمّيتهم في الطبق وحطيتهم عند العين ، فجأة دقدق من كان غايب طول هاذ السنين.
· السفينة اللي جات باش أنكافيها، باللوز والسكر نطعم غاشيها، وبالزباد والعطر نطلي سواريها ، ونطلب ربي العزيز للحج يدّيها.
· علاش يا لالة التخمام رحمة الله واسعة و كبيرة لو كان جات بالكلام نتحدثو و نعطوك تدبيرة، بصح كل شي بالمكتوب ويعيا و الخير يبان و تزول عليك الهموم و تروح الحيرة .
· في الساقية الماء يجري و الحشيش نابت متخالف،بالشوك مليت حجري من هذاك الراي التالف، كي غبت و غاب زهري و لا اللي يجيني خايف.
· لا تامن الخيل اذا غدات ولا تامن الليالي اذا صحات ولا تامن النساء اذا تابت وصلات
· جيت ساميت البحر شفت الحوت يعوم عرفت ما عندي زهر في ذا الحظ المحموم كي غاب ضي القمر ما ردت ضي النجوم .
· أصلك أصلك و ما ينفع غير الصح مولاة النية الصافية عليها ربي يفتح أطول و لا تقصر يجيها السعد و الربح .
· يا مولاة القلب الكبير ربي يعطيك و يوسع عليك ما عندك لا ذهب و لا حرير و أنت دايما زاهية و ربي مسهلك، ما دريت واش من حيلة ندير باش نكون مثلك .
· لالة يا لالة وين ما تكوني نرسلك مرسول ادا سكنت البحر نرسلك عوامة و ادا سكنت السماء نرسلك حمامة و ادا سكنت القبر ايحاسبك مولانا.
· وين الطريق اللي فيها محبوبي جيبولي التراب من ثمة نشريه نعملو جعيبة في مكتوبي و اذا مرضوا عينيا نكحل بيه ،حبيبي مايسمح فيا وانا مانسمح فيه.
· الطبق بين رجليا و بالخاتم بين صباعتيا و الحبيب اللي راح زمان يرجع ليا و الله غير نعيش معاه حتى يتغمضوا عينيا.
· مزين القمر بضواه و مزين الانسان اللي في قلبوا جامع، و مزين النجوم كيما الياقوت مجمع و يلمع و مزين القلب اللي عطاه ربي حبيب كيما حبيبي.
· زوج حمامات، يا سعد اللي وكلهم ويا سعد اللي شربهم وسعد اللي يدي دعوة الخير منهم.
· شباب يا شباب ياللي عايروني بيك انت وردة فالكاس وغير انا اللي نديك.
· عيونك توت وحواجبك ياقوت, انا نحب خليلي واللي حاب يموت يموت.
· الطبق ما بين رجليا والخاتم ما بين يديا أفرحي يا يما سعدي رجع ليا ونستشفى في العدو كيما استشـــفى فيا
· هبطت لقاع البحر ولقيت جنية قاتلي واش بيك ياالبنية راكي أتحوسي على المال و لا الذرية قلتلها راني نحوس على حبيبـي يرجع ليا

· من عندو غايب الله يردوا لبلادوا ومن عندو حبيب الله يصبروا على عذابو ومن عندو الزهر يقسموا على حبابو،سلتوا من عند من جابو قالي الزهر كي المطر مين شاف صحابو وكي الضيف من طرق بابو وكي العلم وافر في كتابو.

· غرست ياسمينة في وسط الدار طاحو وراقها وحد النهار قلت حبيبي أنساني ، قالي مانسيتكش بلعاني مالقيتش الطير ألي يوصلك سلامي.
· إذا أنت برنوس أنا قفلة فيك، وإذا أنت محبس أنا وردة فيك وإذا أنت تحبني أنا نموت عليك.
· قعدت تحت النخلة قالولي دقلة نور ،جات أدور النحلة وبالعسل عليت الصور، معاه العيشة تحلى هذاك الساكن في القصور
· سجدت سجدة وصليت على النبي الكريم وتمنيت ورفدت يدي ودعيت ورفعت عينيا وبكيت ياربي يا كريم حققلي كل ما في قلبي ورجعلي ذاك ألي طول عمري تمنيت.
· طلعت للسطح قلت حبيبي بلاك تنساني قالي والله ما ننساك حبيبتي بلعاني محبتك في قلبي صافية كالجوهر الحقاني
· طير يا الحمام طير وطير ولا ترتاح ونزل في السرايا وزيد لسطاح وأنزل في حجر لحبيب و دّي التفاح وقولو قلبي عليك ما صبتلو مفتاح
· شفت الزين بعيني وبكيت عليه وندمت على الأيام اللي كنت فيها بلا بيه واللي يبغيـني
ربي أيخليه ليّ ويخليني ليه
· شفت ألي كان في قلبك بان ولي وقتو حان ،الحمد لله أ نت َطلع علامك وزادك الله في شانك.
· الصبر ياك يقولو الصبر ثمرة تاعو حلوة وراح تلقى واش طول عمرك تهوى وتصفى عليك ليام وتشرب مع لحباب قهوة صافيا إن شاء الله بلا تلوى
· بسم الله بديت وعلى النبي صليت، تمنيت لو نشوفها في منامي ونحدثها ونتبادلو لكلام لابسة لوني زينة لريام كي تخرج في الليل يهرب الظلام وكي تشوف في القمر يسقط كالسهام وكي تطلب الياقوت يجيها عوام و كي تطلب الضحكة جيها على جناح لحمام وكي تطلب المحبة يطيح هوام
وكي تسالها علي تقول برك عوام
· خرجت بالجمعة وفي يدي شمعة لقيت المؤذن فوق الصومعة قالي واش بيك ياولية نجيك محمل مابين الصبيحة والعشية
· بان نجم الهناء والفجر بنورو تبسم وليي عمرو بحبو ليا ما باح راه اليوم عزم على القرب وتكلم.
· خزرت من التاقة ننفض الزربية جازوا ثلاث عزاب عليا ، الأول بعثو الملك قال لو نغنيها والثاني بعثوالسلطان وقال ل نكسيها والثالث بعثو الحبيب وقال له نموت عليها.
· الشمس الغاربة غدوة ترجع تشرق وسفينة لحباب بعون الله تفوت وما تغرق والتبسيمة في وجه كل حبيب إن شاء الله تبرق
· مزين القمر بضواه علينا طالع ، ومزين إنسان ألي في قلبو جامع ، ومزين النجوم كيما الياقوت المجمع ،ومزين ألي عطالو ربي يكون قانع
· هبطت للواد فيه الديكاز ، وعليا خاوتي حراس مايغلبهم فارس ولا نعاس ،شفت فما تراس ، قالي يابنت الناس ملي شفتك ماني لاباس ،رميتلو من بعيد كأس قتلو ماني طالبة تملأه ماس ، طالبة تملاه محبة وإخلاص
· شفت الي كان في قلبك بان ولي كان بعيد وقتو حان والحمد لله انت طلع علامك وزادك الله في الشأن
· لي عطالو ربي من الذهب جبال ماتنحيهالو جيوش من الرجال ولي عطاه الزين وخصال ما يتبدل والدهر بدال يبقى كالذهب مهما حال
· الزينة يا الزينة و الزين ربي عطاك طبيعتك حنينة و كحل العين واتاك وردة في جنينة في يد اللي خذاك يحفظك من العوينة و يخليك للي رباك .
· سمرة يا سمرة يابنت الجيران غبت و طال غيابك و خليتي خليلك حيران ارجعي يهديك ربي و ماتنسي الي هواك و شعلتي في قلبو نيران
· فال يا فلفال يا فاتح سبع قفال اجبرلي سعدي مهما كان من الشرق و لا من الغرب
ولا من الشمال.
· بركاك يا قلبي من البكاء ...واضحك للزمان ...
تسعد ببشائر الخير...و ربي يرد اللي راح..

· شدني شدني...شدني من يدي ..من غيرك انا ما ندي...كلامك زين و سلامك يملا العين

· يانجمة الليل راني وحدي حزينة إذا نساوني لحباب فكريهم بيا ونبهيهم بلي ماني نرقد لا يجيني نوم ونخمم غير عليهم ونترجى في العالي يجمع شملي بيهم
· وردة فاتحة في بستان قدها ولونها وجمالها من بعيد يبان
لازم على كل من حبها يقدملها من الهدايا قناطير و اطنان
ويحمد المولى ويقول سبحانك ربي يا حنان ويا منان أحفضها
· خيوط الليل ذابت ..و شعاع الصبح بان..
و الشمس فوق لاحت..ذهب عليا اللي كان..
و اللي زمان غابت..جات اليوم تبان ..
تسقم السعد ثابت...اتهنيت و الحظ زيان

· خرجت في الليل نطلب في الله
صبت النجوم دايرين
و قالوا صلي على رسول الله
و بالكلمة الزينة رانا راجعين
· لا في الجبال واد معلوم .. و لا في السماء ريح دافي..
و لا في العدو قلب مرحوم..و لا في الخلايق عهد وافي

· طلعت للجبل لقيت الرومية سكنت قلبها وذابت في عينيا
قلتلها تكفيني بنت بلادي وبالي بعيد على البرانية
· غزالي قمري ديما يضوي علينا أنا شمس الي تشرق الصباح وتغرب العشية يارب سهل عليه وعليا
· سبحان الله خالق السماء والنجوم سبحان الله مسخر لجبال وعلا لغيوم سبحان الله يبعد الشدة وينحي ربي علينا لهموم ويولي كل بعيد بشملو ملموم
· قعدتنا زينة فيها لحباب والنساب.... وحتى البراني يقعد زاه قدام الباب ....
· خرجت يوم الجمعة و في يدي شمعة قاصدة الوالي نطقلي ملاك من السماء قالي روحي يابنتي حاجتك مقضية بربي والنبي العربي
· لالة يا لالة يا مولاة القلب القاسي حني على حبيبك يااللي طيرتي مني نعاسي ملي شفتك راني نتعذب عليك نعادي اماليا و كل أحبابي وناسي
· جعلولتي عالية في وسط الدالية والدالية بالعنب والساقية بالحوت أعطوني بنتكم ولانطيح نموت
· يـدى فـي يد خويا ويد خويا بالحنة واليوم سعدو هو وغدو ة أنا نتهـنى
· قال والله نديك باه نولي هــاني.... هربت من هنا جاني.... هربت ملهيه جاني
· ترجمان ياترجمان ياورد كل اللوان جازوا عليا 3بنات واحدة رافدة الكابة والثانية ررافدة الكابة ولخرى رافدة حزام وأنا ديت شوشة سيدي فلان
· صبرت صبرت حتى والفت و حتى عاد الصبر سلاحي جربت عديت قريت او شفت طاب القلب وطابوا جراحي جريت وشقيت ياما حوست قهرني الزمان وطال صياحي أمري لله راني وكلت ايضوي عليا مصباحي
· يا سبحان مين خلقك أُوخلاك فتنة لناس فاتح على خدك الجناس الورد والياسمين والقرنفل والياس أديتي جميع السر واش خليت لناس
· جيتكم يالوالدين بجاه النبي لا تخلو يطول عذابي أنـا نبغيها وزينها هـو سبابـي
· شجرة الجنة يالنابتة في الماء.. سهلي وباركي في كل ما يتمنى
· إذا طاح الليل النهار راهو يطلع و إذا كثر النحاس الذهب هو اللي يسطع و سيرتك كي العطر بين الناس ، القعدة زينة و كي السلطان متربع
· السمراء يا السمراء كويتيني بجفاك أنت مانسيتيني و أنا ما ننساك نطلب ربي و النبي عليه الصلاة و السلام إيكون مكتوبي معاك
· أتوكل على ربي و دير الملزوم و نوي نية بالقلب المهموم شملك بيهم ملموم
· اعقب عليا لسمر مدبل العين أملالي حجري بالسكروالورد والياسمين
بيه القلب انصبر من فراق الزين
· لالة يا لالة بيني وبينك جبال وانتي قلبك قاسح وانا قلبي مذبال وأنتي قلتي نسيتك ونحيتك من البال وأنا قلبي أبيض وما زال يبغيك ويخسر عليك المال
· بسم الله بديت وعلى النبي صليت . وعلى الصحابة رضيت وعيطت يا خالقي يا معين .
نجينا يا ربي من الكشايف والتمريت ....جزت على ديك الساقية وصبيت الماء ....اللي ناوي حاجة ربي يكمل.....

· ياخاوتي ياولاد العموم ...الدنيا الدور والشده ماتدوم .... والحال خليه على حالو ... واللي مكتوب في الجبين تشوفو العين .
· يا زينة البنات كي في القنديل في البيوت لوكان تقبلي محبتي ارمي عليها بالسكوت و نهديك مهرك جوهر من غير ياقوت و بحر محبة من غير حوت حتى للموت
· عطيت جواب للسما لزرق الدمعة على الخد تبرق وتحرق العقل راح والقلب رايق لوكان دريت الزمان يفرق نكوي قلبي وما نخليه يفرق
· مقدود القد مسقم .... غزال شافتو العين شارلي وتبسم قالي اهلك وين ....استحيت لانتكلم وحمارو الخدين
· بسم الله بديت وعلى النبي صليت وعلى الصحابة رضيت ...غلقت عيني وشفت رؤيا شفت طير يرفرف على رف قالي فاعل الخير ديما ينسى وفاعل الشر ديما يشفى امشي بنية اذا تخلطت ديما تصفا
· مشمومي كنت شامة بين العشران ومنين ادبال في الزوابي خليتو عسل كلاوه مابقى غير القطران حقي كليتو وحق غيري خليتو واش بقى في غزالي يوم رميتو
· حب الملوك جاني هدية ,مدبل في اوراقه.....محبوبي كتب لي برية ,الموت ولى فراقه
· حبطت لقاع الجنان لقيت الملاح رقود تنهدت الداليا طاح منها عنقود القمر قال انكشف و السحاب قال ذنوب خلي الحبيب مع الحبيبة وكلش بالمكتوب
· أحمد يا أحمد دير روحك طير وآجي تشوف حآلي نغطّيك بفرآش حرير ونزيدلك تآج سلطآني
· التآقة للتّآقة والقلوب عشّآقة نطلب من ربّي ان شآء الله العيون تتلآقـى
· بسم الله بديت وعلي النبي محمد صليت .... وطلبت ياخالقي اعطيني على قد ماحبيت نزور محمد ونطوف البيت ....
· طق على بابنا طقة على طقة طلعلى سيدى الرجال بفرملة زرقة قالى خيرك يالالة غدوة ترجع القلوب وتتلايم الفرقه
· جآز على بآب دآرنآ عطآني وردة في الكآس قآ لي مآبيآش الوردة اللّي فـي الكآس بيآ غرآمك يآ بنت النّآس
· رحت للسوق نشري الفلفل و الكمون....صبت شيخ كبير ....قالي حبيبك راه عليك مهبول
· قلبي على جمرة و قلب حبيبي على تمرة بعثتلو وردة حمراء و قلتلو الخديعة مرة ..قال لي و الله ما نخدعك حتى يروح نعشي للمقبرة
· باسم الله بديت ..و على النبي صليت .. يا اللي زايدة في عذابي في النهار انومك و في الليل نترجاك أعطيني كلمة من فمك يرحم اللي رباك
· باسم الله بديت..وعلى النبي صليت.....حبطت لقاع لجنان..صبت خوخ طايب.. كليت حقي وخليت حق الغايب

· البسي اللي يواتيك جميع الناس حاروا فيك اللي عندو لعقل يديك واللي ماعندوش يصبر قلبو عليك
· سبحان من خلقك و خلق الناس ما ولدوك في البهجة و لا مراكش و لا فاس فاتح على خدك سبع اجناس ورد و ياسمين و قرنفل اديتي كل السر واش خليتي للناس....
· ذاك الحمام اللي محبوس في السجنة يعيا و يفرج عليه ربي ... و نرجعوا خير من اللي كنا
· بالصح نقدر نجيب وحدا من راسي زينك غالي -- ديما في بالي قدرك عالي -- عليك نرشق مالي