زواجي سيدمر بسببهم

[مشكلتي]

السلام عليكم و رحمة الله و بركاته
أنا سباب مشاكلي عائلتي اذا دمر زواجي في يوم من الايام هوما سبابي
انا عائلتي قطعتهم مدة ستة أشهر السبب دارولي مشاكل مع زوجي مديتلهم دراهم بدون دراية زوجي من بعد كي فاق حتى او ماشي دراهمو قالي يرجعوهم سنتيم سنتيم و هوما أصلا كانو في ديون متراكمة هكذاك و رجعهملي ولاو كرهوه و حبو حتى يطلقوني منو من بعد مدة تجاوزنا الامر و نسينا و رجعت ليهم قعدو مدة و هوما معايا ببرود حتى رجع زوجي سلفلهم دراهم ولاو هايلين معايا لكن المشكل كله أين...... انا تسلفت على جارتي من اجلهم و هوما ضرك ما قدروش يرجعولي دراهم و انا حصلت من جيهة جارتي حشمت منها و من جيهة زوجي لوكان يزيد يعرف هاذ المرة نلحق للموحال مارانيش نرقد ما عرفتش كيفاش نرجع الدراهم و انا أصلا ما عنديش راني في مشكل و هاذ المرة رايحة نقطع علاقتي بيهم جملة عييييييييت

[ع.عيسى]

وانت علاه تسلفيلهم من الخطرة الاولى ؟؟؟ ..ماعندكش راهم ليك انت ..اذا ما تسلفيش ....ولي يقلك انت تجاوبيه وانا منين جاتني ....لذلك ما تسلفي ما تضطري بعدها تقطعي علاقة .....واذا زعفو منك بسبب انك ما حبيتيش تسلفيهم ..خليهم يزعفو ويقطعو ....خير ما تسلفيهم وتزعفي انت وتقطعي انت ..

[اسماعيل 03]

البشير الابراهيمي ربي يرحمو ملي كان في مصر كان عايش يقضي دين بدين حتى مات
شوفي آخر يسلفك بشرط يعطيك الوقت وكي يلحق الوقت يجيبلك ربي اللي يسلفك إذا كانت إرادتك قوية في قضاء الدين
وربي وعدنا إذا كانت عندنا إرادة باه نقضو الدين يقضيه علينا
قال النبي صلى الله عليه وسلم: من أخذ أموال الناس يريد أداءها أدى الله عنه، ومن أخذ يريد إتلافها أتلفه الله. رواه البخاري.

[قدور بن عاشور]

كيفاش تسلفي على جارتك من أجلهم؟ علاش مايسلفوش هم على جيرانهم؟
أصلا من هم "هم" ماوضحتيش، هل والديك أم إخوتك؟
الوالدين تعطيهم من مالك ولا حق لزوجك أن يمنعك، و إن كان هذا المال من عمل سمح لك زوجك به فله حق في مالك حسب رأيي.
أما أن تستلفي لتردي الدين بدين آخر فلا أنصح به.
خبري جارتك بالمشكلة و زيدي زوجك و خلاص ليس لديك خيار آخر