مزالو ( خمس أشهر على التخرج) ( واش ندير )

[مشكلتي]

السلام عليكم
مشكلتي معقدة وكرهتني لدرجة وليت نجرح ونضرب في روحي
أنا طالب العام هذا سنة 6 في طب الأسنان ( العام الاخير)
مشكلتي اني مفهمتش نهار الباك وين كان مخي
تحصلت على البكالوريا بتقدير جيد جدا ( 17) لكن وقت الاختيارات معرفتش واش راني حاب ودخلت بعضاي
رحت طب اسنان هكاك

و ذرك اكره حاجة عندي في حياتي هي الأسنان ...
انا منحبش نخدم خلاص في الدومان هذا .. كرهتو .. كرهت روحي بسبتو

اكره حاجة عندي هي فم المريض

ندمت ووصلت جرحت روحي على الغلطة تاع الاختيار هذا .. رحت حتى لبسيكولوغ .. قالي الله غالب

مزال ذرك خمس اشهر على التخرج ونوكل في صباعي ندم ..
نكره المهنة هاذي ومنحملهاش حتى القراية طلعت بالذز ومن فوق قلبي .. وحلفت اني لن امارسها مدى الحياة
وذرك مانيش حاب نحكم instrument في يدي

كرهت كرهت .. بصح ماعلاباليش واش رايح ندير في حياتي .. منعرف والو ..
انصحوني

[جيني كيم]

اهلا اخيي او اختي .
كيف حالكم !
لا تقلقي رجاءا استرخي وفكري جيدا الحياة لن تنتهي في هاذه النقطة
استمتعتي بحياتك ووقتي تبقت خمس اشهر للتخرج تخرجي واستمتعتي باللحضة
تكبري وتندمي لانك مافرحتيش لاهم مراحل حياتك
بخصوص التخصص انا نشوفه مليح بصح يبقى الراي رايك وهادي حياتك ولكن
لمادا لم تغيري تخصصك في السنوات الاول !! حتى لو كان خيارك خطا ولكن كان لديك الفرص لكي تغيري تخصصك
لن ينفع الندم الان مشكلتك هو عدم تقبل التخصص !! ولكن لماذا كل هاذا العقد والعناء
حاولي تقبل تخصصك العمر مجرد رقم
اتبعي حلمك كملي تخرجك وديري وش حابة مزال عندك الوقت
بالتوفيق واسفة لانني لم استطيع افادتك

[مراد سابقا10]

يا اختي علابالك طب ألأسنان مهنة مليحة ومريحة ماديا

افتحي عيادة متخدمي عند الدولة لا والوا عيادة تخدمي كيما تبغيي وتخدمي زوج سنين ب 2000 دج

وتروحي لدراكم

المهم مادام فوت 6 سنين طب يعني صاي سييتي الخدمة في الستاج يعني قادر توالفي عليها

لازم تحبي طب ألأسنان وماشي اي انسان يدي الحاجة لي بغاها في الحياة هذي

[Rofrof]

انا تان ضيعت سنوات من حياتي وزيد بستغاس تع الهم تع لقراية هادي والامتحانات.. ومرضت. ماراكش وحدك لي كاره اختيارك
من لخر انا الحاجة لي هدّاتلي نفسي قلت المهم الصحة صحتي وراحة بالي سبق من الديبلوم والنجاح وافتخاري قدام الناس بشهاداتي هاد الامور الدنيوية فانية.
بصح غريب انك بعد ٦ سنين تدير ردة فعل مادام قعدلك غير أشهر كمّل وجيب ديبلوم.. وبدل اقرا حاجة وحداخرى ولا اخدم ممبعد اقرا.. المهم ريح راسك من هاد الثقل ومارس هواياتك.
الغالب راهو صاريلك هكا من شدة القراية
وارقي روحك فالقران شفاء.

[Djelfa2021]

اتذكر مخطط مضحك يشرح لماذا لا يجب أن تقلق ها هو :

https://up.djelfa.info/uploads/167399788752341.jpg (https://up.djelfa.info/)

إذن ، إذا كان لا يوجد ما يمكنك فعلة اعمل في مجالات paramedical اي شيء يريحك أو حتى اعمل مؤقتا في عمل اخر خارج مجل تخصصك.
اذن كان تريد الانتقام و العمل ذراع في مجال تكرهه، تعود على السم تدريجيا بالقطرة، من الاسهل الى الأصعب ، ما زاد بالصوف غير الخروف، كل يوم حويجة صغيرة حتى وإن أمضيت 5 سنوات في تعلم ما يتعلمه اخرون في خمسة أشهر...

و في الأخير تذكر ان الاحباط و الممماطلة و كل شيء سلبي مجرد تفاعل كميائي في دماغك يمكن التحكم فيه بطريقة أو بأخرى.

[رَمَادِيَاتْ]

كمل هذو خمس اشهر في كل الاحوال ..

وتقدر مثلا دير ديليقي ميديكال
أو اذا كنت بدراهمك وحاب حاجة تع تجارة قادر مثلا تفتح كومبتوار دونتار.. حاجة قريبة لتخصصك وفي نفس الوقت مشي في فم المريض

[قدور بن عاشور]

لو عاد بي الزمن إلى الوراء لاخترت الطب، كان عندي معدل يؤهلني للطب و طب الأسنان
لكن كرهي لمادة العلوم في الثانوية جعلني أنفر منها.
و السبب الوحيد الذي يجعلني نادما هو دعاوي الخير لي تقدر تديهم بعد كل فحص أو علاج
طبعا إذا لم يكن همك الجشع و اعتبار المرضى مجرد زبائن.
فكر مليح من هذا الجانب، تربح دين و دنيا.

[أم ميرال و آرال]

كمل التخصص ديالك و جيب الشهادة ما بقالكش بزاف
من بعد دير حاجة لي انت تحبها مازالك صغير.
كان عندنا جارنا طبيب أسنان نهار كان عدد الأطباء قلال و ما مجحش في التخصص انتاعو كان أقل من العادي بالمقابل كان عندو موهبة النحت على الخشب و هاذيك الموهبة هي لي خلاتو يتميز و يسافر للدول الأوروبية.

[نافعة(=]

قادر يكون عندك تعطيل بسحر
او عين
ولازمك رقية
لانك بش تكرهها وتخمم بكل هاذ السلبية وتوصل تجرح نفسك
شوف بسيكولوج خير من هذاك
يديراك تفريغ
ولا علاج سلوكي
للتصالح مع الذات وتفريغ الخبرات السلبية