يخص النساء دراهم الشوفة

[nadia salami]

السلام عليكم اخواتي من فظلكم كم يدفع الخاطب لما يشوف العروس اول مرة
وهو ما يعرف بدراهم الشوفة
مع دكر الولاية و شكرا لمشاركاتم

[نفحات]

هذي ترجع للكرم وللمقدرة تاع الرجل كل واحد وكيفاه يمد
ما فيهاش تحديد قيمة
ربي يكملكم بالخير

[ميهانيدار]

على حساب ما حكاولي ;) المبلغ يقدر ب حوالي ألف لا ألفين دينار و ربي يتمم ليكم بالخير إن شاء الله #واو

[أوبال]

حنا معندناش هاد العادة والله فيها احراج كبير

[fati13]

حنا معدناش هد العادة

[أم رقية نسرين]

سبحان الله
بزاف يسقسيو على تفاهات كيما هادي و المصاريف الزايدة هديك وووووووو
و قد ما يمر الزمان يزيدو المصاريف و يولي العرس و ما قبلو منعرف بقداه يسقام بصح الصح مكانش على حاجة صغيرة ميتفاهموش و وهي تهدر لأهلها و هو يهدر لأهلو و هي تلم فاليزتها كي المسلسلات و تروح لدارهم وتحسب رتح يجي يجري و يجيب ورد أحمر و يردها لدارها و يعرضها لعشاء على ضوء الشموع .....
بصح الحقيقة المحزنة فعلا انها تخلص في دار الشرع
وحد الوقت يا لطيف ىبي يبقي الستر

[أم ميرال و آرال]

كون انا في بلاصة الخاطب نشوفها برة باطل خير
واشنو هذا حق الشوفة ثاني؟؟؟؟
الواحد ملي ينوي يتزوج و انتوما تحلبو فيه حتى تديروه
قبون تراب.

[ابى اياد]

السلام وعليكم اضن ان هذه العادة
من الأمور الحسنة للجزائيين وهو تطيب خاطر المراءة
و ليس له علاقة بالمال او الماديات

[آمال الفراشة]

هذي عادة برك عند الجزائريين وكل شخص واش يحب يمد
انا عن نفسي مدلي 5000 الف

[محمد محمد.]

لاشك أن هذه من البدع المحدثة في الدين ، لأن رؤية الخاطب لمخطوبته أمر شرعه الله عز و جل و ليس أخذ شيء يجب عليه أن يدفع ثمنه .

هوما دراهم الشوفة دايرينها على أساس تاع حق لي شفت المرأة و ربي سبحانه أباح للخاطب أن ينظر إليها فهذا حقه الشرعي و لا يجب أن يفرض عليه ثمن .
أما قول البعض أن هذا من الإكرام فهو تدليس و تلبيس لأنه معلوم أن الخاطب لن يأتي فارغ اليدين ، بل سيأتي بالهدايا و الحلويات وووو...الخ .

أما هاذي دراهم الشوفة فهي بدعة ، ربي سبحانه أباح له أن يراك و يشوفك بدون مقابل .