اهلي يضحكون علي

[مشكلتي]

السلام عليكم
حبيت نطرح مشكلتي هنا ولي هي انا عندي حب شباب كثير كثير كثير في وجهي ظهري كتافي صدري ... عمري 25 ومحبش يروح من كي كان عمري 13 وانا هكذا معنديش بش نروح لطبيب معندي وش راح ندير علبالي هرمونات بصح وش رح ندير نسرق ونعالج مثلا ؟ المشكل هي اهلي يضحكو علي لانو عندي حبوب كل مانقعد معاهم يعلقو على وجهي يقولولي وجهك ازرق ومعبي جرب حتى يبداو يقولولي متقعديش معانا تعدينا هذو خاوتي ومعاهم أمي تخيلو أمي تضحك علي وليس فقط داخل المنزل كل منروحو لعند ناس اقربائنا نقولهم شوفو وجها مجراب وتبدا تضحك بالدموع معاهم ناس لبرا لي نفوت عليه يضحك علي ويعلقو على وجهي حتى رجعت منخرجش نحشم نروح للاعراس واذا خرجت نمشي مهبطا رأسي للأرض مستحيل نهزو ونشوف في انسان نخاف حتى اهلي رجعت نتجنيهم بالاخص أمي لاني عارفة رح تقولي نفس الهدرة كل مرة ناكل وحدي نقعد وحدي نهار كامل منشوفش اهلي وميشوفونيش يحشمو يخرجو معايا كي نحب نروح للاعراس وندير ماكياج يضحكو علي يقولولي وش رح تغطي وش تخلي حتى ضرك فكرة الزواج مستحيل اني نتزوج لاني عارفة رح يضحكو علي جمعت شوي فلوس ورحت لطبيب هدرتو بناتلي قصر في الجنة فرحت بزاف كنت متيقنة اني مستحيل نرتاح عطاني دواء لكن للاسف كان غالي غالي غالي مقدرتش نتحمل التكلفة وواحد في البيت ماحب يعاوني رجعت مكتئبة اكثر واكثر رجعت حتى المرآة منشوفش فيها كل يوم عشرين حبة تخرج مفهمتش علاش هكذا ناس كامل مرتاحين غير انا عقدني كرهني في نفسي رجعت نعيف روحي رجعت نكره اهلي ونكره أمي كره لدرجة انو يفوت نهار ومنشوفهم ميشوفوني ميسقسيو علي حتى رجعت نخمم ننتحر مع اني الحمد لله انسانة متمسكة في ديني كل ليلة ندعي ربي يعجل بأجلي لاني صح صح كرهت رح تبانلكم اني نزيد فيها لكن عندي حبوب هرمونية اذا متعرفوهاش شوفو في ڤوڨل حبوب زرقات ومش حبة ول إثنان وجهي كامل من الجبهة الى الذقن معرفتش وش رح ندير حبيت نتصحوني ول على الأقل تحفزوني لاني خلاص كرهت ،:(

[samixp02]

عليك بالابتعاد عن زيوت القلي خاصة زيت الذرة والصويا المعدلين
ثانيا تحتاجين مكمل غذائي omega 3 + zinc+vitamine d3
وتحتاجين للتعرض لاشعة الشمس اذا لم تستطيعي شراء vit d3
قللي من تناول الكاربهيدرات

[مراد سابقا10]

يا اختي كلامك غير منطقي كيف لا تملكين ثمن الذهاب لطبيب مختص في الأمراض الجلدية والفحص ب 2000دج فقط تستطيعين ان تبيعي خاتم

من الذي لديك وتذهبين للطبيب زيد مشكلة حب الشباب هو يروح كي الإنسان يكبار في العمر بصح اذا مراحش لازم علاج اصلا لازم تعالجي خاصة انك امراة

والمراة معروفة بجمالها مالا انفضي الغبار عليك وروح لطبيب مختص في الأمراض الجلدية ونصيحتي لك متروحيش لطبيب عام تخسري صورادك هكذاك.

[قنون المربي والأستاذ]

السلام عليكم ورحمة لله وبركاته
أبشري ولا تقولي هذ الكلام:كل ليلة ندعي ربي يعجل بأجلي
أبشري فقد مرت واحدة من معارفي بنفس محنتك (حب الشباب، ثم عزلة عن الكل وإخفاء لوجهها)ولكنهاشُفيت بإذن الله ثم بالإبتعاد عما ينغص حياتها دون أن ننسى العلاج المناسب
وأبشري فقد أتمت نصف دينها
صحيح أن علاجها كلفها مبالغ مالية معتبرة
أنصحك بأن لاتفقدي الأمل فالخيِّرون كُثر وستجدين من يلتفت لحالتك

[نجاة^^]

عزيزتي ولما كل هذه المعاناة اللتي هي بيدك ،حااولي اول حاجة إذا لم تستطيعي المعالجة اقصد إذا كنت لا تملكين المال اطلبي المساعدة من الأهل او ممن هم أهل لذلك "' مزال الخير فالبلاد"" اهلك انت اللي حليتيلهم العين ،،امالا عاودي اغلقيها وشوية ثقة ،صدقيني الحياة ماهي إلا أيام ،فلا تدعي بتعجيل الأجل وإنما إدع بتعجيل الفرج ،
وربي يسهل أمورك

[الواثق]

قصة حب الشباب عادية موجودة عن الكثييير ........لكن الغريب هو اهلك وتصرفهم وفهمك لهم فلاتهولي الامور فضحكة وابتسامة او تعليق هو من مميزات شعبنا الرائع فنحن نجيد الاستهزاء والضحك والتنكيت ولانعي اثرها على الاخرين.....خذي الامر ببساطة وحاولي العلاج وهو امر مرحلي سيذهب وينسى كانه لم يكن ............والله المستعان

[KAYO]

انصحك باستعمال غسول الوجه بدل الصابون و في اليل استعملي جال peroxyde de benzoyl بتركيز مخفف 0.25 مع استعمال كريم الترطيب لانه يجفف البشرة

[❣سڪڕ❣]

يا ختي نورمال حب الشباب حاجة عادية وعابرة وتروح مع الزمان
وكاين معالجات فعالة دون الحاجة للفحص عند الطبيب
يعني أدوية من صيدلية عادية و في متناولك ويقلك الصيدلي كيفاش تستخدميها
ننصحك بزوج حوايج معجزة صراحة ومجربة : دواء اسمه : دارما darma
تصيبيه في اي صيدلية عادي ماكسيمون يدير 30 الف وكاين بوماد وسمها : كوتاكنيل دير 25 الف
تاني فعااالة جدا استخدميهم وشوفي الفرق
والنظافة بعد مهمة غاااياا استخدمي غسول مزيل للدهون بيسك الدهون مسببة للحبوب
واعتني ببشرتك وثيقي في نفسك الامر مايستهالش هكا كامل ختيتو تبراي ان شاء الله الامر بسيط شوية اهتمام وعلاج خفيف وصاي / موفقــة ^_^

[kazilo]

انا شخصيا كل ما يضحك عليا عبد يكون حافز ليا انني ننتصر عليهم ونولي انا نضحك عليهم ونقلك يا اختي حاجة صغيرة وراح تنحي الافكار هادي من مخك تماما نعرف عباد وحدة وجها كامل محروق ونيفها مكاش خلاص وعايشة وتضحك وتلعب وكاين لي عندهم تشوهات في وجهم وكاين الاعمي الي عمرو ما شاف وحهو اذا فيه الحب والا مفيهش وكاين بنات في وجهم الشعر كي الرجال وكاين يا اختي لي عندهم البهاق او الكلف في وجهم ويخدمو فالادارات وانت علاجك ساهل خلاص وتقلقي في روحك اخرجي واخدمي وعيشي حياتك وعالجي وراح تضحكي انت على روحك لي كنت مكبرة حاجة صغيرة

[chercheur eco]

حتى تتخلّصي من هذه المحنة عليك أن تعتني بثلاث أشياء
1- الابتعاد عن التوتر وأخذ الوقت الكافي من النوم، يعني الاهتمام بالحالة النفسية جيدا بمعنى اذا اكترثت لهذا الكلام ووترك فاعلمي انك لن تتخلصي من حب الشباب حتى بالادوية، افضل طريقة لاحفاظ على نفسيتك هي عدم الاهتمام لما يقولونه والانشغال باشياء اخرى تعود بالفائدة عليك
2- الاهتمام بالتغذية الصحية الجميع سينصحك بالابتعاد عن المقليات والدهنيات لكنني أنصحك بالابتعاد عن المنبهات كالقهوة والشاي السكريات لأنها هي المسبب الأول لاختلال الهرمونات والمقليات لأن الدهنيات تحتوي على اغلب الفيتامينات اللازمة للجسم وعوض التخلص من مشكل تتسببين في مشاكل أخرى ابتعدي عن السكريات والنشويات كالارز البطاطا والخبز لأنها تتحول في الجسم الى سكريات وهذه السكريات هي التي تسبب خللا في الهرمونات وتزيد من التوتر وكذلك الأمر بالنسبة للمنبهات وكلي الخضار الأخرى اكثير من الخيار اشربيه كعصير اوكليه كسلطة واستعمليه لوجهك
الشكولاطة ستساعدك على التقليل من التوتر لكن بما انها حلوة وفيها دهنيات معقدة وربما مهدرجة ستضرك أكثر مما تنفعك ولهذا ان استطعت ان تشربي الكاكاو الخام مع الحليب دون سكر فسيكون هذا مفيدا لك
3- الاهتمام بنظافة وترطيب الوجه، قد يبدو لك المر غريبا لكن البشرة الدهنية تحاول ان تجد توازنا في درجة الرطوبة فتقوم بافراز الدهون لازم استعملي صابون الجزر او الجال الخاص بتنظيف البشرة الدهنية أو المختلطة، اشتري العسل الحر واستعمليه كماسك للوجه مع ماء الورد
لا تذهبي الى الطبيب فالأدوية تداوي شيئا وتسبب امراضا اخطر من حب الشباب خاصة تكيس المبايض، السكري وامراض الكبد والكلى