حائر بين انتظار ظهورها أو البحث عن أخرى

[مشكلتي]

أنا شاب في نهاية العشرينيات موظف منذ سنوات صرت أفكر مؤخرا في موضوع الزواج و لأني لست مرتبط أو في علاقة غرامية فكرت في فتاة كانت تدرس معي أخلاقها عالية و متربية كما نقول بالعامية ( بنت فاميلية ) لكن المشكلة ليس عندي اي اتصال معها و لا اعرف أين أجدها رغم أنها تقيم في حي قريب من حينا لكن و لأن هذا الحي كبير و المداخل و المخارج كثيرة لم أعرف عنوانها بالضبط و بعد محاولات وجدت حساب فيسبوكي لاحدى صديقاتها و ارسلت لها رسالة للسؤال عنها لكنها رمتني في سلة " البلوك " مباشرة دون أي جواب كان سلبي أو ايجابي
و الأن انا في حيرة هل أنساها و أبحث عن اخرى أو انتظر أكثر لعلي التقيها يوما ما علما اني رأيتها في منامي أكثر من مرة

[مراد سابقا10]

يا راجل مادام راك تخمم فيها نفسيا اكيد تشوفها في المنام

اصلا انت معلابالكش بالطفلة هذي كيف احوالها متزوجة ام لا ؟؟؟؟ في تفكيرها احد ما ؟؟؟؟؟؟؟؟

كلامك غير منطقي اخي

شوف السلعة لي قدامك ماشي تبحث على حاجة مستحيلة .

[ايمان4]

يا لطيف صديقتها باين غارت منها ... ما قدرتش حتى تجاوبك عن احوالها اشك انها اذا لم تجبك ممكن البنت مزال عزباء .. اسال الجيران عليها .. او يدلوك على بيتهم او ع الاقل يخبروك اذا مخطوبة او لا او متزوجة ... ربي معاك لانو مش ساهلة تكون حاب وحدة و تتزوج مع اخرى تعيش طول حياتك حزين .... خصوصا في حالة تكون عزباء و تضيعلك بسبب الخجل ... عادي الحلال ما فيهش عيب ربي معاكم ممكن حتى هي تكون معجبة بيك وين عرفت

[بشرئ عاشقة العلم]

هذي صحبتها غارت منها باينة ..... دليل على انها ما زالت عزباء ... انت حاول تسال عليها في حيها مدام تعرف اسمها من المفروض ، و الباقي ساهل .

[جزائري عربي]

السلام عليكم
راك تقول بنت متربية، فأولا اسال نفسك اذا كنت اهلا لها، يعني إذا كنت انسان مصلي، خاطيك الدخان والتخلاط....
ثانيا صلي صلاة استخارة، اذا كان فيها خير ليك راح الطريق تنفتحلك وتلقى طريقة للوصول ليها
ثالثا، راك تقول قرات معاك يعني تعرف اللقب نتاعها، روح للحوانيت في الأحياء لي راك شاك فيها، واسال عن عائلة لقبهم كيفهم، حتى ولو ماكانوش هما يمكن يكونو فاميليتهم
أخيرا، تفكر يمكن كان عندك صاحبكم يقرى معاكم وجارهم في ان واحد
على العموم، إذا كانت مكتوبك راح تكون من نصيبك، انت فقط توكل على الله
وربي يرزقك الزوجة الصالحة التقية النقية

[اميرة الامواج]

بارك الله فيك

انا والله مافهمت مشكلتك

فهمني انت تحوس تتزوج ولا تحوس تهدر في الفيسبوك.

لا تحوس تتزوج روح واسقسي على لقبها وتقدم لخطبتها رسميا .

أما لا تحوس تهدر في الفيسبوك جابلي ربي ستطول مدة البحث عنها كثيرا ....
ولكن نصيحة مني لا يوجد افضل من الحلال
واخطيك من الطريق العوجة .....
واظن الفتاة مازالت عزباء لأنها لو كانت متزوجة لاخبرتك صديقتها أنها تزوجت ....

المهم ربي يسهلك ....

سلام من قلب يحب السلام

[الأيمان]

أكيد عندها اسم عائلة و مادامك تعرف حيهم سقسي على اسم العائلة ..واستخر ربي..كان كتب المكتوب مرحبا كان مكتبش مرحبتين ...و كيما قال أحد الاخوة لربما تزوجت...

[بـــيِسَة]

السلام عليكم .

الشخص الذي ساعدك للحصول على اسم مستخدمها على الفيس
كيف لا يستطيع مساعدتك على الوصول الى والدهآ ؟؟؟

[وسيمツ]

ليس لدي الكثير لأساعدك به.

لكن كاين نقطتين أود التنبيه لهما.
النقطة اللأولى: عن هاته البنت التي قلت أنها متربية و كلش.
الإنسن في حياتو تقريبا كل 2 سنة تقريبا تتبدل العقلية مع المعطيات الجدد و الأمور لي يكتسبها.
بمعنى كل سنتين تلقى نسخة أخرى من هذاك الإنسان new version
النسخة هذي قادر تكون أفضل مما كان في السابق
أو قادر تكون أسوء مما كان في السابق و قادر ماتعرفوش تماما.
لا سيما انت عندك مدة لم ترها أي أنك لا تعرفها الآن.
فقط لديك تصور عنها في الماضي.
لذا كن حيادي في هاته النقطة و اسأل عنها من الصفر.

النقطة 2: هي بما انك قلت تسكن في الحي.
تقدر تسأل الحوانت تاع المواد الغذائية لي كاينين في الحي
عن شخص -لي هو الأب- باللقب تاع البنت.
لأنهم يعرفو الناس تاع الحي كامل و شحال يخلصو و شحال واحد في الدار ..
خاصة لا الناس دير عندهم الكارني تاع الكريدي.

و ربي يعاونك.

[rachide-dz]

سقسي موزع البريد الفاكتور لي قريب ليكم
ولا امام امام المسجد تع الحومة تعكم