زوجة ثانية .. 48 سنة

[مشكلتي]

السلام عليكم
انا مراة عمري 20 سنة.. جامعية ..
تقدم لخطبتي راجل في عمرو 48 سنة ..
انا رأيي فيه انو عجبني.. مليح .. لاباس عليه .. خدام .. عندو سكنة.. الخ

المشكلة انو الراجل هذا اللي تقدملي متزوج و عندو اولاد ...

وقالي نتزوج ونعقد عليك في السر مؤقتا ..من بعد يخبر زوجته واولاده ..يعني حتى يحط مرتو الاولى امام الامر الواقع وتسكت وماتلقى مادير وترضى بزواجو ..

انا وافقت ..
بصح ( لااعلم هل هي اشارة ام لا ) خرجت الايام هاذي شفت الراجل هذا وهو ماشافنيش ...شفتو من بعيد وحدو مع اولادو ..المشكلة انه يموت عليهم.. حسب ماشفت وعلى عكس ماقالي على المشاكل في دارو .. حركاتو معاهم يظهر انو يحبهم... !!

واش رايكم ؟

[ع.عيسى]

فارق 28 سنة... + متزوج* + له اولاد + يتزوج بيك في السر ولا يخبر زوجته وأولاده..؟؟؟؟؟. .في رأيي لا توافقي... 20 سنة راكي مزلتي صغيرة انت قد أولاده..*

[بـــيِسَة]

حطيتي روحك في بلاصة مرتو ؟
خممتي كيفاش تكون رد فعل مرتو و ولادو ؟
خممتي في حياتك زوجة تانية مع فارق عمر 28 سنة ؟

أي راجل يحب ولادو يكذب اعليك
و أي راجل يقدر يولي لمرتو الاولى
في مكان تصلحي الاحوال تتزوجي برجل أكثر منك بكثير و متزوج و عندو اولاد
ربي يهديك
صلي الاستخارة يا ختي و انا قتلك هك من بابا النصح لا أكتر
و ديجا نت صغيرة الف واحد يتمناك

[مصطفى_س]

السلام عليكم

اظن انت في مرحلة المراهقة


اخبري والدتك بالامر ستجيبك عن اسئلتك

[ايمان4]

ركن من اركان الزواج هو الاشهار ... يعني اشهار الزواج هذا غدوة من غدوة ينركك نورمال ... يا اختي فترة مراهقة و السيد يظهرلي دارلك غسيل دماغ .... فيقي مع روحك تستاهلي زوج لي يفرح بيك و يشهر بيك قدام عايلتو امو و دارهم بلي باغيك زوجة و يديرلك قيمة مش واحد حشمان بيك ... و زيد في عمر باك ... مع انو لو كان جا عازب او مطلق العمر ما يهمش بزاف ..

[حورية تو]

أرى أنه وجد فريسته ...أفطن ..المراهقة راها تخرط عليك...
أفطني قدام لتندمي خاصة وبحسب عمرك لا تزالين غرة في حياة لا ترحم

[رَمَادِيَاتْ]

السؤال في القصة

أين عائلتك
وما موقفها من هذا الأمر؟
20 سنة
48 سنة
زواج سري
اولاد وزوجة أخرى

معطيات متضادة تجيبك بنفسها بأن يجب عليك الرفض مباشرة

وبغض النظر عن أنك ستكونين زوجة ثانية، أو له اولاد.. كيف ترضين بأن يكون زواجك سرا؟

لا تندفعي وتعقلي... فالمتأمل في الموضوع يظهر له جليا أنه نوع من أنواع "رمي النفس" ليس إلا.

[الأيمان]

لا حول و لا قوة إلا بالله ..رايح لبنات الناس صغيرة ويقلك نتزوج بالسر هيا يتزوج بالعرفي أحسن ...
لا تغرك المظاهر ...أو الخدمة أو السكنة ......شوفي خلل يقلك بالسر ...هذا أنه ليس رجل فالرجال لا يخافون من زوجاتهم ..الرجال يخرجها طاطاي حاب نتزوج أخرى ..نصيحة لوجه الله 20 سنة لا تدمري حياتك ..مادام في السر ..كي يعلن لزوجته تقولوا يا أنا يا هي ...و منبعد يخيرها هي ...تأكدي جايب معاها الأبناء ...نصيحة لوجه الله سيعطيك الله خيرا منه و لا تغرنك الخدمة و السكنة مادامت الرجولية منعدمة ......سيأتي خير منه فقط الدعاء و واتقاء الله ....

[الأيمان]

أنت مازلت في مراهقة و هو راشد معقول يفكر هكذا...هو بعقله و أنت بقلبك !

[ايمان4]

رجعت باش نقلك انو راه ف عمرو 4 سنة حتى انت في هداك العمر كي تككملي قرايتك و تبداي تخدمي راح تشري دار ان شا الله و تشري سيارة اذا كنت تعرفي تتصرفي ف الدراهم و ربي راح يرزقك لانك راح تكوني تسعاي .... ما يخلعكش امر عادي راه كبير غير الجايح لي خدام و ما كاسب والو ... و لو استدويو او قااراج من غرفة واحدة في قرية ...يعني مش حاجة لي تخلع ..شوفيلك شاب او ع الاقل راجل كبير عازب او مطلق او ما يهمش حتى و نقولو يا سيدي انت حلمك تكوني زوجة ثانيةة ع الاقل واحد مش حشمان بيك تقوليل لا ممبعد لكان تقولو يا هي يا انا يختارني انا نقولك لا لا حنونة هذا من الاول خاسف يشهر بيك و يقول حابها زوجة غدوة من غدوة يقلها غلطت معاها و لصقت فيا و هي مش متربية و رمات روحها عليا الفتانة و تعشي انت صفر خممي في روحك هادي فترة مراهقة و تعدي شوفيلك زوج تاع صح مش فالصو

[مراد سابقا10]

واش ديري بواحد في عمروا 49 سنة اصبح شيخ هرم ربي يهديك قادر حتى تعافيه

[فتيحة0411]

السلام عليكم
بالاضافة للكلام المذكور في التعليقات السابقة بغيت نزيدك حاجة اخرى
هذا 48 سنة وباغي يتزوج في السر
الواضح أنو ماشي خطبة تقليدية، فمن المستحيل يجي لداركم ويقول هاذ الهدرة لباباك
ان شاء الله نكون غالطة ولكن الظاهر أنو تعرفتي بيه خارج إطار الخطبة والزواج
إذا كان هذا صحيح، وبعيدا عن أنك غلطت، فخمي مليح، كيما عرفك وهو متزوج فراح يعرف عليك ألف وحدة
عاودي خمي مليح وربي يفرج عليك

[toulay]

وعليكم السلام ورحمة الله وبركاته
واشبيك هبلتي قاعدة طيش في روحك
ربي سبحانه مدلك عقل تميز بيه و en plus وداركم واش محلهم من الاعراب هل خبرتيهم شاورتيهم واش قالوا وعاجبتك نورمال تتزوج فالسر يعني عادي جدا معندكش مشكل
وحاجة حيرتيتي بيها مين قلتي اولاده يحبهم مالا واش حابة يكرهم ياو راهم اولاده قطعة منو حاجة باينة يموت عليهم ويخرجهم ويحوس بيهم ويشريلهم
واصلا وين راح يعقد عليك فالاوضاع هاذي ياك عقود الزواج مؤجلة الى اشعار لاحق
غير اخطيك والهربة تسلك وقص عليك التهريج هذا
ومزالك صغيرة ركز في قرايتك لكان تقرا ولا شوف كاش formation ديرها ولا اتعلم كاش صنعة ومبعد ساهل الحال
بالتوفيق

[Anabela]

ربي يهديك يابنتي ويرجعك لعقلك اهتمي بقرايتك وزيدي تعلمي ف الحياة قبل خطوة كهذي تبانلي منهدرتك مزالك صغيرة وعلاه باغياتو مثلا يكره اولادو ، خليك من الرومنسية و حكايات المسلسلات وتزوجي واحد قدك فلعمر وتخمام

[الأيمان]

لا إله إلا الله ..شاركي في المنتديات أو أي شيء مفيد ...كي تشغلي فكرك بعيدا عنه ...ما أخبثه ! في السر اللهم عليك به فإنه يريد حراما .

[نجاة^^]

ربي يرشدك للصح ...
ثبتي روحك قبل أي قرار

[tassnim5]

لو كان كنتي بنتي أو أختي ننزع لك التيليفون و الانترنت و ماكانش الخرجة و اذا رحتي تقراي نديك بيدي و نرجعك لأنك ما تعرفيش صلاحك و راكي حابة تدمري حياتك بيديك. احكي مع امك وشاوريها حتى تفهمك لأنك ما تعرفي والو فالحياة و هذا الانسان راهو لعبلك على عقلك و استغل سذاجتك . بعدي قد ماتقدري عن هذ الانسان و نحيه من بالك و شوفي مستقبلك و قرايتك واذا تقدم لك شخص من الباب و يكون مناسب لك فاستشيري أهلك اولا و ما تتخذيش أي قرار بدونهم و ما تقوليش حياتي و أنا ندبر راسي لأن هذاك الانسان لوكان عرف أنك شاورتي أهلك ما يقولكش نتزوجك فالسر و ما يقربلكش أصلا . ديري قيمة لأهلك باش الناس تديرلك قيمة.

[بشرئ عاشقة العلم]

مالكي اختي هبلتي 20 عام عندك مشي 30 و مشي 40 و بفارق 28 سنة بزاااف رهو بلاك اكبر من بوك و عندو دراري و زوجة ثانية . و زواج في السر ..... و انت رهي جايتك نورمال حاجة متبشر بالخير في هذ الزواج

[Rafik.B]

حبيت نطرح سؤال هاكم تزوجتو وحطيتوا زوجتوا قدام الامر الواقع وهيا ماقبلتش بالامر الواقع وقاتلوا يا انا يا هيا راح زعما يخلي مرتوا واولادو ويجي معاك انتيا وسبحان الله الرجال حافظين نفس القالب نتزجوا فالسر ونحط الزوجة الاولى قدام الامر الواقع المشكل القالب هذا عمرو ما يصلح ياراح يعود يجيك خطرة خطرة من ورى مرتو ياراح مرتو متقبلش وتحطوا امام خيارين وبما انو قالك هاذ الهضرة معنتها هو عارف بلي مرتو مش راح تقبل وحاجة باينة راح يقولك عندي معاها مشاكل علاه هو كاين زواج مفيهش مشاكل . الراجل هذا ماهوش حاب يتزوج حاب يتسلى شوية برك .

[Al220]

ساعفيني خطيك

[*عبدالرحمن*]

من القوانين

يتم غلق الموضوع عند بلوغه 20 مشاركة