حقروني بالعين

[مشكلتي]

السلام عليكم

اعمل اون لاين مند سنين في مجال التجارة الالكترونية وتطوير المواقع وليس لي عمل اخر على ارض الواقع ... مشكلتي هي في الزواج حيت كل ما انوي اخطب فتاة اجد عدم تقبل لاهلها عن طبيعة عملي بل الاغلبية لايعتبروه عملا اصلا ولي 3 محاولات فاشلة فقط بسبب هذا الشيء

كلهم يحوسو على خدمة مضمونة كيما يقولو ......انا مفهمتش وش هو هاد الضمان ليحكو عليه وهو الانسان ماشي ضامن حتى روحو لايعيش للاسبوع الجاي ولالا

وزيد راجل بطولو وعرضو قاصد لحلال يرجعوه على جال الماديات ...ومبعد كي يبورو يبداو يتحسرو ويلسقوها فلمكتوب

والله تعبت عمري 33 سنة واكيد اي شخص في سني ومازال اعزب يصبح الزواج شغله الشاغل.

[toulay]

وعليكم السلام ورحمة الله وبركاته
اولا ربي يفرج عليك ان شاء الله
يعني تحب الصراحة اخي وبعيدا عن العاطفة عندهم الحق بغض النظر عن الضمان لانو الضامن ربي سبحانه ولكن خمم لمرة خلاف ماكان ni assurance, ni retraite, ni rien du tout كيفاش راح دير تخلي بنت الناس معلقة
هي على كل الارزاق بيد ربي سبحانه قادر يرزقك بين ليلة وضحاها
ماحقروك ماوالو فقط كانوا صرحاء و واقعيين لا اكثر ولا اقل
علابالي ردي مراحش يعجبك بصح هاذي هي الحقيقة
المهم متدريش زيد حوس متقطعش الامل كاين ليقبلوا
بالتوفيق

[فتيحة0411]

أخي حط نفسك مكان الأب
هو رجل كبير في السن، يعني ما راحش يفهم معنى العمل الالكتروني، بالنسبة ليه إذا قبل بيك فراح يرمي ابنته للمجهول
بالاضافة أي أب إذا تقدم لابنته رجل، راح يسال عن أخلاقه في العمل، تعامله مع الناس، هل دراهمه حلال أو حرام؟ تقدير مبدئي لمدخوله الشهري...
ليس بالضرورة أنو يكون خدام عند الدولة، لو كان عامل في حانوت مشي حانوته فراح يستطيع أنو يسأل عن هذه الامور
أما في حالتك، فالعمل مبهم بالنسبة له، كيف يسال عن أخلاقك مع من تعاملت معهم، كيف يقدر مدخولك الشهري، هو واش عرفه إذا دراهمك حلال ولا حرام....
يعني هناك عدة تساؤلات لا إجابة لها
الحل أنو يكون عندك عمل في الواقع، ولو تبيع خبز فوق طاولة أمام منزلك، المهم حاجة ملموسة مشي خيالية
الموضوع مشي موضوع ماديات، فلو تقدم لخطبة فتاة شخصان، واحد عامل بسيط بمليون فالشهر، والثاني عامل عبر الانترنيت بعشر ملاين فالشهر، فراح يقبلو بصاحب المليون في الشهر
ربي يفرج عليك

[ing.Youcef]

وعليكم السلام ورحمة الله
بصراحة في رأيي أنهم ما حقروكش، فقط أنت لم تقصد الفتاة المناسبة أو العائلة المناسبة، فهناك بنات تزوجوا من لا يعمل أصلا فأنت عليك أن تبحث عمن يقبل بظروفك وهم موجودون أكيد وعليك أيضا أن تقدر وأن تحترم مواقف الجميع فمن رفضتك أو رفضك والدها فذلك من حقهم وهو داخل في حريتهم ولا عيب عليهم أبدا ولا يحق لك أن تذمهم لرفضك بأي حال من الأحوال.
ولا تغر نفسك بفكرة راجل بطولو وعرضو فهذا كلام لا معنى له..!! الرجولة والطول والعرض لا يفعلون لك شيئا في الحانوت ولا في السوق ولا في محطة البنزين ولا تحصل بها سكنا ولا شيء..
حقا الرجولة خير ونعمة ولكنها ليست كافية بل هي فقط مدعاة للنظر في غيرها وما بعدها مما تقوم به الحياة.
بالتوفيق.

[ع.عيسى]

واش يجيك من مجتمع مريض عقليا وفكريا .....فكرتني بصديق لي ..يعمل ميكانيكي...رفضه الكثير لانه ليس بعامل مرسم ..مع ان له سكن وله سيارة ودخله من مهنته جيد ..وفي الاخير تزوج لالاتهم ...السبب هو الزوخ ...حابين كي يسالوهم الناس واش يخدم يجاوبو ...مهندس ..مدير .ذكتور .الخ ما يحبوش كلمة ميكانيسيا او ماسو او حلاق...الخ وكانها ليست بمهن...على اي حال زواج مكتوب ...لا تيأس زيد ابحث ..كاين مستعدين يزوجو يناتهم حتى وان كان بطال

[Elwawy]

أنا مثلك عامل حر فريلانسر أونلاين في مجال التصميم أكبر منك بقليل, و لعلمك 10 سنوات عمل أونلاين و الحمد لله, و في نظر الناس تماما مثلك يظنون أني طلاب و عاطل على العمل رغم أنه يمكنني التقاعد حاليا 100%, و لا أعمل لبقية حياتي, أو أشتري سيارة بورش إذا أردت.

المهم الناس لا تفهم يا أخي, عندما تقول فريلانسر يظنون أنك عندك قناة يوتوب أو ما شابه, تبيع الدبشة أونلاين.

إبحث عن فتاة تشبهك أو تشاطرك نفس الإهتمامات, فتاة تعمل عمل حر من المنزل أيضا.

ثاني شيء ناس أغبياء ينظرون إلى إنتفاخ بطنك "دليل على شبعك", و إنتفاخ محفظتك الموضوعة في الجيب الخلفي, ينظرون هل تملك سيارة و أي هاتف تستعمل...مظاهر الثراء.

[3ab2ou]

افتح محل بسجل تجاري ديرو مثلا تجارة الكترونية تستفيد من لاكارط الشفاء و من التقاعد و تبان خدام بالنسبة لهم هدا ادا كنت متحمل التكلفة دفع حقوق التأمين ..الخ

[سجل انا عربي]

انا اخي مثلك دخل عمل في شركة عادوا هوما يقولوا ارواح تخطب ودوك لحمد لله يسلك مضمون ويحب يدرس او يدير سيبار

[زايدي أمحمد]

الله يفرج عليك اخي

[Anabela]

المشكلة في العقليات ،لا تستطيع تغيير المجتمع ككل ، مزال مطحتش فمكتوبك برك متتقلقش وربي يعطيك ماتتمنى واكثر

[ابو سليمان10]

انا موظف و راتبي مقبول نوعا ما و الحمد الله الا انني لو تمكنت من العمل على الانترنت و الحصول على ما يكفي لتركت الوظيفة
عقلية شعبنا متحجرة...اعرف شباب يحصلون على 1000 دولار و اكثر في الشهر فقط من غرفته

انا اعطيك حل مجرب...ان كان دخلك كافي من الانترنت فحاول ان تستاجر مكتب او بالاشتراك مع شباب اصدقاء لك تعمل منه و لما تتقدم للخطبة تقول لدي مكتب مختص في البرامج الى اخره....

ناس عايشة مليح من الانترنت و شعبنا مازال لا يؤمن بالفكرة ههه

[- HOCINE -]

ماذا تنتظر من مجتمع متخلف
اصلا راهي رايحة للتجارة الالكترونية

قريبا ستختفي النقود الورقية والمعدنية
لست خبير في العمل اون لاين لكني نجحت في كسب 1000 دولار من جلسات فراغ على الانترنت فما بالك بالمتمرس
أرى مستقبل التجارة الإلكترونية محتوم لا محالة

[وسيمツ]

السلام عليكم
في الحالات العادية يتم سؤالك عن راتبك كم تتقاضى في المتوسط .. ان حدث هذا و رفضوك فأرى أنه من المنطقي رفضك بل و ذلك هو الصواب.
أما ان لم يتم سؤالك فربما لم يفهمو عليك ماذا كنت تقول ... في هاته الحالة انت لي تأحذ المبادرة و تشرح لهم طبيعة عملك و الاجر الذي تتقاضاه

الناس مش تحوس على المضمون بل على الملموس ... اجعل الأمر ملموسا و لي فيها خير يجيبها ربي.
من جهتك أيضًا لازم تكون مرن ... علابالك بلي هذي حاجة جديدة على المجتمع .. إذن تكيف مع ذلك و دير اي حاجة شكلية كواجهة ان لو ينجح الامر مطلقًا

و هذي ماهيش حقرة بالعين.

ربي يوفقك

[رقيّة]

نورمال خويا حقهم ..ونتا حقك نشوف في جهة اخرى...
ومن جهة اخرى ماتدخلهاش بخشانة تاع طول وعرض وهوما درك يبورو ويعودو يحوسو...بدل العقلية شوي ...
اذا رفضوك فهو حقهم كيما حقك نتا ترفض اي وحدة تشوفها وماتعجبكش يعني ماتخذش الامر من منظور شخصي..لأنو من حقهم يحوسو على مستقبل جيد لبنتهم ~

[Aya2020]

السلام عليكم خويا حابة نحكيلك حكاية ان شاء الله تفيدك انا كانت صاحبتي عندها قنات يوتوب عامين هي تخدم وطلع في فيديوهات كنت نضحك عليها لحقتها 300 الف مشترك قاتلي حابة نبيعها وصح وباعتها بحوالي 180 مليون فتحت حساب بنكي هنا واستقبلت المبلغ ورحت معاها جبدتهم قدامي انا فرحتلها وفي نفس الوقت تشوكيت مصدقتش هدا الامر والحقيقة دخلني بعض الحسد للاسف فقط لاني منعرفش هدا المجال وحابة نتعلمو من هادي الحكايت اصبحت اقتنع بهدا المجال اما بخصوص مشكلتك ارى انها بسيطة تقدر تقصد بنات الي منخرطين في هدا المجال او تفتح محل فقط تكري محل وتحط مكتب تاعك على اساس بيرو دافير كما يقولو او تحل محل وتخم تجارتك الالكترونية

[الأيمان]

لاتتعجل في الحكم ..من قال حقروني بالعين ....
معهم حق ...مازلنا جهال بالبزنس من الأنترنت ....عادي
ثانيا ماضمان استمرارية عملك الحر ..ممكن غدوة مفلس و معك زوجة و ابن ...
ثالثا : ديما استخير و ازدم و اذا رفضت عادي مفيهش خير ...
و كيما يقولو انت تسلك تسلك دير خديمة واقعية كبيع الملابس مثلا ...و ادخل ببائع ملابس و عامل في الانترنت ...وسترى ...خمم في كلش .....و نزيدك كل الرجال يفكرون في اعفاف انفسهم ( الجنس الحلال) لا أكثر و لايفكرون في مسألة هذه المرأة التي ينحيها من بيئة و يديها لبيئة أخرى ....يجب أن نفكر بعقلانية و في بنات الناس ...
تخيل اختك تقدم لها نفس شاب بكامل مواصفاتك ...او ابنتك كيف سيكون ذلك ...