الزوج المتعجرف

[مشكلتي]

انا انسانة متزوجة عندي طفل تسع اشهر و عايشة مع زوجي و امو وباباه المشكلة اني مالقيتش حل مع زوجي و امه
ام زوجي و اخواته دارو فيا المنكر كامل الي يديرو اهل الزوج فالكنة . و انا عادي صبرت و ديما هاربا من المشاكل غير على جال وليدي قلت ميعيش يتيم
لكن حماتي ربي يغفرلها كترت بزاف ، تستقبل بنات اخواتها يجيو عندنا يقعدو بثلاث ايام لابسات و متبرجات تقول في عرس لاخمار لا احتشام انا نحشم من شيخي نلبس كيفهم و زيد ميحكوش معايا غير زوج كلمات و زعما يطيبو الماكلة والحلوة و مع يجي زوجي يجريو يحطوها و تبدا امو تشكر فيهم . و هو كي يشوفهم يفرح و القضيان و السهرات و الحكايات و يوصلهم بسيارتو و كي نقولو بلي منيش مرتاحة و منقبلش بهاذ العفسة يقولي عادي وين راه المشكل غير نتي موسوسة و تحبي تقطعي الضياف من هاذ الدار وياخي ما راكي تصرفي عليهم ولا تخدمي فيهم .
و منين نقعدو وحدنا بلا ضياف تشعل التلفاز اغاني و مسلسلات و تعيطلو فلان شوف المغنية هاذي قاعدة هاذي تهبل شوف عينيها و ......... انا نحير لكان ام تهدر هكا مع وليدها و هوا يعجبو الحال و يمشي معها فالخط الشيء الي تديرو عجوزتي كامل ما يغيضنيش قد ما تغيضي من زوجي مادايرلي حتى قيمة ديما حاطني فالمقارنة مع غيري وزيد يستفزني و يصغرني عمدا قدام العباد يحب يبينلي بلي راه داير فيا مزية منين داني و هو يستاهل ماخير وانا كي المهبولة تعبت وانا نجري باش نرضيه قايمة بشغل الدار بروحي بوليدي مكانش حاجة تجي في بالكم و مدرتهاش لكن النافع ربي الي نديرها كامل منبانلوش مخليني ديما نجري باش يرضى و كون غير نهار واحد قال الحمد لله .
و درك مكانش حل انا محال نقبل الذل والله غير تعبت نفسيا و هيا مستحيل تتبدل و هو من نهار خطبني قالي منخرجش على والديا لانو وحيد امو و خواتاتو متزوجات و انا ساعتها قبلت غلطة عمري مدرتش في بالي بلي كاين عباد هكا . ودرك مصر على كلامو دار وحدي مكانش يا نرجع مع امو يا بالسلامة و نعطيه الولد . يعني مش رايحة نخسر داري برك ونزيد نولي نجري باش منخسرش وليدي
ادعولي

[بلا صوت]

أواه لازم تفرضي روحك ، زيريه برك وقولي شروطك وديري ردات أفعالك
كي تحيطه امام الامر الواقع دوك يراجع حسابو ، الراجل إحب ويقادر لمرآ لتزيرو

[محمد محمد.]

السلام عليكم

مافهمتش أختي كفاه تخسري ولدك ؟؟

الولد تديه أنت في كل الأحوال فلا داعي للقلق .

على حسب روايتك فالحل هو إما أن يوفر لك سكنا مستقلا إما الإنفصال ، فهذه الأفعال التي ذكرتيها غير أخلاقية بالمرّة

[رَمَادِيَاتْ]

داير فيك مزية.. شابة هذي

وهل ثمة ما هو أسوأ من أن يعيش المرء وهو يشعر أنه محض نكرة؟
وهل نمو طفلك في جو يجد فيه أمه مجرد هامش سيجعل هذه المرأة التي ارتضت لنفسها هذا النوع من اللاقيمة والضعف قادرة على انشاء انسان قوي سوي ذا قيمة وغير متأثر بصفات أبيه وأخلاق أهل أبيه مستقبلا؟

أعتقد أن المشكلة ليست في السكن المستقل، بقدر ماهي في تركيبة هذا الزوج ومدى وزنك لديه.. لأننا نرى كثيرا أمهات أزواج متسلطات وازواج يقفون في صف زوجاتهم ولو ربتا على قلوبهن..


في كل الأحوال وإلى أن تتبيني الأمر جيدا.. نصيحتي الوحيدة: لا للمزيد من الأطفال.

الخروج بواحد أفضل من اثنين أو ثلاثة.

والحضانة من المفروض هي من نصيبك لا من نصيبه.

أدعو الله أن يلهمك القرار الصحيح

[حورية تو]

الزواج هو شركة بين زوجين وفقط تدخل طرف ثالث يؤدي إلى كوارث وأمه دخلت في خصوصيتكما بطريقة اخرى ..تشكر في بنات اخريات وجملهن وشطارتهن ..هذا ما أدي إلى إستخفاف زوجك بك لأنها لم تشكرك
أنت تردين أن ترضي زوجك بأي طريقة لكنه لا يرى هذا لأنه فقط يقارن بينك والأخريات
أقول لك أرضي ذاتك أحسن
اطبخي ما يعجبك
إابسي ما يحلو لك انت
عيشي من أجلك و أجل إبنك
جدي لنفسك حياتك الخاصة
جدي هواية لك و أنشغلي بها
كوني على ما تريدينه أنت
أنظري لزوجك على أنسان وفقط احكي معه في كل الأمور بثقة و كأنك تحكين مع شخص تلتقيه صدفة ثم سيدهب في طريقه
كوني مكتفية بذاتك قوية من أجلك
سيحس بالفرق ...مع الوقت سيقدرك و أكثر
ما تقعديش تجري غير موراه كأن الحياة تتوقف عليه ..الحياة لن تتوقف إلا بعد أن يتوقف قلبك عن الدق ..

[بشرئ عاشقة العلم]

كارثة و خلاص و الله كليوم نسمعو قصة جديدة عللى الحماتات و العجايز المفروض وحدة في دارها يخلها مهنية في راسها مشي يضلو يديرو المشاكل و الله حسبي الله و نعم الوكيل في هدا النوع و هي المشكلة الاساسية في زوجك باينة طابقلهم لهد الدرجة*

[غصن البآن]

السلآم عليكم

اول شيء فكرة تخسري وليدك أو ياخذو منك هذي الغيها من عقلك لان الحضانة من حق الام في حالة الانفصال لاقدر الله والنفقة مجبر عليها لوليدو .المهم ربي يصلح احوالكم

اسمعي اختي كل امرأة في حياتها الزوجية تعيش منغصات وممكن تنغبن لكن نصيحة مش عند المشاكل تفكري بالانفصال .. صح متقبليش الذل واصري على رأيك فيما يخص بنات خالتو لي مداصرهم هكذا لكن مش انك تخلي الدار وتخربي بيتك .. احكي مع باباك ولا واحد لي يحشم منو و حكميه وحكيلو واش كاين وفهميه بلي انتي راكي تشتكي باش تحافظي على دارك بلا ما تقبلي حاجة تغضب ربي ..والديه معندك متغيريهم ..انصحيه وابقاي تصبري و تاكدي حال مايدوم الا اذا كان الراجل هو عوج وحتى حاجة متصلح فيه هذا امر اخر ..
الخلاصة جربي واصبري .. وفالاضطرار شوفي طريقة واحد يحكم بينكم ويصلح من العائلة وخاصة اذا من عائلتو عمو أوراجل كبير لي يقول كلمة حق ويحشم هو منو وباباك يكون معاك طبعا وتعيطولو ..
ربي يهدي سركم ويصلح احوالكم .. فالضيق والغضب الشديد اسهل شي تخمي فالانفصال ..لكن هذا مش الحل ..اصبري وربي يهديكم

[Elwawy]

أختي تجاهلي كل شيء ستختفي المشاكل بأكملها, و الشيء الذي أنصحكي به أثناء التجاهل أن تشغلي نفسكي و تتعلمي حرفة أو أي نشاط أو صنعة يكون من الأحسن مربح, ركزي على ذاتك و على ما تريدين أتركي الباقي يقوم بالسرك و التهريج بدون متفرجين.

[Amir ami]

هذا وحيد امو ومربي في الدلال وماهوش تاع مسؤولية . وزيد راهو يخوف فيك بابنك رغم انو الحضانة من حقك. قبل ماتتخذي اي اجراء اولا لازم تفرضي نفسك و ثاني حاجة فهميه انك امراة و نص وماتحاوليش ترضيه لانو مغرور. رجال اخر زمن.

[جزائرية السراب]

الطفل يتبع الام اختي وربي يفرج ان شاء الله

[visa uk]

كريهي القلب تمام ا سبحان الله عندهم نقمة وسكارة في دم ونميمات ووووووو هاته يومياتهم ووووووو

[Orchid flower]

اسمحي لي الاخت المشكل ماشي في زوجك او عجوزتك المشكل فيك ان و في شخصيتك الضعيففة مكانش اللي يقدر يسترخصك لو تعاملتي معاه على انك غالية
درك جاية تقولي محسسك عامل مية مين اخدك هذا انت اللي لحقتيلوالشعور هذا .. الزوج نهار اللي يجي يخطب يحسب نفسو اختيار الشي المميز و الغالي وووو بعد فترة مالزواج اذا اكتشف انك مسترخصة نفسك خلاااص تتنحى من عقله الشي هذا .... نصيحة الاخت اذا تحبي نصيحة الطلاقق ماهوش الحلبالنسبة ليك لانك لو تزوجتي غيره و تعاملتي مع نفسك مثلما تتعاملي معاها درك نفس الشي رايح يصرااا
الاخت نفسك اذا ماقيمتيهاش انت مكانش اللي راح يقيمك و كرامك اذا ما حفظتيهاش انت مكان اللي راح يحفظ هالك ... مالا قوي شخصيتك و جدي لك هوايات او اي شي و ابتعدي عن زوجك متبقايش ملاحقاتو ...

اتبعي معاه معاه سياسة جديييدة اشعريه بالحب و الحنان و في نفس الوقت بيني انو كاين امور ما تتساهليش فيهم و انك ما راحش تموتي لو افترقتي معاه يعني شغل ابني بناااية حتى تطلعيها للسماء و من بعد هدمي كامل واش بنيتي مرة على مرة بينيلو انك تقدري تروحيو تخليه في اي فترةو .... كوني غامضة شوية ---- قلنا شوية ماشي تعيشي في غموض -- متخليش نفسك صندوق مفتوخح ... متخليهش يتوقع ردات فعلك ... ابتعدي عن النديب و الدموع لانو الدموع ممكن ينفعوك مرة او اثنين بعدها ترجع بالنسبة ليه حاجة روتينية

اهتمي بنفسك ماشي لاجله انما لاجلك انت شوفي نفسك فالمرآآة و افرحي بنفسك اهتمي كوني في منتهى الاناقة و اللباقة متسنايش اطرااء منو ... تصرفي كانثى يصعب على اي رجل انو لا يغرم بها و صدق الشي هذا بينك و بين نفسسك باه يلحقلو .... انتبهي لكلماتك معه نعطيك مثااال فيمكان ما تقوليلو انت هو السعادة نتع حياتي لالا قولي حياتي معك اسعد فالامر فيه فرق فالاولى معناه وصلتيلو رسالة انك ستموتين بدونه و تفقدين السعادة بدونه هنا عطيتيلو فرصة انو يقولانه عامل مزية مين دااك و انك لست مميزة لوكان ماهو عطاك القيمة اما الثانية فمعناه انو هو اضاف لمسة جديدة لحياتك خلاتها اسعدلكن لحقو مييسا انو بالاصل حتى قبله حياتك كانيعيدة انمازادت جمالا بوجوده نتمنى انك فهمتيني
الموضوع فيه تفاااصيل بزااااف منقدرش نكتبهم هنا على العام لانو يحتاج وقت كطوييل لكن كيما قتلك المشكل انت فيه و في تكوين شخصيتك اما ام زوجك فالمطالب منك حسن المعاملة و اللباقة الباقي متكلفيش نفسكلارضاء خص على حساب نفسك مكانش اللي يجبرك تسترخصي نفسك و مكانش اللي يقدر يسترخصك و يعتبرك هواء الا اذا انت منتحتيلو الضوء الاخضر مالا بدلي شخصيتك و تصرفاتك و راح يبدا يحير

حاجة اخرى بالنسبة للمغنية الفلانية و العلانية مين يقولك هاكا قولي عمليات تجميل قولي لوكان تشوفهم قبل العمليات و بلا ماكياااج حالتهم حالة بنوع من اللامبالاة و اكملي لعبك على الموبيل او غيره و بنات خالتو قولي مرة مرة بشكل عام و بلا ما بيني بلي راكي عليهم انو المتربيات ميعملوش هكا و الشي الغال و الثمينما ينكشفش للي يسوا و اللي ميسوااش وووووووو يعني اعملي موضوع بلا ما تبيني انك تقصديهم و ثاني قولي الافضل في الحالات كيما هذو الراجل يتجاهلهم و يتصرف كذا و كذا و حتى لو تعامل بلامبالاة لا يهم لاننو راهو يستمع و الراااجل يسمع يسمع يسمع و من بعد ينفذ لما يوازنها في راسو

ثاني جننيه في العلاقة الخاااصة و اضن انو فهمك كفاااية باه منتوسعش فالموضوع هذا قدام الجميع

المهم الحاة اللي نوصيك عليها يكون كلامك موزون هادئ و بهيبةو ثقة كبيييرة لانو لو حسك مترددة و معندكش ثقة في نفسك غير انسااي واش كنت نقولك من الصباح

[بـــيِسَة]

ربي يهدي مآ خلق
نصيحة بما أنه تدقف مآء المشاكل
فاجعلي اسلوبك معهم يعتمéد على تصرفاتهم

[الأستاذ حمزة دراجي]

مسائل البيت لا تناقش هنا
كاين طبيبة نفسية تعالج الامر

[zahra1999]

السلام عليكم

الناس تحب تضيف وين تلقى الفشل باش تتمتع مليح بالنزهة .وتتجنب البيت لي فيه النجاح باش متحسش بالغبينة والفشل.

الحل ؛كوني امراة ناجحة ودعي الكل يخشى دخول عتبة البيت