طلب نصيحة

[مشكلتي]

السلام عليكم
كانو جاو ناس شافوني لوليدهم، يعني خطبة تقليدية، الولد أنا منعرفوش، عنده نفس عمري 22 سنة، ولكن بحكم أنو من العائلة نسمعو عليه غير الخير
مصلي، خاطيه الدخان، بار بالولدين,,,
البارح الولدة نتاعه اتاصلت بأمي باش يجي يدير الرؤية الشرعية، أمي قالتلها صبري حتى يفوتو هاذ اليامات تاع الحجر الصحي، وأمه وافقت.
أنا كي سمعت بلي مبدئيا راهم معولين يرجعو، فلت ندخل للفيسبوك نحوس على البروفيل نتاعه
لقيته بسرعة لانو حاط اسمه ولقبه والصورة نتاعه
الصراحة منشوراته عادية، شوية على الدين وشوية على التنميةالبشرية، ولكن لي لفت انتباهي أنو كاين شخص واحد لي يدير جام، وهي بنت، وكي تعلقله على منشور يردلها "ميرسي شارز ساره"

أنا توسوست دخلت للبروفيل نتاعها، لفيت بلي تخدم معاه، وعندها 25 سنة وعزباء
لقيته دايرلها جادوغ لكل منشوراتها، ويتفكرها فيعيد ميلادها
قلبي نفر منه، ومعرفتش واش ندير
ما راحش نقول لأمي نرفضه لانو دار "جادوغ" لوحدة تخدم معاه
ومشي في أول لقاء راح يجي نسقسيه عليها
خايفة يكون متعلق بيها، والوالدة نتاعه فرضتني عليه لأنو مايرفضلها حتى طلب
راها تالفتلي واش ندير
نتمنى تنصحوني

[فتيحة عد]

هاذا ماشي رد، ولكن حبيت نبه، هل هاذاك الاسم الكامل للبنت؟ شارز ساره؟
إذا كان لقب الأفضل نحيوه

[مراد سابقا10]

لازم تسقسي على الطفل مليح ولازم تحريات دقيقة كل انسان عندو جوانب ظل في حياتوا .

[ايمان4]

المرة الاولى ما قريتش الموضوع نيشان .. قلتي بنفس عمرك ؟ السيد خدام ؟ اذا نعم ف واش خدام؟؟ عمل قار ؟
هل السيد مسؤول ؟ او غير هاكك نتزوج و صايي مش مبالي و انسان مهمل و مش قد المسؤولية ؟ طموح باغي يزيد يخدم و يدير دار و يتحمل مسؤوليتو ؟ اخر شي البنت لي تديرلو تعليقات ف الفيسبوك ؟ قلتي تخدم معاه هل عمله قار ؟؟؟ قلبي ما يخلينيش و ما يهنينيش نتزوج واحد بهاد العمر و يكون بنفس عمري ...

[هـــدوء]

22 سنة هذا كتكوت...
الزواج يقتضي شاب مكتمل الرجولة...
و الشاب المكتمل الرجولة ماعندوش وقت بش يعلق و لا يجامل أي واحد لا على صفحات المواقع و لا على أرض الواقع.
لأنو إنسان مشغول ببناء مستقبل أفضل ليه و لعايلتو.

[zahra1999]

السلام عليكم اختي الكريمة

لنضع هذه الشارز ساره"جانبا

عزيزتي صاحبة المشكلة ما مدى تعلق هذا الخاطب بك؟هل ترينه حااار في طلبه كما نقول بالعامية ؟أظن أنك تعرفين هذا خاصة وان المعني بالامر(الخاطب)من العائلة؟
أم انك مجرد امراة سيسكت بها امه وطلباتها كما ذكرتي !

اذا كان الاحتمال الثاني فسأنصحك بالتمهل في الامر لان الزواج قضية كبرى ليست بهينه

فترة الخطوبة هي فترة يكون فيها تعلق الطرف بطرفه الاخر في أوج درجاته ثم تتضاءل بعد الزواج .
فكيف هو حال الزواج اذا كانت الخطوبة فاترة

خلاصة القول .اذا لاحظتي برودا لافتا من هذا الرجل فلا أنصحك بهذا الزواج لانه ينذر بجحيم بعده .تقبلي مروري

[بشرئ عاشقة العلم]

هي في الزواج مالافضل يكون كبير عليك ب 5 _10 سنوات احسن مشي قدك يبانلي صغير في عمرو و في اغلب الاحيان في عقلو هذا صراحة و اغلب الظن تزوج باش يسكت امه و الله اعلم غير رني نقول على حساب المعطيات

[بـــيِسَة]

سلآمـ

نفس السن و الله من الأفضل أنه أكثر منك على الأقل ب 3 سنوآت
و هدآ ربمآ يفسر بانه خبير في الحيآة و ان خطأت ربمآ يعفو
حسنآ لنرجع لموضوعنا راح نهدر بالدارجة باش تفهمي أكثر
الغيرة أجبارية على الزوج او الزوجة صدقت لازملك تغيري كيفاش خطيبي يجامي
لوحدة على الفيس و الله وحدة متقبلها الا لكن عليك ان تتحدثي معه بعد يوم الخطوبة
كامل عندهم سوابق يا أختي و مكاش الي مغلطش منين كان سيليباتار لكن
بعد الشوفة لازم تحكي معاه و يفهمك و انتهى الأمر
ربي يهنيك

[محمد محمد.]

السلام عليكم أختي الكريمة

على حسب روايتك هذه فإن زواجك سيكون جائرا ظالما ولا يمكن لعاقلة أن تقبل بهذا خاصة وأن هذه الفتاة ليست مجرد فتاة عرفها في الفايسبوك بل هي تعمل معه وفوق ذلك أكبر منه سنا وزيادة على ذلك أمّه هي التي تريد تزويجه .

أختي الكريمة عليك برفض هذا الزواج إني لك من الناصحين

و أصلا ليس الرجل المسؤول هو الذي تزوجه أمه ، وطبعا نصيحتي هي على حسب روايتك أما إن كانت الرواية ناقصة أو لها منحى آخر فأنا لا أتحمل مسؤولية نصيحتي لأنه معلقة بروايتك

الله يوفق

[kimjia]

انا من الاشخاص لي اذا تزوجت نزوج بواحد من نفس عمري بصح 22 صغير بزاف وشكون لي راح يصرف على الاخر خاصة الاوضاع لي رانا نعيشو فيها ويعني يقدر يتحمل المسؤلية ولا المرة الاولى جاتو ذيك النزعة تناع حاب يزوج ونبعدا شهر شهرين يمل وتوليو في المشاكل وطلاق لا قدر الله
اما موضوع الطفلة عادي خاصة يخدم معاها وكبيرة عليه
ونصيحة اخطيك من هذا زواج مزلتي صغيرة ويجيك لي احسن منو

[Amir ami]

مادام نفرتي منو اخطيك برك مازلتي صغيرة

[- HOCINE -]

نصيحتي إليك الإمتناع عن هذا الخاطب لثلاثة أسباب أولها أن صغير في السن وبنفس عمرك وثانيا زواج الأقارب يورث الأمراض وثالثا الشكوك حول خلفيته

من أجل حياة أفضل وخالية من المشاكل تزوجي من يكبرك في السن (30-32) يكون على مستوى عالي من النضج والمسؤولية ونسبة الطلاق منعدمة

[Al220]

٢٢ سنة في وقتنا طفل مشي حتى مراهق ناقص تجربة بزاف غادي يدير اخطاء و تخلصي معاه.
خدام واش من خدمة باينة نتاع سلاك و السكنة محال عنده ولا شراتهاله امه حرزي تتحكم فيك بحكم انه مشي قد المسؤلية والله تهبلك