ما رايكم في هادي الخطبة ؟

[مشكلتي]

السلام عليكم
بداية انا شاب في عمري 30 سنة توظفت حديثا كاستاذ في الجامعة بعد تعب كبير ، بعد ما تحسنت ظروفي قررت نتزوج ونكمل نصف ديني ،.عجبتني بزاف طالبة ندرس فيها عمرها حوالي 24 سنة ، انسانة عاقلة ومحترمة ولابسة لباس محترم ، جامي شفتها تمشي مع واحد او تتصرف كما يتصرف اغلب جيل هادا الوقت ، واظن انها هي ايضا لاحظت بلي راني حاط عيني عليها ، بعدما قررت نفتح معاها موضوع الارتباط بها في احدى الحصات ، تفاجات انها جات متبرجة بشكل غير طبيعي مكياج وكانها في ليلة عرسها وجلست في الطاولة الاولى ، وكانت حشمانة بزاف ، في الحقيقة طاحت من عيني بسبب تبرجها داك ،و اجلت موضوع نتكلم معاها ، وانا منها في حيرة نخطبها لانها عاجبتني بزاف او نلغي الامر تماما ، صليت صلاة استخارة ، ولكن كل ما نتفكر تبرجها داك يغيضني الحال ، مع العلم انها الخطرة الاولى والاخيرة لي جات فيها متبرجة بهاداك الشكل ، ..انتم وخصوصا الاخوات واش رايكم .

[بشرئ عاشقة العلم]

تبانلي على حساب مغرفتي الجيدة بالبنات و على حساب قولك انو هي عاقلة بغات غير تزيد تلفتلك الانتباه انو هي جميلة خصوصا انو قلت بلي كانت حشمانة المهم باش تقدم خطوة انت من عندك و اول مرة تدير هذا التصرف و تبقى الاستخارة خير دليل و ملازمش نحكمو على الانسان من اول فعل خاطى يديره طبعا

[مراد سابقا10]

امرك غريب يا اخي وكيف حكمت عليه بلي بنت فاميليا من الوهلة الأولى وانت لم تبحث في ماضيها امرك عجيب

واذا كانت هذه الفتاة تسكن في ولاية بعيدة كيف ستعرف ماضيها.....الخ يجب على الأقل ان تكون لديك فكرة على الفتاة اين تسكن و اسال هناك والباقي على الله

انا ننصحك نصيحة زواج الغربة والبعد في اغلب الأحيان لا ينجح

وانا نصيحتي لك تزوج من مكان قريب من مكان سكنك على ألاقل الفتاة حين تسال عنها تستطيع معرفة خباياها

اما اذا بغيت تزوج بدون معرفة ماضي الفتاة فهذا غباء يا اخي قادر تتزوج بوحدة لا قدر الله ومبعد يبعثولك الفيديو انتاعها او صورها

صحيح الحقيقة المطلقة تبقى مخفية بصح على الأقل كي تسقسي ويشكروك الناس في الفتاة على الأقل لا تلوم نفسك فيما بعد فالحقيقة الكاملة عن اي شخص

يعلمها الله وحده.

[toulay]

وعليكم السلام ورحمة الله وبركاته
انت نسيتي كل حاجة مليحة وركزتي على النهار لجات حاطة فيه الماكياج وانت اصلا في حد ذاتك قلتي كانت حشمانة بزاف
صلي استخارة وان شاء الله خير
القرار الاول والاخير يرجعلك انت اذا عجبتك البنت وراك متمسك بيها اللهم بارك دير خطوة واذا ماكش مقتنع وتبقى موسوس من هذاك التصرف لدارتوا غير خليها في حالها ومبعد تبقى تكرهلها حياتها وربي يعوضكم ان شاء الله
فقط ملاحظة للاخ مراد سابقا مقدرتش نفوت على ردك مرور الكرام لانو فيه تناقض
كيفاش ياسبحان الله كل ماندخل لموضوع تاع مشكلتي ويكون صاحب الموضوع رجل تقولوا تزوج باوروبية ولا روسية لانه الزواج في الجزائر قمار شغل هاذوك معليش حلال لا يهم الماضي ولا البعد ولا غيره والجزائرية تحبوا تنبشوا فالماضي تاعها على اساس انتم مبشرين بالجنة
الحمد الله الحساب والعقاب بيد الله وحده
هو منحبش نهدر بصح خطرات تلقى ردود تنطق ذراع
بالتوفيق ياصاحب الموضوع

[Rafik.B]

الاولى ان تلوم نفسك انت من اخطأت اولا كيفاه تبينلها بلي راك حاط عينك لانو بهاذ الطريقة راك تفسد في بنات الناس المفروض راك رجل جامل عقلو وزيد ماشاء الله استاذ جامعي تسقسي عليها وعلى عايلتها وتستخير وتخمم بلا ماتبينلها اي حاجة وكي تتأكد تفتح معاها الموضوع مباشرة يعني انت دوكا الطفلة طمعتها ومازال راك تسقسي وعلى حساب هدرتك ان هاذا الامر كان لمرة واحدة ممكن راجعت نفسها ولقات روحها غالطة الخطأ اللي وقعت فيه الطفلة انت سبابو كان جيت رزين قاع ماتتحطش في موقف الشك هذا وجل من لا يخطئ بالتوفيق وربي يسهلك أخي

[ابنة الاسلام]

استخر الله في أمرها
+
اسأل عن الفتاة ..اقصد رزين العقل الذي يسكن بجوارها ..
+
لا يغرنك المظهر (سواء كان حميد او قبيح ) ..المظهر ليس بالمعيار الذي تحكم به .


الله المستعان .

[أثر]

كي حطيت عينك عليها وماغضيتش البصر لي راك مطالب بأن تغضه جانك نورمال
وكي هي تعرات ودارت المكياج لأجل خطأ درته أنت جاتك بيزار !!!
شحال تعيّيوا pffff
غمض عينيك يا ولدي واخدم خدمتك وبركاك ما تلعب عينيك في بنات الناس وكي تعجبك وحدة تروح تسقسي عليها بلا ما هي تشعر
ثك تتقدم رسميا لوالديها ماشي تصارحها في حصة تعليمية
الله يهدي ...

[Elwawy]

قاعدة ذهبية: تريد الزواج, لا ترضي أحد : لا والدين و لا شخص أخر, لا ترضي أي شيء بما في ذلك الخزعبلات الدينية, دير رايك و تذكر أخي الدنيا أسباب, لا يوجد وحي ولا معجزات تحدث الأن.

مهما كان الأمر ستتزوج و تمر بما يمر به الجميع و ما تراه عند الجميع, لن تعيد إختراع العجلة.

لا يمكن أن تصدق نوع الشيطان الموجود وراء كل وجه بريء و جميل لكل فتاة, إحذر, فتاة في ال24 (سن في هذا الوقت تع الذر) ممكن أن "تهبلك" لتقول لك "محبتش ماما"

[yassefe]

تبان مزالك نية جامي تحكم من لوجه راني في الجامعة كل يوم تشوف لعجب

كاين 3 انواع من البنات

1 لي خارجينها صحة صحة

2 لي تحت طرف تلعبها ناس ملاح وهيية .............
3 بنت فاميليا ويتعدو علي الاصابع
اكبر خدعة تلعبها قدامك طفلة تحشم ...سقسي عليها وزيد وزيد وزيد