عايرتني سلفتي وانا عاد مزالني عروسة

[مشكلتي]

سلام ديركت نحكي واش ل صرالي عندي ياخاوتي شهر زواج فقط .جاونا البارح ضياف قعدنا مع بعض .عندي اخت زوجي وحدة كبيرة ومش متزوجة28سنة .للعلم انا ومرت سلفي جينا مع بعض يعني اهل زوجي جابو 2عرايس في نهار واحد
الموهم كي كانو الضياف اخت زوجي حطت القهوة وخرجت مسرباتلهمش حتى بدات الضيفة لي هي بنت عم زوجي تسربي ومبعد دخلت اخت زوجي كملت سربات معاها
كي راحو الضياف حكمت اخت زوجي قلتلها "عيب نورمالمو انتي تفرغي"
زعفت ونسمعها تقول واش دخلها فيا هذيك السمينة وووو
عايرتني ياخاوتي جرحتني منسمحلهااااااااااش

[toulay]

وعليكم السلام ورحمة الله وبركاته
اولا عندي ملاحظة تاع كبيرة ومشي متزوجة وعندها 28 سنة نقولك راها مزالها صغيرة بصغرها مفهمتش العقلية المتخلفة والعقيمة تاع الطفلة لتفوت سن معين راها كبيرة
وثانيا ماكان ماراحلك فيها تسربي ولا تقعد كيما انت متحبش السلفة ولعجوزة يدخلوا فيك انت تاني متدخلش فيهم
علابالي ردي مراحش يعجبك بصح هاذي هي الحقيقة
وبنت عمها مشي برانية يعني راها في دار عمها تقدر تسربي وتقدر حتى تدخل للكوزينة وتحل البرمة وتشوف واش طيبوا
مالا يا اختي انت لغلطتي وتحمل نتيجة افعالك
بالتوفيق

[أثر]

ونت واش دخلك تسربي ولا تقعد ؟!
من تدخل فيما لايعنيه سمع مالا يرضيه
ونت وهذيك العروسة 2 في يديكم الحنة واقيلا !!
سبحان الله راكم كبار على هاذ الأمور تاع الذر

[أثر]

هي صح غلطت لي قالت عليك كذا وكذا مي الغلطة تاعك لي رحتي للبلاء برجليك
ربي يهدي النفوس
ومرة خلاف حاولي ما تحتكي بيها ولابغيرها احكمي قدرك تبقاي عزيزة
ربي يصلح الاحوال بيناتكم

[سَامِيَة]

ولما شفتيها خرجت وماسرباتش علاه ما تقدمتيتش نتي وسربيتي ولا هذيك الخدمة تقوم بها فقط الكبيرات في السن واللائي لم تتزوجن ! على ما أظن أنت الآن من أصحاب الدار !

[تاج الوقار16]

اختي ماراحش نعلق على المشكل
لانو قطرة من بحر ما ستلقينه من معاير ومشاكل مع اهل الزوج

وجدي روحك وخممي كفاش تتصرفي لاحقا
واذا عندك إمكانيات للخروج غير اخرجي بدارك لانو الدار اللي فيها بنات مهما تديري ماكيش مليحة والعيب فيك
واقراي معاناة العرايس تفهمي
وديري ريجيم مازال امامك حمل ورضاعة وتربية
وما تزيديش تنتقدي اي وحدة اهتمي بروحك

[النجمة القطبية]

حيرتيني صراحة وانتي درك لاه جابوك عروسة شهر كامل متعرفيش تسربي قهوة لا انتي لا صديقتك وزيدي تعلقي !!!
صراحة ما لقيت ما نقول قاعدة تتفرجي في الضيفة تسربي جاتك نوغمال !!
يا اختي انفضي شوية غبرة على عمرك شهر ما بقى ما تستناي اقفازي شوية

[ريتال2]

والله خلعتني وانت علاه جابوك للدارهم لازم انت طيبي قهوة ماشي حماتك وانت تفرغي وتقسمي وتسربي انا كن دارتها قدامي عادي نسربي ونشكرها لانها قامت بمهمتي طيبت قهوة نغمالمو تجي تقعد مع بنت عمها ونضحك ونزعق عادي راهي قامت مهمتك انها طيبت قهوة انت قعدت تتفرجي على ضيفة وقهوة وعلاه متنوضيش انت تسربي اضحكي على روحك مااشي على حماتك يا اختي

ومعندكش حق تهدري معاها وتزعفي عليها درتي غلطة كبيرة نورمالمو الان هيا متخدمش شغل لان كي يجو يخطبو يقولو تساعد والدتي في امور بيت فهمتني صح ماشي زوجوك لولدهم باه تقعدي تتفرجي عليهم ايا لازم تقفزي وتبيني حنة يديك وديري اعمالك ومهامك بدون انك تقولي انت ديري هاذي وابتعدي عن مشاكل ولازم تكوني صبورة ومتدخليش في امورهم مع انها بنت عمهم معنها راهي تقريب اختهم وعادي كن سربيتي انت وعادي ليس مشكل كبير اذا جابت قهوة وحطتها انت سربيها بدون كلام عادي كل وحدة تفهم اخرى بدون كلام

هيا صح غلطت عايرتك لكن انت رحتي ليها برجليك لازم قبل ماديري خطوة خمي واش يجي موراها لانو ماهوش حقك تقوليلها امها صحا او اختها لكن انت.


روحي اطلبي منها سماح وعادي اذا مزالها زعفانة منك

[Simsim.rd]

يا اختي هاذي نقطة من بحر المشاكل نتاع يوميات العروسة في دار ناسها، اولا الغلطة نتاعك لي علقتي عليها و هي تاني غلطت كي عايراتك. بصح هاد المشكل بالرغم من انو تافه لازم تدي منو العبرة و ديري حدود لروحك و لسلفتك هاذي معناها منا و جاي تعرفي واش تهدري ما دخلي روحك فيهم ما تخليهم يدخلو روحهم في امورك الحياة مازالها طويلة لازم تكوني ذكية و عقلانية في تصرفاتك. و نصيحة اخيرة هاد الحادثة فوتيها كبري عقلك و ماديريش مشكل كبير من كلمة

[ابنة الاسلام]

اسمحيلي اختي انت تدخلك لم يكن في محله ...يعني حاجة مش مستاااااهلة اصلا ودرتي عليها ملاحظة بطريقة فظة ..وبالتالي سمعتي مالايرضيك ولو انها لم تصب هي الاخرى ...امالا كبروا عقولكم شوية وماترجعوش من الحبة قبة ..تعلمي تفوتي ..لان الاحتكاك يكون فيه بزااااف مواقف مماثلة ..تبقى عليك انت اذا تتجاوزيها ولا ديري آري عند كل موقف ...ربي يهنيييك

[زايدي أمحمد]

انت ظلمتيها ومزال تحلي في فمك وعلاه ماسربيتيش انت ؟

[noursm]

و علاه ما سربيتيش انتي ؟؟
ولا جابوك راجل في الدار ؟؟
ندبر عليك اختي تعاملي مع اهل زوجك بالنية ، و اخطيك من هاد الحسابات .
و حطي رجليك في الارض

[fella111]

28 سنة كبيرة ؟؟؟؟؟؟؟؟ تخلف
خليتي الضياف يسربيو وحدهم و تزيدي تهدري المشكل راه فيك

[أثر]

الاخت الكريمة ربما كان ردي شوية قاسي عليك وانا اعتذر لك
لكن تاكدي بلي هاذ الامور هي لي تخلق لك مشاكل انت في غنى عنها
حاولي تعاملي اهل زوجك كأنهم أهلك وكأنك في دارك وإذا بدر منهم شيئ او اشياء تسوءك فخليك بعيدة واحكمي قدرك وعامليهم فقط بالحسنى مهما بدر منهم. دعواتي ليك

[fatijijel]

ايييه يا اختي الباديء اظلم
لازم تكوني صماء و طرشاء و السلام

[قدور بن عاشور]

راكي هلكتيها من كل النواحي
أولا 28 ليست كبيرة أو بايرة
ثانيا يبدو أنك أصغر منها و جديدة في البيت وجاية تدبري عليها و تفهميها الأصول زعما.
ثالثا ما تعرفيش تسربي أنت و لا كنتي حاطة كراع فوق كراع و تستناي فيها تسربيلك
رابعا راجعي تصرفاتك قبل فوات الأوان و لا تتدخلي فيما لا يعنيك

[زمن الغربة]

28 ماشي كبيرة صدقا ...ثانيا نظن شهر راكي مولات الدار ماشي برانية ...ثالثا المفروض يكون العنوان انصحوني كيفاش نصلح خطئي مع أخت زوجي لأنك غالطة الفين بالمئة ....والخلاصة تفكيرك جد محدود وفي حال استمريتي بنفس المنوال رايحة تجيبي لنفسك ولزوجك ولهاد العائلة مشاكل عديدة وكثيرة فانضجي شوية بنيتي

[المطمئنّة]

السّلام عليكم ورحمة الله وبركاته

يؤسفني يا أختي أن أخبركِ أنّ كلاكُما مخطيء، والسّببُ ليس هو تقديم القهوة
إنّما احتِقارُكِ لها لأنّكِ ترينها كبيرة وفاتها قطار الزّواج
واحتقارها لكِ لأنّها تراكِ سمينة رغم أنّ ذلك ليس عيبا
وإلّا فتقديم القهوة أمر عادي جدّا إن قدّمت هي أو أنتِ لا توجدُ أيّة مشكلة

أنصحُكِ يا أختي بأن تترفّعي عن هذه الأمور، أنتِ الآن متزوّجة وستصبحين أمّا ومربيّة وقدوة، أتركي عنكِ احتقار الآخرين قولكِ أن أخت زوجكِ كبيرة يدلّ على استهزاءكِ بها مع أنّ الزّواج رزق والدّليل هناك من تتزوّج وهي بنت 15 سنة وهناك من تتزوّج وهي في الأربعينات ولا ينبغي لنا أن نستهزأ بالآخرين

أمّا فيما يخصّ عيشكِ مع أهل زوجكِ في بيتٍ واحد، فليس لكِ أن لا تتدخّلي في الأهل وتسأليهم لماذا فعلوا هذا وهذا، أنظري ماهي الأعمال المشتركة بينكم وقومي بأعمالكِ ولتكن نيّتُكِ صافية معهم، ولا تسألي النّاس عن أعمالهم، ولا تسمحي كذلك للآخرين أن يتدخّلوا في خصوصيّاتكِ

أتمنّى لكِ التّوفيق في حياتكِ أختي
تقبّلي مروري

[أم رقية نسرين]

مالا قلتي كبيرة و مشي متزوجة و 28 سنة ؟؟؟؟؟؟ ربي يهديك وش رايحة نقولك
المهم المفيد راكي غالطة و غالطة بزاف و تجاوزتي حدودك معاها ...تسما نتي حاطة روحك ضيفة ؟؟
و جاتك عادي ضيفتكم تسربي لروحها و نتي قاعدة تتفرجي فيها ؟؟ عيب عليك نتي و العيب الأكبر أنك تلومي سلفتك علاه مسرباتش والله هادي مليحة
شوفي نقولك كبري عقلك راكي دركا مرا تاع دار مكيش طفلة في داركم لكان من الشهر الأول هادا هو تخمامك وين رايحة بيها ؟؟؟ ولا الزواج تحسبو فيه غير خطبة وعرس و تصديرة
خمي مليح في التصرف تاعك بعقلك و راح بنفسك تحكمي

[kimjia]

ختي انا نمدلك نصيحة نتي قلتي عندك شهر عروسة هذا يعني انك مزلتي متعرفيش طبايع العايلة لي راكي فيها وطبيعة سافتك وعجوزتك لازم تكوني شاطرة وفحلة وتبيني حنة يديك مهيش تخلي لعروس الثانية تدي بلاصتة في دار مهيش يوليو يقولو والله غير جبنا عروس فحلة وعروس خالية مدير والو
اما بخصوص سلفتك ميحقش عليك تقولي هكذا عليها نتي معلبلكش واش كاين حتان مزوجتش وش كان صارى قبل متجي
ونصيحة اخيرة اقفازي وفحالي مع انو عندها سلفتك الحق حتى كن يكونو ضياف قراب بزاف للعايلة مهيش كي يروحو يقولو والله يا هذيك لعروس مهيش موجبة كامل

[*عبدالرحمن*]

تم بلوغه 20 مشاركة