مستعجل

[مشكلتي]

السلام عليكم
خاوتي خواتاتي ندخل في الموضوع بدون مقدمات
انا شاب 28 سنة عندي ماستر في المحاسبة ولقيت خدمة هذا الاسبوع نبدا نخدم عندي الدار الحمد لله بصحتي بطولي عطاني ربي حسن و جمال والحمد لله متربي ولد اصل من عائلة محترمة الحمدلله مشكلتي يا خاوتي لعزاز اني حبيت طفلة وناويها للزواج لكن هي تخطبت ومحمبتش تقبل وخاوتها يحوسو يزوجوها بالسيف انا قلتلها شهر برك ونخطبك عل الرغم من ظروفي قاهرة ومعنديش داهم واش ندير يا خاوتي انصحوني مستحيل نسمح فيها تعلقت بيها بزاف خفت نخطبها ميعطونيش لاني مزلت مبديتش نخدم يا خاوتي خممت نروح نهدر مع هذا الانسان لي خطبها نقلو يجبد روحو وخفت يقول لخاوتها ونزيد نعقد الأمر مغهمتش واش ندير اعطوني حل اما هي قالتلهم منقبلش قالولها علاه قوليلنا علاه متقبليش عييت والله مراني ناكل ولا نرقد حياتي رجعت جحيم طول اليوم نخمم وخلاص

[toulay]

وعليكم السلام ورحمة الله وبركاته
يا اخي رد بالك تروح تحكي مع هذاك السيد لانو راح تعقد الامور اكثر ودير مشاكل للطفلة ولروحك ثاني
وفيما يخص الطفلة تقدر تقول لخاوتها معجبنيش محسيتش روحي مرتاحة منيش عارفة تحاول تمدلهم جواب مقنع
وانت مين تحكم خدمة روح احكي مع دارهم ومد عليها الكلمة وان شاء الله خير
ربي يفرج عليك ان شاء الله
بالتوفيق

[ع.عيسى]

اخي الكريم ..انا رايح ننصحك عن تجربة ولاني مريت بما مررت به واتفهم شعورك جيدا
اولا ...لا يحوز للمسلم ان يخطب على خطبة اخيه ...لا يحوز لك شرعا انك تتقدم الى خطبة هاته الفتاة مادامت تخطبت بشكل رسمي لهادا السيد
ثانيا ...كن على يقين انه اذا كانت من نصيبك ستكون من نصيبك ..رايح تجي اسباب وتبطل هاتي الخطبة ساعتها تتقدم انت ويقبلو بيك عادي ....اما اذا لم تكن من نصيبك فحتى وان كنت غني وصاحب مكانة اجتماعية وتخطبها ويقبلو ولكن رايحة تجي ظروف قاهرة تجبركم انه كل واحد يروح في سبيله ....
لذلك عليك انك تدعي ربي انه اذا كان فيها خير لك وانت فيها خير لها يجعلها من نصيبك واذا مكانش فيها خير ربي يعوضك بما فيه الخير لك ..اما انك تتهور وتروح تهدر مع السيد وتقلو اجبد روحك اعلم جيدا ان هاذا الفعل هو اكثر من كاف لان يجعلك ضمن القائمة السوداء لهاته العائلة ، كما انه تجاوز لحدود الله تعالى ولن يكون من حقك التوفيق مادام تجاوت حدوده ....
كل ما عليك فعله هو الدعاء والانتظار ....اذا بطلت الخطبة بيناتهم ..تقدم انت ...اما اذا تمت وكللت بالزواج ..اصبر وادعي ربي يعوضك .....ربي يفرج عليك ان شاء الله

[⌈الأشتر⌉]

عليكم السلام


زواجك منها أمر غير مضمون، حتى لو لم تقبل به، فأنت قد تعدها بالوهم، وتفوّت عليها فرصة أن تحصّن نفسها، وتؤسس عائلتها، فلعلّ هذا الرّجل الذي تقدّم إليها، رجل صالح، يطيب العيش معه، فما كان عليك أن تجهر بالكلمات، وأنت غير مستعد!. المشاعر وحدها لاتبني بيتا، ولاتؤسس عائلة، يجب أن يتبعها الفعل و الإقدام.

[رأيي] أن تطلق سراحها، وأن تحضّها على معالجة أمر من تقدّم إليها بعيدا عنك، لكي لاتندم لاحقا إن لم يكتب الله تعالى لكما الزواج، بأن تكون سببا في إفساد حياتها، خاصة في هذا الزّمن، زمن الفتن، تجدها "ماحكمت هذا ولا هذا"..، وأليس يتفرض بالمحبّ أن يفعل ما فيه خير لمحبوبه؟! وإن تحسّنت أحوالك في المستقبل، ووجدتها متاحة، وما زالت ترغب فيها، أتيت البيت من بابه!

[أثر]

سبحان الله كرهتونا بسيرة هاذي نحبها وهي تحبني
واش من حب يا ولدي حاسب روحك واقيلا روميو وهي جولييت 2019
مكانش حب قبل الزواج فمكلاه تكذب على روحك وتكذب عليها
البنت تخطبت وخاطبها اذا فيه كل الشروط ورفضاته لاجلك فهذا لايجوز شرعا ولايجوز عرفا وأخلاقا
خلي البنت تتزوج وتستر روحها
ومكالاه ديرلها المشاكل ليك وليها
ياما شفنا بنات رفضوا الخطاب وانتظروا الحبيب المزعوم ومن نهار تزوجوا وهم ف المشاكل لوذنيهم
حاجة الحرام عمرها ما تثمر ايها المحترم

[تاج الوقار16]

قرار البنت هو سيد الموقف
أن هي رفضت سواء لأجلك او لعدم ارتياحه لهذا الشخص فستكون لك فرصة للتقدم ويجب أن تسرع حتى لا يتقدم غيرك
اما مدام الأمر في المداولات فما عليك سوى الترقب وهذا على حساب أخواتها وقرارهم
ثم اذا راهي من مكتوبك ماراح تهرب
ولكن تذكر
ولا تواعدوهن سرا

[زايدي أمحمد]

الله يكتب لي فيها الخير