شكون عايشة مع ناس راح يهبلوها

[مشكلتي]

تغسلي ماعنك.... راها تقربع
متغسليهمش....فنيانة
تسيقي وتنقي الحالة....خصرتي الماء وتعمرت الروقارة
متسيقيش ....معفونة
تلبسي قش شباب....خبيه للمناسبات
تلبسي قش مدرنح....متلبسش متبانش عروسة
تتقلشي....زواخة وحاطة روحها حاجة
متتقلشيش....كافية ومتخلفة لاه بيها
تديري مكياج ....راها تتبودع وتزوخ
ماتديريش....لاه بيها شينة كحل ماتديروش في عينيها كي النسا
تغسلي حوايجك ....علاه تغسلي بلوحدة خلي يتحجرو
تخليهم يتحجرو ....علاه راكي تخبي فلحوايج الموسخين
تبدلي لوليدك حوايجو....راح تمرضيه
متبدليلوش....راه فايح وقارص
تجمعي معاهم....يشبعوك هدرة بايخة
ماتقديش معاهم .....متكبرة
تسقسيهم على كاش أمر....راها تقرعج
ماتسقسيهمش....متكبرة مهيش حنينة
تغيري ديكور الغرفة وتبدلي فيها امور ....شبعت راحة
متغيريهش....تظل راقدة
تسشوري شعرك....الكهرباء جات غالية
متسشوريش ....يضحكو عليك .مكشردة
تبدلي ديما وتدوشي....تخسر الماء والصابون
متبدليش ....فايحة ومدودة
متاكليش .....وعلاه متاكش
تاكلي نورمال....تاكل بزاف

المهم بزاف بزاف صوالح هذو لي ران متفكرهتهم برك
علبالي مكاش حل هذي هي الدار الكبيرة على الاقل خلوني نفرغ قلبي لاني بالفعل راح نهبل وملقيتش لمن نشتكي من دون هذ الركن

[toulay]

السلام عليكم
واش راح دير يا اختي اصبر وخلاص متردش عليهم حتى لو من الداخل تغلي وراح تنفجر ديرهم فالثقيل
الهدرة فيها فيها يالوكان منعرف واش تكون الناس مايعجبهمش لعجب
جرب احكي مع الزوج تاعك يكريلك وتستقل بدارك وحدة كيما يقول المثل اخسر وفارق
راحة البال لاتعوض بثمن
ربي يفرج عليك ان شاء الله
بالتوفيق

[ing.Youcef]

يا لطيف
أنت لي رايحة تهبلي روحك
كل ما تدري حاجة تبقاي تسني فيهم واش يقولو عليك
إرضاء الناس غاية لا تدرك
عيشي حياتك بالواجب والمعقول وما يهمك في حتى واحد
كلش يفوت وما يبقى غير العيب
بالتوفيق

[أثر]

ابقاي تبعي الناس واش يقولوا
لي حاب يهدر العام راه طوييييل
عيشي حياتك وديري الشيئ المعقول والمنطقي ولي ماعجبه يروح يشرب من ماء البحر قد ما شرب ماراحش يفضّ

[mina2004]

ما كنتش حابة نضحك ضحكتيني سيرتو هادي صراتلي تع تبدلي ديما وتدوشي....تخسر الماء والصابون
متبدليش ....فايحة ومدودة
ههههه يربي يفرحك كيما فرحتيني و يزرع الضحكة على وجهك باينة راكي معمرة علخر اختي

كحل لمشكلتك قولي لراجلك يدير شلاغم و يكري دار وتعيشوا وحدكم عاد وقتها دير رايك و تقلشي كيما تحبي و ما راحلك في حتى عربي
الى ما صلحش و ما قدرتوش تكروا دار جمونفو و اتهناي من الناس كيما يقولوا رضا الناس غاية لا تدرك ما راحلكش فيهم و ش قالك مخك ديري اعملي و سيبون

[تاج الوقار16]

اختي كل العرايس ذايقين من الكأس هاذي
كتبت لك ردا مفصلا ولم يمر بسبب النت
المهم باختصار
ديري في وذنك كيتمان واسمعي قران كي تكوني تخدمي في الشغل
وفي فراغك اغلقي عليك شومبرتك والعبي مع وليدك واللي يطبطب عليك يستنى شوي قوليلو كنت مشغولة
واذا قالو لك هاذي روبا ماشي شابة قولي لهم شفتو مقدم الحصة الفلانية قال بلي المشي مليح للقلب(مثال برك)
يعني بدلي الموضوع تخليهم حايرين
لازم تبقي غامضة في نظرهم يوليو يخافو من ردة فعلك اللي لا علاقة بالموضوع
مالازمش تبانيي بلي تقلقتي والا يوليو يستفزوك
ومهما كان انت راجلك ولا انو ماراحش ينافسوك ويوليو ضراير
خافي من اللي راهم برا انيقات عريانات يوزعو في الابتسامات ممكن راجلك يميل ليهم ويهرب من عبوسك وانشغالك بتفاهات اهلو
وزيد كون راكي في دار باباك تتمني برك تتزوجي ولا تولدي وتقولي نتحمل كلشي
تكون راكي مريضة تقولي يا ربي غير صحتي وكل شي يهون
لكل شيء اذا ما تم نقصان..فلا يغر بطيب العيش انسان
هي الأمور كما شاهدتها دول..من سره زمن ساءته ازمان

[المطمئنّة]

السّلام عليكم ورحمة الله وبكاته

استعملي قاعدة: السّكوت عن الأحمق جوابه
تجنّبي الجلوس في التّجمّعات التي تتأذّين منها، واشغلي نفسكِ بالإستماع للقرآن أو المحاضرات الدّينية أو الكتب المفيدة بصيغة audio
لا تضيّعي وقتكِ في تحليل نظرة الآخرين لكِ وكلامهم عنكِ
لأنّكِ ستتعبين نفسيا وتخسرين الكثير دون أن تشعري وأنتِ منغمسة في الإهتمام بهذه السّفاسف
لعلّ الله يرزقكِ راحة البال

[زايدي أمحمد]

الله يكون في عونك

[fatijijel]

ربي معانا و الله المستعان

[قدور بن عاشور]

لا يوجد حل،

إصبري و خبي في قلبك و على 20 سنة خرجي زعافك في زوجة ابنك

و هكذا حتى تستمر الدورة (الأم ـ زوجة الإبن) إلى قيام الساعة