تدخل حماتي الرهيب 2

[مشكلتي]

السلام عليكم
انا صاحبة مشكلة تدخل حماتي الرهيب في حياتي
شكرا جزيلا لكل من قرأ موضوعي ورد عليه
الاخوة والاخوات لي قالولي حماتك تتدخل فيك وتنصحك بتغيير ثيابك لأنها تحبك وتعاملك كيما بنتها
وتحب تشوفك في احلى صورة وتحب تحافظلك على استقرار بيتك
وهل تظنونني ساذجة لدرجة أني منعرفش نوايا شخص عشت معاه أكثر من سنة تحت سقف واحد
نعم هي بالفعل تفعل ذلك استهزاء بي وزعما باش تعايرني بأني (منيش نقية)بطريقة غير مباشرة
وانا متأكدة كل التأكد انها لما تتلاقى النسا صحاباتها رايحة تقوللهم عليا(لكان منقوللهاش بدلي حوايجك متبدلهمش)
الاخت تولاي شكرا على ردك
جاء في ردك انك قلتيلي ردي عليها بعبارة يعطيك الصحة لي ولهتيني وشكرا لك ووو
لكن ذلك بأي صفة يكون
اذا قلتلها يعطيك الصحة لي ولهتيني ومبعد نروح نبدل روبتي ثما وين تزيد تحكملها وتفرح وتقول ران نحكم فيها وراهي متفهم والو
واذا قلتها يعطيك الصحة بطريقة اني نستهزا بها معناها رانا رجعنا لنفس ردودي السلبية لي اقترحها تع واش دخلك فيا ووووو
على كل حال اريد منكم للمرة الثانية حلا يكون فعالا ولائقا ومناسبا
ونتمنى متقولوليش غيري ملابسك كل يوم منيش قاعدة غير علا جال ذاك الشي
راه عندي مسؤولية زوج وبنت نربي فيها
والسلام عليكم ورحمة الله

[*عبدالرحمن*]

واذا قلتها يعطيك الصحة بطريقة اني نستهزا بها معناها رانا رجعنا لنفس ردودي السلبية لي اقترحها تع واش دخلك فيا ووووو

السلام عليكم ورحمه الله و بركاتة

ما هو الهدف الاساسي من عرض المشكلة و الرد عليها

هو الاصلاح علي قدر الاستطاعة

و من هذه الاستطاعة

ما يقدمة صاحب المشكلة من خلفيات لمشكلتة

و علي هذا الاساس يجاء الرد

و عن نفسي حين اجدك تقولي في موضوعك السابق


ووصلت بها الوقاحة لدرجة تقولي غيري فستانك راه موسخ؟!

؟؟؟؟؟؟؟؟كيف كيف الحل معها اخوة الايمان

هل يصح ان تقولي هذا علي ست في سن والدتك

هل ترضي ان يقول احد هذا القول علي والدتك

و هل تنتظري اني اكون في عونك و انتي تتجاوزي بعض الامور

قال الرسول صلي الله عليه و سلم

من رأى منكم منكراً فليغيره بيده فإن لم يستطع فبلسانه ، فإن لم يستطع فبقلبه ، وذلك أضعف الإيمان " –رواه مسلم ( 49 )

لكن يحضرني قول الله تعالي

لَّا يُحِبُّ اللَّهُ الْجَهْرَ بِالسُّوءِ مِنَ الْقَوْلِ إِلَّا مَن ظُلِمَ وَكَانَ اللَّهُ سَمِيعًا عَلِيمًا (148) سورة النساء

و كلمة وقاحه قول سوء

فهل يحق لكِ ذلك

اجدك تقولي في موضوعك السابق



لدي مطبخ خاص وحمام خاص داخل المنزل الكبير للعائلة رغم هذا لم اسلم من تدخلاتها


انظري داخل الاقتباس لكلامك باللون الاحمر

هل تعلمي من هو الكبير داخل المنزل الكبير للعائلة

ح تقولي زوجك

لا و الله ليس زوجك

بل حماكي و حماتك

و يصبح حماكي في مقام والدك

و تصبح حماتك في مقام والدتك

و يحق لها التدخل فيما تراه غير مناسب لنظام منزل العائلة

و السؤال هل يصح الخطاء لصاحب البيت

اذن عدم علمك بهذه الامور لا تعطيكِ الحق بالقول بالسوء علي كبيرة المنزل

و ارجع الي ما تم تقديمة منك و علي اساسة ح يكون الرد ايضا


نعم هي بالفعل تفعل ذلك استهزاء بي وزعما باش تعايرني بأني (منيش نقية)بطريقة غير مباشرة

وانا متأكدة كل التأكد انها لما تتلاقى النسا صحاباتها رايحة تقوللهم عليا(لكان منقوللهاش بدلي حوايجك متبدلهمش)


كيف هي بالفعل تفعل

و في نفس الوقت بطريقة غير مباشرة

ثم تعودي و تقولي

وانا متأكدة كل التأكد

هل سمعتيها تقول ذلك حتي تكوني متأكدة

علي العموم الحل حتي لا تخسري زوجك

ان كان قي استطاعته ان يجد لك منزل بعيد عن العائلة

لا تترددي في ذلك لكن ان لم يكن في استطاعته

يجب ان تقبلي الوضع الراهن و تحاولي التقرب لها بالود

و تقربيها من قلبك مثل و الدتك

[قدور بن عاشور]

كوني طيبة و صارمة معها في نفس الوقت.
ما تتبلايش و لكن رديلها الصرف

قولي لها راني كبيرة و نعرف صلاحي، مارانيش نرضع في اصبعي.
و لا تلتفتي للردود المثالية لأننا في عالم غير مثالي

[toulay]

وعليكم السلام ورحمة الله وبركاته
عفوا اختي بلا مزية
قولها هكذا يعطيك الصحة وبارك الله فيك بصح دير رايك انت يعني متبدلهاش ابقى بيها ومبعد وحدها تقلق ومتزيدش دور بيك
لا لا كاين فرق كبير بين يعطيك الصحة و هاذيك تاع واش دخلك
يا اختي الحل هو التجاهل سمطها متبقاش مركزة معاها وخلاص
بالتوفيق

[~رآقية بأخلآقي~]

الحل انك تتجنبيها قدر المستطاع وحاولي متتلاقيهاش ووقت ما تكون هيا برا ادخلي شمبرتك اخدمي شغل تاعك قبل ما تنوض والا ف الليل كي ترقد هيا و اذا قالت لك بدلي روبتك مثلا قوليلها شفتي راهي توسختلي وكنت ضرك راح نبدلها ديري الماكسيموم تاعك باش ما تهز عليك والو وربي يهديها

[ام احمدي]

اختي تجاهليها لكن باحترام
مي تقولك بدلي قشك قوليلها أن شاء الله لكن متبدليهش والا عاودتلك الهدرة تبسمي في وجهها وروحي كملي خدمتك
كي تسقسيك فلان جا تبسمي قوليلها معلبليش حاولي تقوليها بطريقة تبيني فيها باي ميهمكش في الي جا وراح
بالعربي كوني سامطة تبسمي ومتقلقيش روحك لكن ديري رايك ومتكثريش الهدرة بزاف معاها
المهم مطيحيلهاش وفي الوقت نفسه حافظي على كرامتك
وربي يفرج عليك اختي

[سيدتي الفاضلة]

وعليكم السلام ورحمة الله وبركاته

ونتمنى متقولوليش غيري ملابسك كل يوم منيش قاعدة غير علا جال ذاك الشي
راه عندي مسؤولية زوج وبنت نربي فيها


ضعي "طابلية تاع شغل" او خصصي فستان قديم للقيام بالأعمال المنزلية وغيّريه فور انتهائك منها .. "مافيها والو" ولن ياخذ من وقتك أكثر من دقيقتين وفي المقابل ملابسك "ما تفسدش".. يعني "مليحة ليك"

بالنسبة لمشاكلك الأخرى مع عجوزتك .. مع الوقت "توالفيها وتوالفك" وهذه الاصطدامات بيكنما ستخفّ (لأنّه من الواضح أنّ لديك الرغبة في ايجاد السّبل للعيش بسلام معها وتفادي المشاكل) واذا أردت اختصار الوقت، انظري الى طريقة تعامل بناتها معها، وقلّديهن فيما يناسبك ويناسب أوضاعك، فهنّ أدرى "بعقليّتها" وطريقة ارضاءها .. أمّا تدخّلها في الأمور التي تخصّك (إذا تعدّت اطار النّصيحة) والأوامر المجحفة بحقك، تمالكي أعصابك ولا تتطاولي معها في الكلام و"ديري واش يريّحك" دون أن تشعريها بعداوة أومعارضة صريحة .. "تبّسمي "واذا انتَبهَت وعلّقت على الموضوع .. أجيبي "نسيت" ، " المرة الجاية" ، "ماعليش" وهكذا ... "سايريها" لكنّ حذاري من الكلام الوقح أو "التّشناف" .. بمعني "ماعليش تسمّطي أحيانا باش تسلّكي راسك، بصح ما تكونيش قبيحة" و "ماتخرجيش للعيب"
وأخير "وسّعي خاطرك" وواصلي البحث عن سبل التعايش مع عجوزتك بسلام ... موفقة ان شاء الله.

[تاج الوقار16]

نعطيك نصيحة أخرى ربما تجيب معاها نتيجة
كي تقولك روحي بدلي
قوليلها وشنو؟! بكل تعجب وشوفي فيها
وغادري المكان بصمت
العجائز يخافو ملي تحمر عينيها وتزعف وتبقى ساكتة يوليو غير يخممو واش ممكن تدير ويديرولها حساب
اذا ما نفعش معاها
وعادت موراها قوليلها يما رباتني وعلمتني واش ندير وكل وحدة تتلهى ببناتها واخرجي واياك تكبر لانو اذا كبرت الشيطان حاضر وتشعل بيناتكم وتخسري زوجك
وانت حاولي تكوني قدامها بابهى حلة واعتبرها ضيفة لازم دايما تشوفك مليحة

[amoulette]

حقا اعجز عن التعبير
ليس بسبب المشكلة و لكن حتى بسبب الردود
اكيد اللي راها تقولك قوليله كل واحد يلهى بروحه وقحة و اصلا لو كانت مكانك لن تتجرأ على هذا القول الا اذا كانت قليلة تربية و حياء
اذا طلبت منك تبدلي ثوب لانه متسخ فهذا يعني انه متسخ مراهش تتخيل و لكن الغلطة هنا راها غلطتك كيفاش تقدري تقعدي لابسة ملابس متسخة و تزيدي تقولي ما عنديش وقت و عندي مسؤولية !!, النظافة من الايمان يا اخت كيفاش تشوفيها تضييع وقت
خصصي ملابس لشغل الدار و كي تكملي غيريها فورا
اما بخصوص الامور الاخرى اذا قاتلك ديري حاجة و ما بغيتيش قوليلها مباشرة منقدرش نديرها ولا معنديش وقت دروك و ما تنسيش انكم راكم عايشين في دار وحدة
الجار و نعاملوه بالحسنى فما بالك بشخص يعيش معك تحت سقف واحد
وحدة تقوللها طنشيها و الاخرى تقوللها شنفي عليها و حمري فيها عينيك
الله يبعدنا على النساء اللي كيفكم افاعي الله يحفظ و يستر
فعلا بعض الردود يجب ان تراقب قبل النشر لانها لا تساعد على حل المشاكل بل تزيد الطين بلة

[حسناء بنت الجبل]

أختي عشر أعوام و ما تقدريش تحكمي أنك عرفتي الناس ، فما بالك بسنة ؟؟؟؟ و سؤال واحد ،كيف تأكدتي انها تكلم مع صديقاتها و تقول : "لو كان ما نقولهاش بدلي ما تبدلش "


يا أختي المثل يقول : خوذي الراي لي يبكيك أما لي يضحكك يضحك عليك

حاولي التأقلم معها قدر المستطاع فهي مهما فعلت ستبقى و تظل والدة زوجك و ربي يصلح الأحوال

[النجمة القطبية]

سنة واحدة زواج وبنت واحدة ومعندكش الوقت تبدلي ملابسك ومراكيش قاعدة غير لهدا الامر !!!
حيرتيني مالا في واش راكي تقضي وقتك وكيفاه راكي تستقبلي زوجك
يا اختي راكي عروسة في بداية الحياة ومقتبل العمر هنعلي بليس ورتبي امورك
وادا حرتي في فستانك كيفاه تبدليه واش ديري كي تولي بولدين ولا ثلاث هدا كامل وانتي ماكثة في البيت ومعندكش الوقت
تحبي الصح حيرتيتي وملقيت ما نقول

[نُـون]

"كي تقولك بدلي قشك قولها قولي لولدك يشريلي :)
ولا كاش ما عندك رويبة هاتيها"
بصراحة
شعرت من موضوعك أنك ترغبين أن "تخرجي فيها طول"
والحل الافضل "اللي حابتنا نقولوهولك
تقولي لراجلك ديرلي داري وحدي."
"روحي قوليلو يديرلك دارك وحدك وهنينا
:) "

[حسناء بنت الجبل]

"كي تقولك بدلي قشك قولها قولي لولدك يشريلي :)
ولا كاش ما عندك رويبة هاتيها"
بصراحة
شعرت من موضوعك أنك ترغبين أن "تخرجي فيها طول"
والحل الافضل "اللي حابتنا نقولوهولك
تقولي لراجلك ديرلي داري وحدي."
"روحي قوليلو يديرلك دارك وحدك وهنينا
:) "

الله يعطيك الربح ، ههههههه ضحكتيني ، الاختصار المفيد

[ايمان4]

نصيحة من قلب يحب الخير و السلام ... ما تقوليلهاش حاجة تقدري تجبدي بيها العيب حذاري ثم حذاري ثم حذاري يعني المشكل هذا انا و ممكن نطيح فيه لكن احذري خطييييك من المشاكل ...تبدلي روبة عجبني رد واحد الاخت قاتلك خصصي فستان او اثنان للشغل فقط يعني كي قاتلك متسخ يعني تاع الصح متسخ و كي توني تشوفي فيه ماشي مسخ اساليها مباشرة قوليلها معليش خالتي غير درك بدلته راه متسخ اين ؟ بحسن نية و بنبرة حسنة يعني اذا لم يكن متسخ مراحش تقلك اصلا بدليه راها تعلم فيك ...دار العيال تعلم علابالي مراحش تحبك كما يماك بالصح دار الناس تبغي الصبر لي حنا بنات اليوم ربي يسمحلنا مع والدينا و ما عدناش ...الصراحة رجعنا ما نحترموش الكبير و لا الصغير ...معليش واش فيها اذا نظمتي روحك علابالنا مسؤولية لكن خصصي فستانين للشغل و كي تكملي بدليه و البسي او استحمي ع حسب ..و امشطي شعرك و و و ...و قابلي بنتك راه عندك النهار طووول ..لكن لكان تقوليلليها حاجة تبقى ف خاطرها تقدري لا قدر الله تصرا مشاكل مع زوجك و تطلقي و تبتمي بنتك ع جال بدلة متسخة؟ و الله غير نبغيلك الخير صعييييبة تكوني في النعمة و تخرجي منها ... لانو راكي فيها تشوفي غير السلبيات لكن كي تخرجي يبانولك الايجابيات لي راكي عمياء عليهم درك و تندمي واحد الندم غير ربي لي عالم بيه و تماك ما تلقايش يد المساعدة و تتبقاي تتحسري و ما تعرفيش اصلا كيفاش تتصرفي و يفوتو عليك ايام سوداء

[ايمان4]

و ما تديريش ع الناس لي ف محيطك ما علاباليش صديقات بنات الخالات و لا ما علاباليش انا ... لانو و الله و تجي فيها ما تدير واش راها درك تقلك ... و ممبعد تبقى هي تغير فيك بحياتها لي اصلا كما لي راكي عايشة فيها انت و مراهاش تبانلك سعيدة تولي تغيري منها و هي تتعمد باش تغيرك باش تزيدي تكرهي حياتك احبي زوجك و احبي امه علابالي ممكن الحقرة و اللظلم احيانا لكن اصبري ع الشي لي يتقدري تصبري عليه و تشوفيه شيء تافه مراحش يؤثر ع حياتك الزوجية مباشرة ... الله غالب السكنى مع اهل الزوج هاك ... لكن واش تديري الشباب الله غالب عليهم كلش غالي عليه السكن غالي ...الكرا غالي ... لازم الانسان يتمشى ع حسب الامكانيات ما تزوجتيش ميلياردير ... شاب في مقتبل العمر يبني في روحه ... انا من عندي ما تسمعيش كلمة تاع قولي لها كذا وبخيها كيفاش تقلك متسخة ما نعاونكش فيها و ممبعد ندي الاثم تاعك و تاع بنتك مستحيييييل .... ساعفي و كي تستقلي بدارك وحدك ان شاء الله تقولي الحمد لله صبرت و نلت و درك راني نعيش في السعادة مع زوجي ان شاء الله امين نتمناهالك

[أمة الرحمان رقيّة]

السلام عليكم اختي

انا اصدقك فيما تقولين واعلم ان ثوبك غير متسخ لان حماتي شبعت فيا انتقاد في لبستي ايضا

كانت تقول لي قنادرك عراض وعلاه ماتلبسيش كيما النساء تاع الفاميليا، انا كنت اعلم لماذا ارتدي قنادر عراض لاني في البيت الكبير ويجب ان احترم نفسي واحترم والد زوجي أما بيني وبن زوجي فذلك شأني الخاص


نشفى مرة كنت نفور في الكسكس وقالت لي غسلتي يديك قبل ما تمسيه؟


اما على التدخلات انا شخصيا شحال من مرة قلتلها خليني نخدم خدمتي كيما نعرف
خاصة بعد ولادتي اصبحت تتدخل في كل شيء نلبس لوليدي حاجة كون نروح ونرجع نلقاها بدلتلو قشو
حتى الاكل تسبقني باه تحضرلو الاكل قبلي
انا سايرت في امور حتى تعبت وقلتلها ماتزيديش تقوليلي واش ندير وواش مانديرش
الكوزينة كوزينتها تدبر راسها فيها لكن حياتي الخاصة لا

ورغم اني هدرت الا انها مزالت تتدخل


النتيجة تاع هاذ الشيء انهم يكرهوك ويعودو وين يروحو يشكيو منك للناس انك ماتصلحي لوالو

المهم تربحي راحة بالك ، انا حماتي والله ثم والله نبوس وليدي تقولي ماتبوسيهش!!! اتذكر حتى مرة لما انجبت ابني الاول كانت تمنعني من الاستحمام ,,يعني ربي يكون في عونها صح لي راها عايشة مع عجوزة شغلها الشاغل واش دارت كنتها


اختي التفتي لحياتك ولا تسمحي لاحد ان ينغص عليك معيشتك

الله اعلم بالنوايا وانت اعلم منا بنواياحماتك، لكن الردود التي تجدينها في المنتدى اكثرها تكون ضد صاحب المشكلة والامر هذا صار عادي
اذا لم تنجحي في وضع حدود بينك وبين الاخرين فيما يخص حياتك الشخصية فانت لست مؤهلة لان تكوني زوجة وام بشرط ان يكون كلامك مؤدبا وذلك لان ديننا يحث على هذا

لماذاينزعج الاخرون من حياتك؟ طالما هي حياتك انت فقط؟
مازلنا لم نفهم أن عيش الكنة في بيت العائلة لا يعني أنها ملك لحماتها

والله المستعان


ارجو عدم الاقتبااااس