وجهوني هبلت

[مشكلتي]

السلام عليكم راح نهبل والله انا فتاة عمري 19 سنة جبت الباك العام لي فات ب 13 ادنى معدل فمشواري الدراسي للاسف من تم وين تبدل كلش مدولي رياضيات واعلام الي فولايتي ودخلت فاكتئاب بسبب التوجيه درت شبه طبي ومقبلونيش يعني وين حطيت يدي مصلحتش والخيرة فيما اختاره الله مقديت ني نقرا ني نعاود الباك الرقاد وخلاص جبت 9 فالسداسي الاول غير بدعاوي الخير مبذلتش ادني مجهود للاسف الشديد والسداسي الثاني الوقت ضيق مقديتش نريفيزي المهم 9 ايضا بصح مانيش بعيدة يعني نطلع ثانية رياضيات مانيش بندير اعلام درككك كي خرجت نتيجة الباك حسيت بتأنيب الضميررر لانو معاودتوش وقعدت حوالي 4 اشهر فالمنزل بسبب الاضرابات وكي شفت النتائج ولي عاودوه جابوا مليح ندمت اشد الندم وقررت نعاودو بصح علوم تجريبية وانا كنت تقني رياضي قررت هاذ الصيف نقرااااا علوم بصح خفت نتغبن مع العلوم وسيرتو قاع مانيش قاريتهاا مع العلم اني متفوقة في اللرياضيات وزيد الفيزيك والمات تاعهم ساهلة واش رايكمم رايحة نهبل الحيرة قتلتني حتى اصبت بالارق رايو عليا تعيشو

شكرا

[~~ كَمَا الوَدْقْ~~]

وعليكم السلام : اختي الفاضلة كلنا نمر بأوقات عصيبة ..ليست نهاية العالم انك لم توفقي في الدراسة ..لست فاشلة عليك بالمحاولة ..انسي امر بكالوريا 2019 فكري في المستقبل تزودي اياك والاستسلام للافكار السوداوية التي تحيط بك ..توكلي على الله ..ثم استخيري اي الشعبتين تلائمك ..عيشي على الامل ..احب ان اخبرك انني اجتزت البكالوريا 4 مرات ولم احقق اي شيئا يقربني من حلمي لكني لازلت احاول ..وفقك الله وسدد خطاك*

[هـــدوء]

الشي لي تهدري فيه اسمو نتبع ما في الغار و نخلي ما في يدي.
المشكلة تاعك هي عدم الرضا, من أول لحظة ماعجبكش وش حققتي بيديك و قعدتي تعسي في لي دا و عاود و لا قعد.
خلاص حددتي مشوارك كمليه للأخير و ما تعسي حتى واحد التاي بروحك برك و بكيفاش تتطوري و تتحسني.
عزيزتي نتي قريتي تقني رياضي وش توقعتي يوجهوك مثلا؟
شعبة الرياضيات و الإعلام الآلي و تحديدا الإعلام الآلي من أفضل الشعب إذا ماكانتش هي الأفضل على الإطلاق.
بدل ما تمدي فرصة لروحك و تقراي الفرع هذا بكل إيجابية و حماس رحتي تفشلي في روحك و مارضيتيش مع أنك نجحتي في الباك و درتي فرع مميز.
لوكان مديتي لروحك فرصة تقرايها صح خاصة و أنك جبتي 13 شعبة تقني رياضي وين المفروض تكوني ملمة بالفرع هذا لوكان راكي نجحتي بتفوق.
هذا 4 شهور إضراب و جبتي 9 مالا لوكان جيتو تقراو يوميا ببرنامج مكثف شحال تجيبي؟
و تزيدي تكتبي فيها بلي جبتي 9 و نجحتي بالرقاد !!! هذاك راهو فشل إذا ماراكيش فايقة.
على كل حال مازال كاين وقت و تقدري تستدركي أخطاءك و الإنسان راه ديما يتعلم.
شخصيا نقولك ما تركزيش على الباك على حساب دراستك الجامعية.
كملي في الفرع تاعك و حاولي تجتهدي فيه أكثر بش تتميزي و لا مانع أنك تعاودي الباك في نفس الوقت.
و أخيرا شعبة العلوم التجريبة مش بالسهولة هذيك مقارنة بالتقني رياضي, العلوم و الفيزياء تاعها هي نفسها تاع الرياضياتيين بدون القيمة المطلقة فقط بالإضافة إلى برنامج معمق في مادة العلوم الطبيعية.
بالتوفيق.

[طالبة علم شرعي]

سلام عليكم
اانا ننصحك تكملي في التخصص ... حتى لو قررتي تعاودي الباك
وتبحثي عن كلا التخصصين اقصد رياضيات واعلام الي فمهما كانت الرياضيات ملفتة للانتباه فالاعلام الالي اكثر منها خاصة انك بعد دراستها تستطيعين تطبيق ما درسته على الواقع
بالتوفيق

[سيرين راجي]

السلام عليكم
بصراحة انتي ماقلتيش واش من تخصص كنتي حابة تديري قلتي طول رياضيات والظاهر ماكنتيش حابتها عن تجربة ننصحك عاودي العام الجاي واختاري تخصص فيه خدمة البلاد راكي عارفتها المهم تلاقاي خدمة مش مهم واش تقراي
وبالنسبة للقلق والندم ماعندهم ما يديروا بلا فايدة فكري فالجاي برك

[مسلم أمره لله]

نصيحة عاودي في التخصص تاعك
علوم يحاسبو عليها ياسر ومادة جديدة عليك ممكن تهبطلك المعدل
وياسر لي كانو معانا ودارو حاجات اخرى لي نجحو تمنينا نكونو كيما هم
لكنهم كانو شجعان وتقبلو المخاطر واكيد تعبوا باه نالوا
انتي معاودتيش الباك العام ليفات خلاص انسايها وعاودي العام الجاي وين راه المشكل
وعاودي في تخصصك انتي ادرى بيه

[solinne]

يا بنتي كملي في التخصص تاعك ما خصو والو الشهر هاذا حضرت سوتنونس تاع ختي كملت ماستر في نفس التخصص الي مدوهلك والله غير الميموار تاعها عجبت بزاف لي جيري تحت. طريقة الالقاء حصلت على أعلى نقطة16ظ«5 وضرك راهي حابة تكمل دكتوراه ان شا الله ما ترجعيش اللور والوقت راه يمشي كملي ورضاي بواش كتبولك ربي

[تاج الوقار16]

كاستاذة علوم تقولك الأمر صعب انك تعاودي الباك وتجيبي مليح لكن ليس مستحيلا اذا قريتي دروس خصوصية علوم
تقدري تتفوقي في تخصصك والعلم
مافيهش حاجة دونية
لما تحصلت على البكالوريا اعطوني بيولوجي
بكيت وما حبيتش نقراها العام الأول طلعت بالتطباع
بعدها عشقتها وتفوقت فيها ودرك انا استاذة علوم ولو لم اكن كذلك لسعيت ان اكون
احيانا نحن نمشي والله يدفعنا نحو الطريق الانسب الذي نراه عكس ذلك
بالتوفيق