انا في مصيبة ارجو النصيحة

[مشكلتي]

بسم الله الرحمن الرحيم
السلام عليكم و رحمة الله
اللهم صل و سلم على الحبيب محمد
انا امرأة متزوجة مند خمس سنوات و لدي ابن و انا و زوجي نحب بعضنا جدا اخدته فقيرا ليغنينا الله انا عندي دراسات عليا و بعد الزواج ربي رزقني بعمل شريف جدا المهم في هدا الاسبوع زوجي قال لي داهب البحر مع اصحابه لمدة ثلاث ايام على الاكثر ودعنا بحرارة انا و ابنه في الليل اتصل به لم يرد بعث مساج راني مليح على غدوة البورتابل مقفول إلى اليوم توسوست سالت عن اصحابه اللي قالي رايح معاهم و جدتها كدبة انصدمت رحت لدار العيال اين نعيش ام أجد ولا ورقة تخصه لا الكارت ولا برمي و لا باسبور و الشي تأكدت انو خارج الوطن و في اليل كوناكتا الفايسبوك جديد اضفني فيه قال لي انه في اسبانيا فيزا لعشرة أيام و يريد أن يحرقها و يبقى باش يخدم بحكم انو 3 سنين بدون عمل أو انا نبكي و هو يبكي قال لي انه مع مغربي في استوديو و يريد العمل في الفلاحة كدب مفنن ثم على غدوة يجيني الخبر اليقين انه مند سنتين متزوج من بميقرية عندها 42 سنة جارتنا تعرف عليها بعلمي كان أبوها مريض و كان يعتني به بحكم انو كل بناته و أولاده في فرنسا المهم تزوج عرفي في 2017 و ثبته في المحكمة في جانفي2018 و داروregroupement familial و راح عندها بدون ان يصارحنا و لو بكلمة ترك كل شي راح كانه هارب انا منهارة و مصدومة و جثة فوق الأرض انني اموت و صارحته في الليل انصدم و لم يجد ما يقول كان يريد اللعب على الجبلين و انا المستغفلة و الغبية الوحيدة في القصة تخيلو الوضع انني منهارة اسبوع و هو يبكي قلتلو تعال و كان شي ام يكن قال لن يأتي إلا ادا عمل اوراق الاقامة متمسك بالاوراق مهما يكن قلتلو تعال و طلقها لكنه يقول ادا طلقتها سانكشف و لن يعطوني الاوراق واليوم لم يعد يبكي بل يضحك انني في مصيبة و أزمة أحتاج النصيحة و الأمور القانونية و الدعاء كثيرا تنصحوني انا اختكم في الله علما انو عشقته و الكل انصدم لأنه موضي مصلي يحشم لا يتكلم إلا نادرا الكل منصدم و لكن ما قام به غدر و خيانة و تحايل و حيلة و خبث رهيب سنتين و هو يمثل و الامرّ من دلك مند بداية علاقتهما و انا شاكة سنتين و انا اواجهه بالأدلة و هو ينكر و يحلف على المصحف انو ليس بينهما شي سوى العناية لأبيها مقابل مبلغ شهري انه طماااااااع جدا خدمت عليه دم قلبي كسيتو وكلتو شربتو راني هابلة ما العمل غدر عائلتي التي وثقت فيه و اكل ملحنا و دخل بيتنا و كل شي انني اموت منهارة ما العمل ارجوكم ارجوكم و هو مازال يريدني و ابنه و لكن مع تلك العجوز تخيلو صورها في الفايسبوك ير محتشمة و قال لي ان دلك قبل أن يتزوجها و قلتلو انت ديوث انا لم يكن يقبل ان اتمكيج أو أي شي كنت محافظة عليه و على شرفو لم اجرحه و لم تنقص من قيمته و هناك الكثير من التفاصيل لم ادكرها

[نجاة^^]

وعليكم السلام*
ربي يفرج عليك أختي لم أجد ما أقول حقيقة القرار يعود لك ،،واحد ماراح يقولك طلقيه وخاصة عندكم ولد ،اسناي يرجع هاذ المرة وحاولي تتفاهمي مع زوجك ان شاء الله الأخت زبدة ذايبة والبقية ينصحوك
غريب أمر الرجال "والله'' خيانتهم تهز الأرض والسماء معا مع انو تزعمين أنه يحبك*
لا حول ولا قوة الا بالله**

[ع.عيسى]

لا حول ولا قوة الا بالله العلي العظيم.. والله غريب أمره.. يحرق ويخليك ويخلي ابنه.. هو تزوجها طمعا في الإقامة بالنسبة له هي مجرد أوراق.. لذلك رايح يرجعلك بعدما يتذوق مرارة الغربة. هو عمبالو ساهلة... والله يا اختي مالقيت واش نقلك.. في النهاية رايج يرجعلك* واذا ما سمحتيلوش ما عليك لوم.. ربي يهديه ويصلح احوالك*

[ابو سليمان10]

غريب ...لا حول و لا قوة الا بالله
..

[سيدتي الفاضلة]

وعليكم السّلام ورحمة الله وبركاته،
بدءا، أحيّيك أختاه، أنتِ امرأة مؤمنة وقويّة والدّليل أنّك كنت السّند والدّعم لأسرتك وعملتِ مابوسعك للحفاظ على تماسكها وسدّ احتياجاتها الماليّة. لكن تجري الرياح بما لا شتهي السّفن. طموحات وتطلّعات زوجك كانت مختلفة تماما، خطّط لمستقبله وسعى إلى تحقيق أحلامه دون اطلاعك عليها لاقتناعه بأنّك سترفضين رفضا قاطعا وربّما ستعيقينه بطريقة أو بأخرى. المهمّ حقّق مبتغاه وها أنتِ تبكين زوجا وحبيبا تخلّى عنك وعن ولده من أجل تحقيق طموحه. ربّما يعود يوما ما، وربّما لا، وربّما تكون عودته متأخّرة جدّا...
بغضّ النّظر عن كلّ المآسي والأحزان التّي تسبّب فيها لك، أراه الخاسر الأكبر. تزوّج زواج مصلحة "بقاورية " و"سمّح فيك و فوليدو " سيعيش بدون كرامة بعد أن اسودّت صفحته هنا، ورحل طامعا في "إقامة وربّما وظيفة " هناك.
لا تعيشي الماضي لأنّه سيحيي ذكريات ممزوجة بالسّخط والحنين، ولا تعيشي المستقبل كي لا يضيع شبابك على أمل رجوعه، بل عيشي الحاضر وفكّري في نفسك وابنك. ما حصل قد حصل، المهمّ أن تخرجي من أزمتك هذه بأقلّ الأضرار. تخيّلي انّه مات، أجل مات والسّلام .. لا تسمحي له بأن يملأ رأسك بالوعود والأمال الواهية .. ان عاد يوما، لكِ أن تقرّري حينها ان كنتِ ستسامحينه أو لا، وإن لم يعد فلن تتأثّر حياتك كثيرا (ان تجاهلت وجوده وتعوّدت على ترتيب أمورك والعيش بدونه منذ اللّحظة).
كوني قويّة فحسب وفكّري فقط في نفسك وابنك.. "واللّي باعك بالفول بيعيه بقشورو" والحبّ يا أختي أفعال لا أقوال. انظري لمن أضاف لعلاقتكما وضحّى و ساند أكثر لتدركي من كان حبّه أقوى .. للأسف تعلّمنا الرّومنسيّة من المسلسلات وفهمناها فهما خاطئا. ونصيحتي لك لا تفكّري في الطّلاق ولا تتسرّعي في اصدار حكم ما .. احرصي فقط على الاستقرار المعنوي والنّفسي لك ولابنك واحاطتكما بحبّ العائلة والمقرّبين حتّى لا تستشعران الفراغ الذّي خلّفه .. دعي الأيّام تكشف لك ما سيعينك ان شاء الله على اتّخاذ القرار المناسب.

اتمنّى لك الخير حيثما كان ولا تقنطي من رحمة الله
سلام
.

[الأمل المفقود]

سلام عليكم اختي
سمحيلي أنصحك و ربي يجعل الخير في لي صرالك ، اقولك خير لأنو تكشف على حقيقتو لي هي أنه هو و الشرف ما يتلاقاوش هو و الرجولة ضدان لا يلتقيان
أنت كنت فحلة معاه و أمراة تاع دار و مسؤولية و حبيتيه بصح حبيتي الشخص الغلط و جاالوقت وين لازم تنسايه لأنو ما يستاهلكش حتى ولو كاين لي قالك يروح و يوليلك
أولا و قبل كل شيىء نحيه من بالك و قلبك حتى تعرفي تفكري مليح و تكون خطواتك القادمة مدروسة و واثقة من روحك لانو القلقة و النرفزة تعقدلك الوضع
ثانيا رفعي عليه دعوة قضائية بتهمة الإهمال العائلي و طلقي منو لانو لو تستمري في الوضع هذا تضيعي نفسك و إبنك
إستشيري محامي و عملي خطوات اللازمة حتى تضمني على الاقل حق إبنك ما يضيعش
و تاكدي المحكمة تحكم عليه غيابيا و أول ما يدخل من المطار للسجن مباشرة
ثقي في الله و حمد لله ربي كشفو اليوم قبل الغد و هاكدا و لا أكثر
صبري و أنسايه و ما تفكريش فيه نهائيا لانو مايستاهلكش و شوفي حياتك و حياة ابنك هذا هو الأهم
لا حول و لا قوة إلا بالله
سلام عليكم و رحمة الله

[Ibtissam bl]

لا أعرف ما أقول أختي غير الدعاء ربي يفرج عليك إنشاء الله*
لا تقنطي من رحمتي الله

[محارب الحمق]

التعدد حلال زواج المصلحة حرام. فرج الله كربك

[sam2016]

لا حول و لا قوة إلا بالله، يروح يخلي مرتو وبنو وحدهم ، الله يعطيني قلبو، أو بالأحرى الله لا يعطيني قلبو، خان الأمانة ، القرار يرجع ليك أختي وربي يكون معاك ديري اللي تريحك هادا توقعي منو كلشي يا لطيف يسمح في عايلتو... اللطف يا رب

[ايمان4]

سبحان الله عصر العجائب ... لا حول و لا قوة الا بالله ...سمح فيك و في ابنه الصغير مع انو ربي رزقه ببنت فاميلية لي صبرت معاه و كانت مزال ناوية تزيد تصبر و جابتله ولد واش بغى اكثر من الدنيا الظروف المادية مع الوقت تتحسن الاوضاع المهم انت كان عندك عمل قار على الاقل ...و بالالحاح و الدعاء كان راح يرزقع ربي عمل ... لكن هو اختار طريق عجيب تزوج و راح للخارج و سمح فيكم كامل يعني ما علابلهش بيك قاع و بولدك اسمحيلي مي كون ف قلبو غير شوية حب مكانش راح يروح السيد هذا اناني يقلك لا نبغيك و على جالكم لا على جال نفسه لانو مش صامن روحو فاوك راح يجي و ممكن ما يرجعلكمش اصلا ... اعذريني اختي راح تفون عليك مدرة راح تكوني فيها جد حزينة و سينكسر خاطرك معليش عيشيها بكل تفاصيلها و بعد شهر او شهرين راح تتقبلي الواقع انو زوجك اناني و سمح فيكم اعتبريه مات و عيشي حياتك و اعتقد مزالك في قمة شبابك اذا ربي رزقك بزوج اتزوجي و ديري حياتك و اتهلاي ف ولدك و هو حتى اذا رجع اكيد بعد فوات الاوان علابالي درك تبانلك صعيبة لكن السنة ستدفع اختها توجدي نفسك ف العشر سنوات و السيد مزال مجاش ...

[Fatima bou]

لا أعرف ما أقول أختي غير الدعاء ربي يفرج عليك إنشاء الله*
لا تقنطي من رحمتي الله

[English is me]

فرج الله كربك اختاه عليك بالصبر ولدعاء في قيام الليل ربي يفرج عليك

[شمس 15]

لا حول ولا قوة الا بالله....
كوني قوية ختي اولا لنفسك ثانيا لولدك انت في وضع صهب لازم توقفي على رجليك عليك بالدعاء و كثرة الاستغفار و الصلاة في الثلث الأخير من اليل.... تفرج بحول الله..
و هو ميربحش لانو ما خانكش انت برك خان وليدو خان باباك خلن ماماك خان خاوتك خواتاتك اعطاولو امانة خدعها قال باش ندير كوارط ههه كوارط يشفهولو غدوة مع ربي مع وليدو مع مسؤوليتو عليك ......
درك كي تزوج يعرف وش عندو درك تولي ليك وش راكي مقررة تصبري عليه و لا تخلعيه....لانو شفتهم مع الgاوريات كيفاه يولو خدام مذلولين معندهم و لا كرامة بصح على جال كوارط يقبل ينذل يتسب .....
خسارة فيه تعبك ووقفتك معاااه...

ملاحظة فقط للنساء ماشي راني نحرض لكن يا امة الله متخدميش باش تصرفي و تقضي على الراجل و على اولادك القوامة للزوج و ليس للزوجة...
الا في الظروف الحالكة معليش اذا صرفتي احتسبي الاجر...

[.kiki]

شقيتيلي قلبي يا ختي وش راح نقولك هادي صح مصيبة نقولك فيها ربي يصبرك و يعوضك خير ان شاء الله عليك بالدعاء و كثرة الاستغفار عسى الله يجعل لك مخرجا.. أما بينك و بينو منقدرش نقولك حتى حاجة هادي حياتكم و نتي أدرى وش يخرج عليك.. مش من والا يقدر يقول كلمة طلاق و مش أي واحد يقدر يحس بيك.. ربي يفرج عليك و يخرجك من هاد المشكل الى هناء و سعادة و ربي يعطيك القوة لي تخليك واقفة على رجليك و تمدي لولك وش يحناج عاطفيا و ماديا.

[تاج الوقار16]

اختي العزيزة مشكلتك صح حساسة بزاف
ربي يفرج كربك
ولكن راح ننتقد ك قليلا ثم نمر الى الحل
نصرف على رجل هذي كارثة درتيها
انت درتيها فوق راسك والرجل لا ينظر أسفل منه
القوامة للرجل قد تعيينه اذا تحتمت
ثم قبلت انو يتردد على والد المرأة قربت النار للزيت واش كنت تستني
تعرف زوج صحابات وحدة راجلها مات ترسل زوجها لصديقتها يطمئن عليها ويقضيلها بعد اشهر تزوجها!!!!
المهم راجلك لا امل فيه
ارفعي ضده قضية ولازم يدفع الثمن
لوكان عدد بطريقة شرعية اقل ضررا مما فعل كذب وغدر وخيانة واستغلال
قضية نفسيتك هي الأصعب لازم تكوني قوية شدة وتخفاف بالوقت
وقولي اللهم أجرني في مصيبتي واخلف لي خيرا منها
يعوض ربي خير منو
حذااااااااار تسمعي لوعودو وتحمي للحب القديم راح تخسري نفسك وما يرجعلكش
اللي باعك محال يشريك
وفرضا ناوي يرجع شمال راح تستني حتى تزوج وليدك؟
اقرأي لناعمة الهاشمي تستفادي منها

[mmoustafa]

لا حول ولا قوة الا بالله نصيحتي عيشي حياتك ما إيدي تتنازلي وضعي حياتك ماهوش رايح يرجع إلا يخدم أوراق وهذه رآه تطول الله يحمل معاك