هل أكلمه ؟

[مشكلتي]

السلام عليكم و رحمة الله
كان لدينا اجتماع للصيادلة.
وهناك التقيت بشخص أبدى اعجابه الكبير بي...و قال أنه يود التقدم لخطبتي مباشرة ...و أنه ليس من الأشخاص الذين يودون الدخول في علاقة أو التعرف...الخ.
بل هو جدي.
لم يعرف الكثير عني ولا أنا .
لأنني كنت مسرعة جدااا فأبي كان ينتظر في السيارة و قد كان في عجلة من أمره...لذلك لم أستطيع اطالة الحديث مع هذا الرجل او سؤاله على أشياء اخرى .
اعتذرت منه و هممت بالرحيل.
لكنه أعطلني رقم هاتفه و طلب مني أن أتصل به من رقم مجهول لأعطيه معلومات عني و عنواني ...الخ.
اخذته و خرجت.
المشكلة أنني في حيرة.
أحيانا أقول أن هذا الأمر عادي...فأنا لن أكلمه للتعرف أو المسخرة...بل سأكلمه مرة واحدة برقم مجهول (ماسكي) فقط أعطيه عنواني وانتهى.
و احيانا اقول مستحيل ...كيف اكلم شاب على الهاتف !!! لم افعلها من قبل و لن أفعلها ابدا...ربما عيب او حرااام او ليس من الاخلاااق.
هو يظهر أنه شاب محترم .
ماذا أفعل في رأيكم.
هل هذا شييءعادي...ام أنه ليس من أخلاق الفتيات العفيفات ؟
هل أترك كل شيء للمكتوب كما يقولون ؟؟؟
ما رأيكم

[toulay]

السلام عليكم
الله يبارك كان عنده الوقت باش يملي عليك الرقم تاعه ومكانش عنده الوقت باش يسقسيك وين تسكن
شوف يا اختي نقولها ونعاودها كيما يقولوا فالاعادة افادة الرجل مين يحب وحدة ويكون حاط عينه عليها حتى حاجة ماتوقف في طريقه يدير المستحيل ويطيح وينوض باش يوصل لهاذيك البنت
وصدقني كون تعيط بالماسكي كيما زعمة قالك راح يقولك واشبيك هذا علاش خبيتي رقمك ولا خفتي ناكلك
صحا قولي على اي ساس عرفتي بلي راهو sérieux ومحترم زوج دقائق حكيتي معاه خلاص وليتي تعرفوا حق المعرفة ياو راهم عايشين مع بعض في نفس الدار لسنوات وميعرفوش بعضاهم مليح
وهاذيك تاع عجبتيني وناوي الخير وخاطيني الدخلات والخرجات ومنحبش نتمسخر ببنات الناس هذا هو الموشح المشهور
ماتعيط ماتخمم فيه ماوالو انسى الموضوع واذا السيد هذا راهو صح مهتم راح يجبدك يالوكان من تحت الارض ويديك غير هو
متكونش من النوع لهات برك يتخطب ويتزوج بالعكس خمم مليح وثقل روحك وكونك رزينة و واعية
بالتوفيق

[مراد سابقا10]

انا نعرف الرجال كي يبغاو يخطبوا وحدة يسقسيوا عليها مليح وهذا شافك من المرة الأولى قال نخطب
فيه احتمالين : يا هذا الرجل ذئب بشري واشي يديرلك الثقة قالك عيطي بالماسكي ومبعد يوقع بيك
يا احتمال ثاني : حتى ولو كان صحيح النية ممكن فيه علة معينة جامي الرجال يشوفوا وحدة هكذا اول مرة يقولك نخطبها مستحيل وفي كلى الإحتمالين الأمر مريب لذا متعيطولوا ما والوا

[زبدة ذايبة]

يعني انت تقبلي على روحك تعطيه المعلومات عن نفسك

ومن بعد يقولك لا لا كبيرة بزاف أنا نحوس على وحدة عندها 18 سنة

أو يقولك أنا عربي نحوسها قبايلية أو العكس

وربما تسمعي حجج مؤلمة ومؤذية منه

حتى تولي تقولي واش اداني نعيطلوا

كاين ألف طريقة وطريقة يلقاك بيها

وحركات الأفلام والمسلسلات لاحقيقة لها في الواقع

حب من أول نظرة من طرف من ؟؟؟؟ من جزائري

هذا لايحدث في أرض الواقع حتى يحدث في الأحلام

خاصة موضوع الزواج يحتاج من الشاب ألف تفكير وتفكير حتى يقرر ويختار

هذي شافك خمس دقايق قال راني جاي نخطب أظن فيها إن

الأمر الثاني

ماتصدقيش كل ماتسمعينه

الرجالأذكياء لدرجة عندهم القدرة على التلبس بعدة أشكال

من بينها أنهم بمجرد مايشوفو المرأة يعرفوا أي خطة ينفذوها معاها

وانت خطتك واضحة وهي أن تتصلي بيه برقم ماسكي حتى يطمئنك بأنه لايريد التلاعب بك

صياد ماهر لضحية ساذجة

وإذا كان بالفعل رايح يجي يخطبك

ماعليك غير ترمي عليه الماء لأنه سيبحث عنك ويجدك حتما

ماتديري حتى خطوة نحوه

لأنها ستكلفك الندامة في الأخير

[omar07]

يااختي واش دخل الاخلاق في انك تتصلي بيه و تعطيه عنوانك و بما انك تكلمتي على المكتوب فالمكتوب تاني لازم يكون معاه السعي .شوفي اختي ادا هاد الانسان عجبك كيما هو عجبتيه انتي اتصلي بيه عادي ويكون الكلام باحتلرام و قوليله العنوان تاعك و مافيهاش عيب* و خطينا من هادي تاع راكي باغية تعرفي نيته مسبقا غير ربي لي يعرف النوايا و*اعطيه فرصة كيما يقولو وصل الكذاب لباب دارو و اذا راه ناوي حاجة تاع الخير* اوكي لقيتيه باغي يلعب و يفوت الوقت تماك تكوني عرفتي و ماتزيديش تعيطيلو و صايي* و الله يوفقك للخير

[الفتاة الهادئة]

مرحبااا انا رأي مادام عطاك النيميرو اذا راه ناوي بصح على المعقول اعطيه لخوك ولا باباك ياك راه ناوي على المعقول اولا
شرحي لباباك ولا لخوك الموضوع ولا قولي ليماك تتفاهم معاه ومبعد اعطيه النيميرو يهدر معاه راجل لراجل باك اذا جا اللهم بارك واذا لالا ربي يجيب مكتوب واحد ااخر ولكن باش تتصلي ننصحك لا ابدا هو ما خوك ولاقريب ليك النصيحة خطيك من هاذ الشي هذا راي والاختيار يبقى ليك انا لوكان صرا معايا هاذ الشي هه الصراحة ندير نفس الشي هه منكذبش عليك انا متعصبة ممكن زوج كلمات منشدش اموا النيميرو لاغالب حنا هذو هما العادات توعنا ماتهدري غير مع محرومك يعني اللي تعرفيه كيما خوك وباباك وغالبا بن عمك اما من غير ابداااااا والعلم لله . .

[مُحمد رازي]

و عليكم السلام و رحمة الله
نتي صعّبتي الأمر على روحك و فتحتي باب على نفسك لي ممكن يوصلك للندامة
كان بمقدورك و ببساطة تقاطعيه مع الأول و تقوليله هاو ليك الوالد تاعي روح حكي معاه
و باعتبارك راكي تقولي بأنو الأب تاعك كان يستناك في السيارة داك اليوم !
ماشي ديري معاه صفقة تاع نوامر ماسكي بينك بينه !
الواحد لي يكون ناوي على حاجة تاع حلال ما يخافش
بصح لي يقعد يلف و يدور و يبلعط فهذا راه باين
أما باش تكلميه فلابد راح يدخلك في متاهة التعارف
واقيلا تتوقعي راح في أول اتصال يقولك اعطيني العنوان أيا للغدوة يجيب دارهم !
الشاب المحترم ما تقدريش تحكمي عليه نتي وحدك إدا محترم و لا لا
و أكاد نبصملك بأصابع رجليا العشرة أنو هاد الشخص من النوع البلعاط
لي يقولك عيطيلي بالماسكي لا يكاد يختلف اثنان بلي هاد الشي على جال أنه يربح ثقتك و حتى ما تكونش عندك ريبة من جيهته
أسهل حاجة أنك تقدر تعرف فتاة وين تسكن بلا ما تعيطلها و خصوصا في حالة هاد الشاب
لهذا كنصيحة اخطيك من هاد الشي ما شي كيمن هاك يتبنى بيت مسلم
و هادي الأمور لي تكون بدايتها على عجالة دايمن تنتهي بسرعة و على عجالة تانيك

[ing.Youcef]

وعليكم السلام ورحمة الله وبركاته

الوقت الذي أعطاك فيه رقمه كان يمكن أن يأخذ فيه عنوانك ثم "يدبر راسه"

[sohaibdz]

هذا ليس اعجاب بل هذه مجرد "نزوة" مع كامل احترامي لك لا يعقل ان يراكي مرة ثم يقرر الزواج بك !! ماذا يعرف عنك غير شكلك ؟!!خلي عندك عزة نفس و انسي الموضوع

[Elwawy]

نعم كلميه, وفي أول فرصة تظهر نية فاسدة أقفلي الخط. ببساطة

رأى ما يعجبه فيك -إنتهى- سبحان الله تقولون مستحيل تجتمع كل الصفات في إمرأة, هو رأى ما يعجبه و ما يبحث عنه, لماذا التساؤل عن الأشياء الأخرى؟ هل تريدون أن ينبش في كل شيء حتى يجد ما لا يعجبه, رب العالمين أسهل شيء في الكون أن يعجب الشاب بجمال الشابة و يتقدم لها رسميا. أين الخلل, تجد البنات : ياه ما يعرفنيش و يحبني و أعجبته, تبا! نعم هذا هو, هل تظنون أن الرجل محتاج للجلوس و الثرثرة و فهم ما يوجد و لا يوجد في ذهنك و شخصك؟ هذا شيء تقومين به أنتي.

و قاعدة : " الرجل مين يحب وحدة ويكون حاط عينه عليها حتى حاجة ماتوقف في طريقه" ما هذا ؟ أصبحت أسمع هذا كثييرا لدرجة أن من يتقدم لفتاة أصبح يُرفض و يُعَرَّض ل 100 test **** لقياس مدى صبره و مدى تعلقه, الضامن ربي يا عباد الله مابكم هبلتو؟

[بـــيِسَة]

سلام


ياك عندك ابوك ولا اخوتك ذكر او خالك او عمك او ...
اعطيهم الرقم تع الهاتف نتاعه وهو يدبر راسه معاه وكيف يتفاهموا

متحكيش معاه في الهاتف راهو خطررررر و دبري راسك

(و ديجا بيناتنا انت كيفاش تحكي معاه وجها لوجه والتلفون قاعدة تسقسي فينا )
بالتوفيق/تحياتي

[noursm]

نقولك حاجة اختي درك كل واحد يعطيك وجهة نظرو على حسب شخصيته و معتقداته .
هي صح المشاورة مليحة و ماكيش غالطة كي حطيتي موضوعك هنا.
و لكن يبقى الامر جد شخصي و خاصة نقدرو نعتبروه مصيري.
لذلك يا اختي احسن شيء استخيري الله لانه هو وحده عالم الغيب.
انتي استخيري و عاودي و توكلي على ربي و سلمي امرك ليه، صدقيني بفضل معونة الله و استخارته تجيك افكار قاطعة سواء لكي تتصلي به ام العكس ، و اصلا كي تتخذي القرار و تنفديه ماش رايحة تندمي عليه .
و كون جيت في بلاصتك يصرالي نفس الشيء نكون محتاره و ما عنديش رأي معين و ما استطيع فعله سوى الاستخارة.
ربي يكملك بالخير اختي و يحققلك الشي اللي تتمناي .

[Arctic Mind]

:d:d:d:d:d:d:d:d:d:d:d:d:d:d:d:d:d:d:d:d:d:d:d:d:d :d:d:d:d:d:d:d:d:d:d:d:d

[أم رقية نسرين]

و عليكم السلام و رحمة الله و بركاته
نصيحة ختي متكلميهش ابدا و متفتحيش على نفسك هاد الباب
شوفي ختي كانت قدامو فرصة كبيييييييييرة باه يتقدملك كان الوالد معاك كاينة فرصة اكبر من هدي ؟؟؟ بصح كون جا جاد في الأمر
ربي يرزقك ختي بالزوج الصالح

[الفتاة الهادئة]

ان شاءالله تلقاي في اقرب وقت القرار الصحيح وعلى حسب كل هده الردود لا ارى اوجه االاختلاف بينهم ولكناتمنى ان تمشي في صواب