من نتزوج ؟

[مشكلتي]

السلام عليكم
وشراكم ان شاء الله ملاح ؟

عندي مشكلة بسيطة حبيتكم تقترحوا عليا

انا برك حايرة شوي
لما يكون هناك انسان يقولك استناي وعطيني مدة كذا "حتى كي نجي لداركم معندهم كفاش يرفضوا"
وبين يجيك انسان اخر

بين انسان خانه عمرو صغير
وبين واحد كبير شوي

بين واحد ظروفه خايناته شوي وراهي تتحسن
وبين واحد لاباس بيه

بين واحد يحبك ومتجاوزش ادنى حد غير انك تستناي وبلا هدرات ولا طلعات وهبطات غير استنايني وهذا نومرو ختي تسقسي عليك
وبين واحد ميعرفك وفقط كي شكروه جاي لعندك

في زوج ولاد فاميلية ولهم من الاخلاق لي ميتعايبوش عليها

لو قبلت بالثاني يعني خنت عهد ؟ يعني واش ؟
وعلاش حتى نقبل بالثاني خاطر واجد وساجي ؟

قالتها واحده متتزوجيش خاطر مكيش عارفة وش بغيتي

ووحدة قالت شوفي الثاني وقابليه واعطيه فرصة راهو انسان مليح

انت كرجل كيفاش تكون ردة فعلك كي يصرالك موقف هك ؟

[فاطمة البرجية]

يا اختي و اذا عطيتي كلمة للاول اقعدي فيها و ما تخلفيش الوعد نتاعك .

[toulay]

وعليكم السلام ورحمة الله وبركاته
صحا المدة هاذي شحال عام عامين خمس سنين قولي برك شحال وشكون راح يضمنلك بلي راح يبقى عند كلمته وميبدلش رايه
شوف يا اختي اشهر العبارات عند الرجل مين يتحط امام الامر الواقع مزالني صغير مزالني مشي خدام والزواج راهو غالي لازم نرتب اموري وخايف داركم ميقبلوش ومزال مفوتش العسكر وغيرها من الاعذار اللامتناهية la liste راها طويلة وعريضة
لاظروف ولا هم يحزنون الرجل مين يحب وحدة صح ويكون عينه فيها يدير المستحيل يطيح وينوض باش يديها والظروف يضربهم عرض الحائط يالوكان يطلبها غير بالكلمة حتى يرتب روحه شويا مشي يخليها فالمجهول ماعلابالها بوالو وهي غير تستنى مسكينة وهو يغرقها فالكلام المعسول والاحلام الوردية
خمم بعقلك فهمتي لانو صدقني قلبك يديك للهلاك والهاوية وخلينا من الحب ونموت عليك ومنقدرش نعيش بلا بيك اي هدرة فارغة برك ماعندها لا ساس لا راس
ليحبك صح يجي لداركم point barre
اكرر خمم مليح والفرصة تجي مرة واحدة فقط مالا استغلها مليح باش متندمش وتبقى تاكل في روحك وتقول واش داني واش داني
Bref انت صلي استخارة وربي يقدر لفيه الخير ان شاء الله
واش من عهد علاش كنتوا مخطوبين وعاقدين ومبعد طاحت بيه بطلتي عليه ورحتي شفتي واحد احسن منو وانت زعمة كنتي قلتيلوا نبقى معاك في السراء ولا الضراء
مكانش حاجة رسمية يا اختي
l'essentiel القرار يرجع ليك وان شاء الله ربي يوريلك الطريق الصحيح
بالتوفيق

[yassefe]

وعليكم السلام ورحمة الله وبركاته
بالنسبة للرجل لي قالك اسناي نورمالمو يجيب الاهل تاعو ويحكي مع الاهل تاعك ويجي رؤية شرعية علي الاقل ويتم التفاهم علي كل شئ ولتم تقرري ياتقبلي ام لا ......
ونفس الشئ ادا اتاك رجل اخر

ادا كنت عطيتيه كلمة باه تسنايه لازمك تسنايه وزيدي احكي مع الاخت تاعو في التفاصيل كلها ادا عجبك الحال نعم وادا معجبكش الحل لا تقبلي بيه عادي جدا ....

[mustapha_sa]

السلام عليكم و رحمة الله

قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي
الحديث واضح جدا

و لا تنسي الاستخارة

[مُحمد رازي]

و عليكم السلام و رحمه الله
الوقت لي رانا فيه صار من المؤكد بأنو الإنسان لي كيما صاحب الحالة الأولى وين يكون صغير و ظروفه ما تسمحلهش ، بأنو ما راهوش جاد في مسألة الزواج كيما يلزم و هاد الشي بالنسبة ليه مجرد حماس مع الأول يخليك تتوهمي أنو كلشي راح يكون ساهل و جميع الأمور راح تتريقل مع الوقت و يربطك معاه و يخليك ديما معلقة تستني وقتاش يكمل قرايته ووقتاش يلقى خدمة ووقتاش يجوز العسكر ووو حتى يوصل للصورة لي راه راسمها في ذهنه و لي حسب اعتقاده راح تجعله مقبول عند أهلك ، و في الجهة الأخرى المقابلة رآه كاين صاحب الحالة الثانية لي كيما تقولو تصرّف تصرّف رجولي و ترك الأمر حتى مين شاف بأن ظروفه تسمحله للإستقرار قصدك ، بصح نتي دركا رجعتي حايرة في هاد الحالتين كيفاش تتاخذي قرار بشأنهم ! ، للأسف كاين بزاف الحالات تاع فتيات كيمن هاك لي تترك الانسان لي يدير التصرف الصواب من جيهتها و لي يوجّد روحه كيما يلزم قبل ما يدير أي خطوة حتى ما يجرجرهاش و ما يأذيهاش و تقعد تستنى في واحد قادر يجيب بيها شعال من عام و هي تستنى فيه و في الأخير احتمال كبير أنه يبطّل و تبانله في جيهة وحداخرة ، لازم تعرفي أختي أنو هادا الواقع رانا عايشين فيه ماشي فيلم وين البطل يحارب العالم على جالك باش يفوز بيك ، الواقع تاعنا كامل يهدرو هدرة تاع أبطال مع البدوة بصح كي تجي للأفعال الهربة تسلّك ، و تلقي شعال من حالات وين تتعرّف الفتاة على واحد و يدخلها في علاقة مشبوهة و يطروشلها عقلها بالوعود ، و كحالتك تاني نتي وين تعتابري بأنكِ راكي مشاركة في الأمر لاخاطرش نتي المسؤولة أنكِ وضعتي نفسك في موقف ما عرفتيش كيفاش تتخذي فيه قرار ، يعني لو كان ما فتحتيش الباب من البداية لهاد الانسان الصغير ما كنتيش رايحة تبقاي حايرة مع الأخير في شكون لي تقبليه و شكون لي ترفضيه ، بالنسبة لسؤالك الأخير راح نجاوبك عليه من وجهة نظر صاحب الحالة الثانية لي كي شكروه عليك جا عندك ببساطة لو كان صرالي نفس الشي كنت راح ننسحب و نرفض هاد العلاقة عاجلا أم آجلا بحكم هاداك الشخص صاحب الحالة الثانية ما كانش الاختيار الأول تاعك و راه مجرد شخص تقدملك في الوقت غير المناسب
المهم هادي حياتك و الاختيار الاول و الأخير راح يكون ليك ، و إدا حبيتي تبني حياتك مع صاحب الحالة الأولى لي طلب منك تستنيه فلازم تضغطي عليه حتى يدير خطوة رسمية و بشكل مبدئي أما مجرد يقولك حكي مع ختي هاد الشي ما راهوش كافي و راح يطوّل بزاف هاد الأمر و في الأخير يا هل ترى راح صح يوصل لديك الصورة و داك المستقبل لي رسمه و يتقدملك أم راح يشبعك غير وعود و يضيعلك سنين من حياتك ؟

[زبدة ذايبة]

انت في الحقيقة واحد ماخطبك رسمي.

مجرد وعود وأوهام راكي تبني عليها في قرارات!!!!!!!!!

في الشريعة الإسلامية لايخطب المسلم على خطبة أخيه.

وانت قاعدة تخيري وحايرة بين اثنين مايصلحوش في زوج.

لأن واحد فيهم ماجا لداركم بشكل رسمي.

واحد منهم استناي لمن عاش حتى يجي.

والثاني إن كان تقدم ليك بشكل رسمي.

الثاني حطي عليه x لأنه حرام عليك

تفكري في رجل آخر.

واللعب بين رجلين عيب ولا يجوز.

انت في الأخير تفكري في مصلحتك.

ومايهمكش حتى واحد

لهذا حرمت الشريعة خطبة المسلم على أخيه المسلم.

واحد في اليد والثاني في الغار.

واحد تحبيه والثاني ظروفه لاتسمح.

واحد كبير والثاني صغير.

واحد طويل والثاني قصير.

ريحي ماتلعبيش بالرجال.

لأن الثاني لو كان يعرف ان فيه رقم 1 رايح يخليك.

ورقم 1 لو كان يعرف أن رقم 2 رشحتيه للموافقة يروح ومايىجعش.

رح تكوني الخاسرة الوحيدة.

وانتبهي مليح لمكر الله.

الظلم ظلمات يوم القيامة.

واحد تواعديه وتهدري معاه في لحرام لدرجة يقولك أستنايني وتحبيه و....

والثاني مسكين مايعرفش أنه عندك علاقة وتواعدي في راجل على انتظاره حتى تتحسن ظروفه.

وين راكي رايحة يا اختاه بهذ التصرفات.

لا مراعاة للدين ولا للعرف ولا للأخلاق

قيسي على نفسك وشوفي إذا ترضاي تكوني رقم في معادلة.

الله يهديك.

[بـــيِسَة]

سلام

انا في رايي الاول
لانك وعدتيه والتاني منعرف هههههه

اسفة لكن خليك منهم بين 2
ونشوفو الثالث ان شاء الله فيه الخير

تحياتي

[محارب الحمق]

ضحكتني تاع ماتجاوزش الحدود معاك لادخلات لاخرجات لا بلا بلا. مافهمتش تكلحي فينا وللا تكلحي في روحك. السيد اللول طيحك طابلة وفتنك لدرجة انك حبيتيه ووالفتيه وممبعد تقولينا ماتجاوزناش الحدود...ماهذا الكذب والخداع؟ علاقتك مع الأول حرام أصلا ولا يبنى عليه أي شيء لا عهد ولا وعد بالانتظار ولاغيره. اصلا هو لم يخطبك من وليك وما بني على باطل فهو باطل. حقيقة تستحقين هذه الحيرة وهاذا القلق لأن بداياتك خاطئة. ولأختم الأمر....اللي حابك يجيك لباب دارك يخطبك.....نقطة إلى السطر

[2000Radjaa]

:dj_17:
مررت بنفس التجربة و استخدمت عقلي بدلا من قلبي من اجل اختيار
و اخترت الي راح اجي مباشرة الى البيت لكن طلبت منه ان اتحدث اليه قبل ان ياتي الى البيت يعني اعطيت فرصة
و الان راني الحمد لله ; يعني ننصحك اعطيه فرصة ادا لقتيه انسان تتفاهمي معاه ويحتارمك راح تعشقيه بعد لزواج

[زايدي أمحمد]

الله يكون في عونك

[kacimo.samy]

وعليكم السلام ورحمة الله وبركاته
لا تكوني غبية

ايه راكي ستنيتيه ومبعد تريقلت امورو وشاف وحدة خير منك ؟
انا ما نعرفوش بصح سمعت مليار تاع قصص من كلا الطرفين

و حلك واضح يتقدم يخطبك ولا يحط كلمة على اقل باينة و دار جاست
المهم قوليلو ارواح تخطب و خاليه يتربط بيك احسن
راه زمان صعيب

وربي يفرج عليك

[~ابتسامة~]

ربي يفرجها ختيتو

[عماد الفقير]

ضحكتني تاع ماتجاوزش الحدود معاك لادخلات لاخرجات لا بلا بلا. مافهمتش تكلحي فينا وللا تكلحي في روحك. السيد اللول طيحك طابلة وفتنك لدرجة انك حبيتيه ووالفتيه وممبعد تقولينا ماتجاوزناش الحدود...ماهذا الكذب والخداع؟ علاقتك مع الأول حرام أصلا ولا يبنى عليه أي شيء لا عهد ولا وعد بالانتظار ولاغيره. اصلا هو لم يخطبك من وليك وما بني على باطل فهو باطل. حقيقة تستحقين هذه الحيرة وهاذا القلق لأن بداياتك خاطئة. ولأختم الأمر....اللي حابك يجيك لباب دارك يخطبك.....نقطة إلى السطر

ــــ

اوافقك

[رثاآء]

جابلي ربي عندكم باب في داركم؟
علاه ما يجيش هذا مول العهد؟ ولا ما يعرفش بلي البيوت يدخلولهم مالبيبان؟
واخته اليوم حبيبة وغدوة عدوة تكتبي عليها في حماتي وسلافاتي ما دارو فيا .
ما كان لا عهد لا هم يحزنون أصلا ما كايناش خطبة رسمية باه نقولو حط عليك الكلمة
وبالنسبة للثاني "إذا أتاكم من ترضون دينه وخلقه فزوجوه "
واستخيري الله عز وجل وخطيك من هادي الغراميات والفيلمات تع الترك
الله المستعان شوفي صلاحك وصلاح دنياك وآخرتك هذا آخر قولي.
السلام عليكم

[الصديق قروف]

عند قراىتي للعنوان ضننت ان اساىل رجل

ارجو ان تكوني فهمتي

[يوسف زكي]

عليك بصلاة الاستخارة .
تتهيأ لك الأسباب بإذن الله