هل اعترف؟؟

[مشكلتي]

السلام عليكم
انا فتاة في العمر 21 سنة
مشكلتي تتعلق بشاب احببته عندما كنت في الخامسة عشر من عمري
درس معي بالثانوية ، لم احدثه مطلقا لكنني احببته جدا ،،
بعد البكالوريا درس كل منا بتخصص اخر، لكنني ورغم اني لم اكن اراه بقيت متعلقة به
بعد عام فوجئنا اننا بتخصص واحد وبفوج واحد (عاودنا البكالوريا في زوج) ،، وها انا بعامي الجامعي الثالث
المشكلة ان الامر اصبح متعب ومرهق بالنسبة لي كليا
فانا لازلت احبه، لو كان مثل السابق ربما تقولون لي حب مراهقة، لكني ها انا بعمر الواحدة والعشرين ولازلت احبه
اصبحت حتى لا اذهب للجامعة، مما اثر على دروسي فتخصصي يحتاج ان احضر يوميا واتابع يوميا دروسي
دعوت الله كثيرا وبكيت وصليت ليلا بالثلث الاخير وقمت ليالي رمضان الاخيرة ودعوته ان يكتب لي راحة بال في هاذ الموضوع
لكنني ما زلت في نفس الحالة
جديا افكر بالاعتراف له، لكن لا ادري كيف ستكون ردة فعله، هل هذا شيء يخالف الشرع وديننا؟ هل ساضل هكذا في هذا التعب؟ اريد نصيحة خاصة من الرجال ، ماذا لو اعترفت فتاة لك! كيف ستكون نظرتك لها؟

[sohaibdz]

لو كان الامر معي لاحتقرتها لان بنت الاصل و الرجال لا تفعل شيء مماثل

[walcot46]

أختي ... ليس في الأمر شيئ ولاعتراف سيد الأدلة ، اعترفي له ولا تخافي فإنه سوف يقدرك كثيرا ويحترمك وبالتالي تريحي من التعب الذي تعانين منه

[محارب الحمق]

أنت عينة من ضحايا الاختلاط بين الرجال والنساء. الاختلاط الذي حرمه وحذرنا منه الشرع. المرأة كالرجل كائن حي يحتاج لإشباع رغباته العاطفية والجنسية وفي ديننا لا يمكن هذا إلا بالزواج لكن من المؤسف أن المجتمع أصبح يصعب الزواج بحجج كثيرة منها الدراسة مما أدى الى تسهيل الحرام والمؤسف أكثر أن المجتمع أصبح يغض الطرف عن الحرام و لا يتسامح ولا يسهل الحلال والله المستعان. أما بالنسبة لمشكلتك من الواضح جدا أنك افتتنت بهذا الشاب وهذا من الطوام والابتلاءات.. أولا انسي حكاية الاعتراف فلايجوز لك شرعا التحدث بهذا الأمر مع شاب أجنبي عنك. ثانيا عليك بغض بصرك والتعلق بالله لا بغيره من الخلق. تعلقك بهذا الشاب دليل على أن فراغا في قلبك لم يملؤه اللإيمان فملأه الحب والعشق. ثالثا: تقربي الى الله وتضرعي له حتى يشفي قلبك ويخلصك من هذا الابتلاء بالطريقة التي يرضاها لك الله وقد يكون ذلك بابتعادك عن هذا الشخص. أخيرا: ان كانت حالتك مأساوية فيمكنك أن تخبري شقيقة هذا الشاب بحقيقة رغبتك بالزواج منه أو عن طريق اخر لا يكون مباشرا ولا يكون فيه لك حرج. ربي يشفيك ويعافيك
https://ferkous.com/home/?q=fatwa-248

[هـــدوء]

احفظي ماء وجهك ...الفتاة مطلوبة و ليس العكس.

[مراد سابقا10]

انا راجل نقولك لوكان تاتي لي طفلة كيما تقولي انت وتعترف صدقيني منزيدش نشوف فيها حتى ولو كانت بنت فاميليا

علابالك وحدة اذا تجرءت ودارت حاجة كيما هذي اعرف بلي قادر تدير حوائج اخرى

[زبدة ذايبة]

وش تحبي؟؟؟؟؟؟

لولد مازال يقرى*


أنت تفكري في الزواج*


وهو يفكر لابورس ماتكفيهش

يفكر مايقدرش يقول لباباه أعطيني نشري كراس وستيلو*

يفكر يشري صباط للشتاء.

يفكر العسكر يستنى فيه.

وانت تفكري :

هاو جا*

هاو راح

هاو شاف فيا

هاو يستنى نعبرلو على المشاعر تاعي.

هاو يحبني.......

واحتمال 99% ماشي سامع بيك.

ريحي روحك*

وألتهاي بقرايتك بعيدا عن المسلسلات وأحلام اليقضة.

قال تحبي قال

راكي رحتي ليه وقلتيلوا:

وش تتوقعي يقولك.

كنت نستنى فيك تجي تقوليلي باش نجي لداركم.

أو

يقولك أستنايني نكمل العسكر ونلقى الخدمة ونشري دار وطونبيل (على عشرة سنين*

أو*

يقولك نخرج معاك لشوارع العاصمة تكيليها معاه*

زنقة زنقة وشارع شارع ومحل محل و.........

قيس قبل ما تغيس.


يعني ضربت في راسك قلتي نروح للراجل.

هبلتي*

وش خليتي لروحك من قيمة ومن شرف.

لو كان اي واحد يعجبنا نروحو ليه خلاص وحدة ماتبقى في دارهم .

ووحدة ومايبقالها* شرف ولا دين.

راني وليت نحب نروح نجري مور الراجل.!!!!!

وين هذا؟؟؟؟؟؟

في الافلام والمسلسلات* الهابطة.

البارح برك وانت تشوفي في الرسوم المتحركة

وممكن مازالك تشوفي.

ولقيتي في عمرك21 قلتي المراهقة راحت وليت نعرف.

وهذا من قوة العرف رايحة تروحي للراجل.!!!!!!!

راجعي روحك يا طفلة

لو كان يعرف بيك باباك يحبسك في الدار.

رايحة تقراي ولا ........

على كل حال نظن مهما قلنا وعاودنا ماراكيش رايحة تقتنعي.

لكن.

جربي سعدك وروحي ليه*

والنهاية نعرفوها*

السيناريو باين نهايته كيفاش.

الندم.....الندم.....الندم......

ولا ينفع الندم.

[مُحمد رازي]

و عليكم السلام و رحمة الله
أختي الكريمة من الأخير راكي غير تفسدي في حياتك و مشوارك التعليمي و تضيعي في وقتك باطل على شخص ممكن ماراهوش كامل دايرك أنك موجودة ، و ما كان لا حب مراهقة لا حب من أول نظرة لا والو هادي كلها أوهام راكي عايشة فيها غير نتي وحدك ، و بما أنكي راكي مترددة و خايفة إدا ما الاعتراف راح يكون مخالف للشرع فهاد التردد و الخوف لوحده دليل على أنكي رايحة تقدمي على حاجة ماشي مليحة ما يتقبلها لا شرع و لا عقل و لا مجتمع ، لهادا نصيحتي ليك انزعي من راسك هاد الفكرة اليائسة و قطعي الأمل منه و داك التعلق ، و تجبدي روحك دركا في وقت كرامتك ما زالت معاك أحسن من غدوة مين تبقي بلا كرامة

[قدور بن عاشور]

حتى و لو تزوج بيك،

و هو مستبعد من طالب جامعي مركزه الإجتماعي يأتي بعد الطلاب (المتسول)
قلت حتى و لو تزوجك يجي نهار يعايرك بلي أنت جريتي موراه


و نزيد نعطيك نصيحة تنفعك في حياتك، قبل أن تقدمي على أي شيء فكري في "ماذا لو؟"
فكري في العواقب دائما.

[منى27]

أنصحك ان تبتعدي عن الاعتراف ولا تفكري في هذا الموضوع بتاتا إلتفتي لدراسة أولا أهلك لم يبعثوك للجامعة لكي تحبي بل لطلب العلم
والحب يأتي بعد الزواج ربي يرزقك زوج صالح

[أم رقية نسرين]

شوفي ختي اتولهي بقرايتك و اخطيك من هاد التخمام هام الملسلات واش يديرو اصلا وين علابالك بيه كيفاه هل يخاف من ربي و مدين و متربي و لا العكس و حتى لوكان كان مدين و متخلق راح طيحي من عينو والله تقوليلي عندك هاد الجرأءة العظيمة باه تروحي و تقوليلو ؟؟؟
علابالك نعرف شباب في العائلة فاتو الأربعين و جامعيين و خدامين والله مالحقو للزواج
اعزمي باه تغيري من نفسك باه تتغير امورك للأحسن و تقريي من الله و حافظي علي دينك و حجابك و ابتعدي على الإختلاط هاد الهم الكبير لي رانا عايشين فيه و تاني تربيتك لي رباهالك والديك و فرحيهم بنجاحك
كي يلحق الوقت لي كتبوهلك ربي راح تتزوجي إن شاء الله
و ربي يهدينا كامل لما يحب و يرضى

[ابو سليمان10]

لا تفعلي...حتى لو كان لديه شىء اتجاهك فانكي ستسقطين من عينه...المراة مطلوبة و ليست طالبة...فان طلبت سقطت من عيني ذلك الرجل
ثانيا لن تستفيدي شيئا عدا الدخول في علاقة محرمة او في احسن الاحوال خطبة تدوم سنوات...

[toulay]

وعليكم السلام ورحمة الله وبركاته
يا اختي يخي علابالك المحيط لرانا عايشين فيه وعلابالك واش يقولوا على الطفلة لتروح تعترف للطفل مايخلوا مايبقوا مالا رد بالك تمدلهم الفرصة يهدروا عليك
مزالك صغيرة ومزال المشوار قدامك ونهار يجيك الرجل المناسب راح تشبع ضحك على روحك وكيفاش كنتي تخمم
اي تبانلك برك متقدرش تنساه ومتعلقة بيه وغيرها بصح صدقني الدعاء والاستغفار وقراءة القران يوميا والمداومة على سورة البقرة راح تنسى حتى اسمو
من الاحسن تتوله بقرايتك لانو هي الصح والراجل جاي ان شاء الله
بالتوفيق

[وسيمツ]

لا احب المشاركة في هكذا مواضيع. لكن ،قانون بيولوجي: اعتراف الفتاة في هذا الجانب هو سقوط حرّ و انتحار لمكانتها عنده و لوكان يبادلها نفس الشعور.


هي من مبادئ الكيمياء داخل الولد.

[سيليا142]

ان فعلتها ستكون كارثة

[وهـرانـي]

يبدوا جليا أن المسلسلات التركية أثرت عليك كثيرا

نفس السيناريو الذي يتم اعداده في مسلسلات الفتن لاخراج شباب الامة الاسلامية وابعادهم عن الاخلاق والفضيلة

أولا اختاه للتغلب على هاته المشكلة يجب الاكثار من الاستغفار ومجالسة جلساء الخير وطلب النصيحة منهم

وفقك الله

[بسمـة أمل]

لا اختي ...ستندمين ندما شديدا

[lachiche]

شوفي اختي لازم تعرفي واش هم الاشياء لي تجذب الانثى للذكر إذا انت تشوفي في روحك بلي تقدري تاثري عليه ويقتنع بلي يجي يخطبك من اهلك , هي كون تصارحيه لا عاد انسان ناس ملاح ومتواضع راح يكون امر عادي والاحتمال الكبير راح طيحي من بالو ولا يتمسخر بيك ويعييك لانه عرف نقطة الضعف نتاعك إذن القضية نتاعك لازم تدرسيها وتشوفي اسكوا هو مهتم لا انت باهية مثلا وعادي الحب هاذا غريزة في الانسان وإذا شفتي روحك بلي راح يطيح قدرك اخطيك منو الرجال كثر واستناي المكتوب نتاعك وخلاص و ربي يجيبلك الخير ويخلصك من المحنة نتاعك

[Amelmina]

لا انصحك بالاعتراف يا اختي*

[فاطمة البرجية]

الاخت الكريمة على حساب واش فهمت هذا مجرد اعجاب و ليس حب
معظم الردود كانت عدم المصارحة و ربما هم على الحق
عادي جدا و طبيعي ان الانثى تنجذب الى الذكر و الذكر الى الانثى و لكن هذا لا يعني انه بالضرورة حب . و هناك العديد من الاشخاص الذين نعجب بهم من بعيد و لكن عندما نقترب منهم نجدهم عاديين جدا .
نصيحتي لكي اختي هي ان تتصرفي بشكل عادي مع زميلك كيما تتصرفي معاهم كامل و اهتمي بدراستك و الله يوفقك