زوجي طاح من عيني!

[مشكلتي]

السلام عليكم اخوتي
نطرح مشكلتي مباشرة و نتمنى تفيدوني بأرائكم و نصائحكم... انا متزوجة عمري 24 سنة ...جميلة و الحمد لمن احسن اخلقي،من عائلة معروفة بالاخلاق و الطيبة، ملتزمة مما جعل الكثير من الشباب يسعون الى خطبتي منذ كنت في 17 الى ان أتى زوجي الحالي و خطبت له بعد ارتياحي لاخلاقه و سمعته ماشاء الله عنه و تدينه قلت رجل صالح يحفظلي ديني ودنياي.. بعد زواجي كان راجلي دائم الاصرار على صلواتي.. لباسي.. احتشامي... حتى انه اوقات كان يزير عليا بزاف و بدون حدود... مهم بعد مدة اشهر من زواجنا كنت نخرج معاه لشراء مستلزمات للبيت و غيرها... لاحظت امر طير النوم من عيوني... زوووجي الملتزم المتدين لايغض بصره ابداااا... تفوت عليه اي بنت كاانت جميلة.. قبيحة... متحجبة.. متبرجة لازم يلوح عينو... قريب نموت انا حشمت في بلاصتو... انا فرض عليا اني نلبس الحجاب الاسود ولا البني الغامق فقط و كل حجاباتي الاخرى البيج...الازرق.. وغيرهم الوان لا تجذب منعها عليا و فرض عليا النقاب و و امور كثيرة... وهو يخرج للبرا يطلق عينيه في خلق الله بنات الناس... شووكااني ياناس كي نخزر فيه يدور وجهو بسرعة يحسابني مش فايقتلو... صدقوني عندي درك تقريبا عام زواج عدت نكرهو و قرفت منه لان اكثر حاجة نعيفها الرجال البصاصين... كيفاش نتوقعها في زوجي الملتزم... عدت نشوف فيه مناافق.. قيمته عندي اصبحت تحت الصفر ...يا الاهي كل مرة نخرج معاه سواء رانا نمشو برجلينا سواء بالسيارة نشوف عينيه منا ومنا... ونعلمكم باني في البيت منخليش حاجة منلبسهالوش... كيما يلبسو البنات البرا و اكثر و مقلشاتو ومهتمة بجمالي و نفسي و شكلي جدااا وانا والله اساسا جميلة جدا الحمد لله لا اجامل نفسي ولكن باش تعرفو بلي ما خصاتو من جيهة والو هو اصلا يقولي راكي مش مخليتني يخصني حتا شي مهتمة بكل النواحي و يحبني جدا... ولكن معرفتش علاش يخزر في بنات الناس! حتا اابنات هادو الي يخزر فيهم يخزرو فيا و نشوف فيهم الصدمة يعني ملتزم و بمرتو معاه و تخزر فينا... حق الله كرهتو زوجي كره لا مثيل له.... لمحتلو اكثر من مرة و بعثتلو احاديث عن غض البصر بطرق غير مباشرة و لكن لا حياة لمن تنادي...اخر موقف صارلي انه مرة كانو بنات عمته و عمته و نساء اخريات من العائلة معنا قاعدين مع بعض.. و جاءه ضيف ادخله للصالة دقدق الباب علينا و نادى لبنت عمته و هادي وحدة متبرجة و معروفة بلي لعوبة معمرة مكياج و و و... عيطلها هي باسمها خرجتلو وقالها جيبيلي حاجة للضيف... قولولي مفروض شكون يعيط مش زوجته ! علاش هي بالذات صراحة ما حملتش نظرات النساء الجالسين الي سمعوه يعيط لبنت مش مرتو و مرته انا موجودة... كي قتله قالي محبيتش نتعبك... واش رايكم اخوتي انا ابناء اخوالي و اعمامي منعني نشوفهم وهو داير رايه... راني نقيم ليل ندعيلو بالهداية بصح قلبي هرب منه طوول... ارشدوني ما الحل

[مراد سابقا10]

هذي ليست مشكلة ومتفسديش حياتك بسبب ذلك

ونصارحك اغلب المتزوجين يقيمون علاقات خارج اطار الزواج وانت تقولي زوجك يشوف فقط خليه يشوف المهم متتطورش لحوائج اخرى

المهم انت ادعيولوا في الثلث الأخير لعوتش يهديه ربي.

[عماد الفقير]

السلام عليكم
الجمال جمال المعدن و حُسن الإختيار تصرّفًا .
زوجك الملتزم غفر الله لنا و له و أصلحناالله و إيّاه مبتلى بمرض النظر الى ما لا يجوز ، إطلاق البصر من الرجال و خاصة المحصن منهم مرض متفّشي و داء عُضال وجب الحيطة التنبّه له و على العاقل رجلا كان أم امرأة محاولة علاج المُصاب به باللين و بطريقة مشروعة و بأسلوب يرغّب القرب و حب العلاج لا ينفّر أكثر و يرغّب في العكس و هذا مشاهد من البعض هدانا الله و اياهم ، أقصد الناصح الواعظ الذي نيّته النًح و الصُلح و لكن يفسد الأمر برمّته باسلوبه افتقارًا للمادة و للطريقة .
يا أمة الله حاولي مع زوجك -أصلحه الله - بدءًا بتبان أنّ ما يقوم به غير جائز شرعا حتى و ان كان عفويا لا إراديًا و حاولي تذكيره بضرورة و إلزامية الوقوف عند حدود الله و محارمه و انّ الذي لا يجوز له لا يجوز لغيره و بالتالي اغضض بصرك عن إماء الله و سيرسل الله تعالى من يعاملك المثل و زيادة و العكس بالعكس و الله المستعان .
يا أمة الله ، حاولي التقرب من نساء صالحات لأزواج صالحين ملتزمين و حاولي مراسله زوجك بواسطة ، مثلا إمام مسجد الحي أو عن طريق شخص معلوم الإستقامة و هكذا لعلّ الله تعالى يُصلح قلوبنا و قلبه ..
الأمر هذا يقع فيه خلق كثير من الرجال هدانا الله و اياهم و لا تنسي الدعاء و الجّد فيه و اخراج الصدقة و صلة الأرحام و جميع اعمال البّر و بجول الله تنفكّ عنكم هاته المشكلة و غيرها .
ايضا أذكرك يا أمة الله انّ هذا الأمر - النظر الى محارم الله - و غيره من الإبتلاء و علينا و عليكم الصبر و التوكّل على الله و نسأل الله العافية

[أَحمــد]

لاتعيني عليه الشيطان .. هو يحتاجك الان فساعديه واصبري عليه ولا تملي النصح والنصيحة والدعاء لزوجك أن يستقيم ويبعد عليه هذا الامر
ولن ينسى لك جميلك

[Elwawy]

إذا كنتي تحبين زوجكي و تحبين له الخير و السعادة, و كان قادر على زوجة أخرى ساعديه في الزواج لكي يغض بصره. (حتى لا نقول إستبدلها بل أضاف أخرى فقط)

إذا كنتي تحبين نفسكي و تحبين السعادة لنفسكي فقط, يمكنكي عمل أي شيء عدا الذي ذكرته.

أعتذر هذه هي الحقيقة.

[yassefe]

كما يعلم الكل أن الرجل يختلف تماماً عن المرأة .هكذا خلق بغريزته الجنسية.لا يختلف بنوا البشر عن الحيوان .مثلا في عالم الحيوان للذكور حب التملك والسيطرة وإمتلاك عدد كبير من الإناث و التزاوج معهن.فنحن بنوا البشر لدينا هذه الغريزة و لاكنها مكبوتة بعوامل منها تربوية أخلاقية ودينية.لذا باإستطاعت الإنسان التحكم فيها و السيطرة عليها وهذا يختلف من إنسان إلى آخر.
ولدينا أيظاً عامل آخر جهل المرأة أو تجاهلها بالحياة الجنسية .فالمرأة الجزائرية مع إحترامي لها هدفين رئيسيين في الزواج
ظ،ـ الإنجاب
ظ¢ـ كسب شهادة للتباهي في وسط المجتمع بانها إمرأة متزوجة
وعندما تجتمع لديها هذه النقطتين تتخلى عن دورها كانثى و ترمي بزوجها الى الجحيم .تنكب كليا لأولادها و لاتكترث بزوجها .مع الأسف 99%من النساء الجزائريات يفعلن هذا
فعندما يكون الرجل أعزبا فهو ينظر إلى من يشاء لأن قلبه فارغ…ولكن لماذا ينظر وهو متزوج ببساطة لأنه مايزال يحس بالفراغ حتى وهو متزوج بمعنى “”””زوجته “””””””””””لم تضف شيئا على حياته الأولى …والحقيقة أن بعض النساء —هداهن الله—تهمل بيتها وزوجها …والأكثر من ذلك تهمل نفسها …ونحن في مجتمع لا يرحم وأصبح مملوءا بالكاسيات العاريات المتبرجات المتمايلات يمينا وشمالا…والرجل عندما يكون خارجا ويلاحظ أولئك النساء —طبعا الذي يخاف الله—فإنه يسارع إلى بيته مخافة على نفسه من الوقوع في المعصية ولأنه يعلم يقينا أن في البيت “””امرأة”””ولكنه يفاجأ عندما يعود إلى البيت ويقارن بين زوجته والنساء اللواتي رآهن في الخارج وطبعا هؤلاء أفضل من زوجته …فيتحسر وقد يغضب وهذا مايدفعه إلى النفور إلى الخارج تعويضا عما حرم منه في الداخل…والعين تزني وزنى العين النظر…فعلى الزوجة إذن أن تملئ عين زوجها حتى لا ينظر إلى سواها…



بصح انا صدقيني لا الوم الرجال علي هادا الشيء لو كنتم انتم النساء . اقولها لكي بالدااااااارجة الجزائرية و لا اقصد بهادا الكلام الاسائة لاكن هي حقيقة و نراها بشكل يومي… كون جاو النساء يحشمو و يلبسو لباس محتشم مكانش لي يشوف معاكم… و حدا تلبس لباس نصف جسدها عاري و وحدا تلبس لباس تمشي و تبيض في عضلاتها و وحدا ووحدا و تحوسي واحد مايشوف معاكم......

فعلاج هذه الحالة يكون :
1- كثرة الاهتمام بالزوج ، و البحث عن السبل المحببه و المقربه الى الزوج ، و غير ذلك لابد ان تظهر الزوجه لزوجها انوثتها ، و الاهتمام في المقام الاول برائحة الجسم و الفم و المكان المحيط بكم فهو له تأثير سريع و مباشر الى قلب الرجل ، ولا شك بان الزوج هي الوحيدة التي تستطيع ان تعلم ما يحب زوجها وما يكره ، والا كيف تكون شريكة حياته ؟ .

[مُحمد رازي]

و عليكم السلام و رحمة الله
لي حيرتني تاع كي تخزري فيه يدوّر وجهه بلخف ! تقولي عليه ملتزم و هو يخاف منك كثر ملي يخاف من ربه ! ، و ما كان حتى سبب لي يبرّر للرجل حتى يطلق عينيه في كل بلاصة ، صح حتى واحد ماراحش يسلم من أنو قادر عينه طيح على الشي لي ما يحلش ليه و لكن هادا ما يعنيش أنه يطلق العنان لداك الشي و ترجع فيه عادة ما يطلق صغيرة ما يطلق كبيرة و ما يخلي لا لي لابسة و لا لي ما لابساش ، فالنظرة تاع الشيطان هادي سهام مسمومة و إدا اختارقت القلب راح يكون صعيب انتزاعها من بعد و راح ترجع مرض تصيب الواحد ، و باش تقولي كيفاش نتي جميلة و هو يشوف في غيرك حتى و لو كانو ماشي شابين هاد الشي من تزيين الشيطان تانيك ، على كل يبقى زوجك و ما لازمش تقطعي منه الأمل و ماشي ضربة وحدة تفركتي كلش لازم شوية صبر ، و عملتي مليح مين لمحتيله على الأمر بطريقة غير مباشرة لاخاطرش المواجهة بشكل مباشر في ظرف كهذا راح تعطي نتائج عكسية و مشي مليحة ، و تمشي معاه بالتدريج في النصح و الوعظ و الدعاء ليه و كذلك لازم تدخلي شوية أفكار تاع تجديد في حياتكم حتى ما تطغاش عليها الرتابة و الروتين الممل ، لازم ديري كامل مجهوداتك قبل ما تحكمي باليأس على الحالة و لعل و عسى ربي يصلح أحواله و تعود المياه لمجاريها

[محارب الحمق]

كلمة ملتزم عند النساء هي كلمة مطاطة وتختلف من امرأة لأخرى. لم أسمع من قبل عن ملتزم ينادي ابنت عمه أو عمته أو خاله أو خالته ويأمرها بإحضار شيء للضيوف وزوجته حاضرة. على كل زوجك عليه غض بصره ولا شيء يمكنه أن يسوغ له أو يبرر فعله أبدا. لا شيء يبرر له ذلك. عليه غض بصره وعليك نصحه مباشرة وبدون مجاملة ولا مقدامت.........غض بصرك يا رجل لا يجوز هذا الأمر يغضبني وقد يحدث مالا يحمد عقباه ان انت أكملت هكذا....يجب أن يفهم زوجك حقيقة شعورك ومعرفتك بمايفعل فأنت طرف أساسي في علاقة الزوجية التي تجمعكما. عليك بالدعاء والنصح الدعاء والنصح الى أن يأتي الفرج

[ابو سليمان10]

الكثير من الشباب تعود على الامر...حتى لو تزوج 4 نساء فسينظر....بشكل تلقائي عيناه تنظران الى اللحم المجاني المعروض في الخارج
لاحظتها في كثير من الناس مثلا تتحدث معاه فيصرف نظره عنك و يتبع قطعة لحم مارة في الطريق

[محمد جديدي التبسي]

هذا أمر عمت به البلوى ولا ينجو منه إلا القليل
لا يمكن وصف زوجك بالملتزم أو المتدين لمجرد انه ملتحي او يفرض عليك الجلباب والنقاب هذه أمور أصبح يطلبها حتى رجل لا يصلي وعامل كوارث...
واقعيا مشكلتك هي أهون ما يمكن ان تعانيه الزوجات في وقتنا
راك تشوفي العجب خيانة علاقات محرمة من رجال متزوجين وما خفي أعظم
المفروض تناقشي الموضوع مع زوجك مش مجرد تلميحات قد مر عام على زواجكم يعني الصراحة لازم تكون أمر عادي بينكم
ربي يهديه ويصلح احوالكم

[زبدة ذايبة]

والله شيء مقرف ويدعو للاشمئزاز*

من المفروض تواجهيه مباشرة*

علاش اللف والدوران*

لو كان جا يخاف من الله عزوجل هذا أولا وأخيرا*

ثم يحترمك كزوجة*

ماكانش يتصرف بهذ الطريقة*

أستغفر الله لا دين ولا دنيا*

لهذا توجهي مباشرة إليه. واجهيه متلبسا بالجريمة*

ماتبقايش تتخايلي*

هذا بيتك ولازم عليك تحافظي عليه*

النظر سبب كل شر*

ومن أكبر أسباب الخيانة الزوجية التي كان يطلق عليها في السابق مصطلح الزنا*

كلمة الخيانة الزوجية أصبحت مصطلح هين ويشمل كل الآفات الخبيثة .

هاوليك وذنيه نحيهملوا*

وما يغركش من بعض الردود اللي تقلك هو الآن يحتاج إليك أكثر مما سبق !!!!!!!!!!!!!!!!!!!

قالتلي وحدة وجهت زوجها بمثل هذ المرض قاللها : لا لا أنا نستعجب برك في المخلوقات"

لهذا انتبهي لبيتك وذكريه بالله والخوف منه*

تضربي النح رايح كل مرة يجيب معاه قصة حب لبيتك*

*وبدون الدخول في تفاصيل أخرى ردي بالك*

لو كان الذي كتب المشكلة رجل لو نصحه الجميع بتطليق المرأة بأنها لاتصلح وفي أخلاقها نظر*

وجعني قلبي*

وا أسفاه على رجال مابقي منهم غير الإسم*

وا أسفاه على رجال همهم ................

وا أسفاه على تعاليم ديننا التي انتهكت*

فسد الرجال ففسدت النساء*

وفسدت النساء ففسد الرجال*

لو كان غير جا مايدعيش الالتزام*

ما خلى مابقى*

لا حول ولا قوة إلا بالله*

بالنسبة إلي واجهيه وما تسكتيش*

وما ديريش روحك ماشي فاهمة*

ربي يصلحلك الحال*

[ايمان4]

انت في موقف لا تحسدين عليه واش انت عروسة عام مزال في ريعان شبابك نتاجك مزال متزوجوش و دايرتله في الدنيا دنيتين متهلية فيه واش بغا اكثر ؟ ههه لكن مجتمعنا يقلك خليه يعاود الزواج و علاش هي شداته ؟ اذا هو عنده شهية كبيرة للنساء قولي اثناء الخطوبة قولي يا بنت الناس انا نبغي النساء و ما نشبعش و يلزمني نعاود نتزوج مرة و مرتين و ثلاثة اذا قبلت فيها و ف الخير و اذا ما قبلتش تزوج اخرى لي تقبل و السلام حلت المشكلة ناقشيه و حاوريه في هذا الموضوع بشكل مباشر لكن تحري انتقاء الكلمات لانو تعرفي مجتمعنا ذكوري اذا في زواجك ما يتصلح حاولي تصلحي مش من هاته المشكلة تكبريها لاكبر منها يعني شوفي كيفاش تصلحي زواجك مش تخربيه كاين اساليب ناعمة الهاشمي في النت و غيرها ممكن يساعدوك ....

[ايمان4]

قصدت النقاش يكون حول غض البصر مكان ما جبدك على الزواجات انا غير قلبي وجعني عليك مدرتش علامات الوقف تخلطت الافكار عليا المهم ربي معاك اختي

[مُحمد رازي]

لأضيف على الشي لي قلته من قبل و بخصوص جزئية مين تخزري فيه يدوّر وجهه فمن خلال هاد الشي يظهر أنه من النوع لي حتى و لو كان واجهتيه مباشرة راح ينكر الأمر أو راح تلقي عنده الأعذار جاهزة ، قادر يقولك أنه راه مستغرب من الحال لي وصلوا ليه النساء تاع اليوم أو يقولك راه يتأمل في خلق الله أو راح ينكر الأمر جملة و تفصيلا بأنك راكي غير تتوهمي و هو ماشاف والو ، و مثل هاد الصنف ماراهش مستبعد أنه كي يلقى زوجته تحاسب فيه يلويلها ذراعها بقضية راه يفكر باش يعدد و الشرع حلل ربعة و الحكاية المعروفة ، لهذا يظهرلي أنو صنف كهذا لازم الزوجة تكون ذكية في التعامل معاه و تعرف كيفاش تسبقه في التفكير ، و الاسلوب الاندفاعي تاع المواجهة المباشرة ممكن ما يجيب حتى نتيجة و خصوصا مع رجل شاف روحه بلي هو لي كان دايمن يفرض رايه و أنو الزوجة ما عليها غير السمع و الطاعة ، و الطريقة غير المباشرة لي تكلمت عليها مشي كمثال تبعثيله قصاصات ورقية فيهم أحاديث على غض البصر أو شي من هاد القبيل ، و لكن قادرة نني تجلسي معاه و تحكيله على هاد القضية و كأنها تخص أشخاص وحدخرين ، كمثال تقوليله أنكي قريتي أو سمعتي لدرس أو محاضرة دينية و كان الشيخ يتكلم على غض البصر للرجال و أنه طرح أمثلة على وحدين هوما متزوجين و عينيهم يزغدو في كل بلاصة و خلي شعورك يوصله بلي كي سمعتي عليهم عيفولك قلبك و حكمك القرف منهم و بينيله أنك راكي حايرة إدا صح كاين مخلوقات كيمن هادو في المجتمع ، و الرسالة غير المباشرة كيمن هاك راح توصله ديراكت و راح يعرف أنه مين راه يطلق عينيه تاني هو أنه راه يدير في حاجة مقرفة و ادا كان فيه الخير و فعلا رجل صالح راح يدارك نفسه مستقبلا و يدير حساب لهاد الشي أما إدا ما نفع معاه والو فكآخر علاج الكي واجهيه بالواقع مباشرة فأكيد ما لازمش تبقي ساكتة طول حياتك ، و قضية بنات العم و لافامي ممكن هادي تربية تربى عليها أنه الشي عادي يخالط بنات عمه و بنات لافامي حتى و لو كانو متبرجات باعتبار راهم كامل عايلة و حدة وممكن نتي تعامل معاك داك النهار من باب الغيرة عليك مين شاف بلي كاين راجل آخر في البيت ، و ما فهمتش نتي علاش غاضتك ؟ يعني كيما كان يغير عليك في الملابس و يقولك واش تلبسي و واش ما تلبسيش حتى ما يشوفوكش الرجال لخرين داك اليوم تانيك ما حبش يدخلك في الوسط ، فأنا نشوف أنه دار داك الشي كيما قلت من باب الغيرة مع اأنو الدعوة راهي تبان كامل مخلطة في قضية الزيارات هادي، و حتى توصلي تغيري هاد الأمر فيه كي شغل راح تعاودي تبرمجيه من جديد واحتمال ياخذ وقت معاك ، المهم ركزي بالحاجة و بالأساس على قضية عدم غض البصر في الشارع هي مكمن الخطر الكبير

[ع.عيسى]

ملتزم ولا يغض بصره خصوصا انه متزوج من امرأة مثلك ، وينادي قريبته وانت موجودة ؟؟؟؟ واجهيهه مباشرة بضرورة غض البصر ، وادعي له بالهداية ،وانصحك اذا كنت تفكرين في الطلاق فحاولي عدم الانجاب منه، واعطي له فرصة ليستقيم ، فان لم يهتدي فافعلي ما ترينه مناسبا لك ، لست مجبرة على ان تكملي حياتك مع رجل تشمئزين من اخلاقه ونصرفاته ، ولا تنسي صلاة الاستخارة.

[النجمة القطبية]

للاسف اختي زوجك فيه خصلة من النفاق بحيث انه يهتم بالمظهر اكثر من الجوهر ويخدع نفسه قبل ان يخدع الناس
المواجهة مع هدا النوع من الاشخاص لا تنفع خاصة لو واجهتيه امام الناس بالمختصر راح تحرجيه وتخسريه
ويؤسفني ان اقول لك ان ما يعاني منه زوجك كنوع من المرض فلا تصدقي من يقول كامل الرجال مثله او الامر طبيعي خاصة ان زوجك عاجز ان يضبط نفسه وسط الناس يعني كل الناس لاحظوا و عندوا الامر عادي دون اي احساس بالذنب
من عندهم نفس المشكل يعتبرون الامر عادي فالشعور بالذنب امر قاتل وصعب فالاسهل ان يبرر الانسان لنفسه والا لكنا كلنا وجدنا المبررات لاطلاق العنان للبصر وراح نلقاو الف مبرر ومبرر
انتي تحتاجي تتعاملي معاه بالاسلوب الغير مباشر من دون ان يعرف انه طاح من عينك وانه هو المقصود بكلامك
نبهيه باسلوب التلميح علابالي صعيب لكن انتي الان امام امر واقع انك لازم تصبري وتعالجيه ادا اردتي الاستمرار معه
ادا كان مخافش من الله مش راح يخاف منك فلا داعي للمواجهة باختصار راح تخسريه او راح يحاول يقنعك ان الامر عادي وطبيعي وان العيب فيك
تعاملي معاه بنفس اسلوبه مرة موعظة مرة نصيحة مرة دعابة وتعلمي تضبطي اعصابك وعواطفك
فقط بالعقل والتعامل الجيد راح تقومي سلوكه على الاقل يضبط نفسه في الاماكن العامة
ربي يكون معاك ويوفقك في مسعاك

[Om inesanis]

اختي العزيزة نعم هذه المشكلة مقلقة والأجدر أقول محزنة لكن هناك نقاط اود توضيحها لك*
اولا وقبل كل شيء اختي لاحظت في طرحك للموضوع انك ذكرت جمالك اكثر من مرة ،،،،اياك اختي والغرور فهو يميت القلبك،،،،نعم انت جميلة وذات خلق تبارك الرحمان الذي اعطاك ،،لكن الاسراف في مدح النفس قد يلعبها عن ما هو ضروري.
ثانيا... انت قلت زوجي دارلي النقاب ومنعني من التكلم مع أبناء خاالاتي والخ....هذا شرع الله و اضوابطه وخطأ زوجك لايعطيك الحق في الأمر من التزامهم
ثالثا زوجك نعم مخطئ ولكن الحمد لله خطأه يمكن إصلاحه..وخير الخطائين التوابون....واقرب طريق بين نقطتين هو الطريق المستقيم يعني ضعي زوجك امامك مباشرة وتكلمي معه في هذا الموضوع بشفافية واخبريه انك لاحظت أنه لا يغض بصره واخبريه أنه سلوك مرفوض بالنسبة لشخص ملتزم ناهيك عن الاحراج والألم الذي يسببه لك هذا... واعتقد انك ضيعت فرصة لما نادى ابنة عمه ..كنت تستطيعين أن تفتحي الموضوع من هذه النقطة...ومن فضلك لا تقاريني بينه وبين ما يفرضه عليك من التزام ...والنصيحة الأهم يا اختي اتقي الله في زوجك ولا تقولي انك كرهته...اصبري اختي وادعي له لعل الله يتقبل منك دعاءك ويبعد عنه هذه البلية...وانت اصبري فإن الله مع الصابرين وأدعو الله أن يهديه ويجمع بينكما بالمودة والرحمة

[مِـشْاٌغَبّـ ^-^]

هذي ليست مشكلة ومتفسديش حياتك بسبب ذلك

ونصارحك اغلب المتزوجين يقيمون علاقات خارج اطار الزواج وانت تقولي زوجك يشوف فقط خليه يشوف المهم متتطورش لحوائج اخرى

المهم انت ادعيولوا في الثلث الأخير لعوتش يهديه ربي.

[Om shahed]

والله لو كنت مكانك
نصارحو ديراكت و نقلو كل شي في و بلي نضراتك مقززة و خلتني نشوفك بطريقة اخرة
و زيد النظر رجال كامل هكا يحبو يشوفو
و مش معناها ميحبكش او مش مهتم بيك
كاينا رجال مريضة بالخزرة

[عمر بن هاشم]

الله يصلح الأحوال و يهديء البال

[قدور بن عاشور]

فوبا تكبري المشكل
زوجك لا يغض بصره و بالرغم من أنها معصية إلا أنها من الصغائر،
يعني ماترجعيهاش مشكلة كبيرة و تكرهي زوجك على جالها،
صغيرة و حلها صغير،
ديري الكوراج نهار تخرجي معاه و يبدا يخزر أحسبيلو هذي واحدة، زوج، ثلاثة....حشميه ماتخليهش يلعب بعينيه و هو معك
و ذكريه بالله حتى لا يفعلها وهو وحده.