كيف اعمل

[مشكلتي]

[b] سلام عليكم من يومين صار عمري 12 سنة نقرا فسويام المشكلة أن أمي تشوفني صغيرة راني حابة نتعلم الطبخ وشغل الدار ويما تقولي روحي منا خواتاتاك الكبار ميعرفوش انتي تعرفي خواتاك مايحوسوش يعرفوا انتي واكلة روحك باش تعرفي وانا نقولها انا وخواتاتي ماشي كيفكيف منشبهلهم مايشبهولي فحتى حاجة خوتاتي الكبار كبار بصح مايعرفوش صلاحهم الكبيرة كامل عرمها 18 سنة وثانية عمرها 17 سنة بصح عقولهم اصغر بعشر سنوات او اكثر لاني أنا كي كنت 8 سنين كنت عاقلة بصح هما يحسبوا روحهم صغار وهما كبار مايعرفوش حتى يقليو بيضة مايديرو والو فدار وزيد كامل الوقت يتهوشوا فيما بينهم حتى الهدرة نتاعهم يهدرو بصوت مرتفع ويما ديما تعيط عليهم تقولهم اسكتوا الجي ان غايسمعكم بصح هما ميردوش على يما يديروا واش يحبوا برك وكل هدرتهم على الحاطة وعلى زميلاتهم وصديقاتهم بالمدرسة يغارو بزاف من صديقاتهم وجداتي تعيش معانا نص دارهمها على خواتاتي يشريو بزاف الملابس وادوات التجميل تقول هدو بنات الوزير ماشي بنات بابا يهتمون بزاف بالمظاهر ويحكموا على الناس بالمظاهر وجداتي مسكينة حتى طاس ماء ميمدهش ليها وكي تروح الطبيب انا لنروح معاها هما مستحيل وجامي يقعدوا مع جداتي باش يهدروا معها ، ونا منقعدش معاهم ومنهدرش معاهم ومنحبهمش اخطر ماشي ملاح وميعاونوش ماما فشغل دار انا منشبهلمش كامل صح عمري 12 سنة بثح نحس روحي ناضجة بزاف كداتي تحب تقعد معايا وتقولي بلي انا صحبتها وصح اكثر واحد نحبه هي جداتي هي صحبتي وهي ديما تقول ليما علميها الطبخ ويما ماتحبش كتبت لكم باش تعاونوني كيفاش نقنع ماما تعاملني ككبيرة وليس كصغيرة مرانيش حابة نكون كيما خاوتي انا حابة مي نولي بعمرهم يولي عندي داري وولادي حتى بدار يما تقولي علاش تحبي تتعلمي طبخ ياك مراكي حابة تتزوجي وانا نقلها لالا وهي تبقى تزعجني بهد الهدرة صح راني حابة نتزوج بصح ماشي دركا بعني على 15 سنة او 16 سنة وقتها نتزوج لاني ناضجة عقليا اما جسديا فانا لست بالغة ولكن النضج العقلي هو صح أرجوكم ساعدوني.

[محارب الحمق]

قد تخرج عليك بعض النساء ممسوخات الفطرة هنا للسخرية منك ووصفك بالمراهقة لكن صدقيني، تفكيرك صحيح ألف بالمئة. أنت على مشارف البلوغ. كما أن ديننا يحث على تعليم الصغار ما يجب تعلمه حتى يكونوا مستعدين للحياة عند الكبر. لكن وبسبب المسخ الفكري الغربي لعقول أشباه الرجال وأشباه النساء في هذا المجتمع أصبحت امرأة بالغة مكتملة الأركان في سن 17 أو 18 امرأة صغيرة. ولهذا نرى بناتهم في علاقات غرامية مع صعاليك في الثانوية والجامعة وغيره. هؤلاء الممسوخون لا تسمحي لهم بتغيير فطرتك السليمة. حاولي مع أمك فالمرأة مطالبة باتقان أعمال المنزل من طبخ وغيره وربي يهدي أمك وخواتاتك البنات

[toulay]

وعليكم السلام
اولا كل عام وانت بمليون خير زاهية فرحانة وناجحة في قرايتك ان شاء الله ولعقوبة لمئة سنة امين يارب العالمين
انت حاول دخل روحك شوف امك كيفاش طيب تاني فاليوتيب كاين ام وليد كثر خيرها انا شخصيا تعلمت من عندها
بالتوفيق

[بسمة ღ]

السلام عليكم ورحمة الله وبركاته
أهلا أختي الصغيرة
حسب ما فهمت من الموضوع
أنكِ لا تُكلمي أختاكِ ،لا عزيزتي
فهن لسن عدواتك ،عمليهما جيدا
أختي لا تزالين صغيرة في السن
فالشيء الوحيد الذي أنصحكِ به
أستمتعي بطفولتكِ
قومي بمساعدة أمك بالقيام
بالامور السهلة البسيطة :كتحضير المائدة
أو غسل الصحون أو تحضير السلطة ...
عزيزتي أمكِ تخاف أن يُصيبك مكروه
إنما عن طريق إستعمل السكين أو الفرن
هذه أم غاليتي تخاف على صغارها
حتى من نسمة الهواء
فلا تلوميها
أكيد ستعلمك كل شيء لاحقا
وأيضا يجب أن تُلغي فكرة الزواج
فهو موضوع الكبار لا الصغار
عزيزتي لا تزالين صغيرة جدا
على تحمل المسؤولية
تفكير بالغ زيادة عن اللزوم
أختي فقط إستمتعي بطفولتك
واهتمي بدراستك من أجل إسعاد
نفسك ومن حولك
واحذري من الوقوع في فخ الفتيات

ربي يحفظك ويسترك أختي الغالية
وربي يهدي أمك وأخواتكِ لطريق الصحيح
بالتوفيق في الدراسة

[زبدة ذايبة]

والله مافهمت حاجة !!!!!!!

مجموعة مقارنات بينك وبين خواتاتك.

ومن جهة أخرى انت تقولي تعرفي طيبي وأمك ماتخليكش طيبي!!!!!!

من جيهة ماتهدريش مع خواتاتك على خاطر في نظرك أنت خير منهم.

من جيهة حابة تتزوجي!!!!!!

خالوطة أكبر منك.

وإن دلت على شيء

إن كانت القصة هذي حقيفية وأستبعد هذا.

أنك بعيدة كل البعد على هذ التخطيط والتخمام اللي راكي فيه.

قال تتزوجي !!!!!!!!

بنت 12 سنة تصنف في مرحلة نموها بمرحلة الطفولة المتأخرة.

يا عيبي!!!!!!!

وقرايتك ماكتبت عليها والو!!!!!!

وماتفكريش فيها خلاص!!!!!!!

قاعدة تفكري وش طيبي للراجل

سعيد الحظ!!!!!!!!

لا حول ولاقوة إلا بالله.

يا إما راكي صغيييرة جدا حتى في تفكيرك.

يا إما هذا موضوع مكذوب وفيه تدليس. وهذا الذي أتمناه.

يا إما أننا نعيش كااااارثة أخلاقية

ستأتي على الأخضر واليابس.

12 سنة تفكري في الزواج!!!!!!!!

بأي عقل تفكرين به؟؟؟؟؟؟

روحي تقراي على روحك.

وتعلمي كيفاش تقومي بنفسك.

وكيفاش الطهارة والوضوء.

وتعلمي القرآن الكريم.

منا ان شاء الله على أربع أو خمس سنوات رايحة تفكري بشكل أحسن.

في هذا السن مشكلتك الوحيدة هي الدراسة والنجاح.

والطبخ خليه للعطلة.

والزواج ماتفكريش فيه خلاص.

لأنه ليس من اختصاصك.

كاين الأب والأم تعاك هما اللي يقرروا إذا كنت مناسبة أو لا.

أما من الآن تفكري في الرجل !!!!!!!!

أنا أعتبرها كارثة.

مازالكي صغيرة وفي مرحلة الطفولة.

غير معقول أن يحمل رأسك الصغير فكرة الارتباط برجل.

دنيا الكبار يا بنيتي معقدة جدا.

ولا تحتاجي لأن تقفزي لأن كل ما هو آت فهو قريب.

فكري في قرايتك فقط.

لأن بعد الدراسة ستكون الأمور سهلة.

النجاح ثم النجاح ثم النجاح ثم النجاح ثم النجاح.

والزواج يأت به الله في حينه.

[زايدي أمحمد]

ربي يفرج عليك

[رندة.]

ما تقارنيش روحك بخواتاتك إلي أكبر منك، ولو أنك تحسّي روحك خير منهم وأنك مسؤولة أكثر منهم، كي راكي حابّة تتعلمّي الطبخ لازمك تظلّي في الكوزينة واتبعّي في أمك وتتعلمّي منها كل شيء، وأطلبي منها تعلمّك باش تعاونيها وهي كي تشوفك متحمسّة راهي تعلمّك. بصح أنا ننصحك حاليا تركزّي في قرايتك وكي يكون عندك وقت فراغ كل مرة حاولي تتعلمّي حاجة خاصة في الويكاند وفي العطل المدرسية. ربي يوفقك ان شاء الله.

[المطمئنّة]

السّلام عليكم ورحمة الله وبركاته


الطّبخ أمر سهل وممتع لمن اتّخذت منه هواية لها، حاولي مع والدتكِ أن تسمح لكِ بالدّخول معها و إعانتها وإذا لم تسمح لكِ بذلك فادخلي معها بنفسك وابدئي بإعانتها في الأمور البسيطة كغسل الأواني و سلق المعكرونة والأرز وقلي البطاطا والبيض وغيرها من الأعمال السّهلة، عندها ستتعوّد أمّكِ على وجودكِ معها ويصبح الأمر عاديا في نظرها...أنا أعرف إحدى الأخوات من الأقارب أخبرتني أنّها دخلت المطبخ وهي في سنّك تماما والآن عمرها 33 عاما وهي طبّاخة ماهرة ماشاء الله والكلّ يمتدح طبخها ووصفاتها
لذلك لا تيأسي أختي

أمّا بخصوص شقيقتيك فهما في ابتلاء ابتليت به أكثر الفتيات في وقتنا هذا والله المستعان، حاولي أن تتقرّبي منهما وأن تنصحيهما بترك مساحيق التّجميل و الإبتعاد عن التفكير المادّي ورفيقات السّوء، ولا تقولي (مانحبّهمش)...مهما يكن فأنتم في أسرة واحدة و أنتنّ شقيقات، قد يعاقبك الله تعالى على كلامكِ هذا وقد يبتليك الله تعالى بما ابتلاهما بِه لذلك لا تشمتي بهما وتقولي بأنّكِ أحسن منهما... فقلوبنا بين اصابع الرّحمن يقلّبها كيف يشاء...

ادعِ لهنّ بالهداية، ربّما تتأثّرانِ بكِ مع الوقت وينصلح حالهنّ.
أرجو من الله أن يصلح حال أخواتكِ وأن يحفظ أهلكِ وأن يوفّقكنّ جميعا لمرضاتهِ.

[هـــدوء]

خيال واسع و طريف هههه

[ريان برهوم]

ههههههههههههههههههههههههههههههه ضحكتيني

[الأمل المفقود]

تعلمي قبل ما يفوتك الوقت حبيبتي

[muslim girll]

في عمرك 12 سنة وتعرفي قسم مشكلتي وتكتبي مشكلة
هههه ووش كتبت؟؟ضحكتني ولا ضحكتيني
المهم ننصحك تشوفي ليميكي تع جيل الثمانينات والتسعينيات يعني شوفي شما في البراري. الخضراء ، وشوفي بيبي الشقية وعهد الاصدقاء وريمي
بالاك تتحسن شوية نظرة تاعك ولحوايج لي ماشي ملاح اخطيك منهم كي تكبري تعرفي سلبياتهم .. اعرفي مالا وش تشوفي فالنت ووش تقراي

وشوفي ليميكي بلغات اجنبية هادي احسن طريقة بش تتعلمي لغة

تتزووجي وديري دار هههه فكرتيني باستاذة قاتلنا فسويام سقساتهم وش حابين ديرو وحدة كتبتلها حابة نستقر ونتزوج هههههï؟½ï؟½
يخي حالة يخي!
مزالكي صغيرة ولو كان جيت نعرفك نعطيك طريحة ع هاد التخمام ههههه
التاي بقرايتك احسن لك.

[rayhane16]

شوفي بنتي
في الذنيا هاذي كل حاجة عندها وقتها فمثلا الطفل الصغير يحب يطير و هو يا ربي يددش و لكن لوكان يطير يطيح و يموت ماشي صح
هاكداك نتي راكي مع الزواج ربما راكي تشوفي في الزواج الحب و الاهتمام علابيها هدرت عليه و هادو ما راكيش ربما تصيبيهم في داركم و لكن تقدري تديهم من مكان ااااخر تماما بعيد كل البعد عن ما فيه مضرتك في عمرك هذا و هو النجاح الدراسي و الاهتمام بنفسك و اثبات وجودك بهوايات تحبيها
مثلا الطبخ معليش ما تحبش امك تعلمك اتعلمي وحدك بالحاجة و بالساهلة ما دامو هوايتك انا بنتي ايضا عمرها تسع سنوات و تحب تطبخ و لكن القراية قبل كل شيء
الطبخ ما يروحش زملنو لمن القراية عندها وقتها
خواتاتك ما تكرهيهمش مهما يكون هما انسك و فرحتك و سندك في هاد الحياة
نصيحتي بنتي ما تخليش الفراغ و التخمام يدوك الى امور لا تخدم ما فيه سعادتك
التهاي بدينك ما دامك ماشاء الله عقلك كبير اقراي كتب راح يكبر غقلك عالمفيد عالاقل و التهاي بقرايتك فبها تثبتين نفسك و نجاحاتك العلمية و العملية و ربي يصلحك و يصلح بناتنا اجمعين

[وَحْـــ القلَمْ ـــيُ]

مازال مازال قدامك طريق طويـــــــــــــــــــــــــــل
اولا تتعلمي ما تطيحيش في اخواتك مع ناس غرباء مثلنا
ثانيا الطبخ خليه للعطلة
ثالثا الزواج حسبتيه غير باسمو ههههه

مازالك يا بنتي صغيرة ههه
وكلامك هو أكبر دليل على أنك مازالك petite ^^
مازال تكبري وتفهمي ويجي كاش يوم تضحكي فيه على تفكيرك هذا
وتضحكي بزاااف لانك مخدوعة بالطريقة اللي راكي تفكري بيها في الزواج ههه

رابعا املئي وقتك بقراءة الكتب النافعة


والموضوع للأسف يبدو مجرد خدعة ...