كيف اجد لي صديقة و أختا؟

[مشكلتي]

السلام عليكم ورحمة الله
انا طالبة جديدة ف الجامعة وعندي واحد المشكل
انا بطبعي غير اجتماعية وما نحبش نخالط ولل نتعرف ع ناس جدد
لدرجة انو البنات لي نمشي معاهم بزاف م الاولى متوسط وانا معاهم
حبيت انحي هذي العقلية ما حبيتش ندير معاهم فلاشومبر ف الاقامة على امل باش نتأقلم ونتعلم نخالط(لبنات تع لاشومبر كامل جايبين الباك بتقدير جيد جدا تسمى تع قراية وهذا لي شجعني)
المهم درت معاهم وكلش وبالشوي بالشوي والفتهم بصح ما نحسش روحي مرتاحة معاهم كيما صحاباتي..ونضطر ديما نروح عندهم على هذيك بدلت ودرت مع واحدة من صحاباتي
وش ندير ضرك
منيش حابة نبقى بعقلية وحدي
--رغم انو عندي بزاف صحاباتي بصح ما عنديش وحدة نقدر نكون معاها في كل وقت وتكون قريبة ليا بزاف كيما اغلب البنات ،صراحة نغير كي نشوف 2 قراب كيما الخواتات ونتمنى نكون كيفهم
نحس روحي وحيدة وفي نفس الوقت انا ما نمدش فرصة لروحي باش نكون صداقات جدد والجامعة فرصة باش نتغير
ديما جابدة روحي ع البنات
حتى الأخت وما عنديش باش نحسها صديقتي(ماما الحمد لله كأنها اخت وصديقة بصح ما تكونش كيما الصديقة الحقيقية)
وش رايكم ف واش كتبت؟ وهل راني غالطة في طريقة التفكير هذه؟

[زبدة ذايبة]

الناس راهم ينقصو في العلاقات

وانت حابة تزيدي

مقابل ماذا كل هذا؟؟؟؟؟

ومن حكم عليك بأنك غير اجتماعية؟؟؟؟

وما معنى إنسان إجتماعي؟؟؟

وشكون اللي قالك أنك كي تبدلي صديقاتك هذا هو معنى أنك اجتماعية.؟؟؟؟؟

ماتعرفيش روحك حتى فاش طيحي.

تبدلي صديقات قديمات كبرتي معاهم

تعرفيهم ويعرفوك

بصديقات ماتعرفيهمش

بأي منطق انت تحكمين على الأمور.

الأصل في الصداقة أن تكون مبنية

على أسس واضحة.

أهمها التفاهم والتوافق والانسجام.

وصديقاتك القديمات يوفرولك كل هذا.

على الأقل تعرفي أخلاقهم

رحتي تبحثي عن المجهول بحكم انك غير اجتماعية.

الصاحب ساحب.

والعبرة ليس في عدد الصديقات

العبرة بأخلاقهم وتربيتهم ومدى انسجامك معهن ومدى تعاونكن على الخير والصلاح.

الصديقة اللي تساعدك على فعل الخيرات وترك المنكرات.

الصديقة التي آذا كانت عندك مشكلة تساعدك وتوقف معاك.

غير هذا لا معنى له.

في انتظار باقي الاعضاء أتمنى لك التوفيق.

[أمة الرحمان رقيّة]

السلام عليكم

اختي اخطيك من الصداقات

الوقت تبدل

خلي علاقتك مع الناس سطحية جدا

الصديق في وقتنا هذا عملة نادرة جدا ومن الصعب تلقاي اخت لي تعينك على طاعة الله بلا حسد وبلا مشاكل وبلا غيبة

واكثر الصداقات تاع البنات تنتهي بمجرد ان وحدة تتخطب ولا تتزوج

اهتمي بدراستك فقط

[مراد سابقا10]

انا راجل ونقولك بكل وضوح مبقات لا صداقة لا والوا في زماننا يفيدك ذراعك وقرايتك

لي يصاحبك في هذ الزمان يبدا يخطط كيفاش يدمرك الناس كامل ولات قلوبهم كحلة بالحسد والغيرة

انا كي نقولك هذا الكلام ماشي يعني مفيهش الصالحين بصح قلال وحتى ولو تلقايه صالح كي تطيح معاه في امور الدنيا والله يحسدك

رانا في زمان واعر بزاف لازم الإنسان يكون يقظ في اقصى الدرجات ولازم يكون يفهم المعاني البعيدة لكلام الناس وتصرفاتهم

زيدي الجامعة ماشي كيما قرينا فيها بكري الجامعة بكري زي وضرك زي علابالك لوكان تطيحي في بنات منحرفات قادر يدخلوك في متاهات كبيرة بارادتك ولى بغير ارادتك

اذا ماشي بارادتك ممكن يكون حتى ماشي بارادتك مثلا يصوروك ويبثعوا صورك او يبتزوك المهم الدنيا حكايات وحكايات متخلاصش.

ديري صديقة ولى زوج واقفلي لاليست ماناش في زمان مخالطة .

[imi souki]

السلام عليكم **
شوفي انا عكسك تماما كنت اجتماعية و عندي الكثير من الصديقات و الناس دايما يقولولي كيفاه ديري هادو الصداقات و ما تتخاصمي مع حتى وحدة.... لكن الحقيقة انو كنت نحس بالوحدة و ثقتي بنفسي مزعزعة من بعدها بديت نقرا كتب بزاف هكا بديت نفكر نمي مواهبي مبقيتش غير صحبتي وش قالت والله ماعندها حتى فايدة ... العلاقات السطحية راحة بال .. سلام ابتسامة سؤال عن الحال و انتهى الكلام ...لأنو في النهاية التي كنت اعتبرها صديقتي و أختي و عشرة 11 سنة منذ الصغر ظهرت تحكي عليا في ظهري ... نصيحة تقبلي شخصيتك الرائعة كما هي و كوني أوع بنفسك يا غاليتي فلا أحد حقق النجاح الا بعد أن تجرع الوحدة ... وفقك الله غاليتي °°°°° آسفة على الثرثرة

[Fifioo]

اختي اخطيك من صداقلت ظال فلانة دارت وفلانة جات و ك تكون معندكش فبس لازم ديريه و شوفي ذاك وشو ي يعني بلاما نزيد في خرابيط
الحمد لله انا عندي زميلات من ابتدائي مي اذا شفتهم يديروها غي على عسة و خرابيط نسكت ونجبد روحي و الحمد لله هذا وقت فكري بقرايتك وبدينك والسلام عليكم

[mrmilano1984]

صرا معي واحد دمرني بالغيرة والحسد وحتي انو حاب يسحبني لطريق خامجة انا فقت لنيتو من لول هو ولد مش متخلق وعائلة الخ كي قريت نيتو وعينيه شفتهم عرفت انو لاينوي الخير ابدا رغم اني عمري مااديتو ابدا والله العضيم لكن سواد قلبو الشديد نعم شديد وكحل واسود وقاس جدا حب يدمرني في طريق لحرام هو اللدة تاعو يضيعك ويحطمك بش تولي كفو وووو لكني هربت منو بلوكت هاتفو اصلا يريح وحدو كي مسموم قلب مكروه جدا يشوفوه يهربو منو عينيه عين شريرة قصدي نوايا عينيه شيطانية ربي يسترك من بنات لي يدوك للهاوية وطرق عوجة اكيد راح تلاقاي بيهم في جامعة تفاديهم فورا ماتخليهمش ينويو من لول ضياعك

[كلنا راحلون]

كثبر لصحاب يبق ....................

[أم رقية نسرين]

شوفي نتي عندك صديقاتك من ايام المتوسط يعني تعرفيهم ملييح و تعرفي اخلاقهم معندك ماديري بالصداقات الجديدة
والبنات ياختي متحكميش عليهم بالقراية يعني مشي كي داو الباك بتقدير جيد جدا تبعيهم برك الأخلاق هي كلش تبعي قرايتك برك و خلي تعاملك مع زميلاتك في حدود الدراسة
ربي يوفقك للخير

[noursm]

الصداقة تجي وحدها ماش انتي اللي تحوسي عليها
راكي مازلتي في بداية السنة بل بداية الحياة الجامعية
بالصح نقولك حاجة خلي علاقتك بالناس سطحية جدا ، و ماكانش منها هادي تع صاحبتي كيما اختي ، مازلتي صغيرة برك ما عندكش الخبرة.

[nadir2339]

عندك صاحباتك من الصغر شدي فيهم . تخلاط بزاف خاصة في الجامعة راه مخطر كيما يقول الفاهم . انا على تجربة نقلك شدي في صاحباتك الي تعرفيهم . ومستقبلك وقرايتك

[Histidine~]

انا ثانيك كنت نحوس على الصديقات مي خلاص طول مسيرتي الدراسية و في اماكن مختلفة الجميع يتنمر علي
بشتى الطرق عند التجاهل و عند الضحك في وجوههم يكفي هذا كل ما بقي في جعبة ايقاف هذا هو "شتمهم" و لن افعل هذا ابدا
لذلك و الحمد لله انا لا بأس بي لست "نية" او "بريئة" الا ان هذا جعلني اكره الصداقة حتى صديقتي السابقة كانت تتقرب الي انا ابتعد عنها
.. كن وحيدا تكن افضل

[عمر احمد عمر]

لا يوجد اصدقلء للابد ولايوجد اعدار للابد هناك فقط مصالح

[visa uk]

كمت قالك والله تاع مصالح مصالج ونفسهم هدا ان لم يوجد مضرين يوجد مصلحجيين وكم اكثرهم اصدقاء مصالح فقط

[karima rayan]

نصيحة خليك مع صحاباتك تاع المتوسط لانو في الوقت الحالي صعب تلقاي صديقة مش تاع مصلحة .خصوصا صديقات الجامعة وهذا عن تجربة اختي .خليك سطحية مع الجميع*

[muslim girll]

اللهم وفقنا للقول السديد والعمل الرشيد

خليك منفتحة على الاخر بمعنى ايدا شفتي حاجة مليحة فيه اديها
شفتي طفلة تقرا مليح وتحفظ ديري معاها برنامج بش تحفظو كيف كيف وهكذا ...
وكاين امور تتعلميهم غير بالعين مثلا المعاملة ماشي لازم حتى داسريها بش تستفادي منها
الصداقة بش تستفادي وتجوزي وقت مليح ماشي بش تفرغي قلبك
الوحيدة لي تحكيلها هي يماك
واما صديقة تديري فيها كونفيونس قريبة ليك بزاف هاد شي ماننصحكش بيه
ديري صحابات اضحكي معاهم واقراي معاهم وديرو نشاطات كيفكيف مي ماتحوسيش ع صديقة كيما كنا نشوفوهم فليميكي
دوك الحياة تبدلت وفالجامعة عام عامين تتخطب تولي ماتغزرش فيك ميمبا -ممكن-
وكيما ذكرت احدى المجيبات الصداقة جي. وحدها
ايدا ماحسيتيش روحك الاز مع كش وحدة خلاص ماشي بالسيف تداسريها
المهم تفهمي وشمعنتها الصداقة
ودايما استخيري حتى على صحاباتك
ربي يسترك

[visa uk]

مخالطة نورمال لكن قتلك كاين الا يضرك ومسموم قلبو اكحل اكحل ومايحبلكش الخير ابدا بنواياه الجد سيئة يخططلك كفاه يدمرك فعلا كما قال الاخ يحب يحطمك ويشوفك طايح تاع الصح وصرات معي ناس فقتلهم وناس طيحوني بعد فقت سواد قلبهم اهمالا جبدت روحي منهم وكي نشوفهم نبدل طريق او جهة او نعمل روحي مانعرفهمش تماما لانهم مضرين جدا جدا للعقل والصحة اما لي يفيدني او نفيدو وووو نورمال نحملها