رح نهبل...ندمت

[مشكلتي]

لسلام عليكم
مجرد أني نفكر ف الموضوع نكره وش بقالي م حياتي
جبت الباك 17 ودرت طب برغبتي.الجامعة بعيدة اذن مضطرة نبات ف الاقامة
رحت 3 ايام قعدت ثما تقريبا
وحبيت نولي للدار باقرب فرصة ..وليت
ضرك راني نكتب ونشهق بالبكاء
رح نقضي اكثر من 10 سنين بعيدة على دارنا
توحشتهم بزااف.م نقدرش نعيش بعيدة على ماما..رح يروح عمري بعيدة عليها ..رح نكبر بعيدة عليها..نكمل كي نكون بلاك 29 ولا 28 سنة وثما نتزوج اذا كان
معناه هذا كان اخر عام ليا ف دارنا
ماراحش نعيش معاهم كيما كنت
لوكان خممت هكا قبل ما ندير الشوا تاعي كنت مستحيييل نختار الطب..
تسمى خلاصت حياتي مع ماما وقع العائلة
فترة شبابي رح تضيع وانا بعيدة عليهم
كرهت ومنيش حابة نولي نقرا
نقراو بالسبت..اذن نقعد معاهم غير يوم ف الاسبوع..منيش قادرة نتحمل اكثر
ليتني اخترت قراية تع 3 سنين ونبقى معاهم لأطول مدة..

ممكن مجرد فضفضة بصح التفكير هذا هلكني ..قريب ينشفوا دموعي..انصحوني جزاكم الله

[نجاة^^]

وعليكم السلام ورحمة الله
راح توالفي متخفيش ،الأيام الأولى تاع الإقامة الناس كامل بكاتهم وبعدها راح تتعودي على الأمر أما بالنسبة لعايلتك حاكيهم في الهاتف تخفف شوي أحسن ما تخلي قرايتك والسنين راهي تجري غمصي عينيك تلقاي روحك في العام 5 او 6 فقط اصبري
ننصحك أملي فراغك لينقص تفكيرك في الأهل والبيت ووو
بالتوفيق

[عادل عبد الله]

السلام عليكم ، الأخت هذا أمر عادي هذه هي سنة الحياة ، مع الوقت ستتأقلمين ودعي هذا التفكير السلبي ، على الأقل في العطل أنت معهم ، أعلم أن هذا الأمر صعب عليك لكن مع مرور الوقت ستتعودين على ذلك ، ولا تنسي أنهم سيكونون فخورين بك عندما تتخرجين وتصبحين طبيبة بإذن الله .

[محمد جديدي التبسي]

يمكنك تغيير التخصص العام القادم
المكوث في الاقامة ليس جيدا لسمعتك
فنحن نسمع كوارث تحدث هناك
ديري تخصص عادي وابقي بجانب أسرتك أفضل
بالتوفيق

[نبض قلبي]

السلام عليكم اختي
و الله كامل كنا و لازلنا نعاني من البعد الى يومنا هذا
لكن ما العمل؟؟
السنة اولى راح تلاقي بعض من الصعوبات لكثرة المواد و الدروس و الساعات الدراسية
حاولي تنسي نفسك او تلهي روحك مع صحباتك او شيء من هذا القبيل
كي تضيق بيك اتكلمي مع الوالدة.تاعك في الهاتف ، و الله ذكرتيني انا وحدة من الناس كنت نضرب معاها بلاك تفوت ساعة في المكالمة
يوم عن يوم توالفي و تخرجي على النظام
ربي يكون في العون طبيبتنا👍

[زايدي أمحمد]

كل بداية مرحبة جديدة في حياتك تجي صعبة وبعد مرور الزمن تتأقلمي لا تنسي انك تكوني مفخرة عائلتك لما تكملي دراستك بالتوفيق ان شاء الله .

[OumaMeh]

السلام عليكم ورحمة الله وبركاته
قالك ما تبقايش في الاقامة
ياخي حالة ياخي
شوفي انا قريت العام الاول و الثاني كنت نروح للدار و من بعد رحلنا ....
رحت انا للاقامة التخصص تاعي ماكنش في الولاية لي رحلنا ليها
واش صرا ؟؟؟
تعذبت خاصة اني خليت خويا الصغير
نبات نبكي نغم على راسي باه ما يشوفونيش لبنات ...
و من بعد والفت
كان الوقت بين دارنا و وين نقرا ع ساعات تقريبا
اذا كنت نقرا الاثنين على ص مثلا نركب على خ يوصلني والدي للمحطة نروح للدرس بحقيبتي ههههه معمرة بلكسرة و الماكلة ههههه
نكمل يومي ونروح للاقامة نتلاقى لبنات ننسى شوية و امي و خاوتي و خالاتي نهدر معاهم يوميا صباح و عشية و تمضي الحياة.
ادعي ربي تكوني مع بنات اصل هذا ماكان ويبعد عليك صديقات السؤ
شوفي ما كانش حاجة ساهلة و لا تجي بساهل
اختصاصك نبيل مع الوقت تحبيه اكثر و مع التربصات يمكن تلقاي تدريب في ولايتك .
امك عمرك ماراح تشبعي منها اقراي على الاقل اذا وجعتها حاجة الا قدر ربي تلقاك.
واش من قراية تاع 3 سنوات لي حابة تقرايها
اختي الجزائر تاع الوقت بقرايتك و ديبلومك و يا ربي
ادي معاك كتب للاقامة اخلقي جو طيب مع لبنات صوموا الاثنين والخميس
انا افضل صديقاتي لقيتها في الاقامة و لحد الان تجيني ونروحلها علما انها من ولاية اخرى
انظري بعيدا نحو الافق.
والديك يكونو فخورين بيك صدقيني و حتى اذا تزوجتي بعد الدراسة والديك يبقاو والديك و صدقيني حياتك كاملة عمرك لا راح تشبعي منهم .
الى الامام فترة وتفوت و تولي تموتي على قرايتك و تستناي وقتاه تتعلمي حاجة جديدة .
موفقة باذن الله

[سر سعادتي..]

اختي كاااامل مريينا بهذه المرحلة انا ايضا كان تخصصي بعييييييييد عن مقر إقامتي وكنت نقعد بالشهر والشهرين باه نروح لدارنا فالبداية شبعت بكااااااا خصوصا واني كنت وحدي يعني ولا وحدة من صحاباتي او على الاقل من لي نعرفهم كانو معيا في هذيك الولاية عااانيت بزااف العام الاول لكن الحمد لله والفت وتعرفت على صديقاتي وركزت فقرايتي ولقيت هذوك الخمس سنين فاتو ريييييح والله رغم التعب والغربة ونزيدك انا في نفس العام لي تخرجت فيه تزوجت يعني في نفس الصيف وزدت تغربت على دارنا لاني مقيمة في ولاية اخرى بعبييييييييدة ومع ذلك الحمد لله راني متأقلمة ممكن لأتجني والفت البعد ... حبيت نقلك اي قضية وقت ورايحة تتعودي ركزي في دراستك وتخصصك مليييح ربي يبارك الجمييع يحلمو بالطب وحاولي تراجعي دروسك بشكل يومي على الأقل يبقالك يوم الويكاند تريحي مع داركم.. وممكن تحكي معاهم فالنت صوت وصورة ... ربي يعييينك اختي ويوفقك في حياتك

[هـــدوء]

يعني لو جيتي تقراي في جامعة محترمة و لها قيمتها عالميا نقولك تضحية معقولة إلى حد ما
خاصة أنو معدلك كان يأهلك لخيارات أفضل من الطب بكثير
أنا مع أنو الإبن يقرا و ينجح بش يعاون عايلتو
بصح مش على حساب حياتو العائلية نفسها
يعني وش يستفيد الإنسان كي يشوف أسرتو بالأسابيع لسنوات
و يرجعلهم أخيرا في وقت ممكن يكونوا راحوا و مايقدرش يفيدهم ساعتها
و يلقى روحوا ما شبعش حتى من وجودهم و فوت أهم اللحظات معاهم
العائلة هي أولى الأولويات و الحاجة لي تتجاوزها لازم تكون ليها قيمة كبيرة فعلا
بالتوفيق ليك

[زبدة ذايبة]

هل أنت متأكدة أنك ماتقدريش تقراي؟؟؟؟

إذا كنت متأكدة من نفسك

فمن الأحسن تختصري على روحك الطريق.

خير من لخسارة كل عام.

وإذا كانت المسافة بعيدة بزاف على داركم

فمن الأحسن تقراي قريب من داركم

تقراي وتباتي في داركم أحسن بكثير

وإذا ماكنتيش متأكدة ماعندك علاه ديري قرار خاطىء

وهذ القرار يتبعه قرارات أخرى خاطئة.

وتبقاي تعالجي الخطأ بالخطأ.

ومثلما قالولك الأخوات هي مسألة


وقت وتعود.

إذا كنت تشوفي لهدف وكانت الظروف مواتية فمن الأحسن
تصبري.

وإذا تشوفي أن هذ التخصص مامنه

فائدة فالأحسن اليوم قبل غدوة.

وديري في بالك البداية دائما صعبة.

ماكاش اللي صابها طايبة واجدة

كلنا مر من طريق التعب والنصب

والشقاء.

الراحة عمرها ماتجيب الخير.

وهذا ما يعنيش أن الفتاة لازم

تركب الكار وتخرج من ولايتها

إذا كاين قدام داركم جامعة

فيكون من الأحسن اللي قريبة لداركم.

ماكانش تخصص خير من الثاني

العلم واحد.

لكن الحسابات المادية هي اللي تخلي

الفروق موجودة بين التخصصات.

شاوري والديك وشوفي رأيهم.

ومن رأيي إذا كانت الجامعة اللي فيها الطب بعيد

فمن الأحسن تروحي لتخصص (جامعة) قريب من بيتكم

وفي الأخير البطالة تضرب بقوة

في الجزائر. كل التخصصات فيها مشكل البطالة.

فكري واستخير واستشيري

فالخير فيما اختار الله.

كوني فقط متأكدة من قراراتك.

ومصلحتك أهم.
والمحافظة على دينك وأخلاقك أهم من الطب ومن النووي.


ربي يوفقك.

[اسيل القمر]

كامل صرالنا هاك لعام لول و مبعد والفنا و درنا صحابات و الله العام التالي بكينا كي جينا نتفارقو

[بسمة ღ]

أختي شئ عادي
السنة أولى هكذا لكن بعد ذلك ستعتادين
تكلمي مع أمك في الهاتف حين تشتاقين
إليها،اجعلي اهلكِ فخورين بكِ
بالتوفيق يا طبيبة المستقبل

[تمردت]

السلام عليكم
الكل هكا وتفكري مش غير نتي تبكي وتتوحشي والحمد لله كاين وسائل التواصل ,,اختي هدي مجرد فترة وتفوووت وتوالفيي ربي يوفقك

[فايزة1207]

انا اكره مرحلة عندي هي الثانوية كنا داخلي نروحوا كل اسبوع شبعت بكاء بصح بعد الليسي ثاني داخلي والفنا وخدمنا وباعدنا على اهلنا هاذي هي بداية الطريق بنتي

[~عيون القلب~]

احمدي ربي واشكريه لأنو وفقك لهذه التخصص
الناس كامل تحلم بيه والناس كامل تحتاجو غدوا الا قدر ربي يمرض احد افراد عائلتك واش راح ديري ؟؟
و زيد راكي تجي فلويكاند معناها الحمد لله راكي تشوفي داركم مرة في الاسبوع و راهو كاين لي فاكونس نتاع الشتا والربيع والصيف والحمد لله
كاين لي يقراو جامعة عادية مشي كيما تخصصك كامل (تخصص عادي) المهم ,, وميشوفوش اهلهم بشهوور
خلاصة القول ارضي بواش كتبلك ربي وكرمك بيه وفضلك على كثير من الطلاب واحمدي ربي واقراي تخصصك بحب و اخلاص فيه

[عيدة نور الهداية]

اختيارك صائب اختي معدلك ممتاز والطب تستاهليه
الان لما تبداو الدروس والمحاضرات وتوالفي اجواء الاقامة صدقيني وقت يعيطولك داركم تقوليلهم معنديش الوقت .
هذي اول مرة فارقتي منزل عائلتك عليها جاتك صعيبة
لكن ستتأقلمي مع الوضع
بالتوفيق يادكتورة

[قابضة على الجمر]

سبحان الله فكرتيني بروحي و الله كي نتفكرها نضحك ....الامر عادي أنك تندمي و تعاني في البداية لانو اصعب الامور بدايتها و من بعد ضرك توالفي و تعودي تضحكي على هاذ الايام ...لازمك تبعدي على داركم و تتحملي مسؤويتك و زيد قراية الطب راح تنسيك في كل شيء و الاعوام تفوت بسرعة البرق و اكيد يجي نهار و تتفكري كلامي

[نهال 12]

الامر صعب كن ربي يصبرك