حيرتي مع ابي ومستقبلي

[مشكلتي]

السلام عليكم
اريد طرح مشكلتي



انا طالبة بكالوريا حرة شعبة تقني رياضي تحصلت في باكي الاول على 11بسبب ظروف صعبة فلم اصل الى حلمي الا وهو تخصص الصيدلة
اعدت البكالوريا هذه السنه لاتحصل على معدل 16.21 والحمدلله
اخترت الصيدلة كتخصص و طارتلي الحمدلله
بصح ابي

مصر وملح على اني ما نقراش هذا التخصص
بسبب الكلام الشائع عنها -ماكانش الخدمة-ماكانش لاقريمون-تقرا 6 سنين و تصبح بطالة - ....الخ
لكن انا حابتها
وبالمقابل
راهو باغيني ندير شبه طبي قابلة
بحجة انو هذا التخصص فيه توظيف مضمون
و راتب جيد
علابالو بلي الرزق بيد ربي وياما قلناهالو وهو مقتنع بيها
ولكن سقسى بزاف ناس قرات وبقات بطالة
كامل نفروه منها وقالولو مبقاتش كيما بكري

المهم هو من الاخير باغي الخدمه ديراكت وباغي الدراهم ويخمم ديراكت على المستقبل
انا ماشي حابه هذي لساج فام
تخيلوا انو وصلت بيه لاقاني بالامام تاع المدينة باش يقنعني ما نقراش صيدلة
ضرك وقعت بين نارين .اما ارضاء والدي مكرهة ومجبرة واما اختيار تخصصي الذي اعدت من اجله البكالوريا
امي ماحبتش تتدخل قالتلي ديري لي حابتها انتي وراضية عليها انتي
صليت هذه الايام الاستخارة كثيرا
لكني مالزلت راغبة في الصيدلة من الداخل
لاني حابتها من صغري
و ابي راسو يابس بزاف عذرا على اللفظ
والدي من النوع لي يحب يضغط ويدير رايو ويغصبك على الحاجة وفي النهاية تمشي كلمتو
راني حايرة اشيروا عليا بلاك ابي يشوف من زاوية مانيش شايفتها انا
بلاك والدي على حق وانا بسبب عاطفتي وميلي للصيدلة ما قدرتش نشوف وش راهو شايف
اعلم ان الواقع مغاير ولازم نديروا حاجه فيها توظيف ووو
ولكن انا اصلا مشني جبت معدل 16 باش في الاخير ندير براميديكال

انتم لو كنتم في مكاني اي التخصصين تختاروا ؟ بغض النظر عن انو الصيدلة حلم الصغر ولكن وش ترايوا عليا وشنو خير فيهم

اشيروا عليا من فضلكم
كرهت والله العظيم كل يوم يزيد يضغط عليا اكثر و ما يسكتش على هذا الموضوع يبقى يلوك فيه

باقية حايرة رغم صلاة الاستخارة
قلت نلجا ليكم لعل تقدروا تقنعوني بالحجة القوية
طولت بزاف سمحولي
هنا نتوقف
بانتظار ارائكم اخوتي رح تكونوا اكثر حكمة مني طبعا بحكم تجربتكم وخبرتكم في الحياة :)
سلام

[الرميصاءْ]

السلام عليكم

تقدري تختاري الصيدلة واستخيري ربي سبحانه يوفقك وعاودي الباك العام الجاي ان شاء الله واقراي قابلة ونظمي وقتك وادعي ربي يسهلك فيهم للاثنين وطاعة الاب واجبة فهميه بالحسنى

[نجاة^^]

السلام عليكم
الصراحة راكي في موقف صعب ،ربي يسهلك ويفرج عليك.

[*آية*]

سلام.
أنا عن نفسي أفضل دراسة التخصص الذي تحبينه لأنك ستبدعين فيه عكس دراسة تخصص مجبرة عليه / ومثل ماقلت (وفي النهاية تمشي كلمته )
بالتوفيق لك

[نبض قلبي]

السلام عليكم
اقراي التخصص الي حبيتيه و اللي بغيتيه
لانو حلمك و موش حاتعيش مرتين و بانتلي موش راكي تعصي في والديك لانو طلب علم و حاجة مليحة موش راح ديري حاجة خارجة الطريق
بالتوفيق

[قدور بن عاشور]

ليس لأنه والدك له الحق في اختيار التخصص الذي ستدرسينه.
له أن يحاول اقناعك لكن الكلمة الأخيرة تعود لك
الخوف في المستقبل يحتم عليك زوجا لا ترضينه

[محمد جديدي التبسي]

لا ادري ماهو الشيء الذي جذبك للصيدله هي أشبه بالتجارة في وقتنا يعني بيع للدواء لو كان حلمك الطب يكون معقول اما عمل القابله فهو عمل محترم جدا وفيه خدمه كبيره للنساء خممي في المستقبل ماذا تريدين من وراء الدراسة فعمل الصيدلي ليس فيه اي جاذبيه حسب ما ارى والله أعلم

[yassefe]

اولا مكانش افضل من تقراي حاجة حابتها ستبدعين فيها

لاكن نتي سقسي خير جماعة الصيدلة في فايسبوك او لي قراوها

انا يقري معاي واحد كان يقري صيدلة وهرب منها في عامو التاني ودار اعلام الي معانا

المهم شوفي لبعيد واش الهدف من دراسة صيدلة ادا عاد عندك طموح وحاجة حابة توصليلها اكملي افضل

+ تقدري تسجلي في شبه طبي والصيدلة لاكن مع الوقت يقولولك جيبيلنا الباك الاصلي المهم باه يكون عندك الوقت للتفكير اكتر .

[قلب امرأة]

اختي انصحك باختيار الشيئ الذي أنت مقتنعة به فهذا مستقبلك ووالدك مع الوقت سيرضى عنك المهم انت ابدا لا تتنازلي عن شيئ هو طموحك فذلك سيكون سببا في معاناة مع الايام وهذا لا يعتبر ابدا عقوقا لوالدك فهو طريق تلتمسين فيه علما

[زبدة ذايبة]

استخيري اولا وأخيرا

ثم

بما أن تخصص الصيدلة من نصيبك يعني خلاص.

ماعليك بعد الاستخارة سوى تقديم الطعن.

ولعل وعسى أن يرفض الطعن الذي قدمته

وكوني على يقين أن الخير فيما اختار الله.

[محارب الحمق]

أكره استعمال كلمة مستقبل وأضمن مستقبلي وووو لا أحد ضامن شيء لا مستقبل ولا غير مستقبل. الصيدلة ستكون ممتعة أكثر ان استطعت النجاح في مسابقة التخصص بعد تخرجك غير ذلك هي مجرد تجارة بيع وشراء. أما القابلة ففيها خدمة جليلة لنساء المسلمين أما ان كنت تقصدين التمريض فهو اختصاص جيد ان كان يخص النساء دون الرجال وعموما المستشفيات اليوم هي أشبه بالاصطبلات مع الأسف وفيها اختلاط بين الرجال والنساء الا أن الحاجة الى قابلات هو امر محتوم ولازم. لا أعرف ماهي النية الحقيقية للأب ولكن ما اعرفه قوله عليه السلام: ""أنت ومالك لأبيك" (‏رواه الإمام أحمد في ‏‏مسنده). على كل حاولي اقناع والدك بذكاء وأعطيه جرعات من الحنان والتودد والمداراة لعله يغير رأيه

[ناصف الورداني]

أنا طالب صيدلة سنة خامسة و راني نخدم و ندرس و ندير الكثير من الاشياء و دراسة الصيدلة و في كلية الطب علمتني اشياء لو درست تخصصا آخر لما نلتها ..
ثم ان الرزق على ربي .. حنا نديروا لي علينا و نجتهدوا ...
و فرق شاسع بين دراسة الصيدلة و دراسة الشبه طبي
فالصيدلة ممكن تقومين باجتياز امتحان التخصص و تصبحين استاذة جامعية و صيدلية مختصة في المشفى ، فيصبح تحت اشرافك فريق من الاطباء و الممرضين و الصيادلة و البيولوجيين الخ ... و هذا لن تصليه في الشبه الطب و عند اجتياز امتحان التخصص مباشرة يصبح لك راتب محترم ...

[المُهَاجر]

تذكري كلامي جيدا
ان اخترت الشبه الطبي مع مقدورك اختيار الصيدلة ستندمين....
على الاقل الصيدلة تقراي وتتحصلي على الشهادة ممبعد يفتح الله تفتحي محل وديري خدامين وتشدي بيتك ,أما القابلة تقراي 5سنوات ثم تلقاي نفسك في فوهة البركان ,العمل الليلي ,المشاكل ,حتى الحبس وما احداث الجلفة عنا ببعيد ....

[Rafik.B]

والدك ربما يفكر في زواجك يعني في الصيدلة حتى لو نجحت فيها راح يكون بعد وقت طويل أما قابلة سنوات دراسة قليلة وتوضيف مباشر يعني في الاغلب الفرص المليحة للزواج رايحة تجيك وأنتي صغيرة وقابلة رايحة تكملي وتتوضفي بكري يكون عندك وقت للزواج عكس الصيدلة 8 سنوات على الأقل وعملك مع النساء فقط يعني لا يسبب ازعاج لزوجك المستقبلي هذا ما راه والدك حسب اعتقادي
ونصيحتي انك تختاري ما يمليه عليك خاطرك باش فالمستقبل تتحملي تبعات اختيارك .لأنو وضع سوق العمل مزري كلنا اتصدمنا بعد التخرج للحياة العملية

[sameur sama]

من الافضل دراسة الصيدلة بالنسبة لي فرق شاسع بين الاثنين توكلي على الله وكملي في الميدان لي راكيبغياتو وبالتوفيق في الصيدلة
واسمحيلي بغيت نسقسيك اختي تقني رياضي وتحصلت على 16.21 لكن معطاولهاش فارماسي -هندسة مدنية-

[نبراس الخير]

اهلا ^^
شوفي انت اذا قريتي حاجة مش حابتها تتعبي فيها
وما تقدريلهاش ويجي زمان نلقاوك زدتي كتبتي موضوع هنا في قسم مشكلتي
تقوليلنا فيه: انا نادمة على اللي تبعت واش اختارلي الوالد
شوفي انت قنعيه بلي ماعندكش قابلية تقراي حاجة اخرى
هو طبعا من حرصو على مستقبلك مع بعض الانانية من جهتو ربما!
المهم انت قوليلو راني متفهمة رأيك لكني حابة نقرا حاجة نقدر نبدع فيها نقدر نتحمل كل الصعوبات علاجالها
قوليلو راني صليت الاستخارة

انا نقولك باباك كان قادر يرغم تخيريها طول
لكنو لاقاك بالامام وحاورك
معناها هو مستعد يتقبل خيارك
وراسو مش يابس!!! لوكان جا يابس كون ماحلبكش اصلا كون راح للسيبار ودا معاه الرقم السري ديالك وخير واش حاب هو ههه
لذا ان شاء الله يقبلك برأيك باين فيه حريص عليك لكنو متفهم

اممم نقولك انا ياما ناس نصحوني بالصيدلة
وقالو مستقبلها واعد
صرراحة ما خيرتهاش
انا تبعت الحاجة اللي كنت حابتها من سنوات وما نندمش عليها ^^


ننصحك تديري كيفي
واللي عينو فيك تروحي في التخصص الفلاني يروح هو فيه ونشوفوه هه


سلام

[بلال88]

سبحان مغير الأحوال! في وقتنا قبل سنوات قليلة فقط كان التقني الرياضي محروما من الطب والصيدلة والبيطرة وحتى التخصصات الأدبية بل حتى العلوم الشرعية! صار كل شيء حلالا الآن!
يعجز اللسان عن وصف العقلية الفذة التي تدير البلاد!


بالنسبة لمشكلتك:

هل تريدين دراسة الصيدلة فعلا؟ أم تريدين أن لا تضيعي معدلك في "الباراميديكال"؟ إذا كان الثاني ربما تنظرين في خيارات أخرى كالتعليم مثلا: معدل مرتفع ووظيفة مضمونة.


لو أصررت على رأيك كيف ستكون ردة فعل والدك؟ يقاطعك، يتبرأ منك؟ أم يغضب قليلا ثم يعود كما كان سابقا؟
إذا كان من النوع الأول فلا أنصحك بالمخاطرة، وإذا كان من النوع الثاني فطيبي خاطره وسيلين مع الوقت إن شاء الله.


ونصيحة لك لوجه الله: رضا الله في رضا الوالدين، وإذا كان خيارك سيتسبب في انهيار العلاقة مع الوالد وانقطاعها فلا شك ستندمين أشد من ندمك على اختيار لا تريدينه.
ربي يوفقك لخير الدنيا والآخرة

[الطيب الجزائري34]

سلام عليكم ... شوفي يا اختي سؤالك عنده عدة زوايا و عدة اجوبة .
اولا كاين العاطفة و كاين العقل و الواقع
الصيديلة رغم انها حلم الصغر هذا لا يعني انه الاختيار المناسب ان كنت من المتفوقين الاوائل هنا اتحدث عن الرزيدانا اي التخصص و الذي هو صعب المنال و بعد ست سنوات ممكن نقولو شويا امل رغم ان الاولوية للعلميين على سحب التقني رياضي منذ البداية ..
ايجابيتها .. بالنسبة لك حلم الصغر و تدرسين شئ تحبينه .. و زيادة الاسم ( صيدلانية )
سلبياتها في الجزائر و هي كثيرة و الاضرابات الاخيرة لخير دليل.. هنا اتحدث بواقعية ..دراستها تتطلب التضحية و الصبر ... بعد التخرج ان كان عندك معرفة كبيرة مثلا والي او شخصية رفيعة المستوى ممكن تتحصلي على ترخيص او لديك المال لشراء fond de commerce من مليارين فما فوق حسب المنطقة ... اما عادا هذا فانسي الترخيص في السنوات الاولى ربما بعد عشر سنوات من التخرج و ربما يكون الامر اصعب لما يمنحوك ترخيص في منطقة نائية تبيعي الباراسيتامول ... لكن ممكن تعملي في صيدلية بعقد .. cta .. هنا بالنسبة للعمل زملاء المهنة يفضلون الباعة اصحاب التجربة و الممرضين لان الراتب يكون اقل ...ممكن بعد التجربة تصبحين صيدلانية remplaçante لصيدلاني اخر هنا ممكن الراتب يكون 40000.00 فما فوق
الان ان كنت محتاجة المال في عائلتك و حياتك فانصحك باختصاص اخر كما قال الوالد .. هنا بالنسبة للوالد هو يفكر بعقلانية لان الواقع يعكس ما يقولوه لك و يفكر بعقلية المدرب المهم نربح المباراة يعني انك تدرسين الشبه الطبي بعد سنوات قليلة و تدخلين في عالم المادة مباشرة ... ممكن تدرسن الشبه طبي و بعد التخرج تعملي في منصبك و في الصيديلة كزيادة مثلما يفعل البعض...في الاخير يبقى رايك .. رغم انه هناك طموح و عاطفة و حب لاختصاص و هناك واقع و حقيقة يجب ان تاخذ بعين الاعتبار و الحقيقة المرة افضل من الوهم المريح. تقبلي مروري.و بالتوفيق.

[soz soz]

مع كل احترامي للوالد كيفاه يقرر واش تقراي بعدما تعبتي وضيعتي عام لتحقيق طموحك هاذي لمفهمتهاش تقريبا اغلب المتحصلين على البكالوريا مقراوش واش حبو انا منهم واختي وانتي وووووو وربي يهدينا ويهدي والدينا علابلي يخممو فالمصلحة تاعنا بصح كيما قالو الاعضاء مكاش ضامن للمستقبل لانو الضامن ربي سبحانه

[ماري نت]

ما أدراك أن الصيدلة تخصص فيه عوائق كثير فربما تتحسن الأمور عندما تتخرجين وربما التكوين شبه الطبي يكثر فيه المتخرجون وتقل مع عددهم الهائل فرص العمل ؟لا أحد يدري ، ولعل في دراسة الشبه طبي أيضا خير كثير لا تعلمينه ، يعني اللي شايفها ربي ماهو شايفها العبد ،المهم الآن هو الاستخارة ليوفقك الله

[زايدي أمحمد]

والدك يبحث لك عن الافضل لا يوجد بشر يهتم بك مثل والدك غمر عليه العمر اكيد انه يعلم سلبيات تخصص الصيدلة لا يريده لك انا شخصيا انصحك تختاري تخصص ساج فام فحتى هي لها مسقبل