زوجة الابن

[مشكلتي]

سلام عليكم

بعد اقل من شهر بإذن الله ندير العرس
انا في دارنا مندير والو عندي شكون يقضي عليا شغل البيت انا غير مريحة والحمد لله خصوصا بعد حادث صرالي واصابتي بإنزلاق غضروفي قالي طبيب مترفديش ثقيل واستحفظي على روحك
المشكل وين راه درك امي تقولي لازم الكنة تدير كلش
المهم انا قريت رأي الشرع انه المراة مطالبة فقط بخدمة زوجها

انا منيش انانية بصح صحتي متسمحليش نخدم افراد اخرين ولا يكلف الله نفسا الا وسعها
اريد رأيكم في حالتي للعلم انا الوحيدة زوجة ابنهم وهوساكن مع اخته تقرى طب واخوه اصغر منه ووالديه امه مازالها صغيرة

[amoulette]

بما انك ستسكنين معهم اكيد سوف تساعدين والدة زوجك في اعمال التنظيف و الطبخ فهذا ليس فندقا حتى تتوقعي ان تبقي مستلقية طول اليوم و والدة زوجك تخدمك
ثم ماذا تقصدين بخدمة زوجك فقط ! هل عندما تنتهون من الغذاء ستغسلين صحنك و صحنه فقط !؟ ام عندما تحضرين الغذاء تحضرين كمية لكليكما فقط
اذا كنت تريدين هذا عليك المطالبة بسكن خاص و جلب خادمة .
بالنسبة لاخت الزوج التي تدرس طب اكيد ليس عندها الوقت للقيام بالاعمال المنزلية لكن هذا لا يعنني ان لا تقوم بأي شيء
يمكنكم تقسيم الاعمال بينكم هكذا حتى واحد ما يتعب و حتى واحد ما يحس بلي راهم حاقرينه

[نبض قلبي]

اختي شوفي معايا
كلش يكون بالتفاهم
اوقفي مع عجوزتك عاونيها اغسلي و اقضي
كي تشوفي روحك انضريتي قوليلها خالتي مانيش قادرة نزيد نوقف و لا ، هي اكيد راح تفهمكك
مي كي تجي نهار اللول حاكماتك الفهامة و تقضي غير لراجلك وش تقول عليك!؟
عادي ديري اللي تقدري عليه و ربي راهو عالم بصحتك و موشك حاديري فوق طاقتك
ربي يهنيك

[مرام 2001]

علاه لازم نخدمو الاهل ثاني؟؟؟ والله معلابالي قوليلهم بلي راكي مريضة او متقدريش يفهموك

[فطيمة 03]

تفاهمي معاه من الدقيقة الأولى قوليلو بلي مانخدمش أمك أو غيرها وإني نخدمك انت فقط . هكذا تتجنبي المشاكل في المستقبل. لأنه إذا كان داير في بالو بلي رايحة تتعاوني مع عجوزتك أو تخدميها في بعض الأمور ومن بعد تصدميه بالواقع . هنا تكوني انت المخطئة . وتكوني فتحت أبواب الجحيم على نفسك.

[عثمان الجزائري.]

المشكلة عندما يرونك في العرس شابعة شطيح و رديح و من بعد تقوليلهم عندي إنزلاق غضروفي ^_^ مزحة....
يجب ان تضعي في رأسك أن أهل زوجك كانوا يقومون على شؤونهم قبل مجيئك يعني انهم تهناو من شخص آخر و هو الإبن على أساس انك ستقوموين على شؤونه، اللهم إلا إذا قلتيوا ما نقدرش نخدمك حتى انت و هنا يكون مشروع زواجه فاشل من الأول...ستكونين تحت المجهر يعني قومي بواجباتك على قدر طاقتك لأن العمل المنزلي لا يستلزم بالضرورة رفع الثقيل...

[نجاة^^]

ربي يعينك ويسهلك اختي

[سيرين راجي]

ما تستطيعين القيام به لزوجك تستطيعين القيام به للبقية يعني ماهمش رايحيين يكلفوك باعمال شاقة طياب ومسيح وغسيل فقط بما انهم عنده امه واخته اكيد راح يعاونوك ولكن بشرط تكوني ناس ملاح وتخبريهم بالضرافة وتعتذري ع الاعمال الي تضرك هما اصلا اذا شافو تعاملك طيب ما يخلوكش تتعبي اما اذا دخلتيها خلاف من النهار الاول ماكيش رايحة تسلكي
كوني طيبة برك مبروك عليك

[هشام 12]

بما أنك قريت راي الشرع في خدمة والدي الزوج يمكن ان تقرئي أيضا حكم الشرع في تعدد الزوجات
المهم انت ديري النية ولا تستبقي الأحداث وكما قال الأخ هم كانوا يقومون بشؤونهم قبل زواج ابنهم ولن يتغير الكثير بمجيئك خاصة وانهم اسرة قليلة العدد

[زبدة ذايبة]

قوليلهم عندك مشكل صحي.

وهوما يقرروا إذا يكملو العرس أو........

عندنا مثل جزائري يقول: معاونة النصارى ولا قعاد لخسارى.

تدخلي لدار الناس وماتقدريش حتى

طيبي لزوجك أو لحماتك بحجة الحادثة.

أو تضطرك الظروف تغسلي لحوايج بيدك.

وتقولي مانخدمش !!!!!!!!

رايحة تفتحي على نفسك باب مشاكل كبير جدا.

وحتى تتفاداي هذ الأمر صراحي زوجك بحالتك الصحية.

لأن أكره مايكره الزوج أن تكون زوجته ماشي قادرة.

مانكثرش عليك.

ربي يسهلك.

[صُبح الأندلس]

شوفي أختي الشرع شيء و العادات و الأعراف شيء وللأسف الناس يتبعون الأعراف لا الشرع يعني شرعا السكن المستقل من حق المرأة لكن من تطال به تصبح شريرة و يهودية و كل الصفات السيئة فيها و الزوجة تخدم زوجها فقط لكن لو قالت هذا لاتهموها بكل الصفات السيئة أيضا.
بما أنك ستسكنين مع أهل الزوج فأنت مطالبة باسم الأعراف أن تساعديهم في أشغال البيت قليلة أم أكثيرة و إلا ستجدين نفسك في بيت أبيك
لأن ما من عجوز ترضى أن تخدم هي كنتها يعني تطبخ لها و تغسل لها و هي راقدة هذه ليست أمك و لا تتوقعي أن تشفق عليك و لو أحضرت لها 100 شهادة طبية
الحل أن تكون كوزينتك وحدك هكذا تتفادي الإحراج

[*أم سجى*]

من الاول كي جا خطبك كنتي عارفة ظروفو مليح وقبلتي��
كان لازم عليك تشرطي شرطك من البداية مش تخلي كي يلحق شهر للعرس وتهدري؟!
على العموم عاوني عجوزتك في أمور طهي وخلي نظافة البيت على بنتها

[اميرة الطموحة]

حتا عجوزتك مش ملزم عليها تخدمك وش حابتها تطبخلك وتغسلك قشك ونتي تبقاي متكية مدمتي فالجماعة فلازم تعاوني . معليش مريضة صارحيه ونت مش ملزمة تهزي ثقالة يعني الحاجة لي متقدريلهاش مديريهاش . واصلا لايشتا مخدمتيش ذكا . يجيو لولاد ورايحا للخدمة رايحا لانو نتي لحتقومي بيهم . ربي يسهلك اختي ومبروك عليك .

[من قسنطينة]

السلام عليكم
وهل سألتي الطبيب اذا تقدري تتزوجي؟
الزواج راهو مسؤولية ومن بعد يسهلك ربي وتهزي بالكرش. هل ستستطيعين تحمل ثقل الحمل ؟
ربي يقدرك ان شالله ويشفيك من علتك ويوفقك في امورك وفي اتخاذ القرارات السليمة

[toulay]

وعليكم السلام ورحمة الله وبركاته
ههههه مرام ضحكتيني صح المهم راك علابالك درك باش دير حسابك ههههه
يا اختي كون من الاول طلبتي دارك وحدك
هي على كل تخدم ولا لا الحرب فيها فيها والله اعلم درك على حساب ناسك
بالتوفيق

[رشا بلقيس]

اخدمي لخدمات لي ميستلزموش تهزي التقل .. مثلا كي تنصبي العشا نتي نصبتي نصبتي لزوج عباد ولا خمسة كيف كيف .. اغسلي لماعن سيقي و امسحي لغبرة و فيها بركة .. حتى كون سكنتي في دار وحدك اكيد كنتي حتسيقي و تغسلي لماعن و تطيبي

اختي شيء اخر اذا ما صارحتيهمش بمرضك صارحيهم قبل العرس بش ميديرولكش مشكل مبعد و ربي يسهللك

[~أمة الله~]

عليكم السلام ورحمة الله
أولا : اعلمي زوجك بمشكلك الصحي
ثانيا: عارفة من نفسك ذلك وكان من الأوّل اشترطتِ سكن خاص
ثالثا: إذا كانوا ناس متفهمين فعادي، ماشي لازم ترفدي الدار كامل فوق راسك، عنده اخته تعاون، وأمه مازالها صغيرة أيضا تعاون، المهم التفاهم هذا ماكان، وربي يهنيكم

[salma02]

غريبة هي مشكلتك. علابالك راكي داخلة بنية ناقصة... و اذا كان دارك وحدك الامر اصعب تحسبي الزواج طبخ و اكل فقط؟ مسؤولية كبيرة... ارى ان تحسني نيتك. و تدخلي بقلب صافي و ارى بما انك مريضة فسكنك مع اهل زوجك احسن من وحدك على الاقل اذا كنتي تطبخي كاين الي يحمل و يسيق و العكس..

[Saif al-Islam]

السّلام عليكم و رحمة الله و بركاته

أعتقد أنّ حالتك حرجة جدًا ، و حتى لا نُغطّي الحقائق و نحن نعلم أنّ العشرة في زماننا أصبحت من عالم المعجزات أو أصبحت من أندر الأشياء ...

لا أعلم إن تزوّجتي بعد أم لا ، و لكن أنصحك أن تُناقشي أمر حالتك الصحيّة مع خطيبك و عائلته ، فإن لم تتوصّلو لتفاهم ما ، اعتقد أنّه من الأفضل أن تبقي في بيت أبيك و تُعالجي نفسك

المغامرة بهذا الزّواج و أنت غير قادرة على تحمّل المسؤولية بسبب ماتعانيه سيسبب لك كوارث أخرى ليست لصالحك ....لذلك فكّري ألف مرّة قبل المغامرة

الله يُشفيك و يوفقك في حياتك