أفيدوني رجاء

[مشكلتي]

بسم الله والصلاة والسلام على رسول الله
والسلام عليكم ورحمة الله وبركاته

ارجو ان تقترحوا علي عملا ما

انا مقبلة على الالتحاق بالجامعة ان شاء الله
يتيمة
وبالنسبة لإخوتي أنا وأمي نتقلب معهم على حالتين:
إما أنهم لا يملكون ما يكفي من المالخصوصا مع حرصهم مؤخرا على البناء من أجل الزواج ..الخ
وإما أنهم لا ينتبهون لينفقوا علينا -ولعل هذا الغالب-
وكل مني وأمي تأخذنا عزة نفس ولا نسألهم شيئا
مؤخرا فقط قررت أن أسألهم وليفعلوا ما يفعلوا
أنا لا أملك ما أشتري به حتى الأساسيات التي لا غنى عنها
خصوصا أني وبسبب عزة النفس هذه دفعت الثمن غاليا عام البكالوريا الفارط
لم أكن أسألهم شيئا شفقة بهم حتى صرت أضحوكة مع غيري بسبب ملابسي
ولدرجة أن انال شفقة الناس وعطفهم

ليس لدي حرفة معينة وكما اني نوعا ما أخاف الخوض في أي عمل خشية الفشل
وأريد عملا لا يخل بدراستي

[سيرين راجي]

شوفي خدمة بسيطة مثلا عند طبيب او محل بيع في هذي العطلة قدما توفري مصروفك وكي تولي فالجامعة شوفي خدمة قريبة ليك اذا كنت رايحة تديري اقامة
على كل حال الخدمة على حساب البلاد الي راكي ساكنة فيها اذا كانة ولاية كبيرة تلفاي بسهولة واذا كانة بلدية صغيرة صعيبة شوية
ربي يسهلك

[*** عبق الزهور ***]

مثل ما قالت الاخت قبلي او ادخلي اتعلمي خياطة تحكمي بيها يدك
حتى انا انوي هذا الصيف ان شاء الله تعلم الخياطة صدقيني معضم الملابس لي رانا نشوفو فيها تقدري تخيطيها وحدك خاصة اذا كنت دايرة حجاب اشري كتان وخيطي وحدك وانت فاريتها منها حرفة في يدك ومنها نقصان مصروف في عوض تشري حجاب ب 400 الف تشري كتان 150 والا 200 وخيطي واش يوالمك

[بـــيِسَة]

اختي كاين بزاف اعمال بسيطة ولكن انت تدرسي شوي الوضع صعب
اخدمي الحلويات و بيعيهم او خيطي ...... و ربي معاك

[nihal159]

مادامك تدرسي فالجامعة فالأفظل ليك أنّك تتعلمي حرفة كصناعة الحلويات أو الخياطة أو عمل البحوث للتلاميذ و طباعة المذكرات؛ هذو هوما الخدمات لي يليقو بيك باش تقدري توفقي بين قرايتك و العمل نتاعك يكون في بيتك و في أوقات الفراغ مش في أوقات الدراسة؛ لأنو العمل كبائعة أو سكرتيرة مايليقش بيك لأنو أكيد يتعارض مع أوقات الدراسة الجامعية نتاعك و سوق العمل مايرحمش؛ إذا شاف رب العمل منّك أي تقصير رايح يوقفك عن العمل؛وترجعي لنقطة الصفر؛ بلا مانحكيو على التعب تاع الخدمة و الدراسة يعني نهار كامل و أنتي برا؛ لذلك أفظل حلّ هو تعلّم حرفة و العمل فالبيت.

[nilly]

دارو تكوين عامين مايعرفوش يخيطو ماشي اي واحدة خيطت ابسط موديل لروبا نتاع دار تحسب روحها خياطة مكنش اصلا ليجي ليك ناس راهي تحوس على خياطين كبار وادا جاوليك غادي يجوليك برك لغادي نقصو سراويل والا دا حاجة مقطعة تخيطها برك لدلك غير اخطيك . وهادو ليقلولك خياطة سهلة جيبي كتان وخيطي ويقولك روحي تلعيم في صيف خياطة ههههههههههه قاريين عامين مايعرفوش وانتي شهر ولا 3 اشهر تولي خياطة هههههه هادو اكيد مخهم ضارب مساكن وزيد يقلولك كل ليتباع برا تقدري تخيطيه شوف اسيدي خياطين كبار ميقدروش يخيطوا لاملابس الجاهرة للتباع كاين شي ناس مختلين عقليا هادي نصيحتي والحلويات ثاني لازملك خبرة كبيرة فيها شكون ليمدلك يرحم باباك معرفتش وين راهم عايشين هدو لينصحوك ....
قولي ليماك تدير المطلوع وتبيعه ولا جيبي كونترا وتفاهمي معاهم ماتروحيش هدا ليناسبك

بصح كيفاش امك ماتخلصش تقاعد نتاع راجلها كل الارامل عندهم تقاعد نتاع راجلهم ؟؟؟؟؟؟؟؟؟؟؟؟؟؟؟؟؟؟؟؟

[نبض قلبي]

ربي يكون معاك
رايي كن راي الاخوات اللي قاتو شوفي خدمة تكون خفيفة ماتضركش
و لاقادة تقري باراميديكال راها عامين برك تخرجي بمنصب مضمون
و في نفس الوقت اخدمي دزي روحك حتى تكملي ولي اخدمي في الباراميديكال و كملي التخصص اللي اخترتيه في الجامعة
ربي يفرج عليك

[TOFNINE]

هدا لي راهم يقولو الفتاة لازم تلتزم البيت وتنتظر الزواج
باباها مات وخوتها الرجال يخمو في مستقبلهم
وهي تجاهد باه تعيش وتعيش امها
روحب بنتي قراي وقراي مليح حسب الجمرة لي راكي فيها وخدمي الخدمة في هدا الوقت مع هدا الرجال هي تاج الراس وليس الزوج
ربي يسهلك شري سيشوار وخدمي مع بنات الجامعة كوافيرا دخلي مصروف بسيط ربي يرزقك حلال
ونصيحتي الدهبية اياك واياك من الشباب وتحقيق الاحلام هدفك نبيل جدا فواصلي طريقك دون ان تلتفتي الى طرق قد تؤدي بك الى التهلكة فانت ابنة وابن وزوج واخو وكل امل امك ان شاء الله

[عثمان الجزائري.]

إن شاء الله يرزقك ربي بزوج صالح يعوضك حنان الأب و يوفرلك اللازم، أعلم ان الأمر صعب عليك كما هو صعب على أخويك فهم يكدون و يجتهدون من أجل عائلتين الأمر ليس بالهين، الصبر عليهم هي مسألة وقت، الناس بأموالها و لقات صعوبة في تحضير أمور الزواج فما بالك بمن حاله بسيط....

[تَـجــارِبْ ♪ ɷ]

بسم الله والصلاة والسلام على رسول الله

السلام عليكم ورحمة الله وبركاته


------------------------------------
" وقلت استغفروا ربكم إنه كان غفارا
يرسل السماء عليكم مدرارا
ويمددكم بأموال وبنين
ويجعل لكم جنات ويجعل لكم أنهارا "

[dali rami]

السلام عليكم أختي الكريمة

أثمن ما اقترحه عليك الإخوة والأخوات قبلي جزاهم الله خيرا

أنا أقترح عليك العمل عبر النت عبر مواقع الخدمات المصغرة مثل : موقع خمسات ، تستطعين العمل عن بعد في أعمال بسيطة ككتابة مقالات أو كتابة على برنامج وورد أو ترجمة أو غيرها من الأعمال البسيطة وتتقاضين نظير ذلك مبالغ تكفيك عن مد يدك نحو الآخرين

شخصيا لي خبرة بالمجال ولله الحمد ، وإذا أردت المساعدة في ذلك فلا مشكل عندي

أسأل الله أن يفرج عليك وأن يرزقك من واسع فضله